Muimui ki he Faleʻi ʻa e Kau Takí

Kuo fale‘i e Kāingalotu ʻi Tongá ke nau ako, pea kapau ʻe maʻu ha faingamālie, ke nau ō ki muli ʻo maʻu ha ako ʻoku māʻolunga angé, pea toki foki leva ʻo tokoni ki hono langa hake ʻo e Siasí ʻi Tongá. Ko Sione Tuʻalau Lātū e sīpinga fisifisimuʻa ʻo ha taha naʻe muimui ki he faleʻi ko iá pea tāpuekina ia ʻi heʻene ngāue tokoní.

Naʻe fāʻeleʻi ʻa Lātū ʻi he kiʻi motu ko Haʻafeva, pea poupouʻi ia ʻe hono fāmilí ke hū ki he Kolisi Liahoná ʻi he 1952 neongo naʻe teʻeki ke hoko ko ha mēmipa ʻo e Siasí. Naʻe papitaiso ia ʻi he 1956.

Naʻe fakaʻamu ʻa Lātū ke maʻu ha ako lahi ange. Naʻe ʻaukai ʻa Lātū he uike ʻe taha mo kumi ha feituʻu lōngonoa ʻi ha ngoue talo ʻo lotu ai ke ne lava ʻi ha sivi faingataʻa kae hoko atu ʻene akó pea hoko atu e akó ki muli. Na‘á ne fakakaukau kapau naʻe tali e lotu ʻa e talavou ko Siosefa Sāmitá, pea ʻoku totonu ke pehē foki mo ia. Naʻe pehē ʻe Lātū kimui, “Naʻe hangē ne fuoloa ʻeku lotú. Ne u ongoʻi ofi ʻaupito ki heʻeku Tamai Hēvaní. ʻI he taimi ne u tuʻu hake aí, ne viviku hoku soté ʻi hoku loʻimatá.”

ʻI ha efiafi kimui mei ai, ne haʻu e sekelitali ʻa e puleakó ʻo kumi ia lolotonga e maʻu meʻatokoni efiafi ʻi he falekaí ʻo talaange ʻoku fie maʻu ʻe he puleakó ke sio kiate ia ʻi he pongipongi hono hokó. Naʻe ʻikai ke mamohe ʻa Lātū ʻi he pō ko iá heʻene fakakaukau pe ko e hā ha meʻa hala kuó ne fai. ʻI he fakataha ko ʻení, naʻe ʻoange ʻe he puleakó kiate ia ha tohi ʻo fakahā ange kuo foaki kiate ia e fuofua sikolasipi taʻu ʻe fā ʻi he Kolisi ʻa e Siasí ʻi Hauaiʻí (ʻiloa he taimí ni ko BYU–Hauaiʻi). Naʻe toki pehē ʻe Lātū kimui, “ʻOku ou ʻiloʻi ne hoko mai e ngaahi meʻá ni kiate au ko ha tali ia ki heʻeku lotú. Naʻá ku tūʻulutui ʻo fakamālō ki he ʻEikí mo palōmesi kiate Ia te u toe foki mai ʻo tokoni ki hoku fāmilí mo hoku fonuá.”

Naʻe ngāue mālohi ʻa Lātu ʻi Hauaiʻi ʻo ʻosi mei he akó pea fetaulaki ai mo hono uaifi ko Hēlení. Pea hangē pē ko ʻene palōmesi ki he ʻEikí, naʻe foki mai ʻa Lātū mo Hēleni ki Tonga ʻo hoko ai ʻa Lātū ko ha faiako ʻi he ʻApiako Māʻolunga ko Liahoná. Hili ha taʻu ʻe ua mei ai naʻe ui ia ke ne tokangaʻi e ngaahi ngāue liliu lea ʻa e Siasí ʻi Tongá. Ne hoko mai leva mo ha ngaahi faingamālie ke ne hoko ko ha palesiteni fakasiteiki, palesiteni fakamisiona, mo ha fakafofonga fakavahelahi maʻa Tonga. Naʻá ne toe hoko foki ko ha taha ʻo e kau taaimuʻa he meʻa fakapisinisí pea longomoʻui he ngaahi meʻa fakapuleʻangá.

ʻI heʻene muimui ki he faleʻi ʻa e kau taki ʻo e Siasí, kuo fakatou tāpuekina lahi fakalaumālie mo fakatuʻasino ai ʻa Lātū. Kuo tokolahi mo ha niʻihi kuo muimui heʻene sīpingá pea kuo faitāpuekina pehē mo kinautolu ʻi heʻenau tokoni ki hono langa hake ʻa e Siasí ʻi Tongá.