Mataupu 35
U’ulima Faatasi
I le amataga o le 2006, sa naunau ai Uili Binene e siitia atu i Kinshasa, le laumua o le Ripapelika Temokarasi o Congo, ina ia faaauau ai lana aoaoga i le faaenisinia eletise. Mo le sefulutolu tausaga, sa faigaluega o ia o se faifaatoaga i le nuu o Luputa, pe tusa ma le iva selau maila mai le aai.
Ua faaipoipo nei o ia i se tamaitai talavou e igoa ia Lili, lea na ia papatisoina i le taimi o lana auaunaga o se faifeautalai o le paranesi. E toalua le la fanau, ae mo le lua tausaga ua mavae, sa nonofo ai Lili ma le fanau i Kinshasa ae o loo faigaluega Uili ia lava se tupe e maua e faatasi atu ai ia i latou ma toe foi ai i le aoga.
I le aso 26 o Mati, na faatulaga ai e le peresitene o le misiona o William Maycock le itu muamua i Luputa ma valaauina ai Uili e avea ma ona peresitene. Sa lagona e Uili le lē mautonu ia te ia lava, ae sa ia lafoaia ana fuafuaga e siitia atu, ae talia le valaauga. E lei leva mulimuli ane, ae toe foi atu Lili ma le fanau i Luputa, ma sa amata e Uili ona tiutetauave fou faatasi ma i latou i ona autafa.
Sa na o ia o se tasi o le toatele o le Au Paia na taliaina valaauga e taitai le Ekalesia i Aferika. Toeitiiti atoa le tolusefulu tausaga talu ona o mai uluai faifeautalai faamisiona i Ghana ma Nigeria, ae ua silia ma le lua selau afe tagata o le Ekalesia i le konetineta atoa. Ua i ai nei siteki i le Ripapelika Temokarasi o Congo, Kenya, le Ripapelika o Congo, Ghana, Côte d’Ivoire, Laipiria, Matakasa, Nigeria, Aferika i Saute, ma Zimbabwe. O taitai malolosi i le lotoifale, sa mausalī i aoaoga a le Faaola ma Lana Ekalesia toefuataiina, sa avea ma se manaoga faifai pea.
Sa auai se tagata Ivory e igoa ia Nopeti Ounleu i le Ekalesia o se tagata aoga i le iunivesite i le 1995. I le lua tausaga mulimuli ane, na avea ai o ia ma se epikopo ina ua faatulagaina le uluai siteki i Côte d’Ivoire. E tolu tausaga talu ona mavae lena, ae avea o ia ma se peresitene o le siteki ina ua vavae lana siteki. I le lima tausaga mulimuli ane, na valaauina ai o ia ma lona faletua o Valerie, e avea ma taitai misiona i le Misiona fou a Ivory Coast Abidjan.
I le taimi lava lea e tasi, sa avea ai Apikaila Ituma, o se tusitala o faasalalauga ma se DJ i le leitio, o se peresitene o le Aualofa i lana uarota i Lagos, Nigeria. O le tausaafia ma le malie, sa fiafia Apikaila e aumaia le ataata i foliga o tagata uma na siomia ai o ia. O le toatele o tamaitai i lana uarota ua le toe o mai i le lotu, o lea na ia faia ai ma ana misiona le toe aumaia o i latou. Sa ia valaauina se tasi o nei tamaitai e avea ma ona fesoasoani lua, ma e lei umi ae latou faaaluina faatasi ni itula, feiloai ma tuafafine ma valaaulia i latou i le lotu.
Sa talitonu Apikaila i le mana o le fesootai atu i tagata. I Aso Sa, sa aoao atu ai e ia ma ona fesoasoani ia lesona ma isi lesona e uiga i faiaoga asiasi. I le taimi muamua, sa foliga mai e leai se tasi na naunau e talia le polokalama. Ae sa finafinau pea Apikaila, ma ina ua mavae sina taimi, sa amata ona auauna atu le toatele o tuafafine i le tasi ma le isi. Na amata ona alualu i luma le auai i sauniga a le Aualofa.
I Kenya, i le taimi lea, sa lauiloa ai Iosefa ma Gladys Sitati i la laua auaunaga i le Ekalesia ma le tuuto atu ia Iesu Keriso. A o le’i papatisoina i la’ua ia Mati 1986, o le ‘au Sitati e le o se aiga lolotu. O nisi taimi latou te auai ai i lotu Kerisiano i le lotoifale, ae latou te le‘i lagonaina lava le fafagaina faaleagaga. Sa masani ona faaalu e Iosefa ona Aso Sa e faigaluega ai pe taalo tapolo.
