Vahe 15
Ko e Fiefia ‘o ha Fuakava Taʻengatá
Naʻe toloi ʻe he ngāue faka-Siasí ʻi Sōleki Siti, pea toki aʻu tōmui atu ʻa Palesiteni Hāloti B. Lī ki he konifelenisi lahi fakaʻēlia ʻi Mekisikou Sití. Naʻe tūʻuta ʻene vakapuná ʻi he konga kimuʻa ʻo e hoʻatā ʻo e ʻaho 26 ʻo ʻAokosi 1972, pea ʻi he efiafí naʻe ʻave meʻalele ia mei he feituʻu ki he feituʻu ke lea ʻi ha ngaahi fakatahaʻanga konifelenisi kehekehe ki he Fineʻofá, mo e kau maʻu Lakanga Taulaʻeiki Faka-Melekisētekí mo e ʻĒloné, pea mo e kau finemuí. ʻI he pongipongi hono hokó, naʻe hikinimaʻi ai ia ʻe he Kāingalotu ʻi he konfelenisí ko e palesiteni foʻou ʻo e Siasí—ko e fuofua haʻofanga lotu ia ʻi he māmaní ke nau fakahoko.
Naʻe foki mai ʻa e palōfitá ki ʻIutā ʻi ha ngaahi ʻaho siʻi mei ai, ʻo toki ʻiloʻi ai naʻe fai ʻe ha mēmipa ʻo ha kulupu hē mei he moʻoní ha fakamanamana ke fakapoongi ia.
Ke fakapapauʻi ʻa e malu ʻa Palesiteni Lií, naʻe kamata ke fakafeʻao ia ʻe he kau polisí ʻi ha feituʻu pē naʻe ʻalu ki ai. Naʻe hounga ki ai ʻenau maluʻí, ka naʻe fakahohaʻa ki ai ʻa e ʻi ai ʻa e kau ʻōfisá. Ko e kau palesiteni kimuí ni ʻo e Siasí kuo meimei ke nau ō pē ʻo ʻikai ke ʻi ai ha kau tangata maluʻi. Ko e taimi kotoa pē ʻi he taimi ko ʻení naʻe mavahe ai ʻa Palesiteni Lī, naʻe ʻikai ko ha meʻa siʻi hono kau fakafeʻao polisí.
Naʻe ʻikai fuoloa, kuo fakakaukau mo hono uaifi ko Sōaná, ke na kau fakataha mo ʻEletā Kōtoni B. Hingikelī mo hono uaifi ko Māsilií, ʻi ha ʻaʻahi ki he Kāingalotu ʻi ʻIulope mo ʻIsilelí.
Neongo ia, ʻe ʻi ai pē ʻene tuʻu fakatuʻutāmaki ʻo e folaú. Te nau fononga ʻo ʻikai fakapapauʻi ʻa e founga maluʻí, ʻi ha feituʻu taʻe-manonga ʻo e māmaní. Naʻe toki kaihaʻasi fakamālohiʻi mo fakapoongi ʻe ha kulupu Pālesitaine ha kau mēmipa ʻe toko hongofulu mā taha ʻo e timi ʻOlimipiki fakafonua ʻa ʻIsilelí ʻi he 1972 ʻi he Faʻahitaʻu Māfaná ʻi Miuniki ʻi Siamane Hihifo. Naʻe fakatupu ʻe he ʻohofi ko ʻení ke ngaʻuta ʻa māmani, pea naʻe manavasiʻi ʻa Palesiteni Lī naʻa hoko ha fepaki fakakautau ʻi ʻIsileli. Ka, naʻá na kei folau pē mo e fāmili Hingikelií, hangē ko e palaní.
Naʻe tūʻuta ʻa e kulupú ki he malaʻe vakapuna ʻi Tela Viiví ʻi ʻIsileli, ʻi he efiafi ʻo e ʻaho 19 ʻo Sepitemá. Naʻe ʻave meʻalele fakatonga hahake kinautolu ʻe Tēvita Kalipileti, ko ha mēmipa ʻo e Siasí mei Kānata naʻe lolotonga ako ʻi he ʻUnivēsiti Hepelū ʻo Selusalemá, ʻi ha maile ʻe fāngofulu ki he fakatongahahaké ki Selusalema. Naʻe fakapoʻuli ʻi he taimi naʻa nau aʻu atu aí, pea ʻikai ke nau lava ʻo sio ki ha meʻa fēfē, ka naʻe ʻi ai ha meʻa fakaʻofoʻofa ʻi heʻenau fononga ʻi he kolo kuonga muʻa toputapú ni.
