Vahe 19
Uouangataha ko ha Fāmili
ʻI ha efiafi ʻe taha ʻi Sune ʻo e 1978, naʻe foki ai ʻa Pili Sionisoni ki hono ʻapí ʻi Keipi Kousi ʻi Kana. Naʻe ʻaukai mo ha kau mēmipa kehe ʻo hono kāingalotú, ʻo hangē ko ia ʻoku nau faʻa faí, ka naʻe ʻikai pē ke lava ʻe he ʻaukaí ʻo fakafiemālieʻi ia. Naʻe helaʻia mo lotofoʻi koeʻuhí kuo tokolahi ange ha kau tui kuo ʻikai ke nau toe lotu mo ia mo toe foki ki honau ngaahi siasi kimuʻá.
Naʻe fakaʻānaua ʻa Pili ke ne toe ongoʻi fakalaumālie mo toe mālohi. ʻI he ongo māhina kimuʻá, naʻe talaange ai ʻe ha mēmipa ʻo hono kāingalotú ha fakahā naʻá ne maʻu. Naʻá ne pehē, “ʻE vavé ni mai ha haʻu ʻa e kau faifekaú.” “Kuó u mamata ki ha kau tangata hinehina ʻoku nau ōmai ki heʻetau lotú. Naʻa nau fāʻofua kiate kitautolu mo kau mo kitautolu ʻi he lotú.” Naʻe toe pehē ʻe ha fefine ʻe taha naʻá ne maʻu ha fakahā meimei tatau. Naʻe misi ʻa Pili ia ki ha kau tangata hinehina ʻoku nau hū mai ki he falelotú ʻo pehē ange, “Ko kimautolú ko ho ngaahi tokoua, pea kuo mau ōmaí ke papitaiso koe.” ʻI heʻene ʻosi iá, naʻe toe misi ki ha kakai ʻUliʻuli naʻa nau ōmai mei ha fonua mamaʻo mo kehekehe ke kau ki he Siasí.
Ka, naʻe teʻeki pē ke lava ʻe Pili ʻo huʻi atu ʻene lotofoʻí.
Naʻe fakaʻau ke fuoloa ʻa e poʻulí, ka naʻe ʻikai pē ke lava ʻo mohe. Naʻe maʻu ia ʻe ha ongo mālohi ke fanongo ki he Kautaha Fakamafola letiō ʻa Pilitāniá (BBC)—ko ha faʻahinga meʻa kuo taʻu lahi ʻa e ʻikai ke ne faí.
Naʻá ne maʻu ʻa e letioó, ko ha kiʻi kalasi lanu melomelo mo ha foʻi kī lanu siliva ʻe fā, ofi ki lalo. Naʻe kahī ʻa e letioó ʻo moʻui ʻi heʻene fakamoʻuí. Naʻá ne mioʻi holo ʻa e ngaahi foʻi kií, pea fefokifoki ʻaki ʻa e hui lanu kulokulá ʻi he ngaahi fiká. Ka naʻe ʻikai ke ne lava ʻo maʻu ʻa e fakamafolá.
Pea, hili ha houa ʻe taha ʻo ʻene kumí, pea fāifai ʻo maʻu ʻe Pili ʻa e fakamafola mei he BBC. Naʻe pehē ʻe he faiongoongó kuo maʻu ʻe he palesiteni ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ha fakahā. ʻE lava he taimí ni ʻa e kakai tangata moʻui taau kotoa ʻi he Siasí ke maʻu ʻa e lakanga fakataulaʻeikí.
Naʻe tō ʻa Pili ki lalo, ʻo tangi fākafoa ʻi he loʻimata ʻo e fiefia. ʻE fāifai pea aʻu mai ʻa e mafai ʻo e lakanga fakataulaʻeikí ki Kana.
Pea hangē pē ko ha Kāingalotu tokolahi, naʻe fiefiaʻa ʻĀteti Kepi (Ardeth Kapp), ko e tokoni ua ʻi he kau palesitenisī lahi ʻo e Finemuí, ʻi heʻene fanongo ʻe lava he taimí ni ʻa e kakai tangata moʻui taau kotoa ke nau maʻu ʻa e lakanga fakataulaʻeikí. Naʻá ne pehē, “Ko ha fakahā foʻou ʻe taha, pea ko e taha ko ʻení ʻoku fuʻu fakaʻofoʻofa.” “Hono ʻikai ke tau monūʻia, ʻoku tau fakamālō lahi ʻi ha palōfita ke ne tataki kitautolu ʻi he ngaahi ʻaho kimui ní.”
Naʻe hoko mai ʻa e fanongonongo ʻo e fakahā fekauʻaki mo e lakanga fakataulaʻeikí ʻo ʻikai fuʻu fuoloa mei he talaange ʻe he palesiteni lahi ʻo e Kau Finemuí, Lute Fanga (Ruth Funk) kia ʻĀteti ʻe tukuange fakalāngilangi ʻenau kau palesitenisií. Naʻe fakaʻohovale ʻa e ongoongó ki he taha kotoa. Ko e lahi taha ʻo e kau palesitenisī kimuʻá naʻa nau ngāue ʻi ha meimei taʻu ʻe hongofulu. Ko ʻene kau palesitenisií ʻe ʻosi pē ʻi ha taʻu ʻe nima mo e konga.
ʻI he taimi ko ía naʻe faingataʻa ke mahino kia ʻĀteti ʻa e taimi ʻa e ʻEikí. ʻI heʻene ngāue ko ʻeni mo e kau finemuí naʻá ne maʻu ai ha ʻuhinga foʻou ki he taumuʻá. Ka ko ʻeni kuo ofi ke ngata hono uiuiʻí, ko e hā leva ha meʻa te ne fai ʻi he kahaʻú?
