Talafaasolopito o le Ekalesia
Mataupu 23: O Taumafaiga Uma

Mataupu 23

O Taumafaiga Uma

tamaitai talavou o loo tauaveina ia fu’a

I le Aso Lulu, 6 Novema, 1985, sa tilotilo atu ai le peresitene aoao o Tamaitai Talavou o Ardeth Kapp i fafo o le faamalama o lona ofisa i le Aai o Sate Leki. Sa i ai se fu‘a na sisi faavaeloto e faamamaluina ai Peresitene Spencer W. Kimball, o lē na maliu i le po na muamua atu. O le faaletonu o le soifua maloloina o le perofeta na taofia ai o ia mai le vaaiga a tagata lautele mo le tele o tausaga, o lea sa le o se mea na faateia ai lona maliu. Ae sa matuai lagonaina lava e Ardeth lona faanoanoa.

Na oo mai le tala a o sauni o ia ma le aufono aoao o Tamaitai Talavou e faia le uluai faasalalauga faasatelite a Tamaitai Talavou. Sa faatulagaina le faasalalauga mo lena Aso Sa, ma sa filifili taitai o le Ekalesia e faaauau pea, e ui lava i le maliu o le perofeta.

Sa fuafuaina e Ardeth ma lana aufono faatonu le gaoioiga mo ni masina. Ina ia fesoasoani e faalauiloa atu tulaga faatauaina fou e fitu a Tamaitai Talavou, sa talosagaina ai e Ardeth ia Janice Kapp Perry, le tausoga o lona toalua ma o se fatupese o le Au Paia o Aso e Gata Ai, e tusi se pese mo le faasalalauga. Sa ia sailia foi se faatagaga e fatu ai se lomiga faapitoa o le New Era, le mekasini a le autalavou a le Ekalesia, e faalauiloa atili ai tulaga faatauaina.

Ina ua uma ona fuafuaina le tau o le lomiga—pe tusa ma le limasefulu sene i le kopi—sa alu atu o ia ia Elder Russell M. Nelson, le faufautua o lana au peresitene i le Korama a Aposetolo e Toasefululua, e faamaonia le tupe faaalu telē. I le iloaina e to‘aiva lana fanau teine, na taumafai ai o ia e faamalamalama le tau. “Elder Nelson,” sa ia fesili ai, “pe e limasefulu sene le tau o se tamaitai talavou?”

Sa ataata Elder Nelson. “Ardeth, oe o se tagata faigata,” o lana tala lea. E lei umi ae faamaonia e le Aufono Faatonusili o Taitai Perisitua le lomiga faapitoa ma faaliliuina i gagana e sefuluono.

I le aso 10 o Novema, o le aso na sosoo ma le falelauasiga o Peresitene Kimball, na faatumulia ai e tamaitai talavou le Tapeneko o Sate Leki. Sa nonofo i luga o le tulaga ia au peresitene aoao o le Aualofa ma le Peraimeri, le toatele o pulega aoao, ma taitai o Tamaitai Talavou ua mavae faatasi ma Ardeth ma ona sui o le aufaatonu.

Sa tatalaina e se aufaipese e fa selau tamaitai talavou le fonotaga i le usuina o le pese “As Zion‘s Youth in Latter Days,” o se viiga na tusia faapitoa mo le viiga fou a le Ekalesia, na lolomiina i le tolu masina na muamua atu. Ona tuuina atu lea e Elder Nelson o le lauga muamua.

“Taumafai ia mauaa ia Keriso le Alii,” sa ia uunaia ai tamaitai talavou. “Ia fusia faatasi outou lava—mauaa i le upumoni, aapa atu e aoao atu ma molimau atu, saunia e faamanuia isi i fua o le Agaga.”

Ina ua uma ona ia faia, sa tula’i atu Ardeth e faailoa atu le mautauave fou a Tamaitai Talavou, “Tu mo le Upumoni ma le Amiotonu,” e faavae i le folafolaga a le Alii i le Mose 7:62: “O le a Ou faia ia tafi le lalolagi i le amiotonu ma le upumoni e pei o se lolo.”

“Ua tatou agai atu i se vaitaimi o loo faaalialia ai e le fili lona mana, ma e toatele ua faaseseina,” sa ia fai atu ai i tamaitai talavou. “Afai latou te vaai atu ia te oe, pe o le a latou vaaia ea se mea e iloagofie lava le ese mai le lalolagi lea o le a fesoasoani ia i latou e iloa ai le ala sao, le upumoni, le sulufaiga o loo latou sailia? E mafai ona e tu atu ma taitai atu mo le amiotonu?”

Sa faaauau le faasalalauga i se aoaoga faavitio e faailoa mai ai tulaga faatauaina e fitu. Sosoo ai, sa tu i luga se tamaitai talavou mai Filipaina ma toe fai mai tulaga faatauaina, taitasi, a o faapau ifo i lalo mai le poletito ia fu‘a felanulanuai e faatusa i mataupu faavae taitasi. Ona tuuina atu lea e le fesoasoani lona lua o Maurine Turley le autu fou a Tamaitai Talavou, ma sa taulotoina faatasi e le faapotopotoga:

“O i matou o afafine o se Tama Faalelagi e alofa ia i matou, ma e matou te alolofa ia te Ia. O le a matou “laulaututu e fai ma molimau a le Atua i aso uma, ma mea uma, atoa ma nuu uma” a o matou taumafai e ola i tulaga e faatauaina e Tamaitai Talavou.