ʻI he ʻaho ʻe tolu hono hokó, naʻe fakataha ai ʻa e fāmili Lií mo e fāmili Hingikelií mo e kau taki ʻo ʻIsilelí mo ʻaʻahi ki ha ngaahi feituʻu toputapu. Naʻe talaange ʻe Teti Kōleki, ko e pulekolo ʻo Selusalemá, kia Palesiteni Lī kuó ne ʻosi fanongo ʻi he talanoa ʻo e fai ʻe he ʻaposetolo ko ʻOasoni Haití ha lotu ʻi he Moʻunga ʻŌlivé ʻi he 1841. Naʻe talaange ki ai ʻe Palesiteni Lī ʻoku fiemaʻu ʻe he Siasí ke langa ʻi ha ʻaho ha fakamanatu pe senitā takimamata ʻi he koló ke fakamanatu ʻaki ʻa e lotú.
Naʻe pehē ʻe Kōleki, “ʻOku mau feinga ke maʻu ha kelekele ʻi he Moʻunga ʻOlivé ke langa ai ha paʻake ki he fakalaulaulotó.” “ʻE ngali malava ke ʻi ai ha maka fakamanatu mo e tohi ko ʻení ʻi he paʻaké.”
ʻI he efiafi ʻo e ʻaho 20 ʻo Sepitemá, naʻe fakataha ai ʻa Tēvita mo ha kiʻi kulupu Kāingalotu naʻe nofo ʻi ʻIsileli pea mo e fāmili Lií mo e fāmili Hingikelií ʻi ha fonualoto ʻi ha ngoue ʻoku tui ha niʻihi mahalo koe feituʻu ia naʻe tuku ai ʻa Sīsū hili hono Tutukí. Naʻe toka ha ongoʻi māluʻia ʻi he kulupú. Naʻa nau lava ʻo sioloto ki hono fata atu ʻa e sino pekia ʻo e Fakamoʻuí ki he fonualotó, pe ko e foki mai ʻa Mele Makitaline ki he ngoué ʻi he ʻaho hono tolú ʻo mamata ai ki he ʻEiki kuo toetuʻú.
Naʻe fokotuʻutuʻu ʻe Palesiteni Lī ʻa e Kāingalotú ʻi he ngoué ko ha kiʻi kolo, pea hoko ʻa Tēvita ko honau palesiteni. Neongo naʻe ʻikai laka hake ʻi he toko tolungofulú ʻa e kau mēmipa pau ʻo e Siasí naʻe nofo ʻi he fonuá, ka naʻe ʻi ai ha ngaahi kulupu fānau ako BYU naʻe toki kamata ke ō mai fakataimi ʻo ako ʻi he Fonua Tapú ʻi ha ngaahi māhina siʻi, ʻo laka hake ʻi he liunga uá ʻa e tokolahi ʻo e Kāingalotú ʻi he ngaahi houalotú. Naʻe tui ʻa Palesiteni Lī ʻe hoko ʻa e kiʻi koló ko e fakavaʻe ʻo ha ngāue maʻongoʻonga ʻi he feituʻú.
Naʻá ne faleʻi, “Ko e taimi ʻe ʻeke atu ai ʻe he kakaí pe ko hai kimoutolú, ʻoua te mou pehē ko e kau mēmipa ʻo e Siasi Māmongá pe Siasi LDS, kae talaange Ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.”
Naʻe foki ʻa Palesiteni Lī, ʻi he hili ʻo e fakatahá, ki hono loki ʻi he hōtelé. Naʻá ne ongoʻi ha langa lahi ʻi he konga ki lalo ʻo hono tuʻá ʻi ha ngaahi ʻaho, pea kamata ke tale pakupaku mo nounou ‘ene mānavá. ʻI he kamata ko ʻeni ʻa e ongosiá, naʻá ne hohaʻa naʻa ʻoku ʻi ai ha meʻa naʻe fehālaaki.
Kimui ange ʻi he pō ko iá, naʻe haʻu ʻa ʻEletā Hingikelī ki hona loki ʻi he hōtelé, ʻi he vili ʻa Sisitā Lií, ʻo faingāue kia Palesiteni Lī. ʻI he pongipongi hokó, naʻe tale mai ʻaki ʻe Palesiteni Lī ha toto mo ongoʻi kuo fiemālie leva ʻa e nounou ʻene mānavá. Naʻe ʻikai fuoloa kuo mālohi feʻunga ke kau fakataha mo Tēvita mo e fāmili Hingikelií ʻo ʻeveʻeva mo mamata ʻi Pētani, Selikō, Kāpaneume, Nasaleti, mo ha ngaahi feituʻu toputapu kehe.
ʻI he maʻu-meʻatokoni pongipongi ʻo e ʻaho hono hokó, naʻá ne talaange ai kia ʻEletā Hingikelī naʻá ne aʻusia ha mana. Naʻá ne ongoʻi ʻo hangē naʻá ne ʻi he ngutungutu ʻo e maté, ka ʻi he faingāue ʻa ʻEletā Hingikelií, naʻe fakafoki mai ʻe he ʻEikí ʻene moʻuí.
