Sauniatu

I le aso 27 Setema 1904, na tautevateva atu ai Elisala Fanene i timuga ma le mafiafia o le togavao, faatasi ai ma ta’ita’i misiona i se savaliga i le motu o Upolu. O lo latou faamoemoega ia maua se nofoaga e mafai ona potopoto ai le Au Paia Samoa ma faatuina so latou nuu, e pei ona faia e le Au Paia anamua i nofoaga e pei o Katelani, Navu, Iuta po o le Au Paia i Hawaii i Lanai ma Laie. O Elisala, o se filifiliga faigofie mo le malaga: o se faifeautala’i faatuatua talu mai le 1897, na faaaloalogia o ia e le Au Paia i le lotoifale ma sa masani ona malaga ma la’asia le auala i le va o Siumu, i le mea sa pulefaamalumalu ai i se paranesi ma le nofoaga o le laumua o le misiona i Pesega.

Ina ua tau atu le savaliga i se vaitafe, na fafa ai e Elisala isi tamaloloa i lona papatua i le isi itu o le vai. O ina na latou maua ai le laueleele na latou sailia, o se laufanua timuga e siomia i se augutu o se maugamu anamua. Ia Oketopa, na avea Elisala ma lona aiga o le to’atolu mai le to’avalu o tagata na muamua nofoia lea ogaele’ele.

O le aso na latou faamama muamua ai le eleele mo se nuu, na manatua ai e Elisala le susu o lea nofoaga ma sa le mafai ai ona tutu se afi e faavela ai se meaai, o lea sa latou galulue ai i le aso atoa e aunoa ma le aai. Toatele le Aupa’ia na faatasi atu ma i latou mulimuliane. O Opapo, o le isi misionare ua lava le agava’a, na omai ma lona faletua o To’ai ma le la fanau e toatolu. Ia Ianuari, ina ua faapaiaina le ele’ele e avea ma “ele’ele filifilia ma o se nofoaga ua fetaui tonu mo le au paia e potopoto ai ma avea ai i latou o tagata filifilia a le Atua,” O Opapo ma Elisala o nisi ia o failauga, na latou faamalosiau atu i le aulotu e tusa ma le 30 tagata ina ia “tutu faatasi o le au paia ma aua le faavaivai i le galuega a le Atua.” Ona filifilia lea e le aupa’ia o se igoa o le nuu o “Sauniatu” o se faamanatu e sauni mo le galuega a le Atua

A’o latou galulue e faatu se nuu fou e aunoa ma se pi’itaga faaleaganuu o taitai o nuu po’o ni so’otaga o tua’a i le laueleele, na ola le Au Paia i le faatuatua. E le’i umi lava ona mae’a le falesa muamua i le nofoaga lea, ae faapopoleina loa ona o se afi mai fale tuaoi. A o la’u mai e isi vai mai le vaitafe, o Opapo, na lagonaina le faanatinati o le tulaga ua iai, na a’e ai i luga o le falesa ma si’i lona lima taumatau ma tatalo. “Tama e, e mafai ona matou faasaoina le tama’i fale, ae le mafai ona matou faasaoina le fale tele.” Ona ia faaaogaina lea o le peresitua e faatonu ai le matagi ina ia suia. Na faasaoina le falesa.

Sa latou faaaogaina fo’i le faatuatua i taimi o faama’i. I se tasi po, na faailoa atu ai se avefeau ia Elisala i se miti ma se faatonuga patino i le auala e tausi ai lona atalii ma’i o Ailama. E pei ona faatonuina, na alu Elisala i le la’au o le wili-wili e tusa ma le maila le mamao, aumai le pa’u la’au ma tu’i ia sau i fafo le sua. O Ailama, o le na manatuaina lona vaaia o agelu i le po lea i tafatatafa o lona fale, na ia inuina le sua lea ma vave malosi ai.

E pei o isi nuu i le Pasefika, O Sauniatu na pagatia i le faama’i oti o le fulu o le 1918. Toeititi lava a mama’i uma tagata o le nuu O le atali’i 12 tausaga le matua a Elisala, o Toma, se tasi o ni tagata to’aitiiti na malosi e fealua’i solo, na ia faia uma mea e mafai ona ia faia e tausi ai tagata o le nuu. “O taeao uma lava ou te alu ai mai lea fale i lea fale e fafaga ma faamama tagata ma sailia po o ai ua maliliu,” o le tala lea a Toma. Na ia faasaoina le to’atele ma fesoasoani e tanuina le sili atu ma le 20 isi tagata, e aofia ai ma lona tama, ae le’i faaitiitia le faama’i.

I le 1930, na faaitiitia le taua o Sauniatu e avea ma se nofoaga e potopoto ai, ae na tumau lona taua e avea ma se nofoaga mo a’oa’oga faaleagaga ma faale-olaga nei. Na avea ma ma’a faamanatu o le faatuatua o uluai Au Paia i Samoa.