Vahe 13
Ko Ha ‘Ilo Vivili
ʻI he konga kimuʻa ʻo Mē 1971, naʻe hū ai ʻa Talaiasi Kulei ki he Laipeli Meliotí ʻo e ʻUnivēsiti ʻo ʻIutaá. Naʻe fakaafeʻi ia ʻe hono kaungāmeʻa ko ʻIusini ʻOá, naʻe ngāue ʻi he senitā hiki tataú, pea mo Lūfina Pilitifooti ke nau fakataha ai. Naʻá na fiemaʻu kimuí ni ke talanoa fekauʻaki mo e ngaahi palopalema ʻo e hoko ko e Kāingalotu ʻUliʻuli ʻo e Ngaahi ʻAho Kimui Ní. Naʻa nau takitaha ʻaukai mo lotu ke ʻilo ʻa e meʻa ke faí.
ʻI he taimi naʻe fakataha ai a Talaiasi mo hono ngaahi kaungāmeʻá, naʻa nau maʻu ha loki ako ʻataʻatā pea nau kamata talanoa ai. Ko e lahi ʻo e ngaahi meʻa naʻa nau hohaʻa ki aí naʻe fekauʻaki mo e taʻofi ʻo e lakanga fakataulaʻeiki ʻo e Siasí pea mo e temipalé. Ko e hā naʻe maʻu ai ʻe ha niʻihi ʻo e kau tangata ʻUliʻuli ʻi he fuofua kamata ʻa e Siasí ʻa e lakanga fakataulaʻeikí? Pea ko e fē ha taimi ʻe toe lava ke maʻu ai ʻe he kakai tangata ʻUliʻulí ʻa e lakanga fakataulaʻeikí?
ʻI heʻenau aleaʻi ʻa e ngaahi fehuʻi ko ʻení naʻe ʻalu hake ha ngaahi fehuʻi lahi ange. Naʻa nau ʻilo ʻoku fāifeinga ʻa e Kāingalotu ʻUliʻulí ke mahino hono tapuí mo kei mālohi ʻi he Siasí. Ko e hā ʻe lava ʻo fai ke tokoniʻi kinautolu ke nau ō lahi ange ki heʻenau ngaahi houalotú? ʻE lava ke fokotuʻu ʻe he Siasí ha kiʻi kolo fakatefito pē ki he kāingalotu ʻUliʻulí?
Pea ʻe fēfē nai ʻa e toʻu tangata kei iiki ange ʻo e Kāingalotu ʻUliʻulí? ʻI heʻena hoko ko e ongo tamaí, naʻe fakaʻamu ʻa Lūfini mo ʻIusini ke na ʻilo ha founga ke tali ʻa e ngaahi fehuʻi ʻena fānaú fekauʻaki mo e fakataputapuí.
Hili hono hiki ʻenau ngaahi fehuʻí, naʻe tūʻuluti leva ʻa e ngaahi kaungāmeʻá ke fai ha lotu, ʻo kolea ʻa e fakahinohino ʻa e ʻEikí. ʻI heʻene ʻosí, naʻa nau maʻu ha ongo mālohi ke ʻave hangatonu ʻenau ngaahi fehuʻí kia Palesiteni Siosefa Filitingi Sāmita mo e kau taki māʻolunga kehe ʻo e Siasí. Ka ʻe lava fēfē nai haʻanau fokotuʻu ha faʻahinga fakataha pehē?
ʻI heʻenau ʻilo naʻe poto ʻa ʻIusini ʻi he fakaolooló mo ivi lahí, naʻe talaange ai ʻe Talaiasi mo Lūfini ki ai, “Fēfē ke ke fetuʻutaki mo kinautolu?” Kapau ʻoku ʻi ai ha taha ke ne fakafofongaʻi ʻa e kulupú, ko ʻIusini.
ʻOsi ha ngaahi ʻaho siʻi mei ai, naʻe talanoa ʻa ʻIusini mo ʻAfa Heikoka, ko e sekelitali fakataautaha ʻa Palesiteni Sāmitá, ʻi he Fale ʻUluʻi ʻŌfisi ʻo e Siasí. Naʻe talaange ʻe ʻAfa kia ʻIusini, “Ko e hā pē meʻa ʻokú ke hohaʻa ki aí, te u lava ʻo fakaleleiʻi ia maʻau.”
Talaange ʻe ʻIusini, “Sai.” “Ko ʻeku hohaʻa lahi taha ʻi he taimi ní, ʻoku mau fie feʻiloaki mo e palōfitá.” Naʻá ne fakaʻaliʻali ange leva kia ʻAfa ʻa e ngaahi fehuʻi kuó ne hiki mo Talaiasi pea mo Lūfiní. Talaange ʻe ia, “ʻOku fiemaʻu ʻe he kakai ʻUliʻulí ke nau maʻu ha loto-maʻui mo mahuʻinga, pea mo mālohi ʻi he Siasí. ʻOku ʻikai ke nau fiemaʻu ke nau siosio pē kae ʻikai ke kau longomoʻui ki he Siasí.”
Naʻe lau ʻe ʻAfa ʻa e ngaahi fehuʻí peá ne tui ʻoku mahuʻinga ʻa e lisí. Talaange ʻe ia, “Te u ʻave ia ki he kau taki māʻolungá mo vakai pe ko e hā ʻenau fakakaukaú.”
Naʻe ʻikai ke fanongo ʻa ʻIusini ia ki ha lau mei he hetikuota ʻo e Siasí ʻi heʻene ʻosi iá, ko ia, ʻi he ʻosi ha uike ʻe tolu mei ai, kuó ne toe foki ki he Fale ʻUluʻi ʻŌfisi ʻo e Siasí. Naʻe talaange ki ai ʻe ʻAfa ʻi he taimi ko ʻení kuo ʻosi fokotuʻu ʻe Palesiteni Sāmita ʻa e kau ʻaposetolo ko Kōtoni B. Hingikelī, Tōmasi S. Monisoni, pea mo Poiti K. Peeka ke talanoa mo kinautolu. Naʻe aleaʻi leva ha fakataha ki he ʻaho 9 ʻo Suné.