Naʻá ne pehē ʻi he loto houngaʻia, “Naʻe pau ke tau ōmai ki he fonua ʻo e ngaahi maná ke siotonu ʻi ha mana ʻiate kitautolu.”
Naʻe ʻamanaki ke nau mavahe mei Selusalema ʻi he efiafi ko iá, ko ia naʻa nau fakaʻaongaʻi honau taimi naʻe toé ke fononga ʻi he potu naʻe hāʻelea ʻe Sīsuú. Naʻa nau ʻaʻahi ki Ketisemani, fonua loto ʻo Lāsalosí, Pētelihema, mo e toenga ʻo e ngaahi ʻātakai ʻi he temipalé. Hili ia pea toki ʻave meʻalele kinautolu ʻe Tēvita ki he malaʻe vakapuná, ʻo nau heka ʻi ha vakapuna ki Loma, kuo fakafoʻou ʻenau tuí mei he meʻa kotoa kuo nau mamata ai mo foua ʻi he Fonua Tapú.
ʻI he ʻaho 7 ʻo Nōvema 1972, naʻe fanongo ʻa ʻĀteti Kepi ki he tatangi ʻa e telefoní ʻi heʻene hū atu ki hono fale nofoʻangá ʻi Paunitifulu ʻi ʻIutā. Ko Falanisisi Kīponi, ko e sekelitali ki he Kau Palesitenisī ʻUluakí, naʻe ʻi he tafaʻaki ʻe taha ʻo e laine telefoní. “ʻE lava ke mo talanoa mo ho husepānití ʻi he pongipongi ʻauhú mo Palesiteni Hāloti B. Lī ʻi hono ʻōfisí ʻi he 11:35?”
Naʻe fakatau ʻa e mānava ʻa ʻĀtetí mo pehēange, “Te ma ʻi ai.” Naʻá ne fifili ʻi he taimi pē ko iá, pe ko e hā ʻe fie talanoa ai ʻa Palesiteni Lī mo kinauá.
Ko ʻene ngāue mo hono husepāniti ko Hepá ko e faiako. Neongo naʻá na kei talavou—naʻá na taʻu fāngofulu mā taha pē—ka kuó na ngāue mālohi ʻi he Siasí ʻi ha ngaahi taʻu lahi. Ko ha mēmipa ia (ʻĀteti)ʻo e kau faiako ʻi he ʻUnivēsiti Pilikihami ʻIongí mo ngāue ʻi he Poate ʻo e Kōmiti Fakafekauʻaki ʻo e Toʻu Tupú ʻi he Siasí. Naʻe hoko [ʻa Hepa] ko ha pīsope kimuʻa pea ʻoku hoko ʻeni ko ha tokoni ʻi he kau palesitenisī fakasiteikí.
‘I he foki mai ‘a Hepa ki ‘apí, naʻe fakamatala ange ʻe ʻĀteti ki ai ʻa e telefoni maí. Naʻe fakakaukau [ʻa ʻĀteti] mahalo ʻe kole ange ʻa Palesiteni Lī ke hoko [ʻa Hepa] ko ha palesiteni fakamisiona. Naʻe ʻikai ke fakakaukau pehē ʻa Hepa, ka naʻá ne manavasiʻi naʻa ko ha meʻa ʻe pau ai ke na hiki. Naʻá na lolotonga langa hona fale pea ʻe pau ke liʻaki ʻa e langá kapau ʻe ui ke na ngāue fakafaifekau. Naʻe fakahoko pē ʻe Hepa ʻa e konga lahi ʻo e ngāué, pea he ʻikai ke na lava ʻo totongi ha taha ke ne fakaʻosi ia.
Naʻe ʻikai mamohe ʻa ʻĀteti ʻi he poó, ʻi heʻene fakakaukau ki heʻene moʻuí. Naʻe tokoniʻi maʻu pē ia ʻe he ʻEikí ʻi hono ngaahi faingataʻaʻiá. ʻI heʻene kei finemui ʻo nofo ofi ki Kātisitoni ʻi ʻAlapeta ʻi Kānatá, naʻe tō haʻane kalasi ʻe ua ʻi he akó. Ko ha niʻihi tokosiʻi pē naʻa nau ʻamanaki ʻe lelei ʻene akó, ka ʻi he tokoni ʻa e ʻOtuá, kuó ne maʻu kimuí ni ai ha fakaʻilonga MA ʻi he faʻu naunau fakalēsoní.