Naʻá ne tohi ai ʻi heʻene tohinoá, “ʻI hoku taʻu fāngofulu mā fitú, ʻoku ʻikai ke u tui kuo ʻosi—tautautefito ki ha taimi kuó u mateuteu lelei ange ai ʻi ha toe taimi kimuʻa, ke mahino mo ʻilo ki hono ʻuhinga totonú.” Naʻá ne ʻilo naʻe kei lahi ʻa e meʻa ke ne fakahokó. Naʻá ne tohi, “Ka, ʻoku ʻikai ke u sio ki ha faingamālie ʻi he taimi ko ʻení ke fai ai ha tokoni ʻe ʻaonga fēfē.”
Naʻe fuʻu faingataʻa ʻa e tukuangé koeʻuhí he naʻe kei lahi ʻa e ngaahi meʻa ʻa e kau palesitenisī ʻo e Kau Finemuí naʻa nau fiemaʻu ke fai. ʻI he ngaahi ʻuluaki taʻu ʻo ʻenau ngāué naʻe fakatuaiʻi ia ʻe he feliliuaki fakahoualotu ʻi he Siasí. Naʻe kiʻi faingataʻa ʻa e hingoa MIA ʻo e Lakanga Taulaʻeiki Faka-ʻĒloné pea naʻe puputuʻu ai ha kakai tokolahi ki he founga ke hū mai ai ʻa e kau finemuí ki he polokalamá. ʻI he hili e pekia ʻa Palesiteni Hāloti B. Lií, naʻe fakangata leva ʻe he Kau Palesitenisī ʻUluakí ʻa e hingoa “Kautaha Fakatupulaki ʻo e Mutualé” (Mutual Inprovement Association) kae fokotuʻu ha houalotu kehekehe ʻe ua ʻa e toʻu tupú, ko e Kau Finemui mo e Lakanga Taulaʻeiki Faka-ʻĒlone.
ʻI he ʻosi ʻa e ngaahi liliu ko ʻení, naʻe kei taʻepauʻia maʻu pē ʻa ʻĀteti mo e kau taki kehe ʻo e Finemuí ʻi he tuʻunga ʻo e kau finemuí ʻi he fokotuʻutuʻu ʻo e Siasí. ʻI he kamataʻangá, naʻe fakatupu ʻe he ngaahi liliú ha ngaahi founga naʻe ʻikai ke lava ai ʻa e kau palesitenisī lahí ke nau akoʻi pe fetuʻutaki hangatonu mo e kau taki fakafeituʻu ʻo e Kau Finemuí. Ka, naʻe pau ke nau fakafou ʻenau ngaahi pōpoakí ʻi he kau taki lakanga fakataulaʻeiki lotofonuá. Neongo kuo fakalakalaka ʻa e fetuʻutaki mo e kau taki fakalotofonuá, ka naʻe kei siʻi ʻa e fetuʻutaki ʻa e palesiteni lahi ʻo e Kau Finemuí mo e Kau Palesitenisī ʻUluakí pe Kōlomu ʻo e Toko Hongofulu Mā Uá, he ko e lahi taha ʻo e fetuʻutaki mo kinautolú naʻe fakafou ia ʻi ha mēmipa ʻo e Kau Fitungofulú naʻe hoko ko ha fehokotakiʻanga.
Naʻe fai ʻe he kau palesitenisī ʻo e Kau Finemuí honau lelei tahá ke nau laka kimuʻa. Naʻe ʻosi fakakaukau ʻa Palesiteni Fanga ʻi he kamataʻanga pē ʻo ʻene ʻi he kau palesitenisií ke fokotuʻu ha polokalama ke tokoni ke tanumaki ʻe he kau finemuí honau tuʻunga fakalaumālié, mo aʻusia ʻenau ngaahi taumuʻa fakafoʻituituí, mo fakaʻapaʻapaʻi ʻa e fatongia ʻo e faʻeē mo e uaifí, ʻa ia naʻá ne tui naʻe fakaangaʻi ʻe he mītia manakoá.
Naʻe kamata ʻa e polokalama foʻoú ʻi he 1977. Naʻe ui “Ko ʻEku Fakalakalaka Fakatāutahá,” ʻo ne fakalotolahiʻi ʻa e kau finemuí ke nau fakatupulaki ha ngaahi taukei ʻi ha tafaʻaki ʻe ono: fakatokangaʻi ʻa e me’a fakalaumālié, ngāue tokoní mo e manavaʻofá, ngaahi founga fakatauhiʻapí, ʻekitivitī fakafiefiá mo e māmani fakanatulá, ngaahi ʻaati fakafonuá mo e akó, pea mo e fakalakalaka fakafoʻituituí mo fakasōsialé. Naʻe toe fakalotolahiʻi foki ʻa e kau finemuí ke ʻai haʻanau tohinoa, ʻo hangē pē ko hono fakaafeʻi ʻe Palesiteni Kimipolo ʻa e Kāingalotú kotoa ke ʻi ai haʻanau tohinoa. ʻI he taʻu pē ko iá, naʻe pulusi ai ʻe ʻĀteti ha tohi manakoa, Miracles in Pinafores and Bluejeans, ʻokú ne fakamatalaʻi ha ngaahi talanoa ʻo ʻene moʻui mo e moʻui ʻa ha kau finemui ʻiloa, mei he kuo hilí mo e lolotongá.
ʻI he konga ki mui ʻo Sune 1978, naʻe ʻi Nāvū ai ʻi ʻIlinoi ʻa ʻĀteti mo ha kau taki kehe ʻo e Siasí ki hono fakatapui ʻo e Maka Fakamanatu he Ngoue Fakamanatu ʻo e Kakai Fefiné. Naʻe tuʻu ʻi he ngoue ʻeka ʻe uá ni ha maka fakamanatu ʻe hongofulu mā ua ʻo ha kakai fefine ʻi ha ngaahi tūkunga kehekehe ʻo e moʻuí, ʻo fakamamafaʻi ʻa e tuʻunga fakafaʻeé. Fakataha mo e fakamafola fakasatelaite ʻe fakahoko kimui ange ʻi he taʻu ko iá —ko e fuofua fakamafola ia ʻi he Siasí—naʻe palani ʻa e maka-fakamanatú ke ne fakalāngilangiʻi ʻa e kakai fefiné ʻi he palani ʻo e ongoongoleleí, fakamahino ʻenau ngaahi tokoni ko e ngaahi uaifi mo e ngaahi faʻē, pea mo fakamanatu hono fokotuʻu ʻo e Fineʻofá ʻi he 1842. Naʻe ʻuhoʻuha ʻa e ʻaho ʻo e fakatapuí, ka naʻe siotonu ʻa e kakai fefine ʻe uaafe nimangeau ʻi he ouaú mei ha fuʻu tēniti lahi.