Sa faatinoina e le aufaipese le pese a Janice Kapp Perry “Ou te Savali i le Faatuatua,” ma sa tuuina atu e Elder Gordon B. Hinckley le saunoaga faaiu. Ina ua mavae lena, a o usuina e le aufaipese ma le faapotopotoga le viiga “Tutumau, Tutumau,” sa solo atu tamaitai talavou e lua selau i lalo o le ala savali ma tauaveina fu’a i lanu e fitu e faatusa i tulaga faatauaina fou.

Sa matuai fiafia lava Ardeth. “O le faeasaite a Tamaitai Talavou sa MATAGOFIE!!” sa ia tusi ai i lana api talaaga. Ua amata se mataupu fou mo tamaitai talavou o le Ekalesia.

O le taeao ina ua maea le faasalalauga a Tamaitai Talavou, sa tu ai Peresitene Ezra Taft Benson e valusefulu-ono tausaga i se pulelaa i le Maota o le Pulega o le Ekalesia. E lei leva ona faauuina o ia e le Korama a Aposetolo e Toasefululua e avea ma peresitene o le Ekalesia, ma ua oo mai le taimi e faasilasila atu ai le tala i le au faasalalau. Sa nonofo i ona tua ona fesoasoani i le Au Peresitene Sili, o Gordon B. Hinckley ma Thomas S. Monson. Sa faatumulia le potu i le au faasalalau ma mea pueata.

I le ma’ea ai o lona iloa o le maliu o Peresitene Kimball, sa lagona e Peresitene Benson le vaivai—vaivai atu nai lo se isi lava taimi muamua. Ae sa malosi le uunaiga a le Agaga i ona luga. I le falelauasiga o Peresitene Kimball, sa ia faamamaluina ai le perofeta ua maliu o se tagata e lotomaualalo tele, agamalu, ma faatuatua. “Sa ia iloa le Alii,” na molimau ai Peresitene Benson. “Sa ia iloa le auala e talanoa atu ai ia te Ia ma le auala e maua ai tali.”

I lalo o le taitaiga a Peresitene Kimball, na faatupulaia ai le Ekalesia i le toeitiiti lua miliona tagata o le Ekalesia, o le toatele o i latou i Amerika Latina. Faatasi ai ma le faitau selau o siteki na faatulagaina i le taimi o lana au peresitene sa i ai uluai siteki i Polivia, Kolomupia, Nicaragua, Parakuei, Puerto Rico, ma Venesuela. Ina ia taulimaina lenei tuputupu ae, sa ia fatuina ma faalauteleina ai le Korama Muamua a Fitugafulu ma lagolagoina le taitaiga e ala i aufono a eria, risone, ma aiga.

Sa faamamafa mai foi e Peresitene Kimball le manaomia o malumalu, galuega faafaifeautalai, ma le suesueina o le talalelei. I le taimi o lana au peresitene, e luasefulu-tasi malumalu na faapaiaina ma le aofai o faifeautalai faamisiona na faateleina mai le sefulufitu afe i le silia ma le luasefulu-iva afe. I le 1979, na lolomiina ai e le Ekalesia se lomiga o le Lomiga a King James o le Tusi Paia faatasi ai ma faafanua, se lomifefiloi o le Tusi Paia, vaega mai le faaliliuga musuia a Iosefa Samita o le Tusi Paia, ma le faitau afe o vaefaamatalaga ma mau faasino i tusitusiga paia a le Au Paia o Aso e Gata Ai. I le lua tausaga mulimuli ane, i le 1981, na faalauiloa ai e le Ekalesia ni lomiga faapena o le Tusi a Mamona, Mataupu Faavae ma Feagaiga, ma le Penina Tau Tele. O le Mataupu Faavae ma Feagaiga na aofia ai ni vaega fou se lua—137 ma le 138—o loo faaalia ai faaaliga a Iosefa Samita ma Iosefa F. Samita e uiga i le togiolaina o e ua maliliu ma le galuega a le Faaola i le lalolagi o agaga. Na lolomiina foi e le lomiga le faasilasilaga faasolopito o le faaaliga e tuuina atu ai faamanuiaga o le perisitua ma le malumalu i le Au Paia agavaa uma, e tusa lava po o le a le ituaiga.

I le falelauasiga, sa faitauina ai e Peresitene Benson lenei faaaliga ose tasi o faaaliga aupito sili ona taua o le tisipenisione. “O lena faaaliga,” na ia tautino mai ai, “ua tatalaina ai le faitotoa i le faaeaga i le faitau miliona o fanau a lo tatou Tama.”

O le taimi nei, a o mafaufau Peresitene Benson i le lumanai, sa naunau o ia e fausia i luga o le talatuu a Peresitene Kimball. E tele luitau, tuai ma fou, o loo i luma atu o le Au Paia. Mo le tele o tausaga, sa le fiafia vaega o tagata faalotonuu Amerika Latina i le Ekalesia ona o le auina atu o faifeautalai ma taitai misiona mai le Iunaite Setete i fafo atu, ma o lo latou tetee ua amata ona lamatia ai le saogalemu o tagata o le Ekalesia i le itulagi. Sa popole foi Peresitene Benson i tagata o Europa Tutotonu ma Sasae, lea sa tapunia ai pea le tele o atunuu i le Ekalesia.

I Iuta, i le taimi lea, sa suesueina talu ai nei se tagata o le Ekalesia e igoa ia Mark Hofmann ina ua pa ni pomu se tolu i le eria o le Aai o Sate Leki, ma fasiotia ai ni tagata se toalua. O Mark o se tagata sa faatau pepa faamatalaga e seāseā maua, o lē sa faatauina mai ni nai aitema i le Ekalesia. O nisi o nei pepa o faamatalaga sa i ai faamatalaga na tuuina atu ai le masalosalo i le tala masani a le Ekalesia i lona talafaasolopito, ma taitai atu ai nisi tagata e fesiligia lo latou faatuatuaga. E ui ina sa fesiligia le moni o nei pepa o faamatalaga, ae o le mea na tupu na tosina atu ai le vaaiga a le lalolagi atoa, ma o lipoti sa masani ona faaalia ai le le fiafia i le Ekalesia.