Ka naʻe ʻikai ko e meʻa faingataʻa tahá ia. Neongo naʻá ne fiemaʻu maʻu pē ha fāmili tokolahi, ka naʻe ʻikai ke na lava mo Hepa ʻo maʻu ha fānau, neongo ʻena toutou lotua ha maná. Naʻá na fakakaukau ʻi ha taimi ke ohi, ka ko e taimi kotoa pē naʻá na kolea ai ʻa e fakahinohino ʻa e ʻEikí he meʻa ko iá, naʻá na maʻu ha “fakakaukau fiemohea.” Naʻá na ongoʻi naʻe fakamāuʻi kinaua ʻe he kaungāʻapí, kaungāmeʻá, mo e fāmilí heʻenau pehē ʻokú na siokita ʻi he ʻikai haʻana fānaú. Ko ha fakakaukau taʻengata pē ki he palani ʻa e ʻOtuá naʻá ne ʻomai kiate kinaua ʻa e nongá mo na tali ʻoku fiemaʻu ke na fefaʻuhi mo ʻena mamahí.
ʻI he pongipongi ke na talanoa ai mo Palesiteni Lií, naʻe tailiili ʻa ʻĀteti mo Hepa ʻi heʻena aʻu atu ki he ʻŌfisi Pule ʻo e Siasí, ka naʻá na fiemālie ke tali ha ngāue pē ʻe ʻomai mei he ʻEikí. Naʻe talitali fiefia kinaua ʻe Palesiteni Lī mo fakaafeʻi mai kinaua ki loto ki hono ʻōfisí. Naʻá ne talaange, “Feinga pē ke mo nonga.” “ʻOku ou tui ʻokú mo ʻiloʻi ʻoku ʻikai ko ha talanoa angamaheni pē ʻeni.”
Peá ne toki fakamatala ki he fiemaʻu ke toutou fetongi ʻa e ngaahi faʻunga ʻi he Siasí ke tulituli hake ki he vave ʻene tupulekiná. Naʻe tautautefito ʻene tokangá ki he polokalama ʻa e toʻu tupu ʻo e Siasí. Naʻá ne tui ʻoku fiemaʻu ke fai ʻe he Siasí ha meʻa lahi ange ke fakamālohia ʻa e toʻu kei talavoú ke teuteuʻi kinautolu ke ngāue ʻi he puleʻanga ʻo e ʻOtuá. ʻI he ʻuhinga ko ʻení, naʻe toe fokotuʻutuʻu ʻa e Mutualé (MIA) ke tokangaʻi hangatonu ʻe he kau taki ʻo e Lakanga Taulaʻeiki Faka-ʻĒloné mo e Lakanga Taulaʻeiki Faka-Melekisētekí.
Naʻe fifili ʻa ʻĀteti, ʻi heʻene fanongo kia Palesiteni Lií, pea ko e hā te ne kole ange kia Hepa ke ne faí. Naʻe fakakaukau ai, “Ko e hā pē te ne fiemaʻu ia ki aí, ʻoku ou tui te ne fai ha ngāue lelei, pea ʻoku ou loto-fiemālie ke poupouʻi ia.”
Pea ui leva ʻe Palesiteni Lī ʻa ʻĀteti ke ngāue, ʻo ne ʻohovale ai. Koia ʻa e ʻuhinga naʻá ne ui ai kinaua ki hono ʻōfisí?
Naʻe fakamatala ange ʻe Palesiteni Lī naʻe toki lotó ni ʻa Lute Fangi ke hoko ko e palesiteni lahi ʻo e Mutuale ʻa e Kau Finemuí. ʻI heʻene ʻosi ngāue mo ʻĀteti ʻi he Kōmiti Fakafekauʻakí, kuo fokotuʻu ai ia ʻe Lute ke hoko ko e tokoni ua. ʻE tuʻu ʻa e ʻōfisi ʻo e kau palesitenisī foʻoú ʻi he fungavaka taha hiva ʻo e Fale ʻUluʻi ʻŌfisi ʻo e Siasí, ko ha taua naʻe toki ʻosí ni ʻi he loto kolo ʻo Sōleki Sití.
ʻI heʻene fōngiá, naʻe tali ai ʻe ʻĀteti ʻa e uiuiʻí, ʻo houngaʻia ʻi he falala kuo faí. ʻOsi ha taimi nounou mei ai, kuo fakahā fakaʻofisiale ʻe he Siasí hono fokotuʻu ʻo e polokalama ʻa e toʻu tupú. Kimuʻa hení, naʻe fakalele ʻa e KMFKF (YWMIA) ʻo tokangaʻi pē ʻe he Kau Palesitenisī ʻUluakí. ʻI heʻene hoko ko ʻeni ko e konga ʻo e ngaahi houalotu ʻa e Siasí, ʻe fakafekauʻaki leva ʻa e ngāue ʻa e KMFKF (YWMIA) mo e KMFKT (YMMIA) ʻi he malumalu ʻo e fakahinohino ʻa e Kau Pīsopeliki Pulé mo e kau taki lakanga fakataulaʻeiki fakauōtí mo fakasiteikí. Naʻe ʻomi foki ʻe he faʻunga foʻoú ha faikehekehe ʻi he KMF (MIA) Lakanga Taulaʻeiki Faka-Melekisētekí, pe taautaha lalahi ange, ʻi he taʻu hongofulu mā valú, mo e KMF (MIA} Lakanga Taulaʻeiki Faka-ʻĒloné, pe kau talavou mo e kau finemuí ʻi he taʻu hongofulu mā uá ki he hongofulu mā valú.
