Vahe 9
ʻAho Fakaʻofoʻofa Ko ʻEní
ʻI he konga kimui ʻo e 1965, naʻe tali ʻe ʻĒliu ta Losa Kamākou ʻa e telefoní ʻi hono ʻōfisi ʻi Sao Paulo, Palāsilá. Ko Ueini Peki, ko e palesiteni ʻo e Misiona Palāsilá, naʻe telefoni maí. Naʻá ne fie ʻilo pe ʻe lava ʻa ʻĒliu ʻo tuku vave mei he ngāué pea haʻu ki hono ʻōfisí. Naʻe ʻaʻahi mai ʻa Vikitā L. Palauni, ko ha tokoni ʻi he Kau Pīsopeliki Pule ʻo e Siasí, ki Sao Paulo, pea naʻá ne fiemaʻu ke talanoa mo ʻĒliu kimuʻa peá ne foki ki ʻIutaá.
Naʻe ʻalu leva ʻa ʻĒliu, ʻa ia naʻá ne lolotonga ngāue ʻi ha kautaha meʻalele, ki he ʻōfisi ʻo e misioná. Naʻá ne toki talanoa mo Palesiteni Peki mo Pīsope Palauni ki ha ngaahi meʻa kehekehe fekauʻaki mo e misioná, kau ki ai mo e tuʻunga ʻo e paaki ʻo e ʻū naunau ʻa e Siasí ʻi Palāsilá, pea naʻe fakakaukau ʻa ʻĒliu naʻe fiemaʻu ʻe he pīsopé ke hoko atu ʻa e talanoá.
ʻI he aʻu atu ʻa ʻĒliu ki he ʻōfisi ʻo e misioná, naʻe fakahoko ange ʻe Pīsope Palauni ʻe hoko ha liliu lahi ʻi he Siasí ʻi Palāsila. Kuo laka hake ʻa e tokolahi ʻo e Kāingalotú ʻi he toko uamano toluafé ʻi he fonuá, kuo liunga hongofulu hono tokolahí mei he taimi naʻe papitaiso ai ʻa ʻĒliu ʻi he taʻu ʻe valu kuohilí. Ke lava ʻo fakahoko ʻa e tupulaki ko ʻení, naʻe fiemaʻu ʻe he Kau Palesitenisī ʻUluakí ke fokotuʻu ha ʻōfisi ʻētita fakalotofonua ke tokangaʻi ʻa e ngaahi pulusi ʻa e Siasí ʻi Palāsilá.
Naʻe toki fakaava foki ʻe he Siasí ha ʻōfisi peheni ʻi Mekisikou Siti ke tokangaʻi ʻa e ngaahi pulusi ʻa e Siasí ki he ngaahi fonua lea faka-Sipeiní. Koeʻuhí ko hono faʻu ʻe he Siasí ha ʻū tohi tuʻutuʻuni mo e tohi lēsoni foʻou fakafekauʻakí, ʻoku totonu ai ke fai ʻa e ngāue ko ʻení ʻo fakafou ʻi he ngaahi ʻōfisi fakalotofonuá kae ʻikai fakatetuʻa ki he ngaahi misioná ke nau fai ʻa e ngāue lahi ki he pulusí ʻiate kinautolu pē. ʻE liliu lea ʻe he senitā foʻou ʻi Palāsilá ʻa e ngaahi pulusi kotoa pē ʻa e Siasí ki he lea faka-Potukalí pea paaki mo tufaki leva ia ki he Kāingalotú.
Naʻe talaange ʻe Pīsope Palauni kia ʻĒliu, “ʻOku ou fie fakaafeʻi koe ke ke tokangaʻi ʻa e ngāué, peá ke hoko ai ko e tokotaha ngāue tuʻumaʻu ʻa e Siasí.”
Naʻe tali ange ʻe ʻĒliu, “ʻOku taha pē ʻa e talí, ko e ʻio.”
Hili ha kiʻi taimi mei heʻene tali ʻa e lakanga foʻoú, naʻe fakatau atu ʻe ʻĒliu mo Naia ʻena kaá kae lava ke na ʻaʻahi ki he ʻIunaiteti Siteití ke hū ʻi he Temipale Sōlekí. Lolotonga ʻa e māhina naʻá na ʻi ʻIutā aí, naʻá na faʻa fakataha mo e Kāingalotú, ʻo na ofoofo ʻi honau tokolahí mo e mālohi honau ngaahi uōtí mo e ngaahi siteikí. Mei he meʻa naʻe lava ʻo tala ʻe ʻĒliú, naʻe fonu ʻa e Fineʻofá, Palaimelí, Lautohi Faka-Sāpaté mo e ngaahi kalasi kōlomu ʻo e lakanga fakataulaʻeikí ʻi he kāingalotu ʻo e Siasí naʻe mālohi ʻenau tuí. Naʻá ne ʻiloʻi naʻe kei tupulaki ʻa e Siasí ʻi Palāsila, pea ʻe fiemaʻu ha taimi kae toki lele lelei hangē ko ia ʻoku hoko ʻi ʻIutaá. Ka naʻá ne tui naʻe meimei mateuteu ʻa e Kāingalotu Palāsilá ke hoko ko ha siteiki.
Naʻá ne fakakaukau, “ʻI he tuʻunga fakatakimuʻa ʻoku mau lolotonga maʻú, ʻe vave pē haʻamau tatau mo homau ngaahi tokoua ʻi he ʻIunaiteti Siteití, koeʻuhí ʻoku lelei pē foki mo homau kakaí, pea ko ʻenau fie fai pē ha meʻá, ʻoku nau fai ia.”