ʻI he aʻu ki he ʻaho ko iá, naʻe fakataha leva ʻa Talaiasi, ʻIusini, mo Lūfini mo e kau ʻaposetolo ʻe toko tolú ʻi he ʻōfisi ʻo ʻEletā Hingikelií. Naʻe ʻosi maheni ʻa e kau taki ʻo e Siasí mo Lūfini ʻi ha ngaahi taʻu, pea naʻa nau ʻilo ʻa Talaiasi ʻi heʻene ngāue ʻi he KSL. Ka naʻe hala ha taha ʻi he kau ʻaposetoló kuo talanoa fakataautaha mo ʻIusini.
Naʻe fakahā ange ʻe Talaiasi mo hono ongo kaungāmeʻá ki he kau ʻaposetoló, “ʻOku mau fuʻu hohaʻa moʻoni ki he palopalema ʻoku mau toloto ai mo homau ngaahi fāmilí, pea mo homau kakaí.” Naʻe fakamatala ʻa Lūfini ki he ʻikai toe mahuʻingaʻia hono ngaahi fohá ʻi he Siasí, hili ʻenau fakaʻau ʻo lalahi ange kae ʻikai maʻu ʻa e Lakanga Taulaʻeiki Faka-ʻĒloné. Naʻe fakamamahi ki ai ʻa e ʻikai ke nau toe maʻulotú.
ʻI he lolotonga ʻo e ngaahi fakatahá, ko ʻIusini naʻe fehuʻi lahi tahá.
“Ko e hā te mau tala ki heʻemau fānaú ʻi heʻenau fehuʻi fekauʻaki mo haʻamau papitaiso kinautolu, ʻi he taimi ʻe pehē ai ʻe he fānau kehe ʻi he Palaimelí ʻe papitaiso kinautolu ʻe heʻenau ngaahi tamaí?
ʻE lava nai ke mau kau ʻi he fakataha lakanga fakataulaʻeikí?
“ʻE lava nai ke fakahoko ʻa e ngāue fakafaifekaú ʻi homau kakaí?”
Naʻe fakafanongo fakamātoato ʻa ʻEletā Hingikelī, mo ʻEletā Monisoni, pea mo ʻEletā Peeka, pea nau loto ke toe talanoa mo Lūfini, Talaiasi, pea mo ʻIusini ke aleaʻi ʻa e ngaahi fehuʻi ko ʻení mo ha toe ngaahi fehuʻi pē. ʻI he ʻosi ʻa e fakatahá, naʻa nau fakamoʻoni ʻoku fiemaʻu ʻa e Siasí ke ne fai ha meʻa lahi ange maʻa hono kāingalotu ʻUliʻulí.
“ʻOku mau tui. ʻOku mau maʻu ha fakamoʻoni,” ko e fakamatala ia ʻa e ngaahi kaungāmeʻa ʻe toko tolú ki he kau ʻaposetoló. “ʻOku mau loto ke fakahoko lahi mai ʻa e ngaahi tāpuaki ʻo e ongoongoleleí ki homau kakaí, neongo ʻoku ʻikai kau ai ʻa e lakanga fakataulaʻeikí.”
Lolotonga iá, ʻi Tōkiō ʻi Siapani, naʻe vaʻinga pasiketipolo ʻa Kasuhiko Iamasita ʻi he fakaʻosinga ʻo e uike kotoa—kae siʻi ʻaupito ha taimi ke ako ai mo e kau faifekau ʻo e Ngaahi ʻAho Kimui Ní. Naʻe ʻosi kamata ʻaʻahi ʻa e ongo ʻeletaá ki ai, ʻo ʻikai fuoloa mei he ʻosi ʻa e fakaʻaliʻali ʻa māmaní, pea naʻá ne saiʻia ke talanoa mo kinaua. Ko e ongo ʻAmelika kinaua, pea naʻá ne fiefia ke talanoa mo e kau mulí. Ka naʻá ne faʻa aleaʻi ke talanoa mo kinaua, pea iku ʻo toe kaniseli pē.
Naʻe teʻeki ai hoko ʻa e meʻa fakalotú ia ko ha meʻa mahuʻinga ʻi heʻene moʻuí. Naʻe fakaʻapaʻapaʻi ʻe heʻene faʻē tui faka-Putá ʻa ʻene ngaahi kuí ʻaki ʻene ʻaʻahi ki honau faʻitoká, ka naʻe ʻikai ke lotu ʻa e fāmilí, fakalaulauloto, pe ako ʻa e ngaahi akonaki ʻo ʻenau tui fakalotú. Ko e tui faka-Putá ko ha tukufakaholo ia naʻe maʻu ʻe Kasuhiko, ka naʻe ʻikai ke ne liliu fēfē ʻene tōʻonga moʻuí.
ʻI he tafaʻaki ʻe tahá, naʻe fakafofongaʻi ʻe he ongo faifekaú ha siasi naʻe fakataha tuʻo lahi ʻi he uike mo poupouʻi hono kau mēmipá ke nau ako ʻa e folofolá mo tauhi ʻa e ngaahi fekaú. Naʻe ʻikai ngata pē ʻa e hoko ko ha Kau Māʻoniʻoni ʻi he Ngaahi ʻAho Kimui Ní ʻi hono fakatukupaaʻi ha taimi lahí. Ka ko ha liliu lahi fau ʻi he moʻuí.
Neongo ia, naʻe mālie kia Kasuhiko e pōpoaki ʻa e ongo faifekaú. Ko e taimi naʻá ne ʻilo ai ki he ʻUluaki Mata Meʻa-hā-mai ʻa Siosefa Sāmitá, naʻá ne fakatumutumu. Naʻe ʻikai haʻane fehuʻi fekauʻaki mo ia. Naʻá ne tui ki ai ʻi he taimi pē ko iá. Kapau pē ā naʻá ne maʻu ha taimi lahi ange ki he Siasí mahalo te ne tali fakamātoato ange hono ngaahi pōpoakí.
ʻI ha ʻaho ʻe taha, naʻe afe atu ʻa Kasuhiko ki he ʻapi nofoʻanga ʻo e ongo faifekaú ʻo kole fakamolemole ʻi heʻene taʻe-tokanga ki heʻenau aleá. Naʻe pehē ange ʻe ha taha ʻiate kinaua, “Misa Iamasita, Fakamolemole atu. Te u foki au ki ʻapi.” Kuo ʻosi ʻene ngāue fakafaifekaú.