Hili ha ngaahi uike siʻi mei he fakatapuí, naʻe tukuange fakalāngilangi ʻe he Kau Palesitenisī ʻUluakí ʻa e kau palesitenisī lahi ʻo e Kau Finemuí. Naʻe ongoʻi lelei ange ʻeni ʻe ʻĀteti ʻa e meʻa ko iá. Naʻá ne tohi, “ʻI he mōmēniti ko ʻeni ʻo e taimí, ʻoku ou ongoʻi fakatuʻamelie lahi ange, mo lotoʻaki lahi ange, mo lotolahi ange, pea mo houngaʻia lahi ange ʻi he meʻa ʻoku ou lava ʻo fakamatalaʻí.”
Naʻe ʻikai fuoloa kuo ui ʻe he pīsope ʻa ʻĀtetí ko ha ʻetivaisa ki he kau loumaile taʻu ʻuluaki ʻo e uōtí. Naʻe vēkeveke ke ne fakaʻaongaʻi ʻene ngaahi aʻusia kimuí ni ʻi he kau palesitenisī lahí ke akoʻi mo fakahinohino ʻa e fānau fefine taʻu hongofulu mā ono ko ʻení. Naʻá ne hiki ʻi heʻene tohinoá, “ʻOku ou tui moʻoni ʻi he tokoni ʻa e ʻEikí, te u lava ʻo tokoni ki he tokotaha takitaha.”
ʻI he ʻaho 29 ʻo Sepitema 1978, naʻe lea ai ʻa Palesiteni Kimipolo ʻi Sōleki Siti ʻi ha seminā ʻa e kau fakafofonga fakavahelahi ʻo e Siasí. Naʻá ne pehē, “ʻOku ʻi ai hatau tufakanga, ko ha fatongia, ko ha fekau fakalangi, ke malangaʻi ʻa e ongoongoleleí ʻi he fonua kotoa pē pea ki he taha kotoa pē.”
ʻOku maʻu ʻe he Siasí ʻi he taimí ni ha kau mēmipa ʻoku laka hake ʻi he toko fā milioná, pea naʻe tupulaki lelei ʻaki ha kau ului ʻe toko tahakilu tupu ʻi he taʻu kuo ʻosí. Ka ʻoku kei fiemaʻu ʻe he kakaí ʻi he potu kotoa pē ʻa e ongoongoleleí. Naʻá ne ongoʻi ha fuʻu fiemaʻu lahi ke aʻu kiate kinautolu. Naʻá ne pehē, “ʻOku kei toe lahi ʻa e ngāue ke faí.”
ʻOku lolotonga ngāue fakafaifekau taimi kakato he taimí ni ha kau faifekau ʻe toko uamano onoafe tupu ʻi he kolopé, ʻoku fuʻu tokolahi ia ʻiate kinautolu ʻe lava ʻo akoʻi ʻi he ngaahi fale lolotongá. Ke teuteuʻi ʻa e kulupu tokolahi ko ʻení, kuo langa kimuí ni ai ʻe he kau taki ʻo e Siasí ha Senitā Ako Faka-faifekau ʻi Polovo, ʻIutā, ʻe lava ke ōmai ki ai ʻa e kau faifekau foʻoú ʻi ha uike ʻe fā ki he valu ke akoʻi ai ha taha ʻo e ngaahi lea fakafonua kehekehe ʻe uofulu mā nima, ʻo kau ai ʻa e lea fakaʻilonga nimá maʻá e kakai tulí.
Naʻe fakaava ha ngaahi feituʻu foʻou ki he ngāué ʻi he taimi kotoa pē. ʻI he fakalotolahi ʻa Palesiteni Kimipoló, naʻe tokoni ai kimuí ni ʻa Tēvita Kenetī (David Kennedy), ko e fakafofonga fakafoʻituitui ʻo e Kau Palesitenisī ʻUluakí, ke tali fakaʻofisiale ʻa e Siasí ʻi Potukali mo Pōlani. ʻOkú ne ngāue ʻi he taimí ni ke fakahoko ʻa e meʻa tatau ʻi ʻInitia, Sulī Lanikā, Pākisitani, Hungali, Lomēnia, pea mo Kalisi. Ka naʻe kei fuʻu toe lahi pē ʻa e meʻa ke faí.
ʻI he lea ʻa Palesiteni Kimipolo ʻi he ʻao ʻo e kau fakafofonga fakavahelahí, naʻá ne lave ki he kakai tui ʻi Kana mo Naisīliá. Naʻá ne pehē, “Kuo ʻosi fuʻu fuoloa ʻenau tatalí.” “Te tau lava ʻo kole ke nau toe kiʻi tatali ʻo fuoloa ange?” Naʻe ʻikai ke ne tui pehē. Naʻá ne ʻeke ange, “Fēfē ʻa Līpia, ʻItiopea, Matāfanga ʻAivolī, mo Sūtani, mo e toengá?” “Ko e ngaahi hingoa ʻeni kuo pau ke tau maheni mo ia ʻo hangē pē ko ʻetau ʻiloʻi lelei ʻa Siapani, Venesuela, Nuʻusila, mo Tenimaʻaké.”