Kimuʻa pea mavahe ʻa ʻĒliu mo Naia mei ʻIutaá, naʻe maʻu hona ʻenitaumení pea naʻe sila kinaua ʻi he Temipale Sōlekí pea maʻu mo hona tāpuaki fakapēteliaké meia ʻEletuleti G. Sāmita, ko e pēteliake ki he Siasí. Naʻe kau atu ki he silá hona ngaahi kaungāmeʻa mei he ʻIunaiteti Siteití, kau ai ʻa e ongo palesiteni misiona mālōlō ko ʻAsaeli Solenisoni mo Kalani Pengikatá. Naʻe fakahoko ʻa e ouaú ʻe ʻEletā Sipenisā W. Kimipolo, ʻa ia ʻoku ʻofa ai ʻa e fāmili Kamākoú hili ʻene tāpuakiʻi hona foha naʻe puké.
Naʻe foki atu ʻa ʻĒliu mo Naia ki Palāsila ʻi he vaeuaʻanga mālie ʻo Tīsema 1965, pea naʻe kamata leva hono fokotuʻu ʻe ʻĒliu ʻa e ʻōfisi ʻētita fakalotofonuá kae kei hokohoko atu pē ʻene fua hono ngaahi fatongia ʻi he kau palesitenisī fakamisioná. ʻI heʻene kau atu ki he ngaahi konifelenisi ʻi he misioná, naʻá ne feinga ke ueʻi ʻa e Kāingalotú ke nau maʻu ha mahino ki he tuʻunga ʻe ʻi ai ʻa e Siasí ʻi Palāsilá ʻi hono fokotuʻu ʻo e ngaahi siteikí ʻi honau fonuá.
ʻI ha konifelenisi fakavahe ʻi tuʻa mei Sao Paulo, naʻá ne tangi ai mo pehē ʻoku fuʻu siʻisiʻi ʻa e taimi ke nau fakataha ai ʻo ako fakataha ko ha Kāingalotú. Naʻá ne pehē, “Kuo pau ke tau moʻui faivelenga ʻo fakatatau ki he meʻa kotoa pē kuo akoʻi mai kiate kitautolú.” Naʻá ne ekinaki ki he kāingalotú ke tokoni ki heʻenau kau palesiteni fakakoló, pea talangofua ki he ngaahi tefitoʻi moʻoni ʻo e ongoongoleleí. Naʻá ne fakamatalaʻi ko e kolo [ʻo e Siasí] naʻe hangē ia ko ha kā lová. Naʻá ne pehē, “Ko e NGKMF (MIA), Palaimelí, Fineʻofá mo e Lautohi Faka-Sāpaté ʻa e ngaahi vaʻe ʻe faá.” “Ko e lakanga fakataulaʻeikí ʻa e mīsiní, pea ko e fakaʻulí ʻa e palesiteni fakakoló.” ʻOku ʻi ai ʻa e fatongia ʻo e konga takitaha ki hono ʻai ʻa e kaá ke ngāué.
Naʻá ne faleʻi kinautolu ke nau tauhi loto-vēkeveke ʻa e ngaahi fekaú. Naʻá ne pehē, “Kuo pau ke tau talangofua, kapau ʻoku tau fie hoko ko ha siteiki.”
ʻI he kamataʻanga ʻo e taʻu 1966, naʻe teʻeki ai pē mahino kia Lamā Viliami ʻa e ʻuhinga naʻe ui ai ia ʻe he Kau Palesitenisī ʻUluakí ke foki ki ʻapi mei Naisīliá. Hili ha ngaahi houa mei heʻene maʻu ʻa e mākoní, naʻá ne heka ʻi ha vakapuna ke mavahe mei he fonuá. Naʻe ʻikai fiemaʻu ʻe he tokotaha naʻá na fetuʻutaki ʻi he puleʻanga Naisīliá ke ne mavahe lolotonga ʻenau ngaahi aleá.
Naʻe ʻamanaki ʻa Lamā ke maʻu ha mahino lahi ange ʻi heʻene tūʻuta ʻi Sōleki Sití. Hili ha kiʻi taimi mei heʻene tūʻuta maí, naʻá ne fakataha mo e Kau Palesitenisī ʻUluakí peá ne fakahaaʻi ange ʻene puputuʻu ʻi hono ui fakafokifā ia ke foki mai ki ʻapí. Naʻá ne fakahoko ange ʻene ngaahi fakataha lelei mo e kau ʻōfisa fakapuleʻangá pea mo e lauiafe ʻo e kau Naisīlia naʻe vēkeveke ke kau ki he Siasí.
Ka kuo ʻosi fakahaaʻi ʻe he Kau Palesitenisī ʻUluakí ʻenau taʻepauʻia ʻi he kahaʻu ʻo e misioná. Lolotonga ʻa e ʻi Naisīlia ʻa Lamaá, kuo ui ʻe Palesiteni Makei ha toe ongo tokoni ki he Kau Palesitenisī ʻUluakí, ʻa ia ko e ʻaposetolo ko Siosefa Filitingi Sāmitá mo Topi B. ʻAisakesoni. Naʻe hoko ʻa Palesiteni ʻAisakesoni ko ha ʻAsisiteni ʻi he Toko Hongofulu Mā Uá kimuʻa ʻi hono uiuiʻi ko ʻení, pea naʻe hangē naʻe fakatefito ʻene hohaʻá ki he founga ʻe tali ai ʻe he Kāingalotu Naisīliá ʻa e fakangatangata ki he lakanga fakataulaʻeikí.
ʻIkai ko ia pē, ka naʻe hohaʻa ʻa e kau ʻaposetolo ʻe niʻihi naʻa hoko ʻa e ngāue fakafaifekau ʻi he kakai ʻUliʻuli ʻo Naisīliá ke fakatupunga ai ha teke ʻe he ngaahi kulupu ki he totonu fakasivile ʻi he ʻIunaiteti Siteití ʻa e Siasí ke fakataʻeʻaongaʻi ʻa e fakangatangatá. Naʻe hohaʻa ʻa e niʻihi kehé naʻa hoko ʻa hono malangaʻi ʻo e ongoongoleleí ʻi Naisīliá ke fakaʻitaʻi ai ʻa kinautolu ʻoku nau poupouʻi ʻa e laulanú ʻi Saute ʻAfiliká pea ʻe fakatupunga ai haʻanau fakangatangata ʻa e ngāue fakafaifekaú ʻi honau fonuá.