O le taliaina o le talalelei toefuataiina na suia ai mea uma. Sa lagona e le au Sitati le fiafia i le Ekalesia, ma a o avea ma se vaega totonugalemu o o latou olaga, sa amata ona latou faaaluina faatasi le tele o taimi o se aiga. Sa avea Iosefa ma peresitene o le paranesi ma le itu mo le tele o tausaga ma sa fesoasoani i le Ekalesia ia aloaia i Kenya i le 1991. Ina ua faatulagaina le Siteki a Nairobi Kenya i le 2001, sa valaauina o ia e avea ma ona peresitene. I le tolu tausaga mulimuli ane, ia Aperila 2004, na avea ai o ia ma se fitugafulu pule eria. O Gladys, i le taimi lea, sa avea ma se peresitene o le Aualofa a le paranesi ma se faiaoga i le Aoga Sa, Peraimeri, Tamaitai Talavou, Aualofa, ma le seminare.
I le 1991, na malaga atu ai le au Sitati i le Malumalu o Johannesburg Aferika i Saute ma avea ai ma uluai aiga Kenya na faamauina mo le olaga nei ma le faavavau.
“A o matou tomanatu i mea na matou oo i ai,” na toe manatua mulimuli ane ai e Iosefa, “sa matuai manino lava ia i matou uma e le mafai e se tasi ona amata malamalama i le uiga moni o le talalelei a Iesu Keriso seiloga ua faamauina se tasi i le malumalu.”
I Sini, Ausetalia, sa toeitiiti lava faauu ia Blake McKeown e sefuluvalu tausaga mai le aoga maualuga—ma sa manaomia e ia se fuafuaga. Afai e amata ona ia aoga i le iunivesite, o le a le faatagaina o ia e taofi ana aoga mo le silia ma le tausaga. Ma talu ai ona sa faamoemoe o ia e auauna atu i se misiona e lua tausaga pe a atoa lona sefuluiva tausaga, sa ia filifili ai e sue se galuega faavaitaimi pe a uma le faauuga nai lo le mulimuli i le toatele o ana uo i le iunivesite.
Sa avea Blake ma se leoleo faaola i se vaitaele e latalata i lona fale, ma sa fiafia o ia i le galuega. Talu ai nei, na mafaufau ai o ia i le Bondi Rescue, o se ata tifaga moni fou i le televise e uiga i leoleo faaola i le matafaga lauiloa o Bondi Beach i Sini, e uiga i le leoleoina o le ogasami. E ui lava o Bondi Beach e tusa ma le fasefulu maila le mamao mai lona fale, sa tonu ia te ia e auai i se polokalama e tasi le vaiaso o le “poto masani faigaluega” iina, lea na folasia atu ai ia te ia tiute o le galuega i aso taitasi. Sa ia faia foi se suega o le malosi e manaomia mo soo se tasi sa manao e avea ma se leoleo faaola i le matafaga.
Sa faigata le suega, ae sa saunia Blake mo lena suega. I le avea ai ma se tiakono, sa fiafia o ia i taaloga afeleti ina ua uma ona alu e tietie uila i mauga ma alii talavou i lana siteki. E ui lava sa faaaogaina e le Ekalesia le Sikauti o se vaega o lana polokalama a Alii Talavou i le amataga o le seneturi lona luasefulu, ae sa seāseā lava ona faaaogaina i le tele o atunuu i fafo atu o le Iunaite Setete ma Kanata. I Ausetalia, pe tusa ma le tasi vaetolu o iunite i le lotoifale na faatinoina le Sikauti. O le siteki a Blake e le o se tasi o na siteki. I tulaga faapena, sa faaaoga ai e taitai se taiala faapitoa na saunia e le Ekalesia mo le fuafuaina o gaoioiga a Alii Talavou.
O le taitai na aveina alii talavou e tietie uila i le mauga, o Matt Green, na faaāuāu ona faailoa atu ia Blake le taaloga tafatolu [triathlon], o se taaloga e tuufaatasia ai le aau, tietie uila, ma le tamoe. I lalo o le aoaoga ma le faufautua a Matt, na atiina ae ai e Blake le amio pulea ma le taulai atu. Ina ua ia faia le suega o le malosi i Bondi Beach, sa tauia tausaga o aoaoga ma tauvaga a Blake. Sa lelei lana faatinoga ma sa faafaigaluegaina o se leoleo faaola amata.