Naʻe fakaʻohovale mo toe fakamamahi ʻa e ongoongo ko ʻení kia Kasuhiko. Naʻá ne tukupā leva ke ʻoua te ne toe fakamoleki noaʻia ʻa e taimi ʻo e ongo faifekaú. Naʻá ne pehē pē kiate ia, “Te u ako lahi ange. Te u lau ʻa e Tohi ʻa Molomoná.”
Naʻe kamata leva ke ne toutou fakataha mo e ongo faifekaú, maʻulotu, mo ako lahi ange ʻa e ongoongolelei kuo fakafoki maí. Naʻá ne manako ke ʻalu ki he ngaahi ʻekitivitī ʻa e Mutualé ʻi he pō Tuʻapulelulú mo fakamaheni ki he Kāingalotu ʻo e feituʻú.
Ko ha taimi fakafiefia ia ki he Siasí ʻi Siapani. ʻI ha taʻu ʻe uofulu mā nima mei he ʻosi ʻa e Tau Lahi ʻa Māmani Hono ll, kuo tupulaki ʻa e tokolahi ʻo e kāingalotu ʻi Siapaní mei he laungeau tupu siʻí ʻo laka ʻi he toko tahamano uaafé. Pea hangē ko Palāsila mo e ngaahi fonua kehe naʻe tupu vave ai ʻa e Siasí, naʻe maʻu ʻe Siapani hano ʻōfisi liliu lea mo ha ʻōfisi tufakiʻanga naunau. Naʻe ʻaʻahi maʻu pē ʻa e kau taki māʻolungá ki he fonuá, kae tokangaʻi ʻa e ngaahi ngāue fakaʻahoʻa e Siasí ʻe he kau taki fakalotofonuá. Naʻe ʻi ai heni ha misiona ʻe fā ʻi Siapani mo ha siteiki ʻi Tōkiō. ʻE ʻikai fuoloa kuo fakaava ʻe he Siasí ha ʻinisititiuti fakalotu ki he fānau ako ʻunivēsití mo fakakau ʻa e Kāingalotu kei iiki angé ʻi he polokalama semineli ako ʻi ʻapí.
Naʻe kei tokolahi ha kakai ʻi Siapani naʻe teʻeki ke nau maheni mo e Kau Māʻoniʻoni ʻi he Ngaahi ʻAho Kimui Ní, ka naʻe fakalahi ʻa e palepale ʻa e Siasí ʻi he Fakaʻaliʻali Expo ʻ70 ke ʻilo lahi ange ki ai ʻa e fonuá. Naʻe tohoakiʻi mai ʻe he fakaʻaliʻalí ha kau folau ʻeveʻeva ʻe laumano ʻi he ʻaho, ʻo māʻolunga ʻaupito ia ʻi he palepale ʻa e Siasí ʻi he Fakaʻaliʻali ʻa Māmani ʻi Niu ʻIoke ʻi he taʻu ʻe nima kimuʻá. ʻI he fakaʻosinga ʻo e fakaʻaliʻalí, kuo laka hake ʻi ha kakai ʻe toko 650,000 kuo nau fakafonu ʻa e ngaahi kaati fakamatala ʻi he palepalé, pea kole ha tokolahi ke ʻaʻahi ange ʻa e kau faifekaú. Pea naʻe ʻosi fakatau mo ha Tohi ʻa Molomona ʻe 50,000 tupu.
ʻI he ako ko ia ʻa Kasuhiko mo e ongo faifekaú, naʻe ʻikai ke mahino ki ai ʻa e meʻa lahi naʻá na akoʻi angé. Ka naʻe hangē ʻena tōʻonga moʻuí mo ʻena sīpinga leleí ko ha pōpoaki mei he ʻOtuá, pea naʻá ne fakaʻamu ai ʻe lava ke ne tatau ange mo kinaua. Lolotonga haʻane fakahoko ʻene ʻuluaki lotu fakatāutahá, ʻo muimui ʻi he ngaahi fakahinohino naʻe ʻoange ʻe he ongo faifekaú, naʻá ne ongoʻi hono ʻōʻōfaki ia ʻe he ʻEikí. ʻI he taimi naʻe fakaafeʻi ai ia ʻe he ongo faifekaú ke papitaisó, naʻá ne tali.
Ko hono ʻaho papitaisó ko e ʻaho 17 ʻo Siulai 1971 Naʻe ʻikai ke ʻi ai ha vai papitaiso ʻo e kiʻi koló, pea naʻe faʻu leva ʻe he ongo faifekaú ha taha ʻi he peito ʻo e falelotú ʻaki ha ngaahi toetoenga papa mo ha lauʻi vainolo laulahi. Naʻe ʻikai ke fuʻu loloto ʻa e vai papitaisó, ka naʻe ʻi ai ha vai feʻunga ke fakauku kakato ai.
ʻI he ʻosi iá, lolotonga hano hilifakinima ʻe he taha ʻo e ongo ʻeletaá ha fefine naʻe papitaiso mo ia ʻi he ʻaho ko iá, naʻá ne longo ʻi he lolotonga ʻo e tāpuakí, naʻe fasi hono leʻó ʻi heʻene kamata ke tangí. Naʻe ʻāʻā hake fofonga ʻo Kasuhikó ke sio pe ko e hā kuo hokó, peá ne fakatokangaʻi ʻa e tafe hifo ʻa e loʻimatá ʻi he fofonga ʻo e faifekaú.
ʻI he mōmeniti ko iá, naʻe lava ke ne ongoʻi e ʻofa ʻa e faifekaú—mo e ʻofa ʻa e ʻOtuá—ki he taha kotoa ʻi he lokí.
Hili ʻae hoko ʻa Sipenisā W. Kimipolo ko e palesiteni leʻoleʻo ʻo e Kōlomu ʻo e Kau ʻAposetolo ʻe Toko Hongofulu Mā Uá, naʻá ne toe femoʻuekina ange ia ʻi ha toe taimi kimuʻa. Naʻá ne faʻa ngāue mei he hengihengí ʻo aʻu ki he 10:30 pe 11:00 efiafí. Pea ko e taimi ʻe niʻihi naʻá ne ʻā hake ʻi he tuʻuapoó ke ngāue. Naʻá ne feinga ke ne liliu ʻa e anga ko ʻení ʻi ha fanga kiʻi founga iiki ke siʻi ange ʻa e femoʻuekina hono ʻahó, ka naʻe fāifeinga ke ne ʻilo ʻa e tafaʻaki ʻe lava ʻo fakasiʻisiʻi aí.