Naʻe feinga ʻa Lamā ʻaki hono lelei tahá ke fakanonga ʻa e loto-hohaʻa ʻa e kau palesitenisií. Naʻá ne fokotuʻu ange, “Mahalo ʻe sai ke ʻalu ha taki māʻolunga ʻe toko taha pe tokolahi ange ki Naisīlia ʻo vakaiʻi ʻa e tūkungá kimuʻa pea toki fai ʻa e tuʻutuʻuni aofangatukú.” Neongo ia, ka naʻe ʻikai fakakaukau ʻa e Kau Palesitenisī ʻUluakí ko e meʻa totonu ia ke fakahokó.
Naʻe mavahe ʻa Lamā mei he fakatahá ʻokú ne loto-foʻi. Naʻá ne tui naʻe finangalo ʻa e ʻEikí ke ne fokotuʻu ʻa e Siasí ʻi Naisīlia. ʻOku akoʻi ʻi he folofolá ko e pōpoaki ʻo e ongoongoleleí ʻoku maʻá e kakai kotoa pē pea ʻoku ʻikai taʻofi ʻe he ʻEikí ha taha ʻe haʻu kiate Ia—“pe ko ha ʻuliʻuli pe hinehina, pe ko ha pōpula pe tauʻatāina, pe ko ha tangata pe fefine.” Kapau naʻe moʻoni ia, ko e hā leva e ʻuhinga naʻe ui ai ia ʻe he Kau Palesitenisī ʻUluakí ke foki ki ʻapí?
Pea ʻi he ʻaho 15 ʻo Sānuali 1966, hili ia ha māhina ʻe ua ʻo e foki ʻa Lamā ki ʻIutaá, naʻe fai ai ʻe he kau sōtia mei he tau maluʻi fonua ʻa Naisīliá ha liukava fakakautau, ʻo faʻufaʻu ai ʻa hono fakapoongi ʻa e palēmiá mo e kau ngāue fakapuleʻanga kehé. Naʻe vave hono taʻofi ʻa e fakafepakí ʻe kinautolu naʻa nau mateakiʻi ʻa e puleʻanga lolotongá, ka naʻe hoko ʻa e liukava fakakautaú ke fakalalahi ai ʻa e fekeʻikeʻi fakavahefonuá pea uesia ai ʻa e fonuá.
Naʻe hohaʻa ʻa Lamā ʻi he ongoongo ʻo e fekeʻikeʻí. Tatau ai pē kapau naʻá ne lava ʻo fokotuʻu ha misiona ʻi Naisīlia, ʻe fakangata ʻe he liukavá ʻene ngāué. Kuó ne tui ʻeni naʻe teʻeki ai taimi ke fokotuʻu ʻa e Siasí ʻi ai.
Ka naʻá ne hohaʻa foki ki he tuʻunga naʻe ʻi ai hono ngaahi kaungāmeʻa ʻi Naisīliá. Naʻá ne tohi kia Sālesi ʻAku hili ʻa e liukavá ʻo pehē ange, “Fakamolemole ʻi he taʻe-ʻamanekina hono ui au ʻe he Kau Palesitenisī ʻUluakí ke u foki ki ʻapi. Kātaki ʻo fakahoko mai kapau te u lava ʻo tokoni lahi atu pe fakalotolahiʻi koe ʻi hoʻo loto-holi ke ngāue maʻá e ʻEikí pea mo e kakai ʻi hená.”
Naʻá ne tohi ʻo pehē, “Sālesi, ʻe mamahi hoku lotó kapau kuo mole hoʻo tuí mo e loto-toʻa ke hokohoko atu ʻa e ngāue lelei kuó ke kamataʻí. Kuo teʻeki ke u tālaʻa ʻe faifai ange pea fokotuʻu ʻa e ngāue ʻa e ʻEikí ʻi ho fonuá. ʻOku ou ongoʻi ia ʻi hoku lotó, pea ʻoku ou ʻilo pau ʻoku fakamoʻoniʻi ia ʻe he Laumālié. [Ka] ʻoku ʻikai te u ʻilo hono fuoloá.”
ʻI he taimi ko ʻení ʻi Kolonia Suisa, ʻUlukuai, naʻe lau ai ʻe Telia Lokihoni ʻa e Tohi ʻa Molomoná ʻi ʻapi ʻo ne maʻu ai ha ueʻi fakalaumālie: “ʻOku fiemaʻu ke ke mavahe.”
Ko e ueʻi mālohi taha ia kuo faifai ange peá ne maʻú. Naʻá ne taʻu hongofulu-mā-ono pē, pea naʻá ne ʻiloʻi ka mavahe mei ʻapi ʻe uesia ai ʻene moʻuí. Ka naʻá ne toe ʻilo foki kapau ʻe nofo ʻi he feituʻu ʻoku ʻi aí, ʻe taʻofi ai ʻene tupulaki mo e fakalakalaka ko ha tokotaha muimui ʻo Kalaisí.
Talu mei hono papitaiso ʻo Teliá, mo hono poupouʻi ia ʻe heʻene faʻeé pea kuó ne faʻa haʻu ʻi he taimi ʻe niʻihi ki he ngaahi ʻekitivitī ʻa e Siasí. Ka naʻe faingataʻaʻia fakapaʻanga ʻa e fāmilí, pea naʻe ʻi ai ha fefusiaki ʻi he vā ʻo ʻene tamai-uá mo ʻene faʻeé. ʻI he taimi tatau, naʻe nofo mamaʻo ʻene tamaí pea naʻe fakakaukau [ʻene tamaí] ʻoku taʻofi ʻe he Siasí [ʻa Telia] mei hono fāmilí. ʻI he taimi ʻoku nofo ai [ʻa Telia] mo [ʻene tamaí], naʻe ʻikai lava ke ne fakalele ʻa e Palaimelí pe kau ki heʻene ngaahi fakatahá.