Ina ua maea lona faauuga i le aoga maualuga, sa amata ona faigaluega Blake i aso uma o le vaiaso i le matafaga. E lei faamaonia e le galuega sona taimi i le Bondi Rescue, ae e lei umi ae puee le au fai ata tifaga o ia ao aoaoina le auala e faaaoga ai masini faaola, fesoasoani i tagata asiasi i le matafaga, ma faamalolosia tulafono o le matafaga. Sa latou pueina foi le taimi na ia laveaiina ai se tagata mai le sami mo le taimi muamua.
Sa fiafia Blake i le galuega. I le na o ia ai o le tagata auai o le Ekalesia i le aufaigaluega, sa ia lagonaina si ona fefe i isi leoleo faaola, o o latou olaga ma tulaga faatauaina sa matuai ese lava mai lona lava olaga. Ae na te le’i lagonaina lava sona popole e faatuatuana’i ona tulaga faatonuina pe a latou i ai.
I le amataga o le 2007, na tali atu ai Blake ma isi leoleo faaola ina ua vaaia se tamaloa o tauivi i se vaega matautia o le vai. Sa latou saili mo le fasefulu-lima minute, ae sa leai se faailoga o se tagata aau na malemo pe o tauivi, ma e leai se tasi o le luasefulu-lima afe o tagata na o i le matafaga na lipotia mai se uō po o se tagata o se aiga o loo misi. Mulimuli ane, na lafoaia e leoleo faaola le sailiga, ma le faamoemoe po o ai lava na latou vaai i ai ua toe foi ane i le matafaga.
E lua itula mulimuli ane, na alu ane ai se taulealea ia Blake i le ‘olo o le leoleo faaola. Sa ia fai mai ua le mafai ona ia maua lona tamā. “Tau o lou nofo iina mo sina sekone,” o le tala lea a Blake i le taulealea. Ona alu lea o ia ma ta‘u atu i isi leoleo faaola.
Sa toe faanatinati atu le ‘auleoleo i le vai i luga o laupapa ma se Pasika Faasee. Sa latou valaau atu foi i se helikopa a leoleo e felelea’i solo i luga a‘e o le ogasami. O le taimi lea, sa nonofo ai Blake ma le taulealea ma lona tina, ma fai atu ni fesili e uiga i le tamaloa o loo misi. Ae e ui lava ina sa talanoa atu ma le toafilemu Blake ia i la‘ua, ae sa popole o ia ina ne‘i maliu le tane a le tina, le tamā o le taulealea.
Ina ua mou atu le ao, na vaaia ai e se tasi o le ‘au laveai se tasi i lalo o galu. Sa maulu se leoleo faaola i totonu ma toe aumaia le tamaloa i le apitaogalu. Sa latou taumafai e faamanava o ia, ae ua tuai tele.
Sa matuā faate’ia Blake i le tala. Na faapefea ona le iloa e ia ma isi leoleo faaola le tamaloa, aemaise lava sa leoleoina lelei le matafaga? Sa lei mafaufau tele lava Blake i le oti, ma e leai se tasi e latalata i ai ua maliu. O lea la ua matua moni lava le oti ia te ia.
Na leva le afiafi ae faatoa manava galuega a Blake i lena po. A o ia mafaufau i le leai o se uiga o le faalavelave lea na faatoa ia molimauina, sa ia toe mafaufau i le ata o le faaolataga. I lona olaga atoa, sa aoaoina ai o ia e faapea, o le oti e le o le mutaaga lea o le olaga, na faia e Iesu Keriso ia mafai ona toetula’i tagata uma i le Toetutu.
I vaiaso na sosoo ai, o le faatuatua i nei mataupu faavae na aumaia ai ia te ia le faamafanafanaga.
I le aso 31 o Mati, 2007, na lagolagoina ai e le Au Paia ia Julie B. Beck, Silvia H. Allred, ma Barbara Thompson e avea ma au peresitene aoao fou o le Aualofa. I lena taimi, sa auauna faatasi ai Silvia ma lona toalua o Jeff, le peresitene o le Nofoaga Autu mo le Aoaoina o Faifeautalai i le Ripapelika Tominika. E ui lava sa fiafia o ia i le i ai faatasi ma faifeautalai i le Keripiane, ae sa ia tulimatai atu e galulue faatasi ma tamaitai o le Ekalesia. O lenei valaauga fou na avea ai o ia ma uluai tagata Amerika Latina na auauna atu i le au peresitene aoao o le Aualofa.
