“Ne Mau Maʻu ha Ngaahi Tāpuaki”

Naʻe loto-mamahi ʻa ʻĀnau ʻi heʻene ʻiloʻi kuo kamata ke totongi vahehongofulu ‘a hono uaifi ko Hinakuiá. Naʻe pehē ʻe ʻĀnau, “Naʻe ʻikai ke lahi ʻeku sēniti mei he faiakó.” Neongo naʻe papitaiso ʻa ʻĀnau ʻi heʻene kei talavoú, ka naʻe vave ʻene māmālohí pea ʻikai ke toe loto ia ke foki ki he siasí. Naʻe ʻikai pē ke liliu e ongo ia ko iá ʻi he taimi ne mali ai mo Hinakuiá, ko ha mēmipa ʻe taha ʻo e Siasí. Naʻe loto ʻa Hinakuia ke talangofua ki he ngaahi fekau ʻa e ʻEikí, mo feinga ke fakalotoʻi ʻa ʻĀnau ʻoku totonu ke na totongi vahehongofulu. Na‘á ne fakaafeʻi ʻena faiako fakaʻapí ke akoʻi e tefitoʻi moʻoni ko iá, ka naʻe ʻikai pē ke tui ʻa ʻĀnau ia ki ai. Naʻá ne pehē, “Ne taʻu lahi ʻema fakafekiki ʻi he meʻá ni.”

Naʻe falala ʻa Hinakuia ʻe tāpuekina kinaua ʻe he ʻEikí pea loto ke fakatukupaaʻi ʻa ʻĀnau ke na totongi vahehongofulu, ke sio pē pe ko e hā e meʻa ʻe hokó. Naʻe manatu ki ai ʻa ʻĀnau ʻo pehē, “Ko ha fili faingataʻa ia kiate au. Ka naʻá ku loto ke ma nofo melino, peá u talaange ʻoku sai.” ‘I he taimi naʻá na kamataʻi ai e meʻá ni, naʻe mahino ʻa e toe siʻi e paʻanga naʻá na maʻú hili hono totongi e vahehongofulú mo e ngaahi moʻuá. Naʻe pehē ʻe ʻĀnau, “Ka naʻá ma maʻu ha ngaahi tāpuaki.” Ko e niʻihi ʻo e ngaahi tāpuaki ko iá ko e paʻanga. Hili ha ngaahi taimi, naʻá na maʻu ha tokoni taʻeʻamanekina mei he kāinga mei mulí, pea kimui ai ne maʻu ʻe ʻĀnau haʻane ngāue fakafaiako ʻi he ʻApiako Māʻolunga ko Liahoná. Naʻe pehē ʻe ʻĀnau, “Talu mei he taimi ne u tali ai e tefitoʻi moʻoni ko iá, mo hono tāpuakiʻi ʻe he ʻEikí hoku fāmilí.”

Kuo ope atu e ngaahi tāpuaki ia ko iá ʻi he paʻangá: ne ongoʻi ʻe he fāmili Halá ha liliu ki he tūkunga ʻo ʻena moʻui fakalūkufuá. Ne foki ʻa ʻAnau ki he lotú, pea fakafiefia ange ʻa e moʻui ʻi ʻapí, pea naʻá na maʻu ha loto-toʻa ke fakatokolahi hona fāmilí ʻo fakafou ʻi he ohi fānaú, koeʻuhi ko e loto-falala ne na maʻu mei hono tauhi e fono ʻo e vahehongofulú. ‘I he 2005 ne nau sila ai ko ha fāmili ʻi he Temipale Nukuʻalofa Tongá.