Meʻamālié, he naʻe lahi ha ngaahi taimi naʻe lava ai ʻa Telia ʻo mavahe mei ʻapi ke ʻalu ki he ngaahi konifelenisi fakavahefonuá mo e ngaahi ʻekitivitī fakamisioná ʻi Monitivitiō mo e ngaahi kolo kehé. Naʻe saiʻia ʻa Telia ʻi he ʻalu ki he ngaahi fakataha mamaʻo ko ʻení, tautautefito ki he ngaahi konifelenisi ʻa e NGKMF (MIA) ʻa ia naʻá ne lava ke fakakaungāmeʻa ai mo e toʻu tupu kehe ʻi he Siasí—ko ha faingamālie naʻe ʻikai ke ne maʻu ʻi hono kiʻi kolo tokosiʻi [ʻi he Siasí]. Naʻe tokoni ʻa e houalotu fakamoʻoni ʻi he fakaʻosinga ʻo e polokalama kotoa pē ke tupulaki ai ʻene tuí ʻo lahi ange.
Hili ha kiʻi taimi nounou mei hono ueʻi fakalaumālie ʻo Teliá, naʻá ne talanoa ki he palesiteni fakakoló. Naʻe ʻiloʻi ʻe Palesiteni Solali ʻa e fāmili ʻo Teliá, pea naʻe ʻikai ke ne feinga ke fakalotoʻi [ʻa Telia] ke nofo. Naʻá ne talaange ha ongomātuʻa ʻi he loto koló, ko e fāmili Pelekuliní. Naʻe ʻikai ke na mēmipa ʻi he Siasí, ka naʻe mēmipa hona ʻofefine ko Meliamé.
Naʻe pehē ange ʻe Palesiteni Solali, “Ta sio angé pe ʻe tali ʻe hono fāmilí ke mou nofo.”
Naʻe vēkeveke maʻu pē ʻa e fāmili Pelekuliní ke tokoni ki ha taha ʻoku faingataʻaʻia, pea naʻa nau fiefia ke fakaafeʻi ʻa Telia ke nau nofo. Naʻe tali ʻe Telia ʻenau fakaafe loto-ʻofá pea naʻá ne loto ke tokoni ʻi hono fakamaau ʻo e falé pea mo ngāue ʻi ha ngaahi houa ʻi he falekoloa ʻi he kauhala ʻe tahá. Neongo naʻe faingataʻa ʻa e mavahe mei ʻapí, ka naʻe fiefia ʻa Telia ʻi hono ʻātakai foʻoú. Naʻá ne maʻu ʻa e poupou mo e fiemālie ʻi heʻene nofo mo e fāmili Pelekuliní.
Ka, naʻe ʻikai ke hao kakato ʻa ʻene moʻuí mei he fekeʻikeʻí. Naʻe hoko ʻa ʻUlukuai ko e taha ʻo e ngaahi fonua tuʻumālie ʻo Saute ʻAmeliká, ka naʻe hōloa ʻenau tuʻunga fakaʻekonōmiká. Naʻe huʻuhuʻu lahi ha kakai ʻe niʻihi ki he ʻIunaiteti Siteití, pea naʻa nau pehē ko e pule fakakominiusí ko e tali ia ki he faingataʻaʻia fakapaʻanga ʻa honau fonuá. ʻI he aʻusia ʻe he ngaahi fonua kehe ʻi Saute ʻAmeliká ʻa e faingataʻaʻia fakapaʻanga tataú, naʻe vave ʻa e mafola ʻa e tāufehiʻa ki ʻAmeliká ʻi he konitinēnití kotoa. Koeʻuhí ko e tuʻu ʻa e ʻuluʻi ʻōfisi ʻo e Siasí ʻi he ʻIunaiteti Siteití, naʻe faʻa fehangahangai ai ʻa e Kāingalotu ʻi Saute ʻAmeliká mo e taʻe-falalaʻiá mo ngaohikoviá.
Naʻe tokolahi ʻa e kaungāako ʻo Telia naʻa nau talanoa fekauʻaki mo ʻenau poupouʻi ʻa e pule fakakominiusí. Ke ʻoua naʻa hoko ha fakakikihí, naʻe fakahā ʻe Telia ʻene mēmipasipí mo e tui ki he Siasí ki ha kaungāako tokosiʻi pē. Kapau te ne talanoa tauʻatāina, ʻe ala manukiʻi ai ia.
ʻI ha efiafi ʻe taha, naʻe ʻaʻahi atu ai ʻa e ongo faifekaú ki he ʻapi ʻo Teliá. Ko e ʻamanaki ia ke ne ʻalu ki he NGKMF, ko ia naʻá ne ʻalu fakataha leva mo e ongo faifekaú. Naʻe fakaʻofoʻofa ʻa e ʻeá, ka ʻi heʻenau aʻu atu ki he loto-koló, naʻe ʻilo ʻe Telia ʻa e meʻa ʻe hokó. Naʻe tokolahi hono kaungāako naʻa nau saiʻia ke fakatahataha ʻi he loto-koló. Kapau te nau fakatokangaʻi ia mo e ongo faifekau mei ʻAmelika Noaté, te nau ʻiloʻi ko ha tokotaha Siasi ia.
Naʻe sio atu ʻa Telia ki he ongo faifekaú, peá ne fakakaukau he ʻikai ke ne lava ʻo maaʻi kinaua. Naʻá ne pehē ʻi hono lotó, “ʻOku ou ʻiloʻi ko e Māmonga au, ka ʻoku mālohi fēfē nai ʻeku hoko ko e Māmongá?”