ʻOku toe fiemaʻu foki ʻe Siaina, Lūsia, mo ha ngaahi fonua lahi kehe, ʻa e ongoongolelei kuo fakafoki maí, ka ʻoku teʻeki ai ke nau tali fakaʻofisiale ʻa e Siasí mo ʻikai hanau ngaahi haʻofanga lotu fakalotofonua. Naʻá ne pehē, “ʻOku nofo he taimí ni he funga ʻo e māmaní ha kakai ʻe meimei toko tolu piliona, ʻi ha ngaahi puleʻanga ʻoku ʻikai ke malangaʻi ai ʻa e ongoongoleleí he taimí ni.” “Kapau te tau lava pē ke kiʻi kamata siʻisiʻi ʻi he puleʻanga kotoa, ʻe ʻikai fuoloa kuo laka mai ʻa e kau ului ʻi he faʻahinga mo e lea takitaha ʻo hoko ko ha ngaahi maama ki honau kakaí pea ʻe malangaʻi leva ʻa e ongoongoleleí ʻi he puleʻanga kotoa kimuʻa pea hāʻele mai ʻa e ʻEikí.”
Naʻá ne fiemaʻu ʻa e Kāingalotú ke nau lotu mo teuteu. Naʻá ne pehē ʻe kei hokohoko atu pē ʻa e ngaahi fakafeʻātungia ki he tupulaki ʻa e Siasí kae ʻoua kuo toki mateuteu ʻa e Kāingalotú ke tukuange atu kinautolu. ʻOku fiemaʻu ʻe he Siasí hono kau mēmipá, ʻa e talavou mo e matuʻotuʻa, ke nau ako ʻa e ngaahi lea fakafonuá pea ngāue fakafaifekau. Naʻá ne talaange ki he kau fakafofonga fakavahelahí, “Ko e melino tuʻuloa pē ʻe lava ke maʻú, ko e melino ʻi he ongoongolelei ʻo Sīsū Kalaisí.” “Kuo pau ke tau ʻave ia ki he potu kotoa pē pea ki he taha kotoa.”
ʻI he ʻaho hono hokó naʻe fonu hake ai ʻa e Tāpanekale Sōlekí ki he konifelenisi lahí. ʻI he kole ʻa Palesiteni Kimipoló, naʻe haʻu hono tokoni ko N. ʻElitoni Tená ki he tuʻunga malangá ʻo lau ʻa e fakamatala ʻa e Kau Palesitenisī ʻUluakí ʻo fakahā ʻe lava ʻa e kakai tangata moʻui taau kotoa ke maʻu ʻa e lakanga fakataulaʻeikí, ʻo tatau ai pē pe ko e hā ʻa e matakalí.
Naʻá ne pehē, “ʻi hono fakaʻapaʻapaʻi ʻo Sipenisā W. Kimipolo ko e palōfita, tangata kikite, mo e tangata maʻu fakahā, pea mo e palesiteni ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻoku fokotuʻu atu ai, ʻi heʻetau hoko ko e fakatahaʻanga maʻu mafaí, ke tau tali ʻa e fakahaá ni ko e folofola pea mo e finangalo ia ʻo e ʻEikí.”
Naʻá ne kole ki he taha kotoa ʻoku loto ki aí ke hiki honau nima toʻomataʻú, pea naʻe tokolahi ʻaupito ʻa e ngaahi nima naʻe hiki ki ʻolungá. Naʻá ne ʻeke pe ʻoku ʻi ai ha taha ʻe taʻe-loto. Naʻe ʻikai ke ʻi ai ha nima ʻe taha ʻe hiki.
Hili ha taimi nounou pē mei he ʻosi ʻa e konifelenisí, naʻe meʻa ʻa Palesiteni Kimipolo ʻi mui ʻi ha tēpile lōloa ʻi ha loki fakatahaʻanga ʻi he ʻŌfisi Pule ʻo e Siasí. Naʻe ʻi ai mo ia hono ongo tokoní, kau taki māʻolunga toko lahi, mo ha ngaahi mātuʻa mali matuʻotuʻa ange ʻe toko fā, ko ʻEtuini mo Sanati Kēnoni (Edwin and Janath Cannon) pea mo Leniteli mo Lesieli Meipī (Rendell and Rachel Maybe). Naʻe toki loto ʻa e ongomātuʻa Kēnoní mo e ongomātuʻa Meipií ke nau hoko ko e kau fuofua faifekau ʻi ʻAfilika Hihifo, neongo ʻoku mahino mei he fatongiá ni kuo pau ke tukuange ai ʻa Sanati mei he tokoni ʻuluaki ʻi he kau palesitenisī lahi ʻo e Fineʻofá.
Naʻe talanoa ʻa e kulupú ki he ngāue ʻa e kau faifekaú pea mo e ngaahi faingataʻa ʻe ngalingali te nau fehangahangai mo ia ʻi haʻanau fetuʻutaki mo e kakai tui ʻi Kana mo Naisīliá. ʻI he hokosia ʻa e taimi ke fakaʻosi ai ʻa e fakatahá, ʻosi ia ha miniti ʻe fāngofulu, naʻe fakamālō ange ʻa Palesiteni Kimipolo ki he ngaahi mātuʻá ʻi heʻenau faivelengá.
Naʻá ne ʻeke ange, “ʻOku toe ʻi ai ha fehuʻi?”
Naʻe sio hake ʻa ʻEletā Meipī ki he kau faifekau kehé. Naʻá ne pehē ange, “Foʻi fehuʻi nounou pē ʻe taha.” “ʻOkú ke fiemaʻú ke mau mavahe fakakū?”
Naʻe malimali ʻa Palesiteni Kimipolo.
Ko Luta Mātini ʻa e ʻuluaki mēmipa ʻo hono fāmilí ke ʻilo ki he fakahā fekauʻaki mo e lakanga fakataulaʻeikí. Ko e taimi naʻe aʻu mai ai ʻa e ongoongó, naʻe mate ʻa e ngaahi laine telefoni ʻi he ngaahi tukui ʻapi ʻi he Vaitafe Senēlió, pea fononga pasi mai ai ha kaungāmeʻa ʻo e fāmilí ʻi ha miniti ʻe fāngofulu ke talaange ki ai. Naʻe tukituki atu ʻa e finemuí ʻi he matapaá, mo ui atu ʻoku ʻi ai haʻane ongoongo.
