O Se Galuega Tele.

I le tausaga e 1943 na faaipoipo atu ai Pisa Toleafoa Tautogia ia Tusitala Tufuga. I le taimi o le la faaipoipoga sa auai Tusitala i le Lotu Taiti, le ekalesia na faavaeina e le Sosaiete a Misionare mai Lonetona, ua le usitai i lona tama, ae a o talavou Tusitala sa avea o ia ma se Au Paia o Aso e Gata Ai. I le tausaga e 1945 na tauanau ai e Tusitala lona tama mo se faatagaga ina ia toe foi ai i lana lotu moni ma amata ai ona toe auai i le Ekalesia a Iesu Keriso o le Au Paia o Aso e Gata Ai. Na tete’e le tina o Pisa i le ekalesia a Tusitala ma ia uunaia ai Pisa e faaipoipo atu i se isi tagata pe a faapea e tumau pea le mana’o o Tusitala e tumau i lana lotu. E ui lava i lena vevesi, na tumau pea le faaipoipo atu o Pisa ia Tusitala ma iu ai ina auai faatasi i le Ekalesia i le tausaga e 1948.

I le 1953 na nonofo ai Pisa ma Tusitala i Saleimoa i le motu o Upolu ma o lo’o faatalitali le la tama lona lima ae valaauina loa Tusitala i se misiona faigaluega mo le 2 tausaga. Na filifili le aiga e tatau ona talia e Tusitala le valaauga. A’o tuuina atu e Tusitala lona taimi e auauna ai i le Alii, na tauaveina ai e Pisa le matafaioi o le tausiaina lea o le la fanau, saunia mea e manaomia mo le aiga, ma lafoina atu tupe e fesoasoani ai i le misiona a Tusitala. Sa tausia e Pisa le faatoaga koko, fa’i, talo ma isi fua o faatoaga e maua ai tupe e faatumau ai tamaiti matutua i le aoga. Ina ua mana’omia e le maumaga laititi aemaise lava se galuega malosi, na te valaaulia alii mai lona aiga lautele e fesoasoani ae totogi i latou i ’aiga o le taeao ma le aoauli.

Ia Fepuari 1954, na fanauina ai e Pisa se pepe teine ma faaigoa ia Misionasamoa, le igoa o le misiona a Tusitala. Ina ua sefulu masina le matua o Misionasamoa, sa le tele se fuata koko e maua ai se tupe mo mea e mana’omia e faauau ai le tausiga o le aiga. Sa saili e Pisa nisi auala e maua ai se fesoasoani i mea mana’omia, o lea na ia taliaina ai se galuega velevao i se faatoaga pisinisi. E alapo lava o ia i le taeao e fai meaai a tamaiti ona tuu lea o Misionasamoa e nonofo ma lana masaga teine e ta’i fitu tausaga, ae o tamaiti matutua i le aoga.

O le tama teine a Pisa ma Tusitala o Tu’ifao, na ia toe faamatala mulimuliane le faasologa o gaoioiga a lona tina i na tausaga na faata’atia mo le aiga. “Sa ia tauaveina uma nei mea i le faatuatua e faamuamua le taua o agaga ma le mea sili ona taua o le lagolagoina lea o le galuega faafaifeautala’i,” sa faapea mai ai Tu’ifao. O ana faata’ita’iga na faata’atia ai se faavae mo ni auaunaga mo le olaga atoa: Na mulimuliane aumaia e Pisa ma Tusitala ni agaga se 90 i le Ekalesia a’o auauna atu i la’ua i totonu o le Paranesi. I le 1970, na mafai ai ona malaga atu i la’ua i le Malumalu i Laie Hawaii ina ia faamauina i la’ua, ma faatasia e lo la faatuatua mo le faavavau.