Naʻá ne loto-toʻa pea kolosi atu ʻi he loto-koló mo e ongo faifekaú. Naʻá ne ʻiloʻi te ne fehangahanga mo e tuenoá ʻi he akó, ka naʻe ʻikai ke ne lava ʻo sītuʻa mei heʻene tuí. Naʻe mālohi ʻaupito ʻene fakamoʻoni ki he ongoongolelei kuo fakafoki maí.
Naʻá ne ʻiloʻi ʻoku moʻoni ia ʻo hangē ko ia ne ʻilo ʻe Siosefa Sāmitá. Naʻe ʻikai ke ne lava ʻo fakaʻikaiʻi ia.
ʻI Fēpueli 1966, naʻe fakahū atu ai ha fokotuʻu ʻe he palesiteni fakamisiona ki Palāsila ko Ueini Pekí, ki he kau taki ʻo e Siasí ʻi Sōleki Sití, ʻo fakaongoongoleleiʻi ke fokotuʻu ha siteiki ʻi Sao Paulo.
Naʻe ʻi ai ha ngaahi vahefonua [ʻo e Siasí] ʻe tolu, ngaahi kolo [ʻo e Siasí] ʻe uofulu, pea mo ha Kāingalotu ʻe toko nimaafe nimangeau nai ʻi he fonuá, pea kuo fakakaukau ʻa Palesiteni Peki mo e kau takimuʻa fakalotofonua kehé ke kole ha ngaahi siteiki lahi ange ʻi he tahá. Neongo iá, ka naʻe ʻikai ha toe siteiki ʻi Saute ʻAmelika, pea naʻa nau felotoi ʻe lelei taha pē ke tomuʻa fokotuʻu ha siteiki vaheloto ke kau ki ai ʻa e ngaahi ʻiuniti mālohi taha mei he ngaahi vahefonua takitaha [ʻo e Siasí] ʻi Sao Pauló. Pea ʻe toki lava leva ʻa e Siasí ʻo fokotuʻu ha toe ngaahi siteiki lahi ange ʻi Sao Paulo mo e ngaahi kolo kehe ʻi Palāsilá ʻi he ngaahi taʻu ka hoko maí.
Naʻe pehē ʻe Palesiteni Peki ʻi heʻene fokotuʻú, “ʻOku ou tui ʻoku tau maʻu ha kau takimuʻa lelei mo ha kakai ʻoku nau palani ki he kahaʻú ʻi he ʻēlia ko ʻení ʻo hangē ko ia ʻoku maʻu ʻi ha toe feituʻu pē ʻi he māmaní. ʻOku ou tui ʻoku nau mateuteu ke tali ʻa e ngaahi fatongiá pea ke fakahoko ʻenau tafaʻakí.”
ʻI he māhina hokó, naʻe fakamatalaʻi ai ʻe ʻEletā Sipenisā W. Kimipolo, ko e ʻaposetolo naʻá ne tokangaʻi ʻa e ngaahi misiona ʻe fitu ʻo e Siasí ʻi Saute ʻAmeliká, ʻa e fokotuʻu [ʻa Palesiteni Pekí] ki he Kōlomu ʻo e Kau ʻAposetolo ʻe Toko Hongofulu Mā Uá. Naʻe loto-vēkeveke ha tokolahi ʻo e kau ʻaposetoló ki he fakakaukaú. Kuo nau fefonongaʻaki ʻi he Siasí pea kuo nau ʻiloʻi ʻa e tokoni lahi ʻa e ngaahi fatongia fakasiteikí ki he Kāingalotú. ʻI he fakahinohino ʻa e palōfitá, kuo fokotuʻu foki ʻe ha kau ʻaposetolo tokolahi ha ngaahi siteiki ʻi tuʻa mei ʻAmelika Noate, pea naʻa nau fakamoʻoni ki heʻenau ongoʻi ʻa e Laumālié lolotonga ʻenau fakahoko ʻa e ngāue ko ʻení.
Hili hono fakakaukauʻi ʻo e fokotuʻu ʻa Palesiteni Pekí, naʻe fakangofua ʻe he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ke fokotuʻu ʻa e siteikí. Hili ha uike ʻe taha mei ai, naʻe ʻave ʻe Palesiteni Makei mo hono ongo tokoní ha tohi kia Palesiteni Peki ʻo fakahā ange ʻa e ongoongó.
Naʻa nau fakahoko ange, “Naʻe loto-taha ʻa e fakataha alēleá ke fokotuʻu ha siteiki ʻi Palāsila pea fokotuʻu ʻa e ʻuluʻi ʻōfisí ʻi Sao Paulo. ʻOku mau lotua ke hokohoko atu hono tāpuekina koe ʻe he ʻEikí ʻi he ngāue ʻokú ke faí.”
Naʻe hokohoko atu ʻi Palemou, ʻĪtali ʻa hono vahevahe ʻe Kīsepa ʻOliva ʻa e ongoongoleleí mo e ngaahi kaungāmeʻá mo e kaungāʻapí. Naʻe ʻi ai ha tokotaha taʻu hongofulu-mā-valu ʻi he niʻihi naʻá ne akoʻí ko Salavatoa Falanite. Naʻá ne ngāue ʻi he fale ngāue tatau naʻe ngāue ai hono tuongaʻane ko ʻAnitoninó, pea naʻá ne mālieʻia ʻi he ngaahi akonaki ʻo e Tohi ʻa Molomoná.
Hili hono ʻoange kia Salavatoa ha tatau ʻo e tohí, naʻe tohi ʻa Kīsepa kia Palesiteni Mapei ʻo kole ha ʻū naunau lahi ange. Naʻe loto ʻa Palesiteni Mapei ke ʻave ha toe Tohi ʻa Molomona, mo ha tatau ʻo e Tokāteline mo e Ngaahi Fuakavá [kia Kīsepa], ʻa ia naʻe toki liliu ki he lea faka-ʻĪtalí. Naʻe toe lea ʻaki foki ʻe Palesiteni Mapei kuó ne maʻu ha tohi meia Salavatoa ʻoku fakahaaʻi ai ʻoku loto [ʻa Salavatoa] ke papitaiso ia.