ʻIkai fuoloa, kuo kamata ke ne ongoʻi ha mamahi lahi ʻi he tafaʻaki toʻohema hono kiá. ʻI he kamataʻangá naʻe fetōʻaki pē ʻa e mamahí, ka naʻe fakaiku ʻo langa maʻu pē hono kiá mo hono mongá. Naʻe toutou langa maʻu pē hono fatafatá, pea naʻa mo ha kiʻi ngāue maʻamaʻa fakaesino pē, naʻe fakaongosia ia ki ai. Naʻe ʻikai ʻaonga ʻa e fakamālohisinó ki hono tūkungá. ʻIkai fuoloa kuo fakatokangaʻi ʻe hono uaifi ko Kamilá kuo faingataʻa ange ʻene mānavá.
ʻI Sepitema ʻo e 1971, naʻe talanoa fakafoʻituitui ai mo e toketaá ki he ngaahi fakaʻilongá. Ko Lāsolo M. Nalesoni, ko e taki ʻo e Lautohi Faka-Sāpaté naʻe toki ui, pea mo e faitafa mafu ʻiloa. Naʻe fakafanongo tokanga ʻa Toketā Nalesoni mo fokotuʻu ange ke sio ʻa ʻEletā Kimipolo ki ha mataotao ʻi he vave tahá.
ʻIkai fuoloa mei ai, kuo talanoa ʻa ʻEletā Kimipolo mo Toketā ʻĒnesi Uilikinisoni, ko ha mataotao ʻi he mafú mo e foha ʻo e palesiteni kimuʻa ʻo e ʻUnivēsiti Pilikihami ʻIongí. Naʻe toe vakaiʻi ʻe Toketā Uilikinisoni ʻa e lipooti fakafaitoʻo ʻo e sivi kimuʻa ʻo ʻEletā Kimipoló mo fai ha ngaahi sivi lahi ange. Ko e taimi naʻe vakaiʻi ai ʻe he toketaá ʻa e olá, naʻe lava ke tala ʻe he ʻaposetoló naʻá ne hohaʻa. Peá ne pehē ange, “ʻAi mahino mai pē”.
“Fāsiʻi ʻa e halanga totó,” ko e tali ange ia ʻa Toketā Uilikinisoní. Naʻá ne fakamatalaʻi ange ko e kālava toʻohema ʻo e mafu ʻo ʻEletā Kimipoló, ʻa ia ʻokú ne puleʻi ʻa e hū kituʻa ʻa e totó, kuo fakafefeka mo fāsiʻi. Naʻe hōloa hono mafú pea faingataʻa ke pamu ʻa e totó ʻi he kālava ʻoku maumaú.
Naʻe ʻeke ange ʻe ʻEletā Kimipolo ko e hā hano fuoloa ʻo ʻene kei moʻuí. Pea talaange ʻe he toketaá mahalo te ne maʻu ha taʻu ʻe taha pe ua, kā ʻe malava pē foki ke mālōlō fakafokifā ʻi ha taimi pē. ʻE ala fakalōloa ʻe he tafá ʻene moʻuí, ka ʻi he taʻu ʻo ʻEletā Kimipoló, ʻoku peseti pē ʻe 50 hono faingamālie ke moʻuí.
Naʻe fakamamahi ‘a e ongoongó. Naʻe fakakaukau maʻu pē ʻa ʻEletā Kimipolo ko e maté ko ha faʻahinga meʻa taʻe-mahino mo kei mamaʻo. Ko ʻeni, kuo hangē ia ko e ngataʻanga ʻo e māmaní—pe ko e kamataʻanga ʻo e ikuʻangá—kuo hoko mai.
ʻI he ʻaho hono hokó, naʻe luelue ai ʻa ʻEletā Kimipolo ki he Temipale Sōlekí ki ha fakataha mo e Kau Palesitenisī ʻUluakí mo hono kaungā ʻaposetoló. ʻI he lolotonga ʻo e fakatahá, naʻá ne lotua ha ivi ke kei ngāue lelei neongo ʻa e tuʻunuku mai ʻa e malava ke maté.
Naʻe ʻikai fuoloa kuo ʻosi ʻa e fakatahá, pea kamata ke mavahe ʻa e kau tangatá mei he temipalé. Naʻe fakatokangaʻi ʻe ʻEletā Kimipolo ʻa e niʻihi kehé ʻoku nau fononga tautau toko ua pe toko tolu, pea haʻu ai ha fakakaukau faikehe ki ai—mahalo ʻe vavé ni ha fononga tautau toko ua pe tautau toko tolu ʻa e kau tangata tatau ko ʻení ko ha kau fata ʻo hono puha maté.
Naʻe ʻiloʻi ʻe ʻEletā Kimipolo ʻe lava ke fakamoʻui ia ʻe he ʻEIkí. Naʻe fifili ʻa e ʻaposetoló, ka ko e hā te Ne fai ai iá, ʻokú Ne lava ke ui ha taha kehe, ʻoku feʻunga ange ke ngāue ʻi he Kōlomu ʻo e Toko Hongofulu Mā Uá?
Naʻá ne fakakaukau loto ai, “Ko ʻeku mavahé, ʻe tatau pē ngaʻutá mo hano puhiʻi ha foʻi teʻelango pē ʻe taha ʻi ha ngaahi foʻi teʻelango lahi.”
ʻI ha ʻaho ʻe taha, meimei ko e taimi ʻeni, naʻe fakaafeʻi ai ʻa Lūfini Pilitifooti, Talaiasi Kulei, mo ʻIusini ʻOa ki he ʻōfisi ʻo Kōtoni B. Hingikelií.
Talu mei Sune, mo e fakataha ʻa e kau tangatá ni ʻe toko tolu mo ʻEletā Hingikelī, ʻEletā Monisoni, pea mo ʻEletā Peeka ʻi he uike kotoa pē. Naʻe meimei ke maʻu kotoa ʻenau ngaahi fakatahá ʻe he ngaahi fehuʻi fekauʻaki mo e taʻofi ʻo e lakanga fakataulaʻeikí mo e temipalé, ka naʻe ʻomai maʻu pē ʻe Lūfini ha laumālie fakanonga ki he lokí.