Neongo ʻe tokangaʻi ʻa e KMF (MIA) Lakanga Taulaʻeiki Faka-Ēloné ʻe ha kau taki lakanga fakataulaʻeiki, ka ʻe kei fakahoko pē ʻe he polokalamá ʻa e ngaahi kalasí ʻo fakatatau mo e tuʻunga tangata pe fefiné pea mo e taʻú, ki he tamaiki tangatá mo e fefiné. Tatau mo e ngaahi tuʻunga fakataulaʻeiki ʻo e tīkoní, akonakí, mo e taulaʻeikí, naʻe ui ʻa e kalasi ʻa e kau finemuí ko e Punungahone (taʻu 12–13), Maea Meiti (taʻu 14–15), mo e Loumaile (taʻu 16–18)—ko e ngaahi hingoa kuo fuoloa hono fakaʻaongaʻi pē ʻe he KMFKF (YWMIA). ʻI he ngaahi taʻu siʻi kimuʻá, naʻe kole ʻe he kau taki ʻo e Siasí ki he uooti kotoa ke nau kamata ha fakataha alēlea toʻu tupu ʻa e pīsopé, ʻo maʻu ai ʻe he toʻu tupú ha ngaahi faingamālie foʻou ke taki. Kuo fiemaʻu ʻeni ʻe he Kau Palesitenisī ʻUluakí ʻa e houalotu KMF (MIA) foʻoú ke ne ʻoange ki he toʻu tupú ha ngaahi faingamālie fakatakimuʻa foʻou.
Naʻe poupouʻi ʻe Palesiteni Fangi ʻa e vīsone ko ʻení ki he polokalamá. ʻI heʻene hoko ko e faiako ʻi he ako māʻolungá, kuó ne ʻoange ai ha ngaahi faingamālie lahi ki heʻene fānau akó ʻi he fakalau ʻa e ngaahi taʻú, ke nau tupulaki ko ha kau taki, pea kuo nau fakahoko ha ngaahi meʻa maʻongoʻonga. Naʻá ne pehē, “ʻOku ʻikai ke ke hoko ko ha [faʻahinga] meʻa ʻaki hoʻo fanongo pē ki aí. ʻOkú ke aʻusia ia ʻi hoʻo fakahoko iá.”
Ko e tefitoʻi moʻoní ko ha meʻa ia naʻe lava ke lotoʻaki ʻe ʻĀteti. Naʻe ʻikai fuoloa mei hono uiuiʻí, kuó ne tali ha ngāue ke kau ʻi ha ngaahi konifelenisi fakavahelahi ʻi Pilitānia. Naʻá ne manavasiʻi ʻi heʻene folaú he naʻe kei foʻou ʻi hono fatongiá. Ka naʻá ne toki manatuʻi ʻa e ngaahi lea ʻa Nīfai ʻi he Tohi ʻa Molomoná: “ʻOku ʻikai tuku mai ʻe he ʻEikí ha fekau ki he fānau ʻa e tangatá kae ʻikai te ne teuteu ha hala maʻanautolu ke nau lava ai ʻo fai ʻa e meʻa kuó ne fekau kiate kinautolú.”
Naʻá ne pehē ai kiate ia, “Kuó u ʻilo ia ʻi heʻeku moʻuí kotoa, ka ʻoku fiemaʻu ke u ʻiloʻi ia ʻi he taimí ni.”
Hili ʻa e papitaiso ʻo Helevēsio mo Luta Mātiní, naʻá na toki ʻilo ʻoku faʻa fie talanoa ʻa e Kāingalotu Palāsila kehé mo kinaua fekauʻaki mo e taʻofi ʻo e lakanga fakataulaʻeikí mo e temipalé. Naʻe fifili ha kakai ʻe niʻihi pe ʻe lava fēfē nai ke kei mālohi ʻa e fāmilí ʻi he Siasí ʻi he ʻikai ke lava ʻo fakanofo ʻa Helevēsio pe ko ʻena tamasiʻi ko Mākisí, ki he lakanga fakataulaʻeikí. Ko ha niʻihi tokosiʻi, naʻa nau taʻe-fiemālie ʻi he faivelenga ʻa e fāmili Mātiní, naʻa nau manukiʻi kinautolu.