Naʻe palōmesi ʻa Palesiteni Mapei kia Kīsepa, “ʻE papitaiso ia. Ka ke kātaki ʻo hokohoko atu hono akoʻi ia mo teuteuʻi ia ke papitaisó kae ʻoua kuo papitaiso ia.”
Hili ha ngaahi māhina siʻi, naʻe fakataha ʻa Kīsepa mo Palesiteni Mapei, ʻAnitonino mo Salavatoa ʻi he ʻapi ʻo ʻAnitoninó ke vakaiʻi ʻa e tuʻunga mateuteu ʻo Salavatoa ke papitaisó. Naʻa nau talanoaʻi ʻa e Lea ʻo e Potó, vahehongofulú, mo e ngaahi tefitoʻi moʻoni kehe ʻo e ongoongoleleí, ʻo fakaʻaongaʻi ʻa e Tokāteline mo e Ngaahi Fuakafá ko ha maʻuʻanga fakamoʻoni. Naʻe ola lelei ʻa e talanoá, neongo ʻa e faingataʻaʻia ʻi he lea fakafonuá, ka koeʻuhí ʻoku nofo ʻa Salavatoa ʻi ʻapi, naʻe pehē ai ʻe Palesiteni Mapei naʻá ne fiemaʻu ʻa e fakangofua ʻene mātuʻá kae toki papitaiso ia.
Naʻe heka pasi atu ʻa e kulupú ki he ʻapi ʻo Salavatoá. Naʻe tuʻu [ʻa e ʻapí] ʻi ha hala fāsiʻi pea mo ha ʻū uaea tau fō naʻe tau mei he ngaahi falé. Naʻe ʻikai fuoloa, kuo nau fakatokangaʻi ʻa e tamai ʻa Salavatoá, ko Silolamo, ʻoku takai hake ʻi he tulikí ki he halá. Naʻe fakafeʻiloaki atu ki ai ʻa Palesiteni Mapei ʻi he lea faka-Siamané, ko e lea pē ia ʻe taha naʻe poto aí makehe mei he lea faka-Pilitāniá. Naʻe lea faka-Siamane mai ʻa Silolamo, ʻo fakamatalaʻi naʻe taʻu ua ʻene hoko ko ha pōpula ʻi Viena lolotonga ʻa e Tau Lahi Hono Ua ʻa Māmaní.
ʻI he ʻilo ʻe Silolamo ʻoku ʻi ai ʻa Palesiteni Mapei ke papitaiso hono fohá, naʻe kamata ke ne lea vave ‘i he lea faka-ʻĪtalí, pea naʻe hā mei he tō hono leʻó mo e tupeʻi hono nimá ʻa ʻene taʻe-loto ki aí. Naʻe kaila atu ʻa Kīsepa mo hono tuongaʻané, pea naʻe ongona ʻa e longoaʻa ʻo ʻenau fekailangakiʻí ʻi he loto halá.
Naʻe lea faka-Siamane atu leva ʻa Palesiteni Mapei, “ʻOku ou fakaʻamu pē ke ke ʻiloʻi, ko e meʻa ʻoku fakaʻamu ho fohá ke fakahokó ʻoku moʻoni mo totonu.”
Naʻe hoko ʻa e ngaahi lea ko iá ke tuku ai ʻa e longoaʻá. Naʻe fakaafeʻi ʻe Silolamo ʻa e kau fonongá ki hono ʻapí, ʻa ia naʻe toutou kole ai ʻe Kīsepa ke ne fakangofua ʻa e papitaisó. Naʻe fai [ʻe Kīsepa] ʻene fakamoʻoní peá ne kole [ki he tamaí] ke ne fakaʻapaʻapaʻi muʻa ʻa e fili angatonu ʻa hono fohá.
Naʻe faifai pea pehē atu [ʻa e tamaí], “Sai, kapau ʻokú ke fie papitaiso ia pea kapau ʻoku fie papitaiso ʻa hoku fohá, ʻokú ne maʻu ʻeku fakangofuá, ka ʻi ha makatuʻunga pē ʻe taha—ke u lava ʻo sio [ʻi heʻene papitaisó].”
Naʻe papitaiso ʻa Salavatoa ʻi he ʻaho ko iá ʻi he matātahi tatau pē naʻe papitaiso ai ʻa ʻAnitonino ʻi he māhina ʻe ono kuohilí.
Hili ha kiʻi taimi siʻi mei hono hilifakinima ʻo Salavatoá, naʻe fakataha mai ʻa e Kāingalotú ki he ʻapi ʻo ʻAnitoninó. Naʻe akoʻi ʻe Palesiteni Mapei, ʻi he tokoni ʻa Silolamo ke fakatonuleá, fekauʻaki mo e mafai ʻo e lakanga fakataulaʻeikí pea fakanofo ʻa ʻAnitonino mo Salavatoa ki he Lakanga Taulaʻeiki Faka-ʻĒloné. Naʻá ne toki fokotuʻu leva ʻa e Kolo Palemoú ʻo taki ai ʻa ʻAnitonino. Hili ʻa e fakatahá, naʻe pehē ange ʻe he tamai ʻa Salavatoá, “Ko ha ʻaho ʻeni he ʻikai ke teitei ngalo ʻiate au.”
ʻI he uike hono hokó, naʻe fakataha ʻa e koló ʻi he ʻapi ʻo Kīsepá pea naʻa nau maʻu ai ʻa e sākalamēnití. Hili ha kiʻi taimi nounou, naʻe maʻu [ʻe Kīsepa] ha fakamatala meia Palesiteni Mapei ʻoku fokotuʻu ʻe he Siasí ha Misiona ʻĪtali. ʻE vavé ni pē ha aʻu mai ʻa e kau faifekaú ki Sisilī.