Ko hono moʻoní, ko e lahi ange ʻo e fealēleaʻaki ʻa e kau tangatá, ko e lahi ange ia ʻo ʻenau ako ke feʻofaʻaki mo fefakaʻapaʻapaʻakí. Naʻe ongo kia Talaiasi ʻa e fakakaukau ʻa Palesiteni Sāmitá naʻe mahuʻinga feʻunga ʻa e ngaahi meʻa naʻa nau tokanga ki aí ke fakakau mai ai ʻa e kau ʻaposetolo ko ʻeni ʻe toko tolú. ʻI he hokohoko atu ʻenau fakatahá, naʻe ʻiate kinautolu ʻa e ʻEikí, pea naʻa nau faʻa fetāngihi ʻi he uma ʻo e tokotaha ʻe tahá.
Ko e ʻaho ko ʻení naʻe fakaava ʻe ʻEletā Hingikelī ʻa e fakatahá ʻaki ha ongoongo fakafiefia. Naʻá ne pehē, “Hili ʻa e lotu mo hono fakakaukauʻí, kuo tataki ʻa Palesiteni Sāmita mo e houʻeiki ʻo e Kōlomu ʻo e Toko Hongofulu Mā Uá ke fokotuʻu ha kulupu tokoni ki he kau mēmipa ʻUliʻuli ʻo e Siasi,”
Kuo aleaʻi mai ʻe he kau taki ʻo e Siasí hano fokotuʻu ha faʻahinga kulupu pehē talu mei he ʻuluaki fokotuʻu ʻe Talaiasi, ʻIusini, mo Lūfini ke fokotuʻu ha kiʻi kolo Kāingalotu ʻUliʻulí ʻi heʻenau lisi ʻo e ngaahi fehuʻi ki he palōfitá. Naʻe fakamatalaʻi ange ʻe ʻEletā Hingikelī ʻe ngāue ʻa e kulupú ko ha konga ʻo e Siteiki Lipetií ʻi Sōleki Sití. ʻE kei hoko atu pē maʻu houalotu sākalamēniti mo e Lautohi Faka-Sāpate ʻa e kau mēmipa ʻo e kulupú ʻi honau uooti totonú. Ka ʻe ʻi ai ha Fineʻofa, MIA, mo e Palaimeli pē ʻa e kulupú. Ko hono taumuʻá ke ʻi ai ha fakalahi mo ha tokoni ki he Kāingalotu ʻUliʻulí, tautautefito ki he kakai kei talavou ʻoku fāifeinga ke maʻu hanau feituʻu ʻi he Siasí.
Naʻe ʻosi ui ʻe he kau ʻaposetoló ia ʻa Lūfini ke hoko ko e palesiteni ʻo e kulupú, pea naʻe fakaongoongoleleiʻi ʻe Lūfini ʻa Talaiasi ko hono tokoni ʻuluaki mo ʻIusini ko hono tokoni ua. Naʻe fakahoko ange leva ʻe ʻEletā Hingikelī ʻa e uiuiʻí kiate kinautolu, pea naʻa nau tali.
ʻOsi ha taimi nounou mei ai, ʻi he ʻaho 19 ʻo ʻOkatopa 1971, naʻe tangutu ʻa Talaiasi ʻi he siteisi ʻo ha falelotu ʻi Sōleki Siti. Ko ha efiafi Tūsite, ka naʻe fonu ʻa e falelotú ʻi he kakaí ʻoku nau teunga lotu. Ko ha tokosiʻi ʻo e ngaahi fofonga naʻe fakatokangaʻi ʻe Talaiasí ko ha kau ʻUliʻuli, ka ko honau tokolahi tahá ko e kakai pālangi.
Naʻe fakataha mai ʻa e taha kotoa ke siotonu ʻi hono kamata ʻo e meʻa naʻe pehē ʻe Talaiasi, Lūfini, mo ʻIusini ke ui ko e Kulupu Sēnesí, ko e fuofua houlotu fakaʻofisiale ʻa e Siasí maʻá e Kāingalotu ʻUliʻuli ʻo e Ngaahi ʻAho Kimui Ní. Naʻe fakafeʻiloaki ʻe ʻEletā Hingikelī ʻa e kulupú mo hono taumuʻá, he ko ia naʻe tatakí. Pea fakahā leva ʻe Lūfini Pilitifooti, ko e palesiteni ʻo e kulupú, ke hikinimaʻi ʻa e kau ʻōfisá, kau ai ʻa Lusila Pengiheti ko e palesiteni ʻo e Fineʻofá. ʻI heʻene ʻosí, naʻá ne fai ʻene fakamoʻoní.
Naʻá ne pehē, “Ko e Sēnesí, hangē ko ia ʻoku mou meaʻí, ʻoku ʻuhinga ia ko e kamataʻanga. -Ko e kamataʻangá ʻeni.” Naʻá ne lea fekauʻaki mo ʻene ʻofa ʻi he ongoongolelei kuo fakafoki maí mo ʻene houngaʻia ʻi he kau taki ʻo e Siasí pea mo e taha kotoa ʻi he haʻofangá. “ʻOku kau ʻa e ʻEikí mo kitautolu.” Naʻá ne fakamoʻoni, “Te tau ikuna. Te u feinga lahi ange ʻi haʻaku toe feinga kimuʻa ke ʻai ʻeni ke lava.”
Ko e taimi naʻe tangutu ai ki lalo ʻa Palesiteni Pilitifōtí, naʻe fakaafeʻi leva ʻe ʻEletā Hingikelī ʻa Talaiasi ke fai ʻene fakamoʻoní, ʻo ne ʻohovale ai. Naʻe laka atu ʻa Talaiasi ki he tuʻunga malangá ʻo pehē, “Naʻe ʻikai ke u ʻamanaki ke lea ʻi he efiafí ni. Hangē ʻoku ongo kaaimuʻá.”
