Vahe 18
Ngaahi Tāpuaki Kotoa ʻo e Ongoongoleleí
ʻI he hoʻatā efiafi ʻo e ʻaho 9 ʻo Māʻasi 1977, naʻe tuʻu ai ʻa Helivēsio Mātini (Helvecio Martins) mo ha kau faiongoongo ʻi he feituʻu ʻoku langa ai ʻa e temipalé ʻi Seni Paulo ʻi Palāsila. Naʻe meʻa mai ʻa Palesiteni Sipenisā W. Kimipolo ki he fonuá ki he ouau ʻo e maka tulikí, pea naʻe fakafuofua ki ha kakai ʻe toko toluafe naʻe ʻi ai ʻo mamatá, ko ha niʻihi naʻa nau toʻo ha ngaahi fakamalu ke maluʻi kinautolu mei he ulo vevela ʻo e laʻaá. ʻI heʻene hoko ko e talēkita ʻi he fetuʻutaki mo e kakaí ki he Vāhenga Fakatokelau ʻo e Siasí ʻi Palāsilá, naʻe ʻi ai ai ʻa Helevēsio ke tokoni ki he kau faiongoongó ʻi hono fakamatalaʻi ʻa e meʻa ʻoku hokó.
ʻI he taʻu ʻe tolu kimuʻá naʻe ʻosi tali ʻe Helevēsio ʻa e ui ke ne ngāue ʻi he fetuʻutaki mo e kakaí ʻa e Siasí. Naʻá ne fakakaukau ko ha falala lahi moʻoni ia ke fai ki ha mēmipa foʻou. Ka naʻá ne fakafemoʻuekinaʻi ia ʻi he fatongiá, ʻo fakaʻaongaʻi hono ʻiloa ia ko ha taha pule pisinisi ʻiloá ke fakahoko ha ngaahi fetuʻutaki mahuʻinga ʻi he mītiá mo fakaava ha ngaahi matapā ki he Siasí.
Ko ha konga ʻo e ngaahi fatongia foʻou ʻo Helevēsió naʻe kau ai hono fakamafola ʻo e fakamatala fekauʻaki mo e temipalé. Kuo meimei ʻosi ʻeni ha vahetolu ʻe taha ʻo e temipalé, ko hono ngaahi holisí naʻe ʻosi māʻolunga ange ʻi he kelekelé. Naʻe fiemaʻu ʻe he taha tā-mape ʻa e Siasí ko ʻĒmili Fetisaá (Emil Fetzer) ʻa e maka māpele hinehina ʻo ʻĪtalí ki he tafaʻaki ki tuʻa ʻo e temipalé, ka ʻi he taimi naʻe mahino ai he ʻikai lava ʻa e fakakaukau ko iá, mo ha ngaahi meʻa kehe pē, naʻá ne ʻomai leva ha taha tufunga (craftsman) ke ne akoʻi ʻa e kau mēmipa fakalotofonua ʻo e Siasí ʻi he founga hono ngaohi fakahangatonu ʻa e ngaahi konga maka simá ʻi he tuʻuʻanga ʻo e temipalé.
Naʻe fakahoko ʻe he Kāingalotu Palāsilá, fakataha mo ha Kāingalotu mei ha ngaahi konga kehe ʻo ʻAmelika Tonga pea mo e fonua ʻo ʻAfilika Tongá, ha ngaahi feilaulau fakapaʻanga lahi ke fakapaʻanga ʻa hono langa ʻo e temipalé. Naʻe totongi ʻe he Kāingalotu ʻi Palāsilá ʻa e pēseti ʻe 15 ʻo hono mahuʻinga fakakātoá. Naʻe foaki ʻe Luta, ko e uaifi ʻo Helevēsió ʻa e siueli naʻá ne maʻu mei heʻene ongomātuʻá, ki he sinoʻi paʻangá.
Neongo naʻe nofoʻamanaki ʻa Helevēsio mo Luta ki ha ʻosi ʻa e temipalé, naʻe fakamamahi kiate kinaua ʻa e ʻikai ke na lava ʻo kau ʻi he ʻenitaumení mo e silá koeʻuhí ko ʻena kili ʻUliʻulí. ʻI ha meʻa ʻe taha, lolotonga ʻena ʻaʻahi takai ʻi he ngaahi alangafale ukamea ʻo e temipalé mo e faliki teʻeki ʻosí, naʻá na tuʻu ʻi ha kiʻi konga kelekele. Naʻe ongo ʻa e Laumālié ki hona lotó. Naʻá na tuʻu ʻi he feituʻu ʻe tuʻu ai ʻa e loki silesitialé.
Naʻá na fekita, peá na fetāngihi. Naʻe talaange ʻe Helevēsio, “ʻOua te ke tokanga ki ai, ʻoku ʻafioʻi ʻe he ʻEikí ʻa e meʻa kotoa.”
ʻI he kei tali ʻa Helevēsio ke kamata ʻa e ouau ʻo e maka tulikí, naʻe kiʻi hila atu kia Palesiteni Kimipolo, naʻe meʻa pē ʻi ha kiʻi funga siteisi siʻisiʻi ʻo ofi ki he holisi ʻo e temipalé. Naʻe hangē naʻe kamo mai ʻa e palōfitá ki aí, ka naʻe ʻikai ke fakapapauʻi ʻe Helevēsio. Naʻá ne fakatokangaʻi atu ʻoku fafana ange ʻa Palesiteni Kimipolo ha meʻa kia ʻEletā Sēmisi E. Fausi, ko ha mēmipa foʻou naʻe toki ui ʻo e Kōlomu ʻUluaki ʻo e Kau Fitungofulú naʻe ngāue fakafaifekau ʻi Palāsila ʻi he lolotonga ʻo e 1940 tupú. Pea toki sio mai leva ʻa ʻEletā Fausi kia Helevēsio. Naʻá ne fafana mai pē, “Haʻu ki heni.” “ʻOku fie lea atu kiate koe.”
Naʻe mavahe leva ʻa Helevēsio ʻo ʻalu ki he siteisí. ʻI heʻene ofi atú, naʻe tuʻu hake ʻa Palesiteni Kimipolo ʻo fāʻofua ki ai. Pea hili hake hono nimá ki hono tuʻá mo sio hake ki ai. Naʻá ne pehē ange, “Tokoua, ko e lea mahuʻinga kiate koé ko e faivelenga.” “Faivelenga pē pea te ke fiefia ʻi he ngaahi tāpuaki kotoa ʻo e ongoongoleleí.”
Naʻe fakahoungaʻi ʻe Helevēsio ʻa e fakalotolahí, ka naʻá ne puputuʻu. Ko e hā ʻa e ʻuhinga ʻa Palesiteni Kimipoló?