Naʻe talaange ʻe ha tangata ʻe taha kia Helevēsio, “ʻOku ʻikai ke u tui te u kei nofo ʻi he Siasí,”
Ka, naʻe tokolahi ha Kāingalotu naʻa nau tanganeʻia ʻi he fāmili Mātiní ʻi heʻenau fakamoʻoni mālohi mo loto ʻaki honau ngaahi fatongiá. Hili ha māhina ʻe fā ʻo ʻenau kau ki he Siasí, kuo haʻu ʻa ʻEletā Pulusi R. Makongikī—ko e mēmipa foʻou taha ia ʻo e Kōlomu ʻo e Kau ʻAposetolo ʻe Toko Hongofulu-mā-uá—ki Lio ti Senelo ke fokotuʻu ʻa e siteiki hono nima ʻi Palāsilá. Ko e taimi ko iá, naʻe ʻikai mahino kakato kia Helevēsio ia hono faikehekehe ʻo e vahe-fonuá mo e siteikí, ka naʻá ne loto pē ke ne hoko ko ha tokoni ʻi he kau palesitenisī fakasiteiki ʻo e Lautohi Faka-Sāpaté. Taimi tatau, kuo tali ʻe Luta ha uiuiʻi ke kau ʻi he kau palesitenisī ʻo e Palaimeli ʻo e siteikí.
Naʻe kau ʻi he siteikí ha fuʻu ʻēlia lahi, ʻo aʻu ki ha sikuea maile ʻe lauiafe. Naʻe ʻoange ʻe he fatongia foʻou ʻo Helevēsio mo Lutá ha faingamālie ke na ʻaʻahi ai ki he ngaahi uooti mo e ngaahi kolo naʻe vāmamaʻo lahi ʻo e siteikí. Naʻe faʻa toki ʻave ʻe Helevēsio ʻa Luta mei he tauʻanga pasí ʻi he tuʻuapoó, ʻi heʻene foki mai mei hono fakahoko hono fatongiá. Neongo naʻe faingataʻa ʻa e ngaahi fiemaʻu foʻou ʻo kinauá, ka naʻe fiefia ʻa e fāmili Mātiní ke ngāue.
Naʻe liliu foki heʻena papitaisó hona vā fetuʻutaki mo e fāmilí. Naʻe ʻikai ke saiʻia ʻa e kau mēmipa ʻo e fāmili ʻo Lutá heʻene kau ki he Siasí, pea nau feinga ke fakalotoʻi ia mo Helevēsio ke liʻaki ʻenau tui foʻoú, mo tala ʻe hoko ha meʻa fakamamahi kiate kinaua. Naʻe aʻu ʻo fakatokanga ha niʻihi ʻi hono fāmilí ʻe ala toʻo ʻe he ʻOtuá ʻa e moʻui ʻena tamasiʻi ko Mākisí.
Ka naʻe lata ʻa e fāmili Mātiní ʻi he lotolotonga ʻo e Kāingalotú. Naʻe tali fiefia kinautolu ʻe he kāingalotu ʻo e koló pea fakakaukau ai ʻa Helevēsio naʻa kuo ngaohi leleiʻi hono fāmilí koeʻuhí ko hono tuʻunga fakapalofesinale māʻolungá. Neongo ia, ka ʻi he hili hano vahe ange ha kiʻi ngāue ʻikai fuʻu mahuʻinga ʻi ha ʻekitivitī fakakoló, naʻá ne fakatokangaʻi ta naʻe ʻikai ngaohi hono fāmilí ʻo toe kehe.
ʻI ha ʻaho ʻe taha, naʻe talaange ai ʻe hano kaungāmeʻa ʻi he Siasí kia Helevēsio, “Kuo fakahaaʻi ʻe he kau mēmipa faivelenga hangē ko koé ki he ʻEikí, ʻa hoʻomou totonu ki he lakanga fakataulaʻeikí. ʻOku ʻikai haʻaku toe veiveiua te ke maʻu ʻi ha ʻaho ʻa e lakanga fakataulaʻeikí.”
Naʻe hounga kia Helevēsio mo Luta ʻa e poupou hona ngaahi kaungāmeʻá mo e kaungā mēmipa ʻi he Siasí. Ka naʻá na loto ke ʻoua ʻe nofo ʻena fakakaukaú ʻi he fehuʻi pe ko e fē ʻa e taimi mo e founga ʻe maʻu ai ʻe he Kāingalotu ʻUliʻulí ʻa e ngaahi tāpuaki ʻo e lakanga fakataulaʻeikí. Naʻá na tui ʻe fakahoko ʻi ha ʻaho ʻe he ʻOtuá ʻa ʻEne ngaahi palōmesí kātoa. Ka, naʻe tukulotoʻi ʻe he fāmili Mātiní ʻenau ngaahi fakaʻamú ke maluʻi mei haʻanau loto taʻe-fiemālie mo loto-mamahi. Naʻa nau tui ko e ngaahi tāpuaki kakato ʻo e lakanga fakataulaʻeikí mo e temipalé te nau maʻu ia ʻi he Nofotuʻí. Ka, te nau lotu pē ki ha tui lahi ange mo ha ivi ke ngāue ʻi he Siasí, kae ʻoua ke hoko.