ʻI heʻene vakai ki he haʻofangá, naʻá ne fakatokangaʻi ʻa e kau mēmipa ʻo e fāmili Fēlikí, ʻa ia naʻa nau fakafeʻiloaki ia ki he ongoongoleleí ʻi he taʻu ʻe fitu kimuʻá. Naʻá ne talaange ki he haʻofangá, “Naʻe mei faingofua pē ke nau fakalaka ʻiate au, ka naʻe ʻikai. Naʻe mahuʻinga kiate au ke u maʻu ha faingamālie ke fanongo ki he ongoongoleleí. Naʻa nau kīvoi ʻi heʻenau fakahoko mai ia kiate aú.”
Naʻá ne kiʻi longo ai ʻo fuofuoloa peá ne toki pehē, “Kuó u faʻa fanongo ki ha kau tangata ʻoku nau tuʻu ʻi he houalotu sākalamēnití pe houalotu ʻaukai mo e fakamoʻoní, kau tangata ʻoku nau maʻu ʻa e lakanga fakataulaʻeikí, ʻoku nau tuʻu ʻo pehē ʻoku ou tui ko e ongoongoleleí ʻoku moʻoni.”
Kuó ne loto ʻi he taimí ni ke fai ʻene fakamoʻoní. Naʻá ne fakahā, “ʻOku ou ʻilo ko e ongoongoleleí ʻoku moʻoni. Pea ko ha ʻilo ia ʻoku vivili.”
Hili ʻa e ʻosi ʻa ʻIsapela Sanitana mo tuʻukimuʻa ʻi heʻene kalasí mei he ako māʻolunga ʻi Penimelitó, naʻá ne foki leva ki hono kolo tupuʻanga ko Siutati ʻOpileisoní ʻi he fakatokelau ʻo Mekisikoú. Naʻe ʻikai ke ne fakapapauʻi ʻa e meʻa naʻá ne fiemaʻu ke faí. ʻE lava pē ke toe foki ki Penimelito ʻo hū ki he ʻapiako teuteu taʻu tolú, ʻa ia naʻe fokotuʻu ki he f fānau ako kuo nau mateuteu ki he ʻunivēsití. Ka naʻá ne fakakaukauʻi fakamātoato ke nofo pē ʻi ʻapi ʻo hū ki he ʻapiako teuteu fakafeituʻu ʻa e puleʻangá.
Naʻe fiemālie pē ʻa e tamai ʻa ʻIsapelá ke tuku pē ke ne fai ʻene fili fekauʻaki mo e akó. Ka, naʻe ʻikai fuʻu loto ʻene faʻeé ke ʻalu ʻo ako ʻi ʻOpileisoni, he naʻá ne hohaʻa naʻa kau ʻi ha ngaahi ngaʻuta ʻa e fānau akó ʻi he feituʻú.
Naʻe fakakaukau ʻene faʻeé, “Kapau ʻe nofo pē heni, ʻe hoko ko ha taha fakafepaki tatau mo e taha kotoa.”
ʻI he kei taʻepauʻia ʻa ʻIsapelá, naʻá ne kole faleʻi ai kia ʻAkelikoli Losano ko ʻene faiako ʻi he meʻa fakapuleʻangá mo e talēkita ʻo e ʻapiako teuteuʻanga ʻi Penimelitó. Naʻá ne fakalotolahiʻi ia ke foki ʻo fakahoko ʻa e sivi huú.
Naʻe talaange ʻe ʻAkelikoli, “Haʻu ʻi he taimí ni. ʻOku ʻi ai ha ʻatā heni kiate koe.”
Naʻe foki ʻa ʻIsapela ki Mekisikou Siti, lavaʻi ʻa e siví, pea tali ke hū. Ka naʻe ʻikai ke ne fakapapauʻi pe naʻá ne fai ʻa e fili totonú, tautautefito he naʻe hā mei ha sivi fakafuofua naʻe feʻunga ia ki he ngāue ki he ngaahi meʻa fakasōsialé—ko ha ngāue naʻe ʻikai ke ne saiʻia ke feinga ki ai.
Naʻá ne talaange ʻi ha ʻaho ʻe taha kia ʻIfeleini Vilaposó, ko hono kaungāngāue falalaʻangá. “ʻOku ʻikai ke u fie hū au ki he ʻapiako teuteuʻangá.”
Talaange ʻe ʻIfeleini, “ʻOua, ʻoua, ʻoua. Ko ho feituʻú ʻeni.” Naʻá ne fakalotolahiʻi ia ke ne ʻahiʻahiʻi ʻa e ako fakafaiako ʻi Penimelitó. Naʻe ʻikai teuteuʻi pē ʻe he ʻapiako taʻu tolú ʻa e fānau akó ki he ʻunivēsití, ka naʻa nau toe fokotuʻutuʻu ke teuteuʻi kinautolu ke faiako ʻi he ngaahi akoʻanga naʻe fakalele ʻe he Siasí ʻi Mekisikoú. ʻA ia ʻe maʻu leva ʻe ʻIsapela haʻane ngāue ʻi haʻane fakakakato ʻene ngaahi kalasí.
Naʻe fakalotoʻi ia ʻe he ngaahi lea ʻa ʻIfeleiní, pea fetongi ʻapiako leva.
Naʻe vave ʻene saiʻia ʻi heʻene ngaahi kalasí mo ʻene kau faiakó. ʻI he lolotonga ʻo e ʻuluaki taʻú, naʻá ne ave ha ngaahi kalasi ako fakalūkufua pea pehē ki ha ngaahi kalasi ʻi he founga fakafaiakó, saienisi ʻo e akó, pea mo e hisitōlia ʻo e akó. Ko ʻene akó naʻe fai ʻi he akoʻi ʻo e fānaú, pea ʻi he lolotonga hono taʻu fakaʻosi ʻi he ako fakafaiakó, naʻá ne ngāue ʻi ha uike ʻe taha ʻi ha ako lautohi naʻe fakalele ʻe he Siasí ʻi Monitelei, ko ha kolo lahi ʻi he fakatokelau hahake ʻo Mekisikoú. Naʻe ʻikai ke teitei ongoʻi ʻe ʻIsapela ha ongo fakaʻaiʻai mālohi, pea naʻá ne hohaʻa naʻa kuo ʻikai ke ne maʻu ʻa e faʻa kātaki ke ngāue mo e fānaú, ka naʻe lelei pē ʻa e uiké.