Kimui ange, ʻi he ʻosi hono fakatoka ʻo e maka tulikí, naʻe toe haʻu ʻa Palesiteni Kimipolo kia Helevēsio ʻo puke maʻu hono nimá. Peá ne toki hili leva hono nima ʻe tahá ʻi he uma ʻo Helevēsió.
Naʻá ne pehē ange, “ʻOua naʻa ngalo Brother Mātini” “ʻOua naʻa ngalo.”
ʻI he konga kimui ʻo e taʻu ko iá, ʻi he Lepāpulika Fakatemokalati ʻo Siamané, naʻe fakatokangaʻi ʻe Henelī Pēkihaati (Henry Burkhardt) ha ʻōfisa Siamane Hahake naʻe tangutu ʻi he ʻotumuʻá ʻi ha fakataha ʻa e Siasí ʻi Tulisiteni (Dresden). Ko hono hingoá ko Mīsisi Fisa, pea naʻá ne tokangaʻi ʻa e ngaahi ʻekitivitī fakalotu fakafeituʻu ʻi he ʻēliá. Kuo laka hake ʻeni ʻi ha taʻu ʻe ua ʻa e ʻikai ke toe feinga ʻa Henelī ke ʻi ai hano ngaahi kaungāmeʻa ʻi he puleʻanga Siamane Hahaké. Naʻá ne kole kia Mīsisi Fisa ke haʻu koeʻuhí ko hono fatongiá.
Naʻe makehe ʻa e fakatahá koeʻuhí he naʻe ʻi ai tonu ʻa Palesiteni Kimipolo. Ko e fakaʻosiʻosi ia haʻane ʻaʻahi ki ha fonua ʻe fitu ʻoku ʻi ai ʻa e Siasí ʻi ʻIulope, pea ʻoku ʻi ai mo ha ngaahi houa siʻi ke feʻiloaki ai mo e Kāingalotu ʻi he Lepāpulika Fakatemokalati ʻo Siamané. Naʻe fakahoko ia ʻi ha hoʻatā ʻi he lolotonga ʻo e uiké—ʻoku ʻikai ko ha taimi lelei ia ki ha fakataha—ka ʻoku fakafuofua ki ha Kāingalotu ʻe toko tahaafe uangeau naʻa nau fakafonu ʻa e ngaahi nofoʻangá mo tuʻu he feituʻu naʻe ʻataá.
Naʻe ʻikai ke teitei ʻilo ʻe Henelī ʻa e meʻa ʻe lea ki ai ʻa Palesiteni Kimipoló. Naʻe tokanga ʻa e Lepāpulika Fakatemokalati ʻo Siamané ki he ngaahi lea ʻa e kau taki ʻo e Siasí, pea naʻe faʻa hohaʻa ʻa Henelī mo e Kāingalotu ʻo Siamane Hahaké ʻi he taimi kotoa pē ʻoku fakahalaki fakahāhā ai ʻe ha taki māʻolunga ʻa e tui fakakominiusí. ʻOku faʻa fakaʻitaʻi ʻe he faʻaahinga lea peheé ʻa e puleʻangá pea mo ʻai ʻa e Kāingalotu ʻi Siamane Hahaké ke nau fakafepaki.
Ko e taimi naʻe tuʻu ai ʻa Palesiteni Kimipolo ʻi he tuʻunga malangá ʻi Tulisitení, naʻe ʻikai ke toe hohaʻa ʻa Henelī ki ha meʻa. Naʻe lea ʻa e palōfitá fekauʻaki mo e tefito ʻo e tui hono hongofulu mā uá: “ʻOku mau tui ʻoku totonu ke fakaongoongo ki he ngaahi tuʻi, kau palesiteni, kau pule, mo e kau fakmaau fakapuleʻanga, ʻi he talangofua, fakaʻapaʻapaʻi mo poupou ki he laó.” Naʻá ne fakakaukau ko e lelei taha ki he Siasí ke talangofua ki he fakakaukau ko ʻení.
Naʻe fakatou fakaofo kia Henelī mo Mīsisi Fisa ʻa e leá. ʻI he ʻosi ʻa e fakatahá naʻá ne pehē ange, “Misa Peekihaati, naʻe lea homou palesitení fekauʻaki mo e meʻá ni koeʻuhí ko au?”
Naʻe tali ange ʻe Henelī, “ʻIkai ʻaupito.” “Ko ha pōpoaki ʻeni ʻoku fiemaʻu kotoa ʻa e Kāingalotú ke nau fanongo ki ai he taimi ko ʻení”
Naʻe ʻikai ke fuoloa mei he ʻaʻahi ʻa Palesiteni Kimipoló, kuo lea fakahangatonu ʻa ʻĒliki Honeká (Erich Honecker), ko e ʻōfisa māʻolunga taha ʻo e Lepāpulika Fakatemokalati ʻo Siamané, ʻa ʻene fakaʻamu ke ngāue fakataha mo ha ngaahi kulupu fakalotú ke fakaleleiʻi ʻa e faʻahinga ʻo e tangatá. Neongo naʻe ʻoange ʻe heʻene ngaahi leá ki he kakai Siamane Hahake tokolahi ha ʻamanaki lelei ki he kahaʻú, ka naʻe kei hoko atu pē hono ʻikai ke tali ʻe he kau pule ʻo e Lepāpulika Fakatemokalati ʻo Siamané ʻa e ngaahi visa ʻa e kāingalotu naʻe fakaʻamu ke nau ō ki he Temipale Suisalaní. Naʻe ʻikai ke mahino ki he puleʻangá ʻa e ʻuhinga ʻoku fiemaʻu ai ʻe he kau mēmipa ʻo e Siasí ke nau ō ki Suisalaní ka te nau lava pē ʻo lotu ʻi he ngaahi falelotu ʻi he Lepāpulika Fakatemokalati ʻo Siamané. ʻIkai ngata ai, ka naʻa nau manavasiʻi naʻa fakaʻaongaʻi ʻe he Kāingalotú ʻa e folaú ke nau hola ai mei he fonuá.
Taimi nounou pē mei ai, kuo haʻu ʻa Pīsope H. Peeki Pitasoni (H. Burker Peterson), ko e tokoni ʻuluaki ʻi he Kau Pīsopeliki Pulé, ki he Lepāpulika Fakatemokalati ʻo Siamané. Lolotonga hono aleaʻi ʻa e ngaahi faingataʻaʻia ʻa e Kāingalotú ke maʻu ha visa ke ō ki he Temipale Suisalaní, kuo fehuʻi ange ʻe Pīsope Pitasoni kia Henelī, “Ko e hā ʻoku ʻikai malava ai ke fakatapui ha loki ʻi heni ke lava ʻa e kau mēmipá ʻo maʻu ai honau ʻenitaumení?”