Naʻá ne tohi ʻo pehē, “ʻOku ou ʻiloʻi pau ʻe hoko ʻo moʻoni hoʻo fakaʻamu ke ʻi ai ha kolo ʻi Palemou ʻo lahi tatau mo e kolo [ʻo e Siasí] ʻi ʻAsenitiná.”
ʻI he ʻaho naʻe fakaava fakaʻofisiale ai ʻe ʻĒliu ta Losa Kamākou mo ʻene kau ngāué ʻa e ʻōfisi ʻētita vaheloto ʻi Palāsilá, naʻa nau tūʻulutui fakataha ʻo lotu. Naʻe ʻikai ha taha ai te ne ʻilo ʻa e meʻa totonu ke faí, ka naʻe ʻikai ofo ai ʻa ʻĒliu. Ko e meʻa naʻá ne ofo aí ko e fakakaukau ʻa e taha kotoa naʻe ʻi aí ʻokú ne ʻilo ʻa e meʻa ke faí.
Hili ʻene foki mei Sōleki Sití, naʻá ne hiki fakaʻauliliki ʻa e naunau kotoa ʻa e Siasí ʻi he ongo ʻōfisi ʻi he Misiona Palāsilá mo e Misiona Palāsila Sauté. Naʻá ne totongi ai ha ʻōfisi ʻi Sao Paulo, fokotuʻu ha ʻuluʻi ʻōfisi, pea totongi ha timi tokosiʻi ke fokotuʻutuʻu mo liliu-lea ʻa e naunaú. Naʻe kau ʻi he kakai naʻá ne totongí ʻa Uolotā Kuetesi ti Kielosi, ʻa ia naʻá ne mavahe fakataha mo ia mei he semineli Metotisí pea kau ki he Siasí.
ʻI he fakaʻosinga ʻo ʻEpeleli 1966, hili ʻa e ʻuluaki māhina ʻo e ngāué, naʻe tokangaʻi ʻe he ʻōfisi ʻētitá ʻa hono tufaki ʻo e naunau kotoa ʻa e Siasí ʻi Palāsilá. Naʻe ʻota leva he taimí ni ʻe he Kāingalotu fakafoʻituituí mo e kau taki ʻo e Siasí ʻi he fonuá ʻa e ʻū naunaú fakahangatonu mei he ʻōfisí kae ʻikai mei he misioná. Naʻe ʻave foki ʻe ʻĒliu ʻa hono faʻu ʻo e A Liahona (Ko e Liahoná), ko e makasini ʻa e Siasí ʻi he lea faka-Potukalí maʻá e Kāingalotu Palāsilá, mei he ʻōfisi ʻo e misioná ki he ʻōfisi ʻētitá.
ʻI he efiafi Tūsite, ʻaho 26 ʻEpelelí, naʻe aʻu atu ai ʻa ʻEletā Sipenisā W. Kimipolo ki Sao Paulo ke fokotuʻu ha siteiki. Koeʻuhí naʻe ʻi ai ha kau palesitenisī fakasiteiki ke uiuiʻi, fakataha mo ha fakataha alēlea fakasiteiki mo e kau pīsopeliki kehekehe ke fakakakato, naʻe ʻikai ke ne mamohe ʻi he ngaahi ʻaho siʻi hono hokó koeʻuhí ko ʻene ʻinitaviu ʻa e niʻihi ʻi he koló te nau ala fakafonu ʻa e ngaahi lakangá. Naʻe ʻikai ke ne lea faka-Potukali, ko ia naʻe faʻa hoko ʻa Palesiteni Peki ko ha fakatonulea.
ʻI he lahi taha ʻo e ngaahi ʻinitaviú, naʻe fehuʻi ange ʻe ʻEletā Kimipolo, “ʻOkú ke fiefia nai ʻi he Siasí?” Naʻe tali ange ʻa e kau tangatá ʻi he loto-fakamātoato pea naʻá ne loʻimataʻia ai. Naʻe pehē ʻe hanau niʻihi, “Ko e konga mahuʻinga ia ʻo ʻeku moʻuí. He ʻikai ke u lava ʻo moʻui taʻe-kau ai ia.” Naʻe fakamoʻoni ha niʻihi pehē, “Ko e meʻa lelei taha ia ʻi he māmaní” mo e “Naʻá ku toki moʻui ʻi heʻeku kau ki he Siasí.” Naʻe talaange ʻe ha kau tangata ʻe niʻihi kia ʻEletā Kimipolo fekauʻaki mo hono liliu ʻe he ongoongoleleí ʻenau moʻuí, ʻaki hono tokoniʻi kinautolu ke tuku ʻa e inu kava mālohí, mama tapaká, pe angaʻuli fakasekisualé.
Naʻe kau ʻa ʻĒliu ʻi he kakai naʻe fuofua ʻinitaviu ʻe ʻEletā Kimipoló, pea naʻe tui ʻa e tokolahi te ne hoko ko ha palesiteni fakasiteiki lelei. Ko hono moʻoní, ʻi he hili ha ngaahi ʻinitaviu lahi, naʻe fanongo ʻa ʻEletā Kimipolo ki hono fakahikihikiʻi ʻe he kakaí ʻa e tuʻunga fakatakimuʻa ʻa ʻĒliú pea fakaongoongoleleiʻi ia ki he lakangá. Ka ʻi he ʻosi hono toe ʻinitaviu fakaʻosi ʻo ʻĒliú, naʻe tui ʻa ʻEletā Kimipolo ʻoku ʻi ai ha ngāue ʻe taha ʻa e ʻEikí maʻana ke ne fakahoko.
