“Wokabaut bilong Lainim,” Ol Histori bilong Olgeta Hap bilong Wol: Papua New Guinea (2022)
“Wokabaut bilong Lainim,” Ol Histori bilong Olgeta Hap bilong Wol: Papua New Guinea
Wokabaut bilong Lainim
Long avinun bilong Septemba 19, 1994, 16-yia-ol Ivy Bruder i bin stap long haus wantaim mama bilong em na ol brata susa bilong em long Rabaul, East New Britain Provins, Papua New Guinea; papa bilong em i bin stap long prishud miting. Ol i bin wok long lukim televisen taim hariap tru ol i luksave olsem ausait, olgeta nois bilong ol pisin, ol binatang, na ol dok i pinis olgeta.
“Olgeta samting i go stap isi tasol,” em i tingim. “Na bihain dispela guria i stat, na taim em i stat, em i no stop.” Ivy na tupela brata, tupela sista, na mama i ranawe lusim haus. Ol trak long rot i kisim ol i go long Vudal Tisas Kolis long sait bilong maunten. Long hap, ol na planti handred lain narapela manmeri i lukim pairap bilong tupela maunten paia, Vulcan na Tavurvur.
Ol i hait paspas aninit long wanpela karamap na lukluk long simuk bilong maunten paia i gat poisin i ron i kam olsem long hap ol i stap, mama bilong Ivy, Claire Charlie, i tok, “Ol pikinini, Papa long Heven i save harim ol prea.” Ol i bung wantaim na Claire i pre. “Taim em i tok, ‘Amen,’ dispela bikpela na strongpela win i kam na karim dispela klaut i gat poison i go,” Ivy i tingim.
Dispela win i karim wanpela bikpela win na ren i kam. Graun malmalum na ol ston bilong maunten paia i kam daun wantaim ren, na laitning i ret olgeta. Bihain, papa bilong Ivy, Michael Bruder, i kamap long ol, em i bringim tu ol bubu bilong ol. Famili i bin seif, tasol taun i bagarap olgeta. Hai skul i stap aninit long pipia bilong maunten paia,na ol lain i stil long haus bilong ol. Papa bilong Ivy, Michael i stap bek wantaim bikpela pikinini man bilong em, George, long halivim ol famili memba i kirapim bek ol haus. Claire, husat i bin wok olsem tella long Papua New Guinea Benking Koporesen i kisim wok long Port Moresby, nesinel kepitol.
Ivy, husat i bin klostu pinisim gred 10 taim volkenu pairap, stat long wok olsem wanpela hedresa aprentis na stap long dispela wok tripela yias long halivim sapotim mama bilong em na ol yangpela brata susa bilong em long Port Moresby. Planti ol klasmet bilong Ivy long Rabaul i stop long go long skul. Tasol Ivy em i narakain. Claire i save laikim tumas long rit, raitim poetri, musik na atis na dispela ol pikinini tu i kisim.
Long yia 1997, Mosese Naeata nupela presiden bilong Port Moresby Misin, tokim Ivy na ol yangpela sista bilong em, Marissa na Marianna long Liahona Hai Skul, wanpela skul Sios i ronim long ples bilong em Tonga. Ol tripela sista i bin stap long nambawan grup bilong ol sumatin bilong Papua New Guinea long i go long Liahona. Em i bin 19 yias pinis taim em i statim gred 11, Ivy bin greduet long Liahona.
Marianna, Ivy, na Marissa Bruder wantaim Irene Leggett long BYU–Hawaii, ca. 2003.
Photo Monique Saenz (BYU–Hawaii) i kisim
Bihain long sevim misin long New Zealand (Wellington), Ivy atendim Brigham Young University–Hawaii, wantaim Marissa na Marianna. Em i maritim James Stiefvater long 2003 na greduet long 2006 wantaim digri long infomesen sistems. Nau em i lukautim ol pikinini bilong em yet, Ivy tok olsem wanpela Seint bilong Las-de i bin halivim famili bilong em long Papua New Guinea: “Sios i bringim kainkain pipol kam insait long laip bilong yu, na ol stap wantaim yu long dispela wokabaut. Ol bilong mi istap wantaim mi oltaim oltaim.”