E lei leva mulimuli ane, ae valaaulia e Boyd K. Packer, le sui peresitene o le Korama a Aposetolo e Toasefululua, le au peresitene fou latou te feiloai i lona ofisa. Ina ua latou taunuu atu, sa ia faaali atu ia i latou se laina o fusifaila i luga o se fata. “Ua tusa ma le sefululima tausaga talu ona ou teuina nei fusifaila,” sa ia faamatala mai ai.
I totonu o fusifaila sa i ai le silia ma le afe itulau o le talafaasolopito o le Aualofa. I le tele o tausaga na muamua atu, a o avea o ia ma se aposetolo talavou, sa avea o ia ma se faufautua o le pulega aoao i le Aualofa ma sa ia maua ai se faamemelo tele mo le faalapotopotoga ma lona peresitene i lena taimi, o Belle Spafford. Mulimuli ane, sa ia talosagaina ai tusitala o Lucile Tate ma Elaine Harris e tuufaatasia se talafaasolopito o le Aualofa mo lona lava faaaogaina. Sa i ai a la’ua galuega i totonu o fusifaila.
“O a’u kopi patino nei,” na ia fai atu ai nei i le au peresitene fou. “Ou te tuuina atu ia te outou.”
I le taimi o Peresitene Bonnie D. Parkin, sa suesueina ai e le aufono aoao o le Aualofa ia Tamaitai o Le Feagaiga: O Le Tala i le Aualofa, o se talafaasolopito umi na lolomiina mo le selau limasefulu tausaga o le faalapotopotoga i le 1992. O lea sa lagonaina e Peresitene Beck ma ona fesoasoani le uunaiga e faitau le talafaasolopito o loo i totonu o fusifaila, o lea na latou vaevaeina ai ma suesueina feauaua’i voluma taitasi. A o latou faitau, sa latou maua se lagona manino o le vaaiga mamao ma le faamoemoega o la latou faalapotopotoga.
Sa latou malamalama, o le Aualofa, sa muai faatuina e ala i le pule o le perisitua. Na suia ana gaoioiga ma taumafaiga i le aluga o tausaga, faatasi ai ma nisi o au peresitene na faatuina ni falemai po o le taulai atu foi i galuega faaagafesootai, faitautusi ma le tusitusi, po o se isi lava ituaiga o auaunaga. Ae o le tuuina atu i tamaitai o avanoa e faalautele atu ai le talalelei a Iesu Keriso ma tuuina atu le toomaga ia i latou sa manaomia le fesoasoani, sa avea pea ma totonugalemu o le galuega a le faalapotopotoga.
Ae, sa popole lava le au peresitene ona sa avea le Aualofa, ua na o se isi vasega e auai ai i le Aso Sa. O sauniga ma gaoioiga a le Aualofa i aso o le vaiaso, aemaise lava i nofoaga sa faatuina lelei ai le Ekalesia ma ona tagata, sa tele lava o ni gaoioiga faaagafesootai sa itiiti se faiā ma le tuuina atu o auaunaga po o le aoao atu o le talalelei. E toatele tagata o le ekalesia sa le iloaina le amataga musuia o le faalapotopotoga po o lona talafaasolopito mau’oa. Sa faapitoa lava le faaalia e tamaitai talavou le itiiti o le naunautai i ai. Sa talitonu le au peresitene e manaomia e tamaitai i le Ekalesia ona maua le malosi ma le taua i lo latou faasinomaga o ni tuafafine o le Aualofa.
A o talanoaina e le au peresitene le Aualofa ua tuanai ma le taimi nei, sa latou mafaufau i le savali autu ma le faamoemoega o le faalapotopotoga mo le usoga a le Ekalesia i le lalolagi atoa. Sa nonofo sui taitasi o le au peresitene i fafo atu o le Iunaite Setete, ma sa iloa e i latou taitoatasi e manaomia ona latou faama’iteina se savali manino, faigofie lea e mafai ona tuufaatasia ma musuia ai tagata o le Aualofa e ui lava i eseesega i gagana, aganuu, ma aafiaga.
Sa faailoa faatasi e le au peresitene ni faamoemoega se tolu o le Aualofa: muamua, faateleina le amiotonu ma le faatuatua patino; lona lua, faamalolosia aiga ma auaiga; ma le lona tolu, saili ma tuuina atu le toomaga mo i latou o e o loo manaomia le fesoasoani. I le agai i luma, sa tonu ai ia i latou e faalauiloa atu le “faatuatua, aiga, ma le toomaga” i soo se avanoa.