Naʻe fakatupu fakakaukau ʻa e meʻá ni kia Henelī, ka naʻá ne fakakaukau pē he ʻikai ke malava. Ka, ʻi ha ʻosi ha uike ʻe tolu mei ai, naʻá ne lolotonga fakataha mo ha kau ʻōfisa ʻo Siamane Hahake, mo e toe ʻasi hake ʻa e kaveinga ki he ngaahi temipalé pea mo e visa ki he folaú. Naʻe kei fakafisi pē ʻa e kau ʻōfisá ke tukulolo ʻi he palopalemá. Ka naʻa nau tui ʻe lava ke fai ha felotoi mo e Kāingalotú.
Naʻe talaange ʻe ha ʻōfisa ʻe taha, “Ko e hā ʻoku ʻikai ke mou langa ai ha temipale ʻi hení?”
Naʻe talaange ʻe Henelī, “ʻOku ʻikai ke malava ia.” Naʻe fakafuofua ki ha kau mēmipa pē ʻe fāafe uangeau ʻi he Lepāpulika Fakatemokalati ʻo Siamané—ʻikai ke tokolahi feʻunga ia ki hono langa ʻo ha temipale. Naʻá ne pehē, “ʻIkai ngata ai, ko e ngaahi ouau ʻi he temipalé ʻoku fiemaʻu ia ke tauhi ke toputapu.” He ʻikai ke lava ʻe he puleʻangá ia ʻo tokangaʻi ia ʻi he founga tatau ʻokú ne tokangaʻi ai ʻa e ngaahi fakataha ʻa e Siasi kehé.
Naʻe talaange ʻe he kau ʻōfisá, “ʻOku ʻikai ha palopalema ia ʻe taha.” “Kapau ʻe lava homou kau mēmmipá ke maʻu ʻa e aʻusia tatau ʻi heni ʻo hangē ko ia ʻoku nau maʻu ʻi Suisalaní, he ʻikai fiemaʻu ia ke mou folau ki Suisalani.”
Naʻe ʻikai teitei ʻamanaki ʻa Henelī ʻe fanongo ki he ngaahi lea ko iá. Naʻe ʻikai pē ke ʻi ai haʻane fakakaukau ʻe lava ke langa ʻe he Siasí ha temipale ʻi he Lepāpulika Fakatemokalati ʻo Siamané. Ka ko ha liliu moʻoni ia kuo hoko! Kuó ne lava ʻeni ʻo sio ki he fakapotopoto ʻo e faleʻi ʻa Palesiteni Kimipolo ke fakaleleiʻi hono vā mo e puleʻangá. Naʻá ne toki pehē ai, “ʻI he taimi ʻoku tuku atu ai ʻe he palōfitá ha ngāue kiate koe, ʻoku totonu moʻoni ke ke fakahoko ia.”
ʻIo, naʻe ʻikai ke ne ʻilo pe ʻe fakangofua ʻe he Kau Palesitenisī ʻUluakí ha temipale ʻi he Lepāpulika Fakatemokalati ʻo Siamané. Ka te ne kole.
ʻI he kamataʻanga ʻo e 1977, naʻe fakamoveteveteʻi ʻe he Lao Fakaangaanga ʻo e Totonu ke Tuʻunga Tatau ʻi he ʻIunaiteti Siteití, ʻa e kakai ʻAmeliká. Naʻe toe pē ha siteiti ʻe fā ke nau tali ʻa e ERA kae lava ke fakahoko. ʻI he fahaʻitaʻu māfana ko iá, ‘i he konivēsio fakafeituʻu ʻa e kakai fefiné mo e ʻamanaki atu ki he konivēsio fakafonua ʻi Nōvemá, naʻe tālangaʻi mo fakakikihiʻi ʻa e lao fakaangaangá pea mo hono ngaahi palopalemá.
Naʻe faʻa lea ʻa e palesiteni lahi ʻo e Fineʻofá, Pāpulā B. Simifi (Barbara B. Smith) mo ha kau taki kehe ʻe niʻihi ʻo e Siasí ʻo fakafepakiʻi ʻa e ERA. ʻI heʻenau ako ʻa e lao fakaangaangá, naʻa nau tokanga ki hono fakaʻaongaʻi lahi ʻo e ngaahi totonu naʻe ʻikai fekauʻaki mo e ngaahi faikehekehe ʻi he houʻeiki fafiné mo e houʻeiki tangatá. Naʻa nau hohaʻa naʻa fulihi ʻe he ERA ʻa e ngaahi lao ʻoku nau maluʻi ʻa e ngaahi meʻa ʻoku mahuʻinga ki he houʻeiki fafiné hangē ko e ngaahi meʻa fekauʻaki mo e veté, tauhi ʻo e malí mo e fānaú, ngāue fakakautaú, mo e ngaahi tafaʻaki kehe ʻo e moʻui fakaʻahó.
Naʻe toe tailiili foki mo e kau taki ʻo e Siasí ʻi he tokolahi ʻo e kau taukaveʻi ʻo e ERA naʻa nau tuʻukāivi ʻi he ngaahi angafai hangē ko e fakatōtamá, ʻa ia ʻoku fakahalaki ʻe he Siasí tukukehe ʻi he tohotohó pe ʻi he taimi ʻoku tuʻu fakatuʻutāmaki ʻaupito ai siʻi moʻui ʻa e faʻeé. Ko hono moʻoní, naʻa nau loto ki he lao ʻokú ne ʻomi ʻa e tuʻunga tataú ʻaki ʻenau nofotaha ki ha ngaahi meʻa pau ʻoku kaunga ki he taʻe fakamaau totonú pe ʻikai ke tufa tatau he sosaietí.
ʻI he ngaahi māhina ofi ki he konivēsio fakafonuá, naʻe fakalotolahiʻi ʻe he kau taki ʻo e Siasí ʻa e Kāingalotú ke nau kau ʻi he ngaahi meʻa fakapolitikalé. Neongo naʻe mahino ki he meimei Kāingalotu tokolahi ʻo e Ngaahi ʻAho Kimui Ní ʻoku poupouʻi ʻe he kau taki ʻo e Siasí ʻa e ngaahi lao ʻoku ʻaonga ki he houʻeki fafiné, ka naʻe ʻi ai ha Kāingalotu ʻe niʻihi naʻe ʻi ai haʻanau ngaahi fehuʻi fekauʻaki mo e tuʻunga ʻo e Siasí ʻi he ERA.
ʻI he ʻaho 25 ʻo ʻOkatopá, naʻe maʻu ai ʻe ʻEli Kolotoni (Elli Colton), ko ha palesiteni Fineʻofa fakasiteiki ʻi Uāsingatoni DC, ha telefoni mei a Toni Leti (Donn Ladd), ko ha fakafofonga fakavahelahi naʻe hoko ko e palesiteni fakasiteiki kimuʻa ʻa ʻEli. Naʻá ne telefoni mai mo ha kole makehe mei he hetikuota ʻo e Siasí.