A o tu Peresitene Benson i luma o le au faasalalau, sa ia iloaina foi e i ai fesili a tagata e uiga i lana lava au peresitene. I lona olaga atoa, sa galue malosi o ia i le malo, ma sa mafaufau nisi tagata pe faapefea e ona manatu ona faatosina ai ana faaiuga i le avea ai ma peresitene o le Ekalesia.

“Ua faatumulia lo‘u loto i se alofa lofituina ma le agaalofa mo tagata uma o le Ekalesia ma fanau a lo tatou Tama Faalelagi i soo se mea,” sa ia fai atu ai i le au faasalalau. “Ou te alofa i fanau uma a lo tatou Tama o lanu uma, talitonuga, ma faatauanauga faaupufai.”

Sa ia fuafua e taitai le Ekalesia e pei lava ona faia e tamalii na muamua atu ia te ia. I ni nai tausaga na muamua atu, na faasilasila mai ai e le Au Peresitene Sili ma le Korama a Aposetolo e Toasefululua se misiona tafatolu mo le Ekalesia: folafola atu le talalelei, faaatoatoaina le Au Paia, ma togiolaina e ua maliliu.

“O le a faaauau pea taumafaiga uma e faataunuu ai lenei misiona,” na tautino mai ai Peresitene Benson.

I le amataga o le 1986, sa avea ai Manuele Navarro e sefuluono tausaga ma ositaulaga i le Paranesi a San Carlos i Nazca, o se tamai aai i Peru i Saute. O le Paranesi a San Carlos sa manatu i ai o se “iunite faavae” o le Ekalesia, o se igoa na fatuina i le faaiuga o le vaitau o le 1970 mo paranesi sa fou i le Ekalesia ma e toaitiiti foi tagata o le Ekalesia. I nisi o nei iunite, e aofia ai le Paranesi a San Carlos, sa fono faatasi ai le autalavou ma tagata matutua i vasega tuufaatasi ma korama i Aso Sa.

Sa fiafia Manuele e feiloai ma e umia le Perisitua Mekisateko i le itula lona tolu o le lotu. Sa i ai pe tusa ma le luasefulu talavou o loo umia le Perisitua Arona i le paranesi, ae e itiiti ifo ma le afa o i latou sa auai e le aunoa. O le feiloai ai ma toeaina i le paranesi na maua ai e Manuele se avanoa e aoao ai e uiga i tiute o le Perisitua Arona ma le Perisitua Mekisateko.

Ua lua tausaga talu ona avea Manuele ma se tagata o le Ekalesia. Sa papatisoina o ia faatasi ma ona matua ma lona tuafafine laitiiti. O le taimi nei ua avea lona tama ma se peresitene o le paranesi, ma o lona tautino i le Faaola na faamalosia ai le tautino a Manuele. “Afai o loo i ai Tama i lenei mea,” na ia fai ifo ai ia te ia lava, “ona o lenei mea e lelei.”

E oo mai i le taimi nei, o le 1986 sa avea ma se tausaga taua mo le Ekalesia i Amerika i Saute. Ia Ianuari, na faapaiaina ai malumalu i Lima, Peru, ma i Buenos Aires, Atenitina—o malumalu lona tolu ma le fa i le konetineta. O le maota o le Alii i Lima sa le gata ina tautua ai ia Manuele ma le 119,000 o le Au Paia o Aso e Gata Ai i Peru ae faapea foi le silia ma le 100,000 le Au Paia sa nonofo i Kolomupia, Ekuatoa, Polivia, ma Venesuela. I le taimi lava na uma ai le faapaiaga, na maua ai e tagata Peru e lua selau ma le lua selau tagata Polivia o latou faaeega paia.

E lei umi ae amata e Manuele lona tausaga lona lua o le seminare, o se polokalama ua silia ma le sefulu tausaga talu ona faalauteleina e le Ekalesia i le lalolagi atoa. Talu ai nei, sa ofoina atu ai e le paranesi a Manuele ni vasega seminare i le afiafi. Ae i le 1986, sa faatinoina ai e le taitai faamaopoopo o le risone mo le Polokalama o Aoga a le Ekalesia i Peru le seminare i aso taitasi i le taeao po mo le tele o uarota ma paranesi e 298 o le atunuu. Na faamaonia e tagata o le Ekalesia i Peru le suiga. Sa latou mananao ia faia vasega seminare e latalata i fale o tamaiti aoga ma o latou faiaoga volenitia i le lotoifale.

O vasega muamua o le seminare na auai ai Manuele sa faia i lona fale, ae na iu lava ina latou siitia atu i le falelotu totogi o le paranesi. O aso taitasi o le vaiaso, e savali ai Manuele pe tusa ma le lua maila e auai i le vasega i le ono o le taeao. I le taimi muamua, sa le faigofie le alapo, ae sa oo ina fiafia o ia e o i le seminare faatasi ma isi talavou. Faatasi ai ma le faamalosiauga a lona faiaoga, sa ia atiina ae ai le mausa o le tatalo i le taimi lava e ala ai i le taeao, e tusa lava pe manaomia ai le alapo.

I le seminare, na maua ai e Manuele se seti o kata o “mau tauloto”. O loo lolomiina i luga o nei kata ni fuaitau taua faaletusi paia ia sa faamoemoe e aoaoina e tamaiti aoga seminare i le lalolagi atoa. Talu ai sa suesueina e le vasega a Manuele le Tusi a Mamona i lena tausaga, o le fuaiupu muamua lava o mau tauloto na ia aoaoina o le 1 Nifae 3:7: “O le a ou alu ma fai mea ua poloaiina e le Alii.”