Hili hono fokotuʻu ʻo e Siteiki Lio ti Seneló, naʻe aleaʻi ʻe Helevēsio mo Luta ha taimi ke maʻu hona tāpuaki fakapēteliaké. Ko e taimi naʻe tāpuakiʻi ai ʻe Ualemia Siliva, ko e pēteliake ʻo e siteikí, ʻa Helevēsio mo Lutá, naʻá ne palōmesi ange te na moʻui fakataha “ʻi māmani ʻi he fiefia ʻo ha fuakava taʻengata.” Naʻe fakaʻofoʻofa ʻa e palōmesí, ka naʻe puputuʻu ʻa e fāmilí ʻi heʻenau aʻu ki ʻapi. Koeʻuhí ko e taʻofi ʻo e lakanga fakataulaʻeikí, naʻe ʻikai ke lava ʻa Helevēsio mo Luta ke hū ʻi he temipalé mo ʻikai ʻamanaki ke fai ʻa e ngaahi fuakava fakatemipalé ʻi he lolotonga ʻena moʻui fakamatelié. Ko e hā naʻe ʻuhinga ki ai ʻa e pēteliaké?
ʻOsi ha uike ʻe fitu mei ai, kuo ʻalu ʻa e tamasiʻi taʻu hongofulu-mā-fā ko Mākisí ki he ʻapi ʻo e pēteliaké ke maʻu hono tāpuakí. ʻI he tāpuakiʻi ia ʻe he pēteliaké, naʻe palōmesi ange kia Mākisi te ne maʻu ha ngaahi faingmālie ke malangaʻi ʻa e ongoongoleleí mo fakamoʻoni ki he moʻoní. Naʻe fakaʻuhingaʻi ʻe Helevēsio mo Luta ʻa e palōmesi ko ʻení ʻe ngāue fakafaifekau ʻa Mākisi. Ka naʻe ngali taʻe-malava mo ia. He ʻikai lava ʻa Mākisi ʻo ngāue fakafaifekau tuku kehe ka ne maʻu ʻa e lakanga fakataulaʻeikí.
Naʻe ʻikai loto ʻa e fāmili Mātiní ke uesia ʻe he ngaahi lea ʻa e pēteliaké ʻa e maʻumaʻuluta, mo e nonga ʻo ʻenau moʻuí. Naʻa nau pehē leva ke hoko atu pē ʻenau moʻuí ʻo hangē ko ia ʻi muʻá kae ʻoua ʻe fuʻu fakakaukau lahi ki he aʻusiá ni.
Ka, naʻe ʻikai loto ʻa Helevēsio mo Luta ke tukunoaʻi ʻa e ngaahi palōmesi naʻe fai angé. Telia naʻa hoko, naʻá na fakaava leva ai ha ʻakauni foʻou—ko ha paʻanga fakafaifekau kia Mākisi.
Naʻe ʻosi fakalongolongo pē ʻa e ʻAho Kilisimasi ʻo Sipenisā W. Kimipoló ʻi he 1973. Naʻá ne fakafetongi meʻaʻofa pē mo Kamila pea mo e tokoua ʻo Kamila ko Melé, ʻa ia naʻe fāʻeleʻi ʻoku ʻikai lava ʻo fanongo pea ʻoku nofo ʻeni mo kinaua. Naʻe ʻai ʻe Kamila ha pīpī ki he ʻōvaní, pea tokoni ki ai [ʻa ʻEletā Kimipolo] ʻi hono seti ha tēpile makehe ki he kau fakaafe naʻa nau ʻamanaki ki ai ʻi he maʻu meʻatokoni efiafí.
Naʻe fakaʻaongaʻi ʻe ʻEletā Kimipolo ʻa e toenga ʻo e pongipongí ʻi heʻene taipé, ʻi heʻene feinga ke fakaʻosiʻosi ha fokotuʻunga tohi naʻe teʻeki ke tali. Naʻe tā ha ngaahi hiva Kilisimasi ʻi he kalamafoní, pea naʻá ne faʻa mavahe mei he taipé ke fulihi ʻa e peleti kalamafoní.