Naʻe fakahoko ʻe ha taha poupou fefeka ʻo e ERA ha maʻu meʻatokoni efiafi ʻi Uāsingatoni DC, ke aleaʻi ʻa e lao fakaangaangá, pea ʻoku taumuʻa ke ne ʻomi fakataha ʻa e kakai fefine ʻo e ongo tafaʻaki ʻokú na tuʻu fehangahangaí, pea kau ai ʻa e houʻeiki fafine ʻo e Ngaahi ʻAho Kimui Ní. Naʻe fiemaʻu ʻe he kau taki ʻo e Siasí ke ʻi ai ʻa ʻEli.
Naʻe talaange ʻe ʻEletā Leti kia ʻEli, “Kapau ʻe tukuatu ha faingamālie, ʻoku totonu ke ke fakamatalaʻi ʻa hono fakafepakiʻi ʻe he Siasí ʻa e ERA.”
Naʻe talaange ʻe ʻEli, “Brother Leti, ʻoku ʻikai ke u fakapapauʻi ʻoku mahino ia kiate au.”
Naʻá ne fakamahinoʻi ange, “Sai pē, ʻoku toe ha ʻaho ʻe tolu ke ke fekumi ki ai.”
ʻI he ʻosi ʻa e telefoní, naʻe ongoʻi moʻutāfuʻua ʻa ʻEli ʻi he meʻa naʻe loto ke ne faí. Kuó ne hoko maʻu pē ko ha taha faʻa-fakalelei mo ha taha naʻe fakaʻehiʻehi mei he fakafekikí. Te ne lava fēfē ke kei tuʻu maʻu ʻo fehangahangai mo ha loki ʻoku fonu ʻi ha kakai fefine ʻoku lahi ʻenau ʻiló? Naʻe ʻikai ke ngata pē ʻi he ʻikai mahino ki ai ʻa e ERA pe ko e tuʻunga ʻo e Siasí ʻi aí. Naʻe ʻikai foki ke lelei ʻa ʻene fanongó pea manavasiʻi ai naʻa hanga ʻe heʻene faingataʻaʻia fakasinó ʻo ʻai ke faingataʻa ke mahino ʻa e meʻa naʻe leaʻaki ʻi he fakatahá.
Naʻe foki leva ʻa ʻEli ʻi he taimi pē ko iá ki he vao ʻakau ʻi hono tuʻafalé ke lotu. Naʻá ne fakahā ki he ʻEikí ʻa e lahi ʻo ʻene taʻetāú mo ʻene ilifiá. Hili ia peá ne vakaiʻi leva ʻa e ngaahi tāpuaki ʻo ʻene moʻuí, mo fakapapau ke fai ʻa e meʻa kotoa ʻi hono mālohí ke mahino pea mo fakamatalaʻi ʻa e tuʻunga ʻo e Siasí ʻi he ERA.
ʻI heʻene foki ki ʻapí, naʻe telefoni leva kia Melolini Lolape (Marilyn Rolapp), ko e taki ʻi he ngaahi fetuʻutaki fakasōsiale ʻi he Fineʻofa ʻa e siteikí, ʻo kole ke na ō ki he pātí. Naʻe toe telefoni foki ki hano kaungāmeʻa ʻi ʻIutā ʻo kole ke ne ʻomai ha ngaahi fakamatala lahi ange.
Naʻe aʻu mai ʻa e fakamatalá ʻi he ʻaho hono hokó. Naʻe kamata leva ke ako ia ʻe ʻEli mo Melolini, pea ʻi he taimi naʻá na mavahe ai ki he pātí, naʻá na ongoʻi mateuteu ke aleaʻi ʻa e ERA mo ha taha pē. ʻI he pō kimuʻá, naʻe ongoʻi tailiili ai ʻa ʻEli mo ongosia fakaʻatamai, ka naʻe fakafiefiaʻi ia ʻe hono ʻofefiné. Naʻá ne talaange, “Nofo pē ʻi he ngaahi meʻa ʻoku mahino kiate koé, pea kimuʻa peá ke ʻalu ʻo mohé, lau ʻa e vahe 100, veesi 5 ʻo e Tokāteline mo e Ngaahi Fuakavá.
Ko e folofolá pē ʻa e meʻa naʻe fiemaʻu ʻe ʻEli ke fanongo ki aí. ʻOku pehē: “Hiki hake homo leʻó ki he kakaí ni; lea ʻaki ʻa e ngaahi fakakaukau te u fakahū ki homo lotó, pea ʻe ʻikai veuveuki ʻa kimoua.”
ʻI he aʻu atu ʻa ʻEli mo Melolini ki he pātí, naʻá na toki ʻilo kuo kaniseli ʻe he kau fokotuʻutuʻú ʻa e meʻá, ʻi heʻenau tui he ʻikai hano ʻaongá. Naʻe ʻosi fakahoko foki ʻe he sea ʻo e konifelenisi fakafonua ʻo e kakai fefiné haʻane fakataha mo e kau faiongoongó ʻa ia naʻá ne lau ai ʻoku kau ʻa e Siasí ʻi he ngaahi kulupu fakafepaki ʻoku nau palani ke veuki ʻa e konivēsió.
ʻI hono uesia ia ʻe he ngaahi lea ko ʻení, naʻe pehē leva ʻe ʻEli ke ne pulusi ʻene ngaahi fakakaukaú ʻi ha fakamatala ki he nusipepa Washington Post, ko ha nusipepa ʻoku tokolahi fau hono kau lau nusipepa ʻi he fonuá. Naʻá ne tohi, “ʻOku ʻikai ke fakafepaki ʻa e Siasí ia ki he ngaahi totonu ʻa fafiné.” “ʻOku taʻengali ia mo e kau taki ʻo e konifelenisí ke nau fakahā mai ʻoku fakafepaki homau Siasí ki he konifelenisí koeʻuhí pē he ʻoku kehe hono ngaahi tuʻungá mei haʻanautolú.”
Naʻá ne fakamatalaʻi ʻa e ngaahi hohaʻa ʻa e Siasí fekauʻaki mo e lao fakaangaangá pea mo ʻene uesia ʻa e fāmilí. Peá ne fakahā leva ʻene poupou ki he faʻahinga tuʻunga hangē ko e totongi tataú mo e ngaahi faingamālie fakapalōfesinale maʻá e kakai fefiné ʻo hangē ko hono ʻofefiné, naʻe palani ke vavé ni pē haʻane hū ki he ʻapi ako laó.