Sa aoao atu e se tasi faiaoga seminare, o Ana Granda, ia Manuele ma ana uo i le vasega e uiga i lo latou taua ma le taunuuga e faavavau o ni fanau a le Atua. I le faalogologo ai i lana aoaoga, sa lagona ai e Manuele e taua o ia i se tasi. Sa ia maua se molimau e faapea, e popole moni lava le Atua i Ana fanau.

Sa ia vaaia foi le auala na puipuia ai o ia mai le tele o faafitauli na oo i ai isi talavou o lana tupulaga, ona o le tausia o poloaiga. E ui lava sa taalo soka o ia ma ana uo e le o ni Au Paia o Aso e Gata Ai, ae sa ia iloaina o ana uo mamae o le autalavou i le lotu. I Aso Lulu, latou te auai i “po faafaifeautalai,” lea latou te taaalo ai i taaloga ma fegalegaleai ai ma faifeautalai o loo auauna atu i le eria.

Sa su‘esu’e faatasi Manuele ma ana uō, lagolagoina o ia, ma fesoasoani iā te ia e tumau ai i le ala sa‘o. Pe a la o ma lona tausoga i pati i po o Aso Toonai, e lei ofoina atu lava e a laua uo i fafo atu o le Ekalesia se ava malosi ia i laua. Sa latou iloaina o i la’ua o ni Au Paia o Aso e Gata Ai ma faaaloalo i o la’ua talitonuga.

Mulimuli ane i lena tausaga, sa asiasi atu ai Consuelo Wong Moreno e sefulufitu tausaga i lona uso matua o Carmen i Cuernavaca, Mekisiko. O Cuernavaca sa tusa ma le ono selau maila i saute o le fale o Consuelo i le aai o Monterrey. E masani ona auina atu e lona tamā o ia ma ona tei iina i le taumafanafana.

O le malumalu i le Aai o Mekisiko sa mamao ese mai le nuu o Consuelo, o lea ina ua ia iloaina o le a faia e le autalavou i Cuernavaca papatisoga mo e ua maliliu, sa ia maua le faatagaga a Carmen e alu ai. Ona ia faia lea o sona faatalanoaga ma le epikopo. Sa le‘i iloa lelei e ia [epikopo] o ia ma sa foliga mai sa faatuai ina ua ia faaalia lona mana’o e alu i le malaga.

“Vaai,” o le tala lea a Consuelo, ma aumai se lisiti tuai o le sefuluai mai ana tusitusiga paia, “Ou te totogia le sefuluai.”

Sa ataata le epikopo a o ia tatalaina le pepa ma tuu atu ia te ia. Sa ia taitaia le vaega na totoe o le faatalanoaga ma iloa ai ua agavaa o ia e auai i le malumalu.

“Aua e te popole, tuafafine,” o lana tala lea. “E mafai ona e alu e fai papatisoga.”

I se taimi e lei umi mulimuli ane, na alu ai Consuelo i se pasi i le Aai o Mekisiko faatasi ma isi talavou ma tagata matutua mai le uarota. Ina ua latou taunuu atu, sa leai se tasi na mautinoa po o fea o i ai le malumalu, o lea na amata ai ona latou savavali e su’e le malumalu. O se aso sa susulu, manaia le la, ma sa tosina atu ai e le vaega o le autalavou le fiailoa o tagata na latou fepasiai a o latou feoai solo i le auala.

Mulimuli ane, na vaaia e se tasi o alii talavou le tumutumu o le malumalu. “Le Moronae lale!” na ia fai mai ai. Sa mulimuli Consuelo ma isi talavou i lana vaai, ma na mautinoa lava, sa i ai le tumutumu, ma maualuga i luga a‘e o i latou.

E lei vaai muamua lava Consuelo i se maota o le Alii, ma o lona telē maoae ma le tusiga o le ata i le fausaga fale faaanamua o le Mesoamerica–na faagaeetia ai o ia. Sa latou ulufale atu i le malumalu, ma sa faafeiloaia ma le agalelei i latou e tagata faigaluega ma faatonuina i latou i le mea e o i ai ma le mea e fai. Sa lagona malosi e Consuelo le Agaga a o papatisoina o ia mo i latou ua maliliu. O se tasi o i latou o se tamaitai o le nuu, ma sa tumau pea lona igoa i le mafaufau o Consuelo. Sa ia mafaufau e feiloai ia te ia i le isi olaga ma patipatia le galuega sa ia faia mo ia.

Ina ua toe foi atu Consuelo i Monterrey i le faaiuga o le taumafanafana, sa ia iloa ai o loo se faamanatuga a Tamaitai Talavou e ta‘ua o le Tupulaga Faia’e. Ina ua uma ona faailoa atu tulaga faatauaina e fitu i le faasalalauga faasatelite, sa valaaulia e le peresitene aoao o Tamaitai Talavou o Ardeth Kapp ia tamaitai talavou i soo se mea e tusi se savali patino o le faamoemoe ma le faatuatua ia Iesu Keriso. Ona latou faapotopoto lea i o latou lava eria, faapipii savali taitasi i se paluni ua tumu i le [kasa] helium, ma faalele atu faatasi i le lagi.

“E ui atonu e te mamao ese mai le toatele o isi tamaitai talavou i le Ekalesia,” na faamalamalama mai ai e Peresitene Kapp, “matou te mananao ia outou lagonaina le malosi o lo latou usoga ma le aofai a o outou tutu faatasi, ma tuuto atu i tulaga faatauaina o le talalelei.”

