“Ko ha Temipale ʻi he Ngaahi ʻOtu Motú Ni”

Ne ʻaʻahi mai e Palesiteni ʻo e Siasí, Tēvita O. Makei, ʻi he 1955 ki Tonga ko ʻene folau ki Nuʻu Sila ki hono tāpuakiʻi e kelekele ʻo e Temipale Hamilton New Zealand. Naʻe pehē ʻe Makei ʻi ha fakataha ʻi Vavaʻu, “Ne u maʻu ha vīsone ʻanepō ʻo u mamata ki ha temipale ʻi he ngaahi ʻotu motú ni.”

Ne mafola atu e kikite ʻa Makeí ki hono kotoa ʻo e ngaahi ʻotu motú ʻo ueʻi ai e kāingalotú ki ha holi ki ha ngaahi fuakava fakatemipale. ‘I he taimi naʻe fakatapui ai e Temipale Hamilton New Zealand ʻi he 1958, naʻe fakaʻamu ha kāingalotu tokolahi ʻi Tonga ke nau ʻalu ki ai, ka naʻe fuʻu mamafa fakapaʻanga ke fai ʻa e fononga he maile nai ʻe 1,300.

ʻI Tīsema ʻo e 1958, ne hokosia ai e faingamālie ke fononga ʻa Vili mo Luʻisa Kongaika ki he temipalé. Koeʻuhi ko e ʻikai ke na lava ʻo totongi ʻena fānaú ke nau ʻalu fakatahá, ko ia ai naʻá na loto ke tatali pē kae ʻoua leva ke toki lava e fāmilí ʻo ō fakataha. Ne pehē ʻe Vili, “ʻI he taimi te tau ō aí, kuo pau ke tau ō kotoa.”

Naʻe pehē ʻe Luʻisa, “Naʻá ma tuʻuaki fakatau atu ʻema meʻa kotoa pē. Ne tuʻuaki fakatau atu homa fale papá, peitó, mo e meʻa kotoa ʻi aí.” ʻI he ʻikai ke na lava ʻo fakatau kotoa hona ʻapí, naʻá na kamata fakatau atu e ʻató, sitoú, mo e ngaahi naunau fale kehé. Hili hono fakatau atu ʻena meʻa kotoa pē, kau ai e pasikala ʻa Vilí mo e mīsini tuitui ʻa Luʻisá, naʻá na maʻu leva ha paʻanga feʻunga ke folau fakataha atu e fāmilí.

Naʻe manatua ia ʻe Luʻisa ʻo ne pehē, “Naʻe fakaʻofoʻofa e meʻa ne aʻusia ʻe homau fāmilí ʻi he temipalé, ka naʻa mau fuʻu fakaʻofa moʻoni ʻi heʻemau foki ki Haʻapaí.” Na‘e mohe pē e fāmilí mo honau kāingá mo e kaungāmeʻá kae ʻoua kuo lava ʻo langa ha kiʻi fale Tonga.

Hili ha taʻu ʻe ua naʻe tō mai ha fuʻu afā lahi ki he ʻotu motú, ʻo ne fakaʻauha e tukui ʻapí mo Haʻapai. Naʻe toki pehē ʻe Vili kimui ko ʻena loto ko ia ke fakatau ʻena meʻa kotoa pē “ko hano ueʻi ia au ʻe he ʻEikí ke fakatau atu ʻeku koloá koeʻuhi ko ha ngāue toputapu, koeʻuhí he te ne toʻo ia meiate au ʻi he afaá. Ne u foki mai mei he temipalé ko ha tangata masiva he koloa fakaemāmaní. Ka ʻi he ʻosi ʻa e afaá, kuo masiva tatau pē e taha kotoa ʻo hangē pē ko kimautolú. Ko homau kehekehé pē he naʻe ʻosi silaʻi kimautolu ia ko ha fāmili taʻengata ʻi he Temipale Māʻoniʻoni ʻo e ʻOtuá.”

Na‘e fakakakato e kikite ‘a Palesiteni Makeí ʻi he 1983, ‘i he taimi naʻe fakatapui ai e Temipale Nukuʻalofa Tongá.