“ʻOku poupou ki he totonu ʻa e kakai fefiné. ̄Naʻá ne fakahā ʻi heʻene tohi ki he ʻētitá, ʻʻOku ou poupou ki hono fakatonutonu ʻo e tuʻunga taʻe-tataú.” “ʻOku ʻikai ke u tali ʻa e ngaahi totonu ʻa fafiné kapau ʻoku ʻikai ke u poupouʻi ʻa e ERA.”
ʻI ha efiafi mokomoko, ʻaoʻaofia ʻi Sānuali 1978, naʻe tangutu tailiili ai ʻa Lei Mai Lieni (Le My Lien) ʻi ha kā naʻe fakataumuʻa ki he Malaʻe Vakapuna Fakavahaʻa-puleʻanga ʻo Sōleki Sití. Ko ʻene ʻalu ʻeni ke tali hono husepānití, ʻa Ngueni Veni Tā, ko e fuofua taimi ia ʻi ha meimei taʻu ʻeni ʻe tolu. Naʻá ne manavasiʻi pe ko e hā ha fakakaukau ʻa hono husepānití ki he faʻahinga moʻui kuó ne fokotuʻu maʻa hona kiʻi fāmilí ʻi he lolotonga ʻo ʻene mavahé.
Ko e konga hono misioná ke tokangaʻi ʻa e ngaahi fāmilí, pea naʻe aleaʻi ai ʻe he Ngaahi Potungāue Fakasōsiale ʻo e Siasí (LDS Social Services) mo ha kau mēmipa ʻo e Siasí ʻi he ʻIunaiteti Siteití ke nau tauhi ha kau kumi-hūfanga Vietinemi ʻe 550 nai, ko honau tokolahi tahá naʻe ʻikai ko ha kau mēmipa ʻo e Siasí. Naʻe maluʻi ʻa Lieni mo hono kiʻi fāmilí ʻe Filipe Feleima (Phillip Fralmmer), ko ha palōfesa ʻi he ʻUnivēsiti Pilikihami ʻIongí, mo hono uaifi ko Militeletí (Mildred). Naʻa na tokoni ke hiki ʻa e fāmilí ki Polovo, ʻIutā, ʻa ia naʻe lava ʻa Lieni ai ʻo nofo totongi pea fakatau kimui ha ʻapi nofoʻanga (mobile home) mei ha Kāingalotu he feituʻu ko iá.
ʻI he kamataʻangá, naʻe faingataʻaʻia ʻa Lieni ke maʻu ha ngāue ʻi ʻIutā. Naʻe ʻave ia ʻe Filipe ki he falekoloá ke kole ha ngāue tauhi fale (janitorial position). Ka ʻi he lolotonga ʻo e ʻinitaviú, naʻe hae ʻe he pulé ʻene tipiloma he ako māʻolungá mo talaange, “ʻOku ʻikai ke ʻaonga ʻeni ia ʻi heni.” Naʻe tangi ʻa Lieni ʻi heʻene tānaki ʻa e ngaahi kongá, ka naʻá ne fakapipiki fakataha kimui mo fakaʻesia ia ki he holisí ke fakaʻaiʻai siʻene kiʻi fānaú ke nau feinga ki ha tuʻunga ako māʻolunga ange.
Naʻe ʻikai fuoloa kuó ne maʻu ha ngāue fakataimi ʻi ha ngoue fuaʻiʻakau ofi pē. Peá ne toki maʻu ha ngāue ko ha tokotaha tuitui pea tānaki mai ki heʻene paʻanga hū mai ʻa ʻene taʻo ha ngaahi keke mali. ʻI he tokoni meia Filipé, naʻá ne toe maʻu mo ha paʻanga ʻaki haʻane taipe ha ngaahi lipooti maʻa e fānau ako BYU.
Ko e taimi naʻe faaifeinga ai ʻa Lieni ke tokonaki maʻa hono kiʻi fāmilí, naʻe faaifenga mo siʻene kiʻi fānaú ke nau anga ki heʻenau moʻui foʻou ʻi ʻAmelikā. Ko e siʻisiʻi tahá, ʻa Lini (Linh), naʻe fasi manava pea faʻa puke. Ko e ongo tamaiki tangatá, ʻa Vu mo Hui (Vu and Huy), naʻe faingataʻa ke na fakamaheni ʻi he ʻapiakó koeʻuhí ko e lea fakafonuá mo e ngaahi faikehekehe ʻo e anga fakafonuá. Naʻá na faʻa lāunga kia Lieni fekauʻaki mo hono fakamataliliʻi kinaua ʻe hona toʻú.
Neongo ʻa e faingataʻaʻia hono kiʻi fāmilí, ka naʻe kei tuitala pē ʻa Lieni ki he ʻEikí. Naʻe ʻalu maʻu pē ki he ngaahi houalotú mo kei lotua hono kiʻi fāmilí mo hono husepānití. Naʻá ne faʻa tautapa ki heʻene Tamai Hēvaní, “Foaki mai muʻa ha ivi.” Naʻá ne akoʻi ʻene kiʻi fānaú ki he mālohi ʻo e lotú, ʻi heʻene ʻilo te ne tokoniʻi kinautolu ʻi honau ngaahi faingataʻaʻiá.
Pea ʻi he konga kimui ʻo e 1977, naʻe ʻilo ai ʻe Lieni ko hono husepānití ʻoku ʻi ha nofoʻanga kumi hūfanga ʻi Malēsia. Naʻe malava ʻo mavahe mei Vietinemi ʻi ha vaka toutai ʻi he fāifai pea tukuange mei he nofoʻanga ʻi Tani Ongi Nemí. Kuo mateuteu ʻeni ke fakataha mo hono fāmilí. Ko e meʻa pē naʻá ne fiemaʻú ko ha taha maluʻi.
Naʻe kamata ngāue leva ʻa Lieni ʻi ha ngaahi houa lahi ange ke tānaki ha paʻanga feʻunga ke ʻomai ʻa Tā ki he ʻIunaiteti Siteití. Naʻe ʻoange ʻe he Kolosi Kulá ki ai ha lisi ʻo e ngaahi meʻa kotoa naʻe fiemaʻu ke ne fai ke maluʻi ai iá, peá ne muimuiʻi lelei ʻa e ngaahi fakahinohinó. Naʻá ne toe talanoa foki ki he kiʻi fānaú fekauʻaki mo e foki mai ʻenau tangataʻeikí. Naʻe ʻikai ke toe manatuʻi ia ʻe hono kiʻi ʻofefiné ʻa Tā, pea mālō pē hono kei manatuʻi ʻe he ongo tamaiki tangatá. Naʻe ʻikai ke nau mafakakaukaua pe ʻe anga fēfē ha feohi mo ha tamai.