Sa naunau Consuelo e faasoa atu le talalelei i isi, ma sa manao o ia e auai i le gaoioiga faatasi ma tamaitai talavou mai le salafa o le lalolagi. Ae talu ai ona sa faatapulaaina e le aai o Monterrey ia faatinoga lautele faalelotu, sa le mafai ai e lana vaega o Tamaitai Talavou ona auai i le faamanatuga sei vagana ua latou maua le faatagaga mai le malo.

Ae, sa ave pea e Consuelo se pepa ma tusi atu se tusi ia Peresitene Kapp i le gagana Sipaniolo. “O au o se Lora e sefulufitu tausaga,” sa ia tusia ai. “Ua atoa nei le vaiaso talu ona ou iloaina le faamanatuina o le faatuatua ma le faamoemoe o le a maua e Tamaitai Talavou i le lalolagi atoa. O lea, ua faatumulia ai au i se olioli faapitoa, ma ou te fia auai.”

I le tusi, sa ia faapipii ai le savali sa ia manao e auina atu ma talosagaina Peresitene Kapp e faaaofia o ia i le gaoioiga:

Sa i ai lo’u faamoemoe ma ou te lei tuua ia mate. Sa ou atiina ae lo‘u faatuatua, ma a o ou tausia, sa ou mauaina le alofa mama, ioe, le alofa mama o Iesu, o lona alofa atoatoa e aveesea ai le fefe uma. Ona ou maua lea o le filemu. Na ou iloa o le filemu e tatou te ōgatusa ai ma isi, e faaaloalo i o latou talitonuga ma taulimaina i latou o ni uso ma tuafāfine.

“Ou te manao ia outou vaai faalemafaufau i le tele o lo‘u manao ia maua ma malamalama se tagata i la’u savali,” na tusi atu ai Consuelo ia Peresitene Kapp. “Ou te faamoemoe o le a i ai se aso o le a lagona ai e i latou uma ou te iloa ma alofa i ai lea lava lagona e tasi tatou te lagonaina.”

Ina ua uma lana tusi, sa ia tuuina i totonu o se teutusi ma auina atu i le Aai o Sate Leki.

Ia Aokuso 1986, sa tula’i ai Peresitene Ezra Taft Benson i le vae o le Mauga o Kumora i le maouta o Palamaira, Niu Ioka. O se taeao o se Aso Sa, ma sa o mai ai se motu o tagata pe tusa ma le valu afe e faalogologo ia te ia o saunoa i le nofoaga na maua ai e Iosefa Samita papatusi auro mai le agelu o Moronae.

Sa auai Peresitene Benson ma lona faletua o Flora i le faaaliga o le Hill Cumorah i le po na muamua atu. O le faaaliga—o se gaoioiga faaletausaga talu mai le vaitau o le 1930—sa faia mo se vaiaso i taumafanafana taitasi ma sa tosina atu ai le faitau afe o tagata asiasi. Sa faatinoina i luga o le mauga lava ia, o le faatinoga sa aofia ai ni seti auiliili ma se vaega toatele o volenitia o e na faatinoina le talafaasolopito o le Tusi a Mamona, ma faaiuina i le faaali mai mataina o le Faaola toetu i sa Nifaē.

O le taimi nei, a o saunoa atu Peresitene Benson i le motu o tagata e toatele sa i ona luma, sa ia taulai atu lana saunoaga i le tusiga paia sa faamanatuina i le faaaliga.

“O le Tusi a Mamona na tusia mo i tatou i le asō,” na ia fai atu ai i le motu o tagata. A o talavou o ia, e toatele tagata o le Ekalesia e le‘i suesueina e le aunoa pe sii mai le Tusi a Mamona. Sa sili atu le lelei o le Au Paia i tausaga talu ai nei, ae sa talitonu o ia o loo i ai pea se avanoa mo le faaleleia.

“Tatou te le’i faaaogaina le Tusi a Mamona e pei ona tatau ai,” o lana tala lea. “E le malolosi o tatou aiga sei vagana ua tatou faaaogaina e aumai ai a tatou fanau ia Keriso.”

Mo le tele o tausaga, sa augani atu ai Peresitene Benson i le Au Paia ina ia o mai ia Keriso e ala i se suesuega o le Tusi a Mamona. I le avea ai ma se faifeautalai talavou i Egelani i le vaitau o le 1920, sa ia atiina ae ai se alofa mo le tusi. I se tasi taimi, ina ua valaaulia o ia ma lana soa misiona e talanoa i se vaega o le au faitio, sa sau Elder Benson ma sauni e talai atu e uiga i le Liliuese. Ae peitai, a o tu o ia e tautala, sa uunaia o ia e tuu ese lana tusitusiga na tapenainaa ae ia na ona tautala e uiga i le Tusi a Mamona.

Sa talitonu ma le naunautai Peresitene Benson e mafai e le Tusi a Mamona ona taitai atu tagata ia Keriso. I nai fia sefulu tausaga ua mavae atu, sa tele atu mea na saunoa ai taitai o le Ekalesia e uiga i le Faaola nai lo se isi lava taimi muamua. I le 1982, na faaopoopo ai e le Ekalesia le soaautu “O Se Tasi Molimau ia Iesu Keriso” i le Tusi a Mamona. O le faaopoopoga na faamamafaina ai le Faaola faapea foi ma le nofoaga taua o le tusi faatasi ai ma le Feagaiga Tuai ma le Feagaiga Fou. Sa talitonu taitai o le Ekalesia o le soaautu fou o le a tuuina atu ai se molimau mamana e uiga i le Faaola ma puipuia ai mai faamatalaga sese faapea o le Au Paia o Aso e Gata Ai e le o ni Kerisiano.