O se tasi o o latou tofiga muamua lava o le toe iloiloina lea o le vaega a le Aualofa o le Tusitaulima o Faatonuga a le Ekalesia. E pei ona silafia e le au peresitene aoao o le Aualofa na muamua atu, o le gagana lavelave o le tusitaulima e ono faigata i nisi o tagata o le ekalesia ona faitau ma malamalama i ai. Sa manatu le au peresitene a Peresitene Beck o nisi o ona taiala sa sili atu ona fetaui mo tagata o le Ekalesia i Iuta nai lo le Au Paia i le lalolagi atoa. E pei o isi taitai o le Ekalesia i lena taimi, sa latou mananao i se tusitaulima e faigofie ona faitauina lea e tuuina atu ai i tagata o le Ekalesia le gafatia e fetuunai ai i manaoga ma tulaga i le lotoifale.
O le tusitaulima o loo i ai nei ua tuuto atu ai le silia ma le luasefulu itulau i le Aualofa. Sa faamoemoe Peresitene Beck e maua mai se mea e sili atu ona puupuu ma faigofie atu. I le faaaogaina o le faatuatua, aiga, ma le toomaga e fai ma o latou faavae, na tusia ai e le au peresitene se pepa o faamatalaga e fa itulau ma auina atu ia Elder Dallin H. Oaks, le aposetolo na vaavaaia le toe faafouga. E ui lava sa fiafia o ia i mea sa latou faia, ae sa ia fautuaina atu le faaopoopo i ai o nisi faatonuga. Sa latou faalauteleina i itulau e sefululua, ma sa faamaonia.
O le tusitaulima sa na o se tasi lea o le tele o galuega faatino a le Aualofa. A o fesoasoani i le toe iloiloga, sa galue Silvia i komiti e tuuto atu i aoaoga faamasani, faiaoga asiasi, ma le faaaofia ai o tuafafine fou i le Aualofa. Sa malaga foi o ia i le tele o atunuu i le salafa o le lalolagi e feiloai ma tuafafine o le Aualofa ma taulimaina o latou manaoga.
Sa naunau o ia ma isi sui o le au peresitene e fesoasoani i tagata uma ia maua le vaaiga mamao a le Aualofa.
Ia Me 2007, sa atuatuvale ai Silvina Mouhsen, o se tagata o le Au Paia o Aso e Gata Ai sa nofo i Buenos Aires, Atenitina. Mo nai tausaga talu ai, sa ia lagolagoina ai lona uso, o lē na maua i le atuatuvale ma le ogaoga o le gasegase o le mafaufau. I lenā taimi, sa oo ai foi Silvina i le maliu o se tagata e vavalalata iai o lona aiga, fanauina lana tama lona tolu, ma avea ai ma se peresitene o le Aualofa i le uarota. O le taimi lea, sa sailia ai e lona toalua o Tavita se siitaga i le galuega, faalauteleina o ana aoaoga, ma auauna atu i le Ekalesia. Ona o le feteenai o a laua fuafuaga atofaina, sa tau le mafai ai ona ia vaai ia te ia i le aluga o le vaiaso.
O lea la, sa tauivi Silvina e aluese mai le moega i le taeao, ma sa ia faia ni mea sese faapopoleina. Muamua, sa alu i lana taavale i le supamaketi ma sa faafuasei ona ia lē manatua le mea sa i ai o ia. I se isi aso, sa alu atu ai o ia e piki lana tama tama, o Nicolás, mai le aoga ma faafuasei ai ona ia u’u mai le lima o se isi tamaitiiti. Talu ai nei lava, na alu ai o ia ma tuu lana tama teine i se patī i le aso sese.
Ina ua talanoa atu Silvina i lana fomai e uiga i nei mea na tutupu, sa ta’u atu e lana fomai i ai, o loo ia aafia i faailoga o le atuatuvale. Sa ia fautuaina o ia e alu mo ni togafitiga, ia livi mai lana galuega faafaiaoga, ma ia maua se talavai.
Sa faigata ona taliaina e Silvina lenei fautuaga. Sa ia iloaina mai le tausia o lona uso, o gasegase o le mafaufau e faigata, o nisi taimi e mafua mai i mea moni tuufaasolo e le mafai ona pulea e se tasi. Ae sa ia manatu ia te ia lava o se tagata malosi—o se tasi sa tausia isi i taimi o faigata, ae le o se tasi na oo i ia lava i faigata. Mo sina taimi, sa ia faamatala atu i ni nai tagata e uiga i le tala a le fomai.