Hili ʻene aʻu ki he malaʻe vakapuná, naʻe kau fakataha ʻa Lieni mo ha ngaahi kaungāmeʻa mo ha kāingalotu ʻo e Siasí naʻa nau ōmai ke talitali ʻa Tā. Naʻe pukepuke ʻe hanau niʻihi ha ngaahi foʻi pula naʻe ulo ʻi he maama ʻo e efiafí.
Naʻe ʻikai fuoloa kuo fakatokangaʻi atu ʻe Lieni ʻa Tā ʻoku hifo mai ʻi he sitepu ʻuhilá (escalator). Naʻá ne ʻasi haufalea mo hangē ʻoku heé. Ka ʻi he ʻasi atu ʻa Liení, naʻá ne ui mai hono hingoá. Naʻá na feaʻutaki ʻi he taimi tatau ʻo fepukeʻaki nima. Naʻe ake ha ongo ʻi he loto ʻo Liení.
Peá ne fusi mai ʻa Tā ʻo fāʻofua ki ai. Naʻá ne fanafana ange, “Fakafetaʻi ki he ʻOtua ʻi he langí, kuo fāifai peá ke aʻu mai ki ʻapi!”
ʻI he ngaahi ʻuluaki māhina ʻo e 1978, naʻe fuʻu hohaʻa ʻa Palesiteni Sipenisā W. Kimipolo ki he fakataputapui ʻo e lakanga fakataulaʻeikí mo e temipalé ʻi he Siasí pea faʻa faingataʻa ai ke ne mohe. Kuo kamata ke lōngonoa hifo ʻa e longolongoaʻa ʻa e kakaí ʻi he fakataputapuí, ka naʻe kei hokohoko atu pē ʻene fakakaukau ki he siʻi Kāingalotu taʻe-faʻalaua mo e kakai lelei kehe naʻe uesia ʻe he meʻá ni. Naʻe hoko ʻene ʻaʻahi fakamuimuí ni ki Palāsilá ko ha fakamanatu ʻo e ngaahi faingataʻa lahi naʻe hoko ki he Kāingalotú ʻi he funga ʻo e māmaní.
ʻI heʻene moʻuí kotoa, naʻe poupouʻi ʻe Palesiteni Kimipolo ʻa e founga ngāue ʻa e Siasí ko hono taʻofi ʻa e lakanga fakataulaʻeikí ki he kakai hako ʻUliʻuli mei ʻAfiliká, pea naʻá ne mateuteu he toenga ʻo ʻene moʻuí ke ne kei poupouʻi ʻa e founga ngāue ko iá. Ka naʻá ne ʻilo ko e ongoongolelei ʻo Sīsū Kalaisi kuo fakafoki maí naʻe fakataumuʻa ia ke lōmakiʻi ʻa māmani, pea kuó ne ʻosi kole ki he Kāingalotú ke lotua ʻa e ngaahi puleʻangá ke fakaava honau ngaahi matapaá ki he ngāue fakafaifekaú.
Naʻe kamata leva ke ne fakaʻaongaʻi ha taimi lahi lahi ange ʻi he potu Māʻoniʻoni Taha (Holy of Holies) ʻo e Temipale Sōlekí, ko ha ūngaʻanga makehe ʻoku tuʻu fakataha mo e loki silesitialé. Naʻá ne toʻo ai hono suú, tūlutui ʻi he lotu, mo tautapa ʻi he loto fakatōkilalo ki he langí.
ʻI he ʻaho 9 ʻo Māʻasí, naʻe talanoa ai mo hono ongo tokoní pea mo e Kōlomu ʻo e Kau ʻAposetolo ʻe Toko Hongofulu Mā Uá fekauʻaki mo e matakalí pea mo e lakanga fakataulaʻeikí. Naʻe fuoloa ʻaupito ʻa e fakatahá. Naʻa nau toe vakaiʻi ʻa e ngaahi lea naʻe fai ʻe he kau palesiteni ʻo e Siasí, ʻe Tēvita O. Makei, mo Hāloti B. Lī ʻoku hā ai ʻe ʻi ai ʻa e ʻaho ʻe fakangata ai ʻa e fakataptapui ki he lakanga fakataulaʻeikí. Ka naʻe loto kotoa ʻa e kau ʻaposetoló he ʻikai ke liliu ʻa e meʻá ni kae ʻoua kuo fakahā ʻe he ʻEikí Hono finangaló ki he palōfitá.
Kimuʻa pea ʻosi ʻa e fakatahá, naʻe tapou ʻa Palesiteni Kimipolo ki he kau ʻaposetoló ke nau ʻaukai mo lotu fekauʻaki mo e meʻá ni. Pea ʻi he ngaahi uike lahi naʻe hoko aí, naʻá ne fakaafeʻi kinautolu ke nau ako ʻa e kaveingá pea hiki mo ʻenau fakakaukaú. Naʻá ne vahe kia ʻEletā Hauati W. Hanitā mo Poiti K. Peeka ke na fakatahatahaʻi ʻa e hisitōlia ʻo e fakataputapui ʻo e lakanga fakataulaʻeikí pea mo lekooti ʻa e meʻa kotoa pē kuo ʻosi leaʻaki fekauʻaki mo e meʻá ni ʻi he ngaahi fakataha ʻa e Kau Palesitenisī ʻUluakí mo e Toko Hongofulu Mā Uá. Naʻá ne ʻosi kole foki kia ʻEletā Pulusi R. Makongikī ʻi he taʻu kimuʻá ke ne toe vakaiʻi ʻa e ngaahi makatuʻunga fakafolofola ʻo e meʻa ko ʻení.
Lolotonga iá, naʻe kei hokohoko atu pē hono lotua ʻe Palesiteni Kimipolo ʻa e fakataputapuí. Neongo ʻene fāinga mo e hohaʻa ko ʻení, ka naʻe fakaʻau ke holo hono mahuʻingá. Naʻá ne ongoʻi ha ongo fakalaumālie, mālohi, mo tuʻuloa, ke hoko atu. Ko e taimi naʻe ʻomai ai ʻe ʻEletā Makongikī e lipooti ʻo ʻene fakatotoló, naʻá ne pehē ʻoku ʻikai ha folofola ia ʻokú ne taʻofi ʻa e Siasí mei hano toʻo ʻa e fakataputapuí.
ʻI he ʻaho Tūsite, 30 ʻo Meé, naʻe vahevahe ai ʻe Palesiteni Kimipolo mo hono ongo tokoní ha tohi fakaangaanga ʻo ha fakamatala ke foaki ʻa e lakanga fakataulaʻeikí ki he tangata moʻui taau kotoa, ʻo tatau ai pē pe ko e hā hono matakali.