Lolotonga ʻene ʻi he ako fakafaiakó, naʻe maheni lelei ʻa ʻIsapela mo Huani Masusua, ko ha talavou mei he matāfanga fakahihifo ʻo Mekisikoú naʻe toki foki mai mei he Misiona North Mexican. Naʻe fakamataliliʻi ʻe ha niʻihi ʻo hona ngaahi kaungāmeʻá kinaua ko ha ongomātuʻa. Naʻe kata pē ʻa ʻIsapela mo talaange ko Huaní ko e tokotaha fakamuimuitaha ia ʻe fie mali mo iá. Naʻá ne fakamahinoʻi ange, “Ko hoku kaungāmeʻa pē. He ʻikai ke u mali mo hoku kaungāmeʻá!”
Ka, ʻi he ʻosi ʻa e akó, naʻe fakatou fakangāueʻi kinaua ke na akoʻi ʻa e seminelí mo e ʻinisititiutí ʻi Penimelitó. Naʻá na loki ako taha pē, pea ʻikai fuoloa, kuó na kamata ō ki he heleʻuhilá mo na feohi lahi ange ʻi he taimi lahi. ʻI he konga kimuʻa ʻo e 1972, naʻe talanoa ʻa ʻIsapela mo Huani ʻi hono loto-falé , fakafokifā pē kuo fehuʻi ange ʻe Huani, “Te ke fie mali mo au?”
Naʻá ne tali ange, “ʻIo” hala ha kiʻi momou ʻi hono leʻó.
Naʻá na mali fakapuleʻanga ʻi Mē, ʻi he lolotonga ʻo e ngaahi ʻaho mālōlō ʻo e faʻahitaʻu māfaná. ʻOsi mei ai ha ngaahi uike siʻi peá na fononga maile ʻe tahaafe fāngeau mo ha kāingalotu ʻo e Siasí ki he temipale ʻi Mesa ʻi ʻAlesoná, ke maʻu hona ngaahi tāpuaki fakatemipalé. Ko e fononga pasi ʻaho ʻe tolú naʻe fuʻu ʻafu ʻi heʻenau tangutu ʻi he ngaahi sea pelesitikí mo e ʻikai ha ʻea fakamokomokó.
Ka naʻe ʻaonga pē ʻa e helá. Ko Mesa ʻa e ʻuluaki temipale ke fakahoko ai ʻa e ngaahi ouaú ʻi he lea faka-Sipeiní, pea ʻi he taimi ko iá, ko e temipale ofi taha ia ki he kāingalotu ʻo e Siasí ʻi Mekisikou mo ʻAmelika Lotolotó. Ki he Kāingalotu ko ʻení, ko e fonongá naʻe lōloa pea fiemaʻu ai ke nau fai ha ngaahi feilaulau lahi. Naʻa nau faʻa fai ʻa e fonongá ke kau ʻi ha konifelenisi fakataʻu ʻa e kāingalotu ʻAmelika Latiná, naʻe talitali ʻe he ngaahi siteiki ʻi Mesá. Naʻe lau ʻaho ʻa e ngaahi konifelenisi ko ʻení mo tāpuekina kinautolu naʻe kaú ʻaki ha ongo ʻoku nau kau mo ha kakai anga fakalaumālie.
Naʻe tūʻuta atu ʻa ʻIsapela mo Huani ki he temipalé, maʻu hona ʻenitaumení pea silaʻi fakataha kinaua ki he moʻuí ni mo e taʻengatá. ʻI heʻena moihū ʻi aí, naʻá na ongoʻi hono fakakoloaʻi ʻe he temipalé ʻena fakakaukau ki he moʻuí mo fakaloloto ʻena loto ʻaki ʻa e ongoongolelei ʻo Sīsū Kalaisí.
ʻI he konga kimuʻa ʻo e 1972, kuo tupulaki ʻa e ngaahi faiʻanga lotu ʻo Pili Sionisoní ʻi Keipi Kousi, Kaná , ki ha kāingalotu faivelenga ʻe laungeau. Naʻe kau ʻi he kau faivelenga taha ʻiate kinautolú ʻa e faʻē ʻa Pilí, ʻa Matilitā. Naʻe toe kau foki ʻa Sēkope mo Lili ʻAnitoa-Kēsoni mo ʻena fānaú, ʻi he kau mēmipa mo e ngaahi kaungāmeʻa mateakí ʻa ia naʻa nau kau ki he kulupú hili ʻa e aʻu atu ʻa Pili ki Keipi Kousí .
ʻI he tokolahi ange ʻa e kāingalotu ʻa Pilí, naʻá ne maʻu ha fale motuʻa naʻe fakaʻaongaʻi ʻi ha taimi ko ha falekoloa piini koko. Naʻe lahi ai ha ngaahi sea papa lōloa, fanga kiʻi sea iiki mo ha ngaahi tēpile, tuʻunga malanga, mo ha sea papa lōloa naʻe fakafalala ki ha holisi ʻe taha. Naʻe manukiʻi ʻe ha kakai ʻe niʻihi ʻi Keipi Kousi ʻa Pili mo hono kau muimuí ʻi heʻenau fakataha ʻi he fale motuʻá, ʻo ui kinautolu “ko e siasi fale koko.” Ka naʻe ʻikai ke tokanga ʻa e kau tui kuo tupu tokolahí ki heʻenau fakataha ʻi aí, naʻa mo e taimi ʻo e ʻuhá, naʻe tutulu hifo ʻi he ngaahi ava ʻi he ʻató pea naʻe pau ai ke nau feʻefiʻefihi fakataha pe fakaʻaongaʻi ha ngaahi fakamalu ke nau kei mātuʻu.
Naʻe fai ʻe Pili hono lelei tahá ke ʻasi fakalata ʻa e falé mo fakafiemālie. Naʻá ne tautau ha fakaʻilonga ʻi he vahaʻa ʻo e ongo matapā hūʻangá naʻe tohi ʻo pehē “Ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní (Kau Māmongá).” Naʻe teuteuʻi ʻaki ha tā ʻo Kalaisi ʻi he kolosí, ha holisi ʻe taha, kae ʻai ha tā ʻe taha ʻi he holisi ʻe tahá ʻoku ʻasi ai ʻa e Fakamoʻuí ʻoku mafao mai Hono ongo toʻukupú mo e kupuʻi lea ʻi ʻolunga ʻi Hono ʻulú, “Haʻu, kiate Au.” Naʻe tuʻu takai ʻi he ngaahi holisi vali lanu pulū vaivaí ha ngaahi tā ʻo Siosefa Sāmita, Kuaea Tāpanekalé, mo ha ngaahi ʻata kehekehe ʻo e Siasí.