A o mafaufau atili Silvina i le soifua maloloina faalemafaufau—o lona uso ma ia lava—sa ia matauina isi o loo tauivi ma na foi āuga. Ae e leai se tasi na talanoa e uiga i na mea. O se tasi tamaitai i le lotu sa i ai ni faafitauli tau i le soifua maloloina faalemafaufau lea na taofia ai o ia mai le auai i sauniga a le Ekalesia. Soo se taimi lava e talosaga atu ai i ona taitai i le lotoifale mo se fesoasoani, e masani lava ona latou fautuaina o ia ia latalata atili atu i le Atua ma faalagolago ia te Ia e foia ona faafitauli.
Mai lona lava aafiaga, na iloa ai e Silvina ua na o se vaega lenei o le vaifofō i faafitauli o le tamaitai, ma sa ia fautuaina o ia e saili se fesoasoani faapolōfesa. I ni masina mulimuli ane, na iloa ai e Silvina na faaaoga e le tamaitai lana fautuaga ma na faasolo manuia ai.
Sa talanoa atili le Ekalesia e uiga i gasegase faalemafaufau i tausaga talu ai nei, ma uunaia le Au Paia ina ia tali atu ma le agaalofa ia i latou o e na tauivi. Na maua ai foi punaoa eseese mo le soifua mālōlōina o le mafaufau. O le Matagaluega o Auaunaga Lautele a le Aualofa, lea ua ta’ua nei o le Tautua a le AAG mo Aiga, ua leva ona ofoina atu fautuaga ma isi fesoasoaniga faalesoifua maloloina faalemafaufau i le Au Paia. E ui lava o le Tautua mo Aiga sa na o le Iunaite Setete, Kanata, Ausetalia, Niu Sila, Peretania Tele, ma Iapani sa i ai o latou ofisa, ae ua faagasolo ona faateleina i le tele o atunuu, e aofia ai Atenitina. O nisi o Nofoaga Autu mo le Tautua o le Uelefea i Amerika i Saute, e pei o ofisa i Chile, na ofoina atu fautuaga faatasi ma fomai ua aoaoina. Sa tuuina atu foi e le Ekalesia le lagolago mo le soifua maloloina faalemafaufau i taimi o mala faalenatura. Mo se faataitaiga, ina ua mavae le galulolo i le Vasa Initia, sa faia e le Tautua a le AAG mo Aiga ni aoaoga i le itulagi na aafia ai e fesoasoani ai i tagata e taulimaina faanoanoaga ma mafatiaga.
A o mulimuli Silvina i fautuaga a lana fomai, sa faaleleia lona soifua maloloina. E le gata i togafitiga, malologa, ma fualaau, ae sa ia maua le mafanafana i faamalositino ma musika. Sa ia saili foi mo ni auala e maua ai le paleni i lona olaga. I le fale, sa tele atu le taimi na la faaaluina ma Tavita e faatasitasi ai. O nisi taimi la te feiloai ai i le malumalu pe a uma galuega ina ia mafai ona la faia se sauniga faaeega paia. O nisi taimi, e na o le la ō faatasi lava i le faleoloa.
Na maua e Silvina se malosiaga faaopoopo i le folafolaga i le aiga. Na aoao mai ai e faapea, na talia e afafine ma atalii agaga o le Atua Lana fuafuaga i le muai olaga, ma mafai ai ona latou agai i luma agai i se taunuuga paia o ni “suli o le ola e faavavau.” O le iloaina o lenei upumoni na maua ai lona faamoemoega, taitaiga, ma le vaaiga a o feagai o ia ma ona luitau.
I le lotu, sa faalagolago tele o ia i ona fesoasoani i le au peresitene o le Aualofa e fesoasoani e faataunuu ona tiute. Sa faalagolago o ia i le Faaola, ma sa amata ona i ai se uiga fou o lona faatuatua ia te Ia. Sa ia faalogologo atili i tatalo o le faamanatuga i Aso Sa taitasi, lea na avea ma se avanoa e mafaufau loloto atili ai i le sauniga. I se tasi afiafi, na tuuina atu ai e Tavita ia te ia se faamanuiaga faaleperisitua, ma folafola atu o le a faagaoioia lona mafaufau i le ala na te manaomia. Sa tatalo foi ana uo mo ia, ma sa tuu e lona tuagane lona igoa i luga o le lisi o tatalo i le malumalu.
E ala mai i nei aafiaga, na tuputupu ae ai Silvina i la le agaga. Sa ia iloaina sa silafia lelei e le Faaola ona tulaga faigata. Sa le’i taulimaina na o ia lava ona tauiviga.