A o malaga o ia o se peresitene o le Ekalesia ma feiloai ma le Au Paia, sa masani ona molimau atu Peresitene Benson ia Iesu Keriso ma le Tusi a Mamona o se molimau faapitoa i Lona paia. Ma i lana lauga muamua lava i le konafesi aoao o se peresitene o le Ekalesia, sa ia uunaia ai le Au Paia e faitau i ai i aso uma.

“O le Tusi a Mamona e lei avea, pe ua avea foi, ma totonugalemu o a tatou suesuega patino, aoaoga faaleaiga, talaiga, ma le galuega faafaifeautalai,” na ia aoao mai ai. “O lenei mea e tatau ona tatou salamo ai.”

I le ono masina mulimuli ane, i le aso 4 o Oketopa, 1986, sa ia toe saunoa ai e uiga ia Iesu Keriso ma le Tusi a Mamona i le konafesi aoao. “O le Tusi a Mamona o le maaauau lea i la tatou molimau ia Iesu Keriso, o Ia lava o le maatulimanu o mea uma tatou te faia,” na molimau mai ai Peresitene Benson.

“O loo i ai se mana i totonu o le tusi lea o le a amata ona tafe mai i o outou olaga i le taimi lava e te amata ai se suesuega anoa o le tusi,” na ia folafola mai ai. “O le a e maua le mana sili atu e tetee atu ai i faaosoosoga. O le a e maua le mana e aloese ai mai mea tau faasese. O le a e maua le mana e tumau ai i le ala sao ma le vaapiapi.”

I le aso 11 o Oketopa, 1986, sa auai ai tamaitai talavou i le Ekalesia atoa i le faamanatuina o le Tupulaga Faiae. Sa taitaia e Peresitene Ardeth Kapp le gaoioiga mai le Kolisi a Ricks, le aoga a le Ekalesia i Rexburg, Idaho. A o ūū atu se matagi malulu i le lotoa, sa saunoa atu Peresitene Kapp i tamaitai talavou i se fale faafiafia a o lei laa atu tagata uma i fafo e faamamulu paluni o loo tauaveina savali o le faamoemoe, alofa, ma le filemu. I isi nofoaga o le lalolagi, sa faalogologo ai tamaitai talavou i se lipine o le savali lava lea e tasi ae latou te lei faalele atu foi a latou paluni i le lagi.

“O outou o se tupulaga ua silafia e lo outou Tama Faalelagi,” na tautino mai ai Peresitene Kapp. “O lenei ua valaauina outou e o mai i luma, e faaaoga la outou uunaiga, ma avea ma se malosiaga malosi mo le amiotonu.”

E afe fa selau maila le mamao, i Monterrey, Mekisiko, o le faasaina o faatinoga faalelotu na taofia ai Consuelo Wong Moreno mai le faaleleina o se paluni i le aso 11 o Oketopa. Ae i se taimi puupuu mulimuli ane, sa faateia o ia i le mauaina o se tusi patino mai ia Peresitene Kapp. Sa faa-Peretania le tusi, o lea na taumafai ai Consuelo i le mea sili na te mafaia e malamalama ai i lona uiga. Ina ua sau lona uso matua o Aida i le fale, sa fesoasoani o ia e faaliliu.

“Consuelo Pele,” na tusia ai e Peresitene Kapp, “na ou mauaina lau tusi matagofie e faailoa atu ai lou faamoemoe e auai i le ‘faamanatuina o le faatuatua ma le faamoemoe o le a faataunuuina e Tamaitai Talavou.’ Sa ou manao ia e iloa na auina atu lau savali ma se paluni e se tamaitai talavou iinei.”

Sa ta‘u atu e Peresitene Kapp ia Consuelo sa ia ta’ua lana tusi ina ua saunoa atu i tamaitai talavou i le Kolisi a Ricks. Sa faamamaluina Consuelo ona sa faasoa atu e Peresitene Kapp ana upu i le toatele o tagata. Sa ia lagonaina le malosi i le iloaina o tamaitai talavou i le salafa o le lalolagi sa tutusa lava lona naunau e faasalalau atu le talalelei.

I ni nai vaiaso mulimuli ane, ina ua mavae le tele o tatalo, na maua ai e tamaitai talavou i Monterrey le faatagaga mai le malo i le lotoifale e faia ai a latou lava faamanatuga o le Tupulaga Faiae. Sa auai Consuelo ma Aida ma le selau o tamaitai talavou ma taitai mai siteki e tele i se nofoaga i le totonugalemu o le aai. Na latou taunuu a o le‘i tafa ata, sa faasolosolo malie ona susulu malamalama le lagi a o latou faapotopoto faatasi i ni vaega ma fesoasoani e feula paluni papa’e. Sa faapipii e Consuelo lana molimau tusilima i lana paluni i se lipine ma faamamulu atu i le lagi faatasi ma isi.

A o vaavaai atu o ia i lana paluni o faaopeopea ese, sa faamoemoe o ia o le a tulaueleele i se mea saogalemu ina ia mafai ai e se tasi ona maua ma faitau lana savali.

E lei leva mulimuli ane, ae faamaeaina e Consuelo ana sini o le Alualu i Luma o le Tagata Lava Ia. Sa amata ona latou aoao ma isi tamaitai talavou i lana uarota e uiga i tulaga faatauaina fou ma lanu e fesootai ma i latou. O Aso Sa taitasi, e tauloto ai e lana vasega o le Lora le autu fou a Tamaitai Talavou. Na faamanatu atu ai ia i latou o i latou o afafine o le Atua ma se taunuuga paia. Sa faafetai Consuelo i le iloaina sa i ai se fuafuaga a le Atua mo ia ma sa popole mo lona soifua manuia.