Naʻe tauhi ʻe Lili ʻAnito-Kēsoni ʻa e falé ke maʻa. Naʻá ne aʻu vave ki ai ʻi he pongipongí ke teuteuʻi ki he ngaahi fakatahá. Naʻá ne mamata ki ha kau ʻāngelo ʻi ai, peá ne fakamatala ia ki heʻene tama fefineko Sāloté, pea ʻokú ne fiemaʻu ʻa e kau ʻāngeló ke nau maʻu ha feituʻu maʻa ke nau ʻi ai.
Naʻe fakataha tuʻo tolu ʻa e kāingalotu ʻo Pili ʻi he uike, ʻi he pongipongi mo e efiafi, ke nau lotu, ʻa ia naʻe fakahoko ai ha ngaahi himi, ngaahi tauʻolunga, pasipasi, lotu, kalanga fakahīkihiki, mo e ngaahi malanga. Taimi ʻe niʻihi naʻe malanga ʻa Pili mo hono kiʻi foha ko Pilikihamí ʻi hono umá.
Ko e taimi naʻe malanga aí, naʻe akoʻi ʻe Pili ʻa e ngaahi tefitoʻi moʻoni naʻá ne ako mei he lau ʻo e ngaahi tohi ʻa e Siasí, hangē ko e ngaahi tefito ʻe hongofulu mā tolu ʻo e tuí, mo fakamatala ha ngaahi talanoa ʻo e Kāingalotu paionia ʻi he Ngaahi ʻAho Kimui Ní. Ka ko e lahi tahá, naʻe manako ke faiako mei he Tohi ʻa Molomoná.
Naʻe tui ʻa Pili ʻe ōmai ʻa e kau faifekaú ʻi ha ʻaho mei he hetikuota ʻo e Siasí, ka naʻá ne manavasiʻi ʻe fakaʻau ʻo loto-foʻi hono kau muimuí ʻi he lolotonga ʻenau tatalí. Naʻe ʻi ai ha kakai naʻe aʻu ʻo nau mavahe mei he kulupú hili hano talaange ʻe he kau fakaanga ʻo e Siasí naʻe ʻikai ke saiʻia ʻa e Kāingalotu ʻo e Ngaahi ʻAho Kimui Ní ʻi he kakai ʻUliʻulí pea he ʻikai ke nau teitei ʻomai ha kau faifekau.
Naʻe faʻa hoko ʻa e malanga taʻe-tuku ʻa Pilí ʻi he taimi ʻe niʻihi ʻo palopalema ai mo e kau maʻu mafai fakalotofonuá. Naʻe tukuakiʻi ia ko haʻane fakamafola ha loi he naʻá ne fakamoʻoniʻi ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ko e siasi moʻoni pē taha ia ʻi he māmaní.
ʻI ha taimi ʻe taha, naʻe puke pōpula ai ia ʻe he kau polisí, ka kimuʻa pea nau ʻave ia ki he ʻapi polisí, naʻá ne vakavakai takai ʻo fakaʻamu ke ne ʻilo ha mata ʻoku maheni mo ia—ha taha ke ʻalu mo ia pea mo e kau polisí. ʻI he kamataʻangá, naʻe ʻikai ke ne ʻilo ha taha. Ka naʻá ne toki fakatokangaʻi ha taha naʻe ofi mai ko Sēmisi ʻEuti, ko ha kaungāmeʻa ʻo e fāmilí.
Naʻe tangi ʻa loʻimata ʻa Sēmisi ʻi heʻene ofi mai kia Pilí. Naʻe ʻikai ko ha mēmipa ia ʻo e kāingalotu ʻo Pilí, ka naʻá ne hili hono nimá kiate ia mo ui ia ko “Sofo,” ko e foʻi lea faka-Fenitī ki he taulaʻeikí. Naʻé ne talaange kia Pili, “ʻOua te ke hohaʻa. Te ta ō.”
Hili hono taki ki he ʻapi-polisí, naʻe vave hono fakakau ʻe Pili ʻa Sēmisi mo e kau polisí ʻi ha talanoa fakalotu. Ko ha toko fā ʻo e kau ʻōfisa polisí naʻa nau fiefia ʻi heʻene pōpoakí mo tui ki heʻene leá. Naʻe kamata foki ʻa e taki ʻo e kau polisí ke fakakaungāmeʻa kia Pili, pea ʻikai fuoloa, kuo tukuange ʻe he kau ʻōfisá ia mo Sēmisi. Kimui angé, naʻe fakaafeʻi ʻe he pule ʻo e kau polisí ʻa Pili ke ne akoʻi ʻa e ngaahi lēsoni ʻo e ongoongoleleí ki he kau polisi Keipi Kousí ʻi he pongipongi Falaite kotoa pē.
Lolotonga iá, naʻe misi ʻa Sēmisi naʻe fetaulaki mo Pili ʻi he falelotú. Naʻe kole ange ʻa Pili ke ne tūʻulutui, pea hili ʻene fai iá, naʻe huhulu mai ha maama ʻi he ʻató. Naʻe kuikui ʻa e fofonga ʻo Sēmisí, ka naʻe kei fakamaamangiaʻi pē ia ʻe he māmá. Peá ne ongoʻi ha leʻo ʻokú ne ui māmālie hono hingoá.
Naʻe folofola ange ʻa e ʻEikí, “ʻOku ou fie ʻomi hoku Siasí ki Kana.” Naʻá Ne tapou kia Sēmisi ke kau mo Pili. “Kapau te ke tokoni ki ai, te u tāpuakiʻi koe pea te u tāpuakiʻi ʻa Kana.”
Naʻe ʻiloʻi ʻe Sēmisi ko e meʻa naʻe folofola ange ʻaki ʻe he ʻEikí ʻi he misí, naʻe moʻoni, pea naʻá ne muimui leva ki Heʻene fekaú.