Sa i ai iina uo, aiga, ma le Alii e lagolagoina o ia a o faamaloloina o ia.
Ia Iuni 2007, na toe foi mai ai Hector David Hernandez i le fale mai le aoga ua matuā vaivai lava. Sa fulafula lalo ifo o ona mata a o la nonofo i lalo ma lona faletua, o Ema, ma fai atu ia te ia sa moe o ia i lana vasega.
Ua mavae le tausaga ma le afa talu ona faamauina Ema ma Hector David i le Malumalu o le Aai o Kuatemala. O le taimi lea o loo ave uma a la vasega i se iunivesite lautele e latalata i lo la fale i Honduras. Ma faatasi ai ma le faapaleniina o galuega aoga, ma le faaipoipoga, sa la tausia lo la atalii pepe, o Oscar David.
O le iunivesite sa la auai ai sa tapulaa ni kosi na ofoina atu i semesa taitasi, o lona uiga o le a umi se taimi faatoa faauu ai Ema ma Hector David. Ma o le avea ai ma matua fou na o mai ma le tele o po e leai se moe, na mafua ai ona pagatia a la meaaoga.
A o la nonofo faatasi, sa ta’u atu ai foi e Hector David ia Ema o la faatoa maua ona togi.
“E le’i lelei tele a’u faatinoga,” o lana tala lea, ma le lē fiafia.
Na iloa e Ema e i ai se mea e manaomia ona suia. A o la talanoaina a la’ua filifiliga, sa mafaufau o ia i le Tupe Faaagaga mo Aoga. Sa tumau pea le polokalama o nonogatupe a le Ekalesia i lona mafaufau i le tele o tausaga, ae sa la mananao ma Hector David ia ola tutoatasi. O lea la ua la lagonaina le uunaiga e sui a laua fuafuaga.
“Aea pe a e alu i se iunivesite tuma’oti ma ta faaaogaina le Tupe Faaagaga mo Aoga?” Na fautuaina si e Ema.
Sa moemiti Hector David e faauu mai le polokalama tausitusi i le iunivesite sa la auai ai. Ae o le iunivesite tuma’oti lea na ta’ua e Ema na ofoina mai ai se mataupu suesueina faapena o mea tautupe. E tolu foi ona kuata i le tausaga, o lona uiga e mafai ona ia avea nisi vasega ma vave faauu ai. O le taimi lea, e mafai ona fesoasoani le Tupe Faaagaga mo Aoga e totogi ai le tau maualuga o le iunivesite.
“Ua lelei,” na ioe ai Hector David. Ae sa manao o ia ia faaaoga e Ema le TFA e ausia ai foi ana sini faaleaoaoga. “O le a ta aooga uma,” o lana tala lea. “O le a ou aoga.” O le a e aoga.”
“Ua lelei,” o le tala lea a Ema, ma le fiafia i le fuafuaga.
Mai iina, sa la talosaga faatasi ai mo se nonogatupe a le TFA ma lesitala ai i le iunivesite tuma’oti. Sa faia e Ema se laa o le faatuatua ma tuua lana galuega i le faletupe, ma tuu atu ai ia te ia le tele o le taimi e faaalu i le fale ma Oscar David.
O tagata na faaaogaina le Tupe Faaagaga mo Aoga sa manaomia ona faia se kosi e saunia ai i latou mo galuega i le lumanai. Na ofoina mai e le vasega ni punaoa e fesoasoani ai i tagata auai ia iloa a latou galuega lelei ma le auala e saunia ai mo lena galuega.
O se tasi o meaaoga a Ema o le tusia lea i lalo o ana taleni ma mea e fiafia i ai. Sa ia matauina e fatufatuai o ia ma e fiafia o ia i le vaega o faasalalauga faapisinisi. Ona ia talanoa lea i tagata sa galulue i fefaatauaiga ma le mamanuina o ata. Ina ua maea na faatalanoaga, sa filifili Ema e sui lana mataupu autu mai le pulega o pisinisi i fefaatauaiga ma faasalalauga.
Sa le tele sona iloa e uiga i nei mataupu, ae ina ua saofai i lana vasega muamua o fefaatauaiga i le iunivesite tuma’oti, sa ia iloaina ua i ai o ia i le nofoaga sa’o.
“O le mea lenei na ou fanau mai e fai,” sa ia mafaufau ai.
E oo lava i le fesoasoani tautupe mai le TFA, o le avea ma se tagata aoga ma se matua sa le faigofie. Sa faaauau pea ona feagai i la’ua ma Hector David ma po e leai se moe ma faigata ona taulimaina o la tiutetauave. I nisi aso, sa mafaufau ai Ema pe tatau ona ia faataatia ese le aoga ma faamaea lana aoga i se taimi mulimuli ane.