Naʻá ne pehē, “kuó u fanongo kuo maʻu ʻe he Siasí ha fakahā,” mo fakamatala kia Luta ʻe lava ʻa e kakai tangata moʻui taau kotoa pē ʻo maʻu ʻa e lakanga fakataulaʻeikí.
Naʻe kei ʻi he ngāué ʻa Helevēsio, pea naʻe pau ai ke tatali ʻa Luta ke toki talaange ki ai. Naʻá ne talaange, ʻi heʻene aʻu mai ki ʻapí, “ʻOku ou maʻu ha ongoongo, ko ha ongoongo fakafiefia!” “Helevēsio, te ke maʻu ʻa e lakanga fakataulaʻeikí.”
Naʻe ʻikai ke toe lava ʻa Helevēsio ʻo lea. Naʻe ʻikai ke ne lava ia ʻo tui ki ai. Naʻe kamata ke tatangi ʻa e telefoní peá ne tali. ʻI he tafaʻaki ʻe tahá naʻe ʻi ai hano kaungā ngāue ʻi Sōleki Siti.
Naʻe pehē ange hono kaungā ngāué, “ʻOku ʻi hoku nimá ʻa e fakahā fakaʻofisialé, pea teu lau atu ia kiate koe.”
ʻI he ʻosi ʻa e telefoni ʻa Helevēsió, naʻá na fetāngihi mo Luta ʻi heʻena fakahoko ha lotu fakafetaʻi ki heʻena Tamai Hēvaní. Naʻe toe pē ha ngaahi māhina siʻi ki hono fakatapui ʻo e Temipale Seni Pauló. Pea ko ʻeni te na lava ʻo maʻu hona ʻenitaumení pea silaʻi fakataha mo ʻena fānau ʻe toko faá.
Naʻe ʻosi ha uike ʻe ua mei ai, kuo maʻu ʻe Helevēsio mo Mākisi ʻa e Lakanga Taulaʻeiki Faka-ʻĒloné. Hili ha uike ʻe taha mei ai, kuo fakanofo ʻa Helevēsio ko ha kaumātuʻa, peá ne foaki leva he taimi pē ko iá ʻa e Lakanga Taulaʻeiki Faka-Melekisētekí kia Mākisi. Naʻe ʻosi fakamaʻu ʻa Mākisi ke mali mo ha taha ʻosi faifekau ko Miliane ʻApelini Palaposa (Mirian Abelini Barbosa), pea naʻá na ʻosi tufa ʻena ngaahi tohi fakaafe ki heʻena malí. Ka naʻá na loto ke toloi ʻena malí, koeʻuhí kae lava ʻa Mākisi ʻo ngāue fakafaifekau.
ʻI he konga kimuʻa ʻo Nōvema 1978, naʻe kau ai ʻa e fāmili Mātiní ʻi he fakatapui ʻo e temipalé. Naʻe tangutu ʻa Luta mo e kuaeá, ʻo ofi kia Palesiteni Kimipolo mo ha kau taki māʻolunga kehe naʻa nau ō mai ki he ouaú. Naʻe tangutu ʻa Helevēsio ia mo e kāingalotú mo ʻena fānaú. Naʻe ʻoange ha ngofua ki he kau faifekau ʻi he ngaahi misiona ʻe fā ʻo Palāsilá ke nau kau ʻi he fakatapuí, pea ʻi he hoko ko ʻeni ʻa Mākisi ko e faifekau taimi kakato ʻi he Misiona Seni Paulo Tokelaú, naʻe lava ai ke kau mo ia.
Hili ha ngaahi ʻaho siʻi mei ai, ʻi he ʻaho 6 ʻo Nōvemá, naʻe maʻu ai ʻe Luta, Helevēsio, mo Mākisi honau ʻenitaumení. Naʻe toki fakahū atu leva kinautolu ki he loki silá, ʻo hoko ai ʻa Mākisi ko e fakamoʻoni ʻi hono silaʻi ʻo Luta mo Helevēsio ki he moʻuí ni mo ʻitānití. Naʻe toki fakahū mai leva ʻa e fānau ʻe toko tolu kei iiki angé ki he lokí, kuo nau ʻosi teunga hina.
Naʻe ʻeke ange ʻe he kiʻi taʻahine taʻu tolu ʻa e ongomātuʻá, “Mami, ko e hā te tau fakahoko ʻi hení?”
Naʻe talaange ʻe Luta, ʻa e taumuʻa ʻo e ʻōlitá, “Te tau tūʻulutui ʻi he tēpile ko ʻení, pea ʻe fakatahaʻi ai kitautolu ko ha fāmili.
Naʻe pehē ange leva ʻa e kiʻi taʻahiné, “ʻOku ou fiefia he te u hoko moʻoni ko ho ʻofefine.”
Naʻe fakamahino ange ʻe Luta, “ʻOkú ke ʻosi hoko koe ko hoku ʻofefine.”
Naʻe tūʻulutui takatakai leva ʻa e fāmilí ʻi he ʻōlitá, pea fakahoko ʻe he faisilá ʻa e ouaú. Ko Mākisi pē mei he fānaú hono kotoa naʻe lahi feʻunga ke mahino kakato ki ai hono mahuʻinga ʻo e mōmeniti ko ʻení. Ka naʻe hangē naʻe ongoʻi kotoa pē ʻe he fānaú ʻi he lokí ʻa hono fakaofó mo e fakafiefiá. Naʻe hā fakaʻofoʻofa kia Luta mo Helevēsio ʻa e fakataha hona fāmilí ʻi he temipalé. Naʻe lōmekina kinautolu ʻe he ʻofá.
Naʻe fakakaukau ai ʻa Luta, “ʻOku ʻaʻaku ʻa kinautolu ʻi he taimí ni.” “ʻOku ʻaʻaku moʻoni ʻa kinautolu.”
