“Ia Iai Lou Filemu i le Mea Nei”

I Sauniatu, se nofoaga i le popofou na potopoto ai i Samoa, e lua ma’a faamanatu e faailoga ai feso’otaiga faapitoa ma Tavita O. MaKei. Na ulua’i asiasi atu MaKei i Sauniatu ia Me 1921, a’o avea o ia ma Aposetolo. I le mae’a ai o le latou feiloaiga ma ia, o latou faamavaega na liua i loimata maligi. A o tietie atu MaKei i lana solofanua i lalo o laina laau, ma ia iloa ai le mulimulita’i atu o le Au Paia ia te ia ma ia maua ai se uunaiga ina ia toe foi atu ma tuuina atu se faamanuiaga faaaposetolo. “Tama Paia e’” na tatalo ai o ia, “silasila mai ma le alofa ma le alofa mutimutivale agamalu i luga o nei tagata lelei. Ia puipuia i latou i lo latou nuu mai aafiaga leaga uma. … Ma ia iai Lou filemu i lenei nuu o Sauniatu. … Ia iai le lotogatasi e fusia ai o latou loto ma aiga.” O lenei faamanuiaga na o’otia ai loto o le Au Paia ma latou tusitusia i lalo ma latou faia ai se maa faamanatu i le tulaga tonu lea. O se nofoaga na faapaiaina e le osigataulaga a ona paionia ma o lea ua faamanuiaina faaaposetolo, ua avea ai nei Sauniatu o se nofoaga taua i le Au Paia i Samoa.

O Elder Tavita O. MaKei faatasi ma tina o le Aualofa a Sauniatu, 1921.

I le 1955 na toe asiasi atu ai MaKei i Sauniatu o se Peresitene o le Ekalesia. I le mae’a ai o lea asiasiga, na fausia ai e le Au Paia se fale Samoa talimalo fale e fai ma faamanatu ia MaKei. I lea fale mamalu, na latou faasoa ai a latou molimau ma fola ai ni ma’a lamolemole i luga o le fola e fai ma sui o molimau ta’itasi. O nisi Au Paia sa tutu i luga o nei “molimau” a’o latou faasoa atu a latou lava molimau.

“Ina ua faamanuiaina e Peresitene MaKei lenai nofoaga, na iai le ese’esega,” o le tala lena a Mavaega Peresitene, o se tasi sa faiaoga i Sauniatu. “E ese a Sauniatu mai isi nofoaga uma, e o’o lava i lo’u nuu na ou fanau mai ai… O le isi itu lea o le lagi.”