Ae i taimi faigata sa la toe fai atu ai ma Hector David i se mautauave i le tasi ma le isi: “O le taimi lenei.”
I le aso 12 o Ianuari, 2008, sa tu ai Peresitene Gordon B. Hinckley i le tuugamau o lona faletua o Marjorie, i le Fanuatanu o le Aai o Sate Leki. Ua toeitiiti atoa le fa tausaga talu ona maliu o ia. Sa gasegase o ia i le malaga i le fale mai le faapaiaga o le Malumalu o Accra Ghana ma maliu ai i ni nai masina mulimuli ane, i le aso 6 o Aperila, 2004.
Sa sopoia faatasi e Peresitene ma Sister Hinckley le lalolagi, ma auauna atu i le Au Paia ma olioli i le mafutaga a le tasi ma le isi. Sa matuai misia lava o ia [e Peresitene Hinckley]. E na o lana auaunaga i le Ekalesia ma lona aiga na taofia ai o ia mai le lofituina i le tuuatoatasi.
Sa taumafai Peresitene Hinckley e asiasi i lona tuugamau i vaiaso uma e tuu ai ni fugalaau ma mafaufau loloto i le ono sefulu ma le ono tausaga o le la faaipoipoga. Sa popole o ia ina ne’i manatu nisi tagata ua faatele na’ua ona asiasi atu o ia i le tuugamau. Ae sa alu lava o ia.
“O ia o a’u mea uma, o le tagata lea sa sili ona ou faapelepele i ai,” sa ia toe manatunatu ai i se tasi taimi. “O le mea aupito itiiti e mafai ona ou faia o le tuua lea o se faailoaga o le matagofie i vaiaso taitasi.”
I lenei asiasiga, sa i ai pea pale i luga o le tuugamau mai vaiaso ua mavae, ma sa tonu ai ia Peresitene Hinckley e tuua i latou iina mo sina taimi umi.
E lei leva mulimuli ane, ae nofo i lalo le perofeta e faamalau ona moomooga mo lona falelauasiga. I le ivasefulu-fitu [o tausaga o lona soifua], sa avea ai o ia ma peresitene aupito matua oe soifua i le talafaasolopito o le Ekalesia. Sa faasaoina o ia mai se taotoga o le kanesa i ni nai tausaga ua mavae, ae o lea ua sosolo le kanesa. Sa ia iloaina ua muta lona taimi i le lalolagi.
“Ou te manao ia tanu a’u i se pusamaliu cherrywood, e tutusa lava ma lo’u toalua,” na ia faatonuina ai. Sa faamoemoe o ia o le a faia lona falelauasiga i le Maota Autu mo Konafesi, e tusa lava pe o lona uiga o le a i ai ni nofoa avanoa i le fale faafiafia tele.
“Sa ou suatia le eleele mo lena fale, ma faapaiaina,” sa ia faamatala mai ai, “ma ua manatu ai e talafeagai le faia o le sauniga o lo’u falelauasiga iina.”
Sa le’i manao Peresitene Hinckley i se falelauasiga umi. E le tatau ona sili atu ma le ivasefulu minute, na ia saunoa ai, e pei lava ona fautuaina mai e le Tusitaulima o Faatonuga a le Ekalesia . Sa ia talosagaina lona fesoasoani muamua ua leva ona i ai, o Peresitene Thomas S. Monson, e taitai. Sa ia talosagaina foi le aufaipese a le Tapeneko e usuina le “O Loo Soifua Lo’u Togiola,” o se viiga sa ia tusia i tausaga ua mavae:
Ua ou iloa o loo soifua lo’u Faaola,
Le Faaola manumalo, le Alo o le Atua,
Ua manumalo i tiga ma le oti,
O lo’u Tupu, lo’u Taitai, ma lo’u Alii.
I le faaiuga o le faatonuina o lona falelauasiga, na ta’ua ai e le perofeta ia Sister Hinckley. Sa ia te ia faamautinoaga uma o le a tumau a la’ua feagaiga o le faaipoipoga i le olaga a sau. O lona manao mulimuli lea ia teuina o ia i ona autafa.
“Ou te tuuina atu ai a’u lava i aao o le Alii,” na ia faaiuina ai, “ma auai faatasi ma la’u soa pele e faavavau e savavali faatasi i le ala o le tino ola pea ma le ola e faavavau.”