Ia Ianuari 1987, na maua ai e Consuelo le aloaiaina faalauaitele mo le faamaeaina o le Alualu i Luma o le Tagata Lava Ia i le Amataga Fou, o se gaoioiga faaletausaga mo tamaitai talavou ma o latou aiga e faia i uarota ma paranesi i le Ekalesia atoa. O le Amataga Fou o se avanoa e faafeiloai ai teineiti i le polokalama, faamanatu mea ua ausia e tamaitai talavou, ma uunaia a latou taumafaiga. I le uarota a Consuelo, sa valaaulia ai e le peresitene o Tamaitai Talavou ia matua e fesoasoani i a latou afafine e faamaea sini o le Alualu i Luma o le Tagata Lava Ia. O le isi, sa talanoa mai ai nisi o tamaitai talavou, o loo laei taitoatasi i se tasi o lanu fou o Tamaitai Talavou, e uiga i tulaga faatauaina. Ona tuuina atu lea e le epikopo o pine ia Consuelo ma isi tamaitai talavou o e na faamaeaina la latou malaga o le Alualu i Luma o le Tagata Lava Ia.

Sa mitamita Consuelo ia te ia lava mo le faamaeaina, ma sa ia faia lana pine e pei o loo ia tauaveina se faailoga [ipu]. Soo se taimi lava e tau i ai le vaai a tagata e le o ni tagata o le Ekalesia, na te faamatala atu po o le a le mea e faatusa i ai ma pe na faapefea ona ia mauaina.

  1. Kapp, Journal, Nov. 6, 1985; Kimball, Lengthen Your Stride, chapter 38.

  2. Kapp, Journal, Feb. 20 and Nov. 6, 1985; Kapp and Rasmus, Oral History Interview, 67–68, 76–77; New Era, Young Women Special Issue, Nov. 1985, copy at CHL. Autu: Mekasini a le Ekalesia

  3. Kapp and Rasmus, Oral History Interview, 77; Russell M. Nelson to Daniel Ludlow, June 25, 1985, Young Women Files, CHL; Kapp, Journal, June 6, 1985; Priesthood Executive Council, Minutes, June 12, 1985; Young Women, General Board Minutes, Aug. 21 and Oct. 9, 1985.

  4. Young Women General Fireside, [1], in Kapp, Journal, Nov. 1985; “Pres. Kimball Dies at 90 after Many Years of Love and Service,” Church News, Nov. 10, 1985, 3; “First Young Women’s Fireside,” [00:00:36]–[00:01:05], [00:02:04]–[00:02:45]; Gerry Avant, “Young Women Are Challenged: ‘Stand for Truth, Righteousness,’” Church News, Nov. 17, 1985, 10.

  5. “First Young Women’s Fireside,” [00:03:11]–[00:06:35], [00:09:01]–[00:19:35]; Gerry Avant, “Young Women Are Challenged: ‘Stand for Truth, Righteousness,’” Church News, Nov. 17, 1985, 10, 12; Gerry Avant, “New Hymnbook Rolls Off Presses,” Church News, Aug. 11, 1985, 3; Davidson, Our Latter-day Hymns, 261. Autu: Viiga

  6. Russell M. Nelson, “Daughters of Zion,” Nov. 10, 1985, 3–4, Russell M. Nelson Addresses, CHL; “First Young Women’s Fireside,” [00:15:21]–[00:15:23], [00:18:45]–[00:19:00].

  7. “First Young Women’s Fireside,” [00:19:35]–[00:36:19]; Kapp and Rasmus, Oral History Interview, 175, 180; Francis Gibbons to J. Thomas Fyans, Memorandum, Oct. 4, 1985, First Presidency, Committees, Departments, and Organizations Correspondence, CHL.

  8. “First Young Women’s Fireside,” [00:22:10]–[00:23:12]; Gerry Avant, “Young Women Are Challenged: ‘Stand for Truth, Righteousness,’” Church News, Nov. 17, 1985, 12.

  9. Gerry Avant, “Young Women Are Challenged: ‘Stand for Truth, Righteousness,’” Church News, Nov. 17, 1985, 10, 12; “First Young Women’s Fireside,” [00:36:19]–[01:29:26]; Mosaea 18:9; “Carry On,” Hymns, no. 255.

  10. Kapp, Journal, Nov. 10, 1985, emphasis in original; Kapp and Rasmus, Oral History Interview, 180. Autu: O Faalapotopotoga a Tamaitai Talavou

  11. Hinckley, Journal, Nov. 10–11, 1985; O. Wallace Kasteler, “Pres. Ezra Taft Benson Outlines Changes in the Church Leadership,” Photograph, in Deseret News, Nov. 11, 1985, A5; Hunter, Journal, Nov. 10, 1985.

  12. Benson, Journal, Nov. 5–6, 1985; Ezra Taft Benson, “Spencer W. Kimball: A Star of the First Magnitude,” Ensign, Dec. 1985, 33–34.