ʻI heʻene aʻu ki he hoʻatā efiafí, naʻe aʻu mai ha niʻihi ʻo e fānau Kimipoló, mo e makapuná mo e makapuna uá ki he maʻu meʻatokoni efiafi ʻo e Kilisimasí. Naʻe kau ʻi he kau fakaafé ʻa Mangalo Teni Tipiti, ko ha tangata naʻe papitaiso ʻe ʻEletā Kimipolo ʻi he taʻu ʻe hongofulu mā ua ki muʻá ʻi Teli ʻi ʻInitia, pea mo ha kiʻi taʻahine Suni kei siʻi ko ʻĀlini, naʻe nofo mo e ʻofefine ʻo Kimipolo ko ʻŌlive Pefí, ko e konga ʻo e Polokalama Ako ʻa e Kau ʻInitiá. Naʻe kai mo hiva ʻa e kulupú, pea ʻalu ʻa ʻEletā Kimipolo ia ke mohe mo ne ongoʻi kuo lava lelei ʻa e ʻahó.
ʻI he efiafi hokó, ʻosi nai ʻa e valú, naʻe tali ai ʻe ʻEletā Kimipolo ʻa e telefoní ʻi hono ʻapí. Naʻe pehē mai ʻa e tokotahá, “Ko au ʻAfa.” Naʻe ʻilo ʻe ʻEletā Kimipolo ʻi he taimi pē ko iá ko ʻAfa Heikoka, ko e sekelitali ʻa Palesiteni Lií.
Tali fakalelei atu ʻe ʻEletā Kimipolo, “ʻOi, ʻAfa, ʻokú ke fēfē hake ʻi he pooni?”
Pehē mai ʻa ʻAfa, “ʻIkai ke fuʻu sai.” “ʻOku ou ʻi falemahaki mo Palesiteni Lī, ʻoku fuʻu puke lahi. ʻOku ou fakakaukau ʻoku totonu ke ke haʻu ʻi he taimí ni.”
Naʻe tāpuni atu ʻe ʻEletā Kimipolo ʻa e telefoní pea lele meʻalele hangatonu ki falemahaki, ʻo ne feʻiloaki ai mo ʻAfa ʻi he holó. Naʻe fakamatala ange ʻe ʻAfa naʻe haʻu ʻa Palesiteni Lī ki he falemahakí ke kiʻi mālōlō mo sivi. Naʻe tangutu pē ʻi he funga mohengá ʻi he taimi naʻe tuʻu fakafokifā ai hono mafú. Naʻe ui tokoni ʻa ʻAfa, pea taimi nounou pē kuo fonu ʻa e lokí ʻi he kau toketaá, kau nēsí, mo e meʻangāué. Naʻe kei femoʻuekina pē ʻa e feituʻú ʻi ha ngāue fakavavevave.
Naʻe aʻu mai ʻa Soana, ko e uaifi ʻo Palesiteni Lií mo ʻena taʻahine ko Hēlení mo hono mali ko Pelení. Naʻe talaange ʻe ʻAfa ʻoku totonu ke nau fakaʻataʻatā ʻa e loki ʻo Palesiteni Lií, pea maʻu ʻe he kiʻi kulupu tokosiʻí ni ha loki ʻatā ki kō atu ʻi he holó, ʻo nau lava ke talitali ai. Naʻa nau lotu fakataha mo tautapa ki he ʻEikí ke fakahaofi siʻi moʻui ʻa e palōfitá. ʻI heʻenau tatalí, naʻe aʻu mai ʻa Melioni G. Lomenei, ko e tokoni ua ʻo Palesiteni Lī ʻi he Kau Palesitenisī ʻUluakí.
ʻI he ʻikai mahino pe ko e toe hā ha meʻa ke nau faí, naʻe taki leva ai ʻe Palesiteni Lomenei ʻa e kulupú ʻi ha toe lotu. Pea toki hū mai leva ha toketā ki he lokí.
Naʻá ne pehē, “ʻOku mau fai ʻa e meʻa kotoa ʻoku mau lavá, ka ʻoku ʻikai ngali lelei.”
Naʻe fuʻu ʻohovale ʻa ʻEletā Kimipolo. Ko Palesiteni Lií, naʻá ne tokoniʻi maʻu pē ia ʻi hono ngaahi fokoutuá, kuo ʻosi taʻu fitungofulu-mā-fā—ʻo kei siʻi ange ia ʻi ai. Pea naʻe fotu moʻui lelei lahi ange. Naʻe fakakaukau ha tokolahi ʻi he Siasí ʻe kei moʻui fuoloa ange ia hili ha pekia ʻa ʻEletā Kimipolo. Pea naʻe ʻikai ha taha ʻe lotu mālohi ange ka ko e fāmili Kimipoló ke hoko atu siʻi moʻui lelei ʻa Palesiteni Lií.
ʻOsi ha miniti ʻe hongofulu. Naʻe mavahe ʻa ʻEletā Kimipolo mei he lokí ʻo lue atu ʻi he holó ki he loki ʻo Palesiteni Lií. ʻI heʻene ofi atú, naʻe hū mai ha toketā.
ʻO ne pehē ange, “Kuo ʻosi pē ʻemau feingá.” Kuo siʻi mālōlō ʻa Palesiteni Lī.