Hili hono papitaisó, naʻe faʻa ʻalu ʻa Kefilini Uōleni ki he kolo lahi ko Peitoni Lusí (Baton Rouge), ʻi Luisiana, ʻoku meimei ke maile ʻe valungofulu ki he fakatokelau hihifo ʻo hono ʻapi ʻi Niu ʻŌliní, ke ako Tohi Tapu mo hono kāingá. Naʻe ʻi ai hanau tokolahi kuo nau kamata ō kimuí ni ki he siasi Penitekosi ʻi he feituʻu ko iá. Naʻe faʻa ʻomi ʻe Kefilini ha ngaahi fakakaukau mei he ongoongolelei kuo fakafoki maí ki heʻene akó, ka naʻe tokanga ʻaupito ke ʻoua naʻá ne fakaongosiaʻi hono kāingá ʻaki ʻene loto vēkeveke ki he Siasí. Naʻá ne talaange kiate kinautolu, “ʻOku ʻikai ke u loto ke fuʻu fakaongosiaʻi fakaʻangataha kimoutolu.”
Ka, ʻi he taimi naʻá ne ako ai fekauʻaki mo e fakahā ʻi he lakanga fakataulaʻeikí, naʻe ʻikai faʻa mapukepuke ʻe Kefilini ʻene ongó. Naʻe telefoni ʻa Kefilini ki hono fakafotu ko Peti Paunisaní (Betty Baunchand) ʻo kau ki he ongoongó. Naʻe ako ʻe he fāmili ʻo Petí mo ia ʻa e Tohi Tapú, ka naʻe ʻikai lahi haʻane ʻilo ki he Siasí mo ʻikai mahino hono mahuʻinga ʻo e fakahaá.
Ka naʻe mahino ia ki he pīsope ʻa Kefiliní. Naʻá ne telefoni leva ki ai he taimi pē ko iá. Naʻá ne talaange, “Sisitā Kefilini, ʻoku mahino kiate koe ʻa e meʻa ʻoku hoko he taimi ní?
Naʻá ne tali ange, “ʻIo.”
Naʻe ʻikai ke fakapapauʻi ʻe he pīsopé ʻa e meʻa ke ne leaʻakí. Naʻe fāifai peá ne talaange, “Ko ha tokotaha lelei koe.” “ʻOku ou fakakaukau ke ʻai koe ke ke hoko ko ha faifekau.”
Hili ha māhina ʻe taha mei he fanongonongó, kuo fononga ʻa Filita Piliu (Freda Beaulieu, ko e fefine ʻUliʻuli ia ʻe taha ʻi he Uooti Niu ʻŌliní, ʻi ha maile ʻe tahaafe tupu ki he temipale ofi tahá, ʻi Uāsingatoni DC, ʻo maʻu ai hono ʻenitaumení, mo silaʻi fakafofonga ki siʻono husepāniti kuo pekiá.
Neongo naʻe ʻosi fuofua fakaʻatā he taimi ko ʻení ʻa e ngaahi tāpuaki fakatemipalé ki ai pea mo ha tokolahi kehe, ka naʻe ʻikai ke ʻalu leva ʻa Kefilini ki he temipalé. Ka naʻá ne fakafetaʻi pē ki heʻene Tamai Hēvaní.
ʻI ha ʻaho ʻe taha, naʻe sio ai ʻa e husepāniti ʻo Peti Paunisaní, ʻa Sevelia, ki hano kaungā ngāue ʻokú ne lau ʻa e Tohi ʻa Molomoná. ʻI he ʻosi ʻene talanoa mo Kefilini fekauʻaki mo e Siasí, naʻe kamata talanoa leva ʻa Sevelia mo ia, peá ne ʻeke ange kia Sevelia pe ʻe fie talanoa mo e kau faifekaú. Naʻe talaange ʻe Sevelia, “ʻIo, tuku ke nau afe mai heni.”
Naʻe ʻaʻahi mai ʻa e ongo faifekaú ʻi he pō ko iá ʻo na akoʻi ʻa e ʻuluaki lēsoni ʻi he lēsoni ʻe fitu mei he Ko e Founga Maau ki he Akoʻi ʻo e Ngaahi Fāmilí (The Uniform System for Teaching Families), ko e ngaahi lēsoni fakamuimui taha ʻa e Siasí ʻi he ngaahi lēsoni fakafaifekaú. Naʻe pulusi ia ʻi he 1973 pea naʻe maʻu ʻa e ngaahi lēsoní ʻi ha lea fakafonua ʻe uofulu, kau ai ʻa e lea faka-Pilitāniá pea ʻoku kamataʻaki ha fakafeʻiloaki ki he ʻUluaki Mata Meʻa-hā-maí, Tohi ʻa Molomoná, mo hono fakafoki mai ʻo e lakanga fakataulaʻeikí.
Naʻe fiefia ʻa e fāmilí ʻi he lēsoní pea mo fakataimi tēpileʻi ha toe taimi ke toe ʻaʻahi ange ai ʻa e ongo faifekaú. Naʻe fakatou fie ʻilo lahi ange ʻa Peti mo Sevelia, peá na fakaafeʻi leva ʻa e toenga ʻo e fāmilí ke nau kau ʻi he lēsoní. Naʻe vave ʻa e fonu maʻu pē ʻa e ʻapi Paunisení ʻi he taimi kotoa pē naʻe ʻi ai ʻa e ongo faifekaú.
ʻI ha fakaʻosinga uike naʻe ʻaʻahi atu ai ʻa Kefilini ki he fāmilí, naʻá ne fanongo atu ki ha talanoa ʻa Peti ʻi he telefoní. Naʻe pehē ange ʻe Peti, “ʻIkai, tau toki fakahoko ia ʻi ha taimi kehe. ʻOku ʻi heni hoku mehikitangá mei Niu ʻŌlini.”
“ʻKo hai naʻe tā maí?” Ko e fehuʻi ange ia ʻa Kefiliní.
“Ko e ongo ʻeletā mei he Siasi ʻo e Ngaahi ʻAho Kimui Ní.” Naʻá na fakaafeʻi ʻa e fāmilí ke nau ōmai ki he lotú he Sāpaté.