ʻI he ʻosi ha ʻaho ʻe ua mei ai, ʻi he ʻaho 1 ʻo Suné, naʻe fakahoko ai ʻe he Kau Palesitenisī ʻUluakí ʻenau fakataha fakamāhina mo e kau taki māʻolungá. Naʻa nau ōmai ki he fakatahá, ʻoku nau ʻaukai, ʻo hangē ko e angamahení, pea ʻi heʻene ʻosí, naʻe tukuange ʻe he kau palesitenisī ʻuluakí ʻa e taha kotoa, tuku kehe pē ʻa e kau ʻaposetoló.
Naʻá ne pehē ange, “ʻOku ou fiemaʻu ke mou hoko atu ʻo ʻaukai mo au.” Peá ne talaange leva ʻa e ngaahi houa lahi kuó ne fakaʻaongaʻi ke kole ai ki he ʻEikí ha talí. ʻE hanga ʻe ha liliu ʻo ʻomai ʻa e ongoongolelei kuo fakafoki maí mo e ngaahi tāpuaki ʻo e temipalé ki ha Kāingalotu taʻe-faʻalaua—ki he houʻeiki tangata, houʻeiki fafine, mo e fānau—ʻi he funga ʻo e māmaní.
Naʻá ne pehē, “Kuo teʻeki ai ke u tomuʻa fakapapauʻi pe ko e hā ʻa e talí.” “Ka ʻoku ou fie ʻiloʻi. Ko e hā pē ha tuʻutuʻuni ʻa e ʻEikí, te u taukaveʻi ia ki he ngataʻanga ʻo hoku iví.”
Naʻá ne kole ki he taha kotoa ke vahevahe ʻenau fakakaukaú, pea ʻi he houa ʻe ua hono hokó, naʻe lea fakahokohoko ai ʻa e kau ʻaposetoló. Naʻe toka ʻiate kinautolu ha ongoʻi uouangataha mo nonga.
ʻE sai pē kapau te u fai haʻatau lotu?” Ko e fehuʻi ange ia ʻa Palesiteni Kimipoló.
Naʻá ne tūlutui leva ʻi he ʻōlita ʻo e temipalé, pea takatakaiʻi ia ʻe he kau ʻaposetoló. Naʻá ne kole ʻi he loto fakatōkilalo mo e loto fakamātoato moʻoni ke fakamaʻa ʻa kinautolu mei he angahalá koeʻuhí ke nau lava ʻo maʻu e folofola ʻa e ʻEikí. Naʻá ne lotu ke ne ʻilo ʻa e founga ke fakatupulaki ai ʻa e ngāue ʻo e Siasí mo fakamafola ʻa e ongoongoleleí ʻi he māmaní kotoa. Naʻá ne kole ki he ʻEikí ke fakahā mai muʻa ʻEne fakakaukau mo Hono finangalo ki he houʻeiki tangata moʻui taau kotoa ʻi he Siasí.
ʻI he hili hono fakaʻosi ʻe he palōfitá ʻa ʻene lotú, naʻe fakafonu ʻe he Laumālie Māʻoniʻoní ʻa e lokí, ʻo ongo ki he loto ʻo e tokotaha kotoa ʻi he siakalé. Naʻe folofola ʻa e Laumālié ki honau laumālié, ʻo ne fakamaʻu fakataha kinautolu ʻi he uouangataha kakato. Naʻe mahuʻi ʻa e veiveiua kotoa pē.
Naʻe tuʻu hake ʻa Palesiteni Kimipolo mei heʻene tūʻulutuí. Naʻe tā mālohi hono mafu pelepelengesí. Naʻá ne fāʻofua kia ʻEletā Tēvita B. Heiti, ko e ʻaposetolo foʻou tahá, pea mo fāʻofua taha taha ki he toengá. Naʻe loʻimataʻia ʻa e kau ʻaposetoló. Naʻe ʻi ai ha niʻihi naʻe ʻikai toe mapuleʻi ʻenau tangí.
Kuo nau maʻu ʻenau talí mei he ʻEikí.
Naʻe manatuʻi kimui ange ʻe ʻEletā Kōtoni B. Hingikelī, “Naʻa mau mavahe fakalongolongo mo ʻapasia pea mo fiefia mei he fakatahá.” “Naʻe ʻiloʻi ʻe he taha kotoa ʻiate kimautolu kuo hokosia ʻa e taimi ki ha liliu pea ko e tuʻutuʻuní kuo hoko mai mei he langí. Naʻe mahino ʻa e talí. Naʻe ʻi ai ha uouangataha kakato ʻiate kimautolu ʻi heʻemau aʻusiá pea mo ʻemau mahinó.”
Naʻá ne pehē, “Ko ha meʻa molumalu mo fakaʻeiʻeiki.” “Naʻe fanafana pau mo mahino ʻa e leʻo ʻo e Laumālié ki heʻemau fakakaukaú mo homau laumālié.”
Naʻe lekooti ʻe ʻEletā ʻEselā Tafu Penisoni ʻi heʻene tohinoá, “I he ʻosi ʻa e lotú, naʻa mau aʻusia ʻa e laumālie fakafiefia taha ʻo e uouangatahá mo ha ʻilo pau kuo faifaiangé peá u aʻusia.” “Naʻa mau fefāʻofuaʻaki, naʻa mau mātuʻaki ofo ʻi he laumālie fakafiefia naʻe mahino ʻene ʻi aí. “Naʻe vela māfana homau fatafatá.”
Naʻe tohi ʻe ʻEletā Māvini J. ʻEsitoni ʻo pehē, “Ko e meʻa fakalaumālie lahi taha ia kuo hoko ʻi heʻeku moʻuí hono kotoa.” “Naʻá ne ʻai ke u ongoʻi vaivai.”
Naʻe toe fakamoʻoni foki ʻa ʻEletā Pulusi R. Makongikī, “Naʻe ongo mai ʻa e leʻo ʻo e ʻOtuá ʻi he mālohi ʻo e Laumālié mei he lotolotonga ʻo ʻitānití, ki Heʻene palōfitá.” Naʻe tali ʻa e lotu ʻa Palesiteni Kimipoló pea naʻe tali mo ʻemau ngaahi lotú. Naʻá ne ongoʻi ʻa e leʻó pea naʻa mau ongoʻi ʻa e leʻo tatau. Naʻe matoʻo leva ʻa e ongoʻi veiveiua mo taʻepau kotoa pē. Naʻá ne ʻilo ʻa e talí pea naʻa mau ʻilo ʻa e talí. Pea ko e kau fakamoʻoni moʻui kotoa kimautolu ki he moʻoni ʻo e folofola kuo foaki mai ʻi he ʻaloʻofa moʻoni mei he langí.”