ʻI he ʻaho Sāpate, 1 ʻo Meé, naʻe fakatahataha mai ai ʻa ʻĒliu mo Naia, mo ʻena fānaú, mo e Kāingalotu ʻe toko tahaafe nimangeau tupu ki ha falelotu lahi ʻi Sao Paulo ke mamata tonu ki hono fokotuʻu ʻo e siteikí. Naʻe fakaava ʻa e puipui ʻokú ne vaheʻi ʻa e falelotú mei he holó ke hao ha kakai tokolahi ange. Pea ʻi he nofoʻi ʻa e sea kotoa pē, naʻe fokotuʻutuʻu ʻe ha kakai ʻe niʻihi ha ʻū sea ʻi he ʻaluʻangá pea nofo ha niʻihi ʻi tuʻa, ʻo fanongo ki he konifelenisí ʻi ha meʻangāue fakaongolea.
Naʻe māfana ʻa Palesiteni Peki ʻi heʻene fakaava ʻa e fakatahaʻangá. Hili hono talitali ʻo e Kāingalotú, naʻá ne tuku ʻa e taimí kia ʻEletā Kimipolo, ʻa ia naʻá ne pehē, “Ko e meʻa fakafiefia moʻoni ke u ʻi heni ke fai ha ngāue naʻe vahe mai ʻe he Kau Palesitenisī ʻUluaki ʻo e Siasí, ʻi he ʻaho fakaʻofoʻofa ko ʻení, ke fokotuʻu ʻa e fuofua siteiki ʻi Saute ʻAmeliká ʻi he fonua maʻongoʻonga ko Sao Pauló.”
Naʻá ne lea nounou kau ki he kamataʻanga ʻo e Siasí ʻi Saute ʻAmeliká. Naʻe kikiteʻi ʻe ʻEletā Melevini J. Pālati, ʻa ia naʻá ne fakatapui ʻa Saute ʻAmelika ki hono malangaʻi ʻo e ongoongolelei kuo fakafoki maí ʻi he 1925, ʻe tupulaki māmālie ʻa e Siasí ʻi Saute ʻAmelika, hangē ko e tupu ʻa ha fuʻu ʻoke mālohi mei ha kiʻi foʻi tengaʻi ʻoké, pea fakaʻau pē ʻo hoko ko e taha ʻo e ngaahi vahefonua mālohi taha ʻi he Siasí.
Naʻe pehē ʻe ʻEletā Kimipolo, “ʻOku tau vakai ki heʻene tupulaki ʻi Saute ʻAmeliká, ʻAsenitina, ʻUlukuai, Silei, Pelū, Palakuai, pea ʻi Palāsila lahi, mo honau kakai angalelei mo ʻofa, ʻoku nau tali ʻa e ui ʻa Kalaisí pea fakatapui ʻa e lelei taha ʻo ʻenau moʻuí ki hono fakatupulaki ʻo Hono Siasí.”
ʻI heʻene lau ha fakamatala kuo tomuʻa teuteu ʻi he lea faka-Potukalí, naʻá ne fokotuʻu leva ʻa e Siteiki Sao Pauló mo ha ngaahi uooti foʻou ʻe fitu mo e kolo ʻe taha. Naʻá ne ui ʻa Uolotā Sipeti, ko ha tokotaha ngaohi naunau fale, ke hoko ko e palesiteni fakasiteiki. Kuo kau ʻa Uolotā ki he Siasí ʻi he taʻu 1950 pea kuó ne hoko ko ha palesiteni fakakolo mo e fakavahefonua kimuʻa peá ne hoko ko ha ʻasisiteni ki he kau palesitenisī fakamisioná.
Hili hono fokotuʻu ʻe ʻEletā Kimipolo ʻa e kau palesitenisī fakasiteikí pea uiuiʻi ha kau takimuʻa fakasiteiki kehe, ʻa ia ko e Kāingalotu fakalotofonua kotoa kinautolu, naʻá ne fakahā ʻa e kau pīsopelikí mo e kau palesitenisī fakakolo foʻoú. Naʻe kau ai ʻa ʻĒliu, ʻa ia naʻe ui ke hoko ko ha pīsope ʻi he Uooti Sao Paulo Uá.
Naʻe kamata ke ongoʻi ʻe ʻĒliu ʻa e mafatukituki ʻo e uiuiʻí. Neongo naʻe lahi ʻene aʻusia fakatakimuʻa ʻi he Siasí, ka kuo teʻeki ai ke ne hoko ko ha palesiteni fakakolo pe fakavahefonua, pea naʻe ngali lahi ʻa e fatongia ʻo hono tokangaʻi ʻa e kāingalotu tokolahí. Ka naʻá ne kei ʻiloʻi pē naʻe tāpuekina ʻe he ʻEikí ʻEne kau tamaioʻeikí pea tokoniʻi kinautolu ke nau lavameʻa.
Kuó ne toki talaange ki ha kulupu ʻo e kau taki lakanga fakataulaʻeikí, “Naʻe fakakaukau ʻa ʻĪsaia he ʻikai ke ne hoko ko ha palōfita, ka naʻá ne tali ʻa e uiuiʻí pea laka atu. ʻI hono ui kitautolu ki he ngāué, ʻoku tau tali ʻo pehē he ʻikai ke tau lava. Kapau te tau fakakaukau pehē, he ʻikai pē ke tau teitei lava. Kuo pau ke tau manatuʻi, ko e ʻEikí ʻokú Ne uiuiʻi kitautolú, pea kuo pau ke ʻoua naʻa tau taʻe-tali ia.”
Hili ʻa e konifelenisí, naʻe lulululu ʻa ʻEletā Kimipolo mo e Kāingalotú. Naʻe tuʻu pē ʻa ʻĒliu ʻo ofi mai, ʻo malimali mo fakalea ki he kakai naʻe talamonū angé. ʻI he ʻaho hono hokó, te ne foki ai ʻo ngāue ʻi he ʻōfisi ʻētita fakavahelotó, pea ʻi he efiafí, te ne fakahoko ha fakataha fakapīsopeliki, mahalo ko hono fuofua fai ia ha faʻahinga fakataha pehē ʻi he konitinēnití.
Ko ha taimi ia ʻo e liliu maʻa ʻĒliu—pea mo ha liliu maʻá e Siasí.