“Talaange kiate kinautolu ʻio.”
Pea ʻi he Sāpate ko iá, naʻe maʻulotu kotoa ʻa e fāmilí, ʻi Peika ʻi Luisiana. Pea ʻi he lolotonga ʻo e ngaahi lēsoni hoko mo e ongo faifekaú, naʻe tukupā ʻa e taha kotoa ke talangofua ki he Lea ʻo e Potó mo e fono ʻo e angamaʻá, totongi vahehongofulú, tali ʻa Sīsū Kalaisi ko honau Fakamoʻui mo e Huhuʻi, pea kātaki ki he ngataʻangá.
ʻI ha meimei uike nai ʻe ua mei heʻenau fuofua ō ki he lotú, naʻe telefoni atu ʻa e fāmili Paunisení kia Kefilini. Naʻá na pehē ange, “ʻOkú ke ʻilo ha meʻa?” “Te ma papitaiso, pea kuo pau ke ke haʻu ki heʻema papitaisó.
Naʻe maʻopo ʻa e falelotú ʻi he ʻaho naʻe fakahoko ai ʻa e papitaisó. Naʻe ōmai ha kāingalotu ʻe toko teau hongofulu ʻo e Siasí ke talitali lelei ʻa Peti mo Sevelia pea mo ha toko hongofulu mā taha ʻo ha kāinga kehe ʻo Kefilini ki honau uōtí. Naʻe lolotonga kei langa ʻa e holó mo e vai faiʻanga papitaisó, pea naʻe kiʻi momoko ʻa e lotú. Ka naʻe mālohi ʻa e Laumālie, ʻo ne fakamāfanaʻi ʻa e taha kotoa ʻi he lokí.
Naʻe tangi ʻa Kefilini ʻi heʻene ʻai takai ʻa e ngaahi tauveli mōmoá ʻi he kau mēmipa foʻou ʻo hono fāmilí naʻe toki papitaisó. Naʻá ne pehē kimui ai, “Ko ha mōmēniti ʻeni naʻá ku tatali mo lotua ʻi ha taimi lōloa.” Naʻe ʻofa ʻi he Siasí, pea naʻá ne fiemaʻu ʻa e kāingalotu ʻUliʻulí hangē ko ia mo hono fāmilí ke nau maʻu kotoa ʻa e ngaahi tāpuaki ʻoku maʻu ʻe he Siasí.
Naʻá ne ʻiloʻi ʻoku hangaifofonga hifo ʻa e Fakamoʻuí ki he Kāingalotú.
ʻI he ʻaho 18 ʻo Nōvema 1978, naʻe fakafeʻiloaki lelei atu ʻa ʻAnitoni ʻŌpina ki ha kau ʻAmelika ʻe toko tolu—ko ha fefine mo ha ongo tangata—naʻa nau tali mai ki ai ʻi he falelotu fakatahaʻanga ʻi he tonga hahake ʻo Naisīliá. Naʻe haʻu fakavave ʻa ʻAnitoni ʻi heʻene fanongo pē kuo nau tau maí. Kuó ne nofo-ʻamanaki kiate kinautolu ʻi ha taʻu ʻe hongofulu tupu.
Ko e kau ʻAmeliká ko ʻEletā Lenitila Meipī, Sisitā Lesieli Meipī, mo ʻEletā ʻEtuini Kēnoni. Naʻa nau ʻeke ange, “Ko ʻAnitoni ʻŌpina koe?”
Naʻe tali ange ʻe ʻAnitoni, “ʻIo,” pea nau hū atu leva ki he falelotú. Naʻe meimei ke fute ʻe tolungofulu e lōlōa ʻo e falelotú. Naʻe teuteuʻi ʻaki e ngaahi mataʻitohi “LDS” ʻi he holisi ʻi ʻolunga ʻi he taha ʻo e ngaahi matapaá, pea mo e kupuʻi lea “ʻApi Fakafaifekaú” ʻi ʻolunga ʻi ha matapā ʻe taha. Naʻe vali ʻe ha taha ʻi he lalo ʻató ʻa e ngaahi foʻi lea “Kāingalotu Naisīlia ʻo e Ngaahi ʻAho Kimui Ní.”
Naʻe talaange ʻe ʻAnitoni ki he kau ʻaʻahí. “Ko ha tatali fuoloa mo faingataʻa, ka ʻoku ʻikai ke toe fai ha tokanga ia ki ai ʻi he taimí ni. Kuo fāifai pea mou aʻu mai.”
Naʻe pehē ange ʻe ʻEletā Kēnoni, “ʻIo, ko ha tatali fuoloa, ka kuo ʻi heni moʻoni ʻa e ongoongoleleí ʻi hono tuʻunga kakató.”
Naʻe kole ange ʻa e kau faifekaú kia ʻAnitoni ke fakahoko ʻene talanoá, peá ne fakamatala ange ʻokú ne taʻu fāngofulu mā valu pea ko e tokoni puleako ʻi he ʻapiako hoko maí. Naʻá ne fakamatala ange ʻa ʻene misi ʻi he ngaahi taʻu kimuʻá ki he Temipale Sōlekí pea kimui ange ai naʻá ne mamata ʻi hano tā ʻi ha makasini motuʻa. Naʻe teʻeki ai pē ke teitei fanongo ia ʻi he Siasí kimuʻa. Naʻe talaange ʻe ʻAnitoni, mo kamata fasi hono leʻó ʻi hono fakamaʻumaʻu ʻene tangí, “Ka naʻá ku mamata tonu ki he fale naʻá ku ʻaʻahi ki ai ʻi heʻeku misí.”
Naʻá ne fakamatala ki he kau faifekaú ʻa ʻene ako fakalelei ʻo e ongoongolelei ʻo Sīsū Kalaisi kuo fakafoki maí, mo ʻene fetohiʻaki mo Lamā Uiliamí, pea mo ʻene mamahi ʻi he kei hokohoko atu ʻa e ʻikai ke ʻi ai ha Siasi ʻi Naisīliá. Ka naʻá ne toe fakamoʻoni foki ki heʻene tui mo e ʻikai loto ke mole ʻene ʻamanakí, ʻo aʻu ki he taimi naʻe fehangahangai ai mo hono kaungā tuí mo e fakatangá koeʻuhí ko ʻenau mateakiʻi ʻa e moʻoní.