Naʻe fakamoʻoni ʻa Palesiteni N. ʻElitoni Tena, “Naʻe hoko mālohi mai ʻa e talí kiate kimautolu kātoa. “Pea naʻe ʻikai ke toe fakafehuʻia ia ʻe ha taha ʻo kimautolu.”
ʻI he ʻosi ha ʻaho ʻe valu mei he lotu ʻa Palesiteni Kimipoló, naʻe lolotonga tangutu ʻa Talaiasi Kulei ʻi hono ʻōfisí ʻi ha kautaha pepa ʻi Sōleki Siti, mo e ʻasi atu hano kaungā ngāue ki he lokí. Naʻá ne pehē ange kuó ne fanongo kuo foaki he taimí ni ʻe he Siasí ʻa e lakanga fakataulaʻeikí ki he kakai tangata ʻUliʻulí.
Na‘e pehē ʻe Talaiasi ia ko haʻane fakaoli pē. Naʻá ne talaange kiate ia, “ʻOku ʻikai ke oli hoʻo meʻa ʻoku faí.”
Ka naʻá ne vivili atu pē, “ʻIkai, ko ʻeku moʻoni.” Naʻá ne toki talanoá ni pē mo ha taha mei he ʻUluʻi ʻOfisi ʻo e Siasí. Naʻe ʻi ai ha lau kuo maʻu ʻe Palesiteni Kimipolo ha fakahā ke ʻoange ʻa e ngaahi tāpuaki ʻo e lakanga fakataulaʻeikí mo e temipalé ki he kau mēmipa moʻui taau kotoa ʻo e Siasí.
Naʻe ʻikai ke faʻafaʻa-tui ki ai ʻa Talaiasi, ka naʻá ne toʻo hake ʻa e telefoní ʻo taila ʻa e fika ki he ʻōfisi ʻo Palesiteni Kimipoló. Naʻe talaange ki ai ʻe ha sekelitali ʻoku ʻi he temipalé ʻa Palesiteni Kimipolo, ka naʻá ne fakapapauʻi ange ʻoku moʻoni ʻa e talanoá. Kuo maʻu moʻoni ʻe he palōfitá ha fakahā ki he lakanga fakataulaʻeikí.
Naʻe moʻutāfuʻua ʻa Talaiasi. Naʻe ʻikai ke ne faʻafaʻa tui ki he ongoongó. Naʻe ʻikai ha meʻa te ne teuteuʻi ia ki he meʻa ʻoku hokó. Naʻe hangē naʻe tupukoso pē ʻa e liliú.
Naʻe toki pulusi ʻe he Deseret News ha fanongonongo mei he Kau Palesitenisī ʻUluakí kimui ange ʻi he ʻaho ko iá. ʻOku pehē ai, “ʻI heʻemau vakai ki he tupulaki ʻo e ngaahi ngāue ʻa e ʻEikí ʻi he māmaní, ʻoku mau fakafetaʻi ai ʻi he lahi fau hono tali ʻe he kakai ʻo e ngaahi puleʻanga kehekehe ʻo māmaní ʻa e pōpoaki ʻo e ongoongolelei kuo fakafoki maí, pea kuo ʻi ai hanau fuʻu tokolahi ʻaupito kuo kau mai ki he Siasí.” “Ko ia, kuo tupu ai hano ueʻi fakalaumālie kimautolu ke foaki ki he kāingalotu moʻui taau kotoa pē ʻo e Siasí ʻa e ngaahi faingamālie mo e ngaahi tāpuaki kotoa pē ʻoku foaki ʻe he ongoongoleleí.”
Naʻe hoko atu ʻa e fanongonongó, “Kuó Ne ʻafioʻi ʻemau ngaahi lotú, pea kuó ne fakapapauʻi mai ʻi he fakahā kuo hokosia ʻa e ʻaho naʻe talaʻofa fuoloá.” “ʻE lava ʻa e tangata moʻui taau kotoa ʻi he Siasí ʻo maʻu ʻa e lakanga fakataulaʻeiki māʻoniʻoní, mo e mālohi ke fakaʻaongaʻi hono mafai fakalangí, pea mo maʻu mo hono ngaahi ʻofaʻangá ʻa e ngaahi tāpuaki ʻoku tafe mei aí, kau ai ʻa e ngaahi tāpuaki ʻo e temipalé.”
Hili e fanongo ʻa Talaiasi ki he ongoongó, naʻá ne ʻalu leva ki he Temipale Sikueá. Naʻe hā fakafiefia ʻa e meʻa kotoa ʻi he feituʻu ko iá. Naʻe talanoa ʻa Talaiasi mo ha taha faiongoongo fekauʻaki mo e fakahaá pea kolosi atu leva ʻi he hala lahí ki he ʻōfisi ʻo hono kaumeʻa fuoloa ko Hiipa Ulusií, kuo hoko he taimí ni ko e talēkita ʻo e fetuʻutaki mo e kakaí maʻá e Siasí.
Naʻe ʻikai ke ʻi hono ʻōfisí ʻa Hiipa, ka naʻe kole ange ʻene sekelitalí kia Talaiasi ke tatali pē ai. Naʻá ne pehē ange, “ʻOku ou ʻilo te ne fie sio kiate koe.”
Naʻe talitali pē ʻa Talaiasi. Naʻe hanga hifo ʻa e ʻōfisi ʻo Hepá ki he tafaʻaki fakahahake ʻo e Temipale Sōlekí. Naʻe māʻolunga ʻa e laʻaá mo ulo ngingila ʻo hū mai ʻi he matapā sioʻatá, pea lava ʻa Talaiasi ke sio ki he ngaahi maka fetapaki ʻo e temipalé.
Naʻe ʻikai ke fuoloa, kuo foki mai ʻa Hiipa ki hono ʻōfisí. ʻI he taimi pē naʻá ne sio ai kia Talaiasí, naʻá ne fāʻofua kiate ia mo ʻene tangí.
Naʻe fanafana ange ʻa Hiipa, “Naʻe ʻikai ke u teitei fakakaukau …”
Naʻe sio ʻa Talaiasi ki hono kaumeʻá pea sio ki tuʻa ʻi he matapā sioʻata ʻi he temipalé. Naʻá ne iloʻi he ʻikai ke ngata pē ʻa e kāunga ʻa e fakahaá ki he lolotongá mo e kahaʻú. Ka ʻe afuhia foki ai mo e kuo hilí. Ko e fuofua taimi ʻeni ʻi he kuonga fakakosipelí ni, ʻe maʻu ai ʻe he kakai hangē ko iá, kakai moʻuí mo e kakai maté, ha faingamālie ke nau maʻu ʻa e ngaahi ouau kotoa ʻo e temipalé.
Naʻe toe sio mai ʻa Talaiasi kia Hepa, pea kuikui siʻono fofongá, pea toki ʻāʻā māmālie hake.