ʻI he ʻosi ʻa e fakamatala ʻa ʻAnitoní, naʻe kole ange ʻe ʻEletā Meipī pe ʻe lava ke na talanoa toko ua pē. Naʻá na hū atu leva ki he loki hoko maí, pea ʻeke ange ʻe ʻEletā Meipī pe ʻoku ʻi ai ha lao ʻi Naisīlia te ne taʻofi ʻa e papitaisó he kuo teʻeki ai ke lēsisita fakalao ʻa e Siasí ʻi ai. Naʻe talaange ʻe ʻAnitoni ʻoku ʻikai ke ʻi ai ha lao pehē ia.
Naʻe talaange leva ʻe ʻEletā Meipī, “Sai, ʻoku ou fiefia ke fanongo ki he meʻa ko iá.” Kuo pau ke tau fakahoko ha fefonongaʻaki lahi ʻi he uike ʻe ua ka hokó, ke ʻaʻahi ki ha ngaahi kulupu kehe ʻoku hangē pē ko hoʻo kulupú.” Naʻá ne pehē mahalo naʻa aʻu ki ha uike ʻe nima ki he ono ʻa e ʻaʻahi ki he ngaahi kulupu ko ʻení pea toki lava ʻa e kau faifekaú ʻo foki mai ke papitaiso ʻa ʻAnitoni mo ʻene kulupú.
Naʻe talaange ʻe ʻAnitoni, “ʻIkai, fakamolemole.” “ʻOku ou ʻilo ʻoku ʻi ai mo ha niʻihi tokolahi kehe, ka kuo mau tatali ʻi ha taʻu ʻe hongofulu mā tolu.” Naʻá ne sio ki he fofonga ʻo ʻEletā Meipií. Naʻe pehē ange ʻe ʻAnitoni, “Kapau ʻe malava ʻi ha faʻahinga founga pē, pea fakahoko muʻa ʻa e papitaisó he taimí ni.”
Naʻe ʻeke ange leva ʻe ʻEletā Meipī, “ʻOku ngali mateuteu moʻoni ha konga lahi ho kakaí?”
“ʻIo, ʻio, ʻaupito!” Ne tali mai ʻe ʻAnitoní. “Tau papitaiso ʻa kinautolu ʻoku mālohi taha ʻenau tuí he taimí ni kae hokohoko atu pē hono akoʻi ʻo e toengá.”
ʻI ha ʻosi ha ʻaho ʻe tolu mei ai, naʻe talanoa ʻa ʻAnitoni mo ʻEletā Meipī ke aleaʻi ha founga ki hono tataki ha kolo ʻo e Siasí. Naʻe hivaʻi pē mei tuʻa ʻe he longaʻi fānaú ha foʻi hiva foʻou naʻa nau ako mei he kau faifekaú.
Naʻe ʻikai fuoloa kuo tuʻu ʻa ʻAnitoni, mo e kau faifekaú, mo ha kakai tui kehe ʻi he kauvai ʻo ha kiʻi ano pulipulia ʻo e Vaitafe ʻEkeonumilí (Ekeonumiri River). Naʻe fute ʻe tolungofulu hono fālahi ʻo e foʻi anó, pea takatakaiʻi ʻe ha vao mo ha ʻuluʻakau lanumata. Naʻe huhulu hifo ha ngaahi konga ʻo e laʻaá ʻi he ʻuluʻakaú ʻo fetapaki ʻi he fukahi vaí, kae felēleaki holo ha fanga kiʻi ika lanu fakaʻofoʻofa ofi ki he kauvaí.
Naʻe aʻa atu leva ʻa ʻEletā Meipī ki he vaí mo taki ʻa e nima ʻo ʻAnitoní. Naʻe malimali ʻa ʻAnitoni mo muimui atu ki ai. Hili ʻene tuʻu maʻú, naʻe puke leva ʻe ʻAnitoni ʻa e fasiʻanima ʻo ʻEletā Meipií, pea hiki hake leva ʻe he faifekaú hono nima toʻomataʻú.
Naʻá ne pehē, “ʻAnitoni ʻUsotima ʻŌpina, kuo fakamafaiʻi au ʻe Sīsū Kalaisi, pea ʻoku ou papitaiso koe ʻi he huafa ʻo e Tamaí, pea mo e ʻAló, pea mo e Laumālie Māʻoniʻoní.”
Naʻe ongoʻi ʻe ʻAnitoni hono kāpui ia ʻe he vaí ʻi hono fakauku ia ʻe ʻEletā Meipií. ʻI he taimi naʻá ne ʻalu hake ai mei he vaí, naʻe toki tau e mānava ʻa e taha kotoa ʻi he kauvaí—pea hoko ai mo ʻenau kata fiefia.
ʻI he ʻosi pē e papitaiso ʻo e uaifi ʻo ʻAnitoni ko Fiteliá mo ha kakai kehe ʻe toko tahafitu, naʻe foki leva ʻa e kulupú ki honau falelotú. Naʻe fakanofo leva ʻa ʻAnitoni mo hano fototehina ʻe toko tolu —ko Falanisisi, Leimoni, mo ʻAloisisi—ki he tuʻunga ʻo e taulaʻeikí ʻi he Lakanga Taulaʻeiki Faka-ʻĒloné. Naʻe vaheʻi leva ʻe ʻEletā Meipī ʻa ʻAnitoni ko e palesiteni ʻo e Kolo ʻApoá, pea mo Falanisisi mo Leimoni ko hono ongo tokoni.
ʻI he mafai ʻo e lakanga fakataulaʻeiki naʻá ne maʻú, naʻe vaheʻi ai ʻe ʻAnitoni ʻa Fitelia ko e palesiteni Fineʻofa ʻo e koló.