  13. Ezra Taft Benson, “Spencer W. Kimball: A Star of the First Magnitude,” Ensign, Dec. 1985, 34; “Pres. Kimball Dies at 90 after Many Years of Love and Service,” Church News, Nov. 10, 1985, 3, 7; Tullis, “Some Observations from Latin America,” 65; Missionary Department, Annual Reports, 1985, 6; Deseret News 1997–98 Church Almanac, 290–91, 312–15, 319–20, 336–37, 366–67, 370–72, 380–81, 403–4; Spencer W. Kimball, Address, Seminar for Regional Representatives, Oct. 5, 1979, 1; Ezra Taft Benson, Address, Regional Representative Seminar, Apr. 2, 1982, 1, Quorum of the Twelve Apostles, Regional Representatives Seminar Addresses, CHL. Autu: Tuputupu Ae o le Ekalesia; Fetuunaiga i le Faatulagaga o le Perisitua; O Korama a Fitugafulu; Polivia; Kolomupia; Nicaragua; Parakuei; Puerto Rico; Venesuela

  14. Ezra Taft Benson, “Spencer W. Kimball: A Star of the First Magnitude,” Ensign, Dec. 1985, 34; “Pres. Kimball Dies at 90 after Many Years of Love and Service,” Church News, Nov. 10, 1985, 3; Kimball, “Events and Changes,” 524, 526; Missionary Department, Annual Reports, 1985, 7; Monson, Journal, Aug. 29, 1979; Lavina Fielding Anderson, “Church Publishes First LDS Edition of the Bible,” Ensign, Oct. 1979, 9–17; Kimball, Lengthen Your Stride, 101–3; Turley and Slaughter, How We Got the Doctrine and Covenants, 111–14. Autu: Spencer W. Kimball; Faatapulaaga o le Perisitua ma le Malumalu; Mataupu Faavae ma Feagaiga; Faaliliuga a Iosefa Samita o le Tusi Paia

  15. Hunter, Journal, Sept. 1, 1982; Hinckley, Journal, Nov. 28, 1983; Charles Didier, Angel Abrea, and Hartman Rector Jr. to M. Russell Ballard, Mar. 2, 1989, Missionary Executive Council, Meeting Materials, CHL; Grover, “Mormons in Latin America,” 523–24; Dew, Insights from a Prophet’s Life, 174; Mehr, Mormon Missionaries Enter Eastern Europe, 155–70; Van Orden, Building Zion, 247, 267–307.

  16. Turley, Victims, chapters 2–8; “Document Deals and Murder: A Hofmann Chronology,” Salt Lake Tribune, Aug. 1, 1987, A6; Haws, Mormon Image in the American Mind, 141–45; Ian Ball, “Mormon Row behind Salt Lake Bombings,” Daily Telegraph (London), Oct. 19, 1985, 7; Hinckley, Journal, Oct. 18 and 21, 1985. Autu: Hofmann Forgeries

  17. Vern Anderson, “Weight of Office Has Tempered Benson Views,” Daily Herald (Provo, UT), Nov. 10, 1985, 70; Haws, “LDS Church Presidency Years, 1985–1994,” 208–9; Spencer W. Kimball, “A Report of My Stewardship,” Ensign, May 1981, 5. Autu: Ezra Taft Benson; O Le Le Faaituau i Faiga Faapolokiki

  18. Navarro, Oral History Interview [Apr. 2023], 7–11, 24, 56; Navarro, Oral History Interview [2015], 1; Nazca Peru District, Annual Historical Reports, 1985; Basic Unit Program, 1–9; Spencer W. Kimball, “Ministering to the Needs of Members,” Ensign, Nov. 1980, 46; Livingstone, “Establishing the Church Simply,” 127–28, 133–43.

  19. Navarro, Oral History Interview [Apr. 2023], 2–7, 10–11, 13, 21, 25; Nazca Peru District, Annual Historical Reports, 1985.

  20. John L. Hart, “Prophecy Fulfilled for Peru Members,” and John L. Hart, “Long Wait Over for Argentine LDS,” Church News, Jan. 26, 1986, 3, 7; Lima Peru Temple, Annual Historical Reports, 1987; Deseret News 1987 Church Almanac, 276, 283, 311; Gordon B. Hinckley, in Lima Peru Temple, Dedication Services, 28; Navarro, Oral History Interview [Apr. 2023], 19–20, 44–46. Autu: Peru; Atenitia; Ekuatoa

  21. Navarro, Oral History Interview [Apr. 2023], 11–12, 33–34, 53–55; Seek Learning Even by Study and by Faith, 1; Griffiths, “Globalization of Latter-day Saint Education,” 208–48; By Study and Also by Faith, 234, 241–45, 250–56, 263–67; Annual Historical Report, Peru, 1985, Church Educational System, Area Historical Reports, CHL.

  22. Navarro, Oral History Interview [Apr. 2023], 11–12, 24–25, 33–34, 37–39; Carla Brimhall, “Films Urge Youths—Stay ‘Free to Choose,’” Church News, Sept. 7, 1986, 8; “1 Nefi 3:7,” Dominio de las escrituras; Administrative Council Meeting, Minutes, Jan. 16, 1985, Church Educational System, Executive Planning Minutes, CHL. Autu: Seminare ma Inisitituti

  23. Moreno, Oral History Interview, [7]; Moreno, Interview, [1]–[2], [9]. Autu: Mekisiko

  24. Moreno, Interview, [2]; Young Women General Presidency to “Young Woman and Your Parents,” July 21, 1986, Young Women Files, CHL; “300,000 Young Women Send Balloon Messages of Hope Worldwide,” Ensign, Nov. 1986, 102; Gerry Avant, “Balloons Bear Messages of Love, Hope and Peace,” Church News, Oct. 19, 1986, 8–10; see also Rising Generation, 1–22.

  25. Moreno, Oral History Interview, [15], [18]; Moreno, Interview, [2], [7], [9].

  26. Moreno, Oral History Interview, [15], [18]; Moreno, Interview, [2]–[3]; Consuelo Moreno to Ardeth Kapp, Sept. 10, 1986, Maria del Consuelo Wong Moreno Papers, CHL; Gerry Avant, “Messages Sent by ‘Rising Generation,’” Church News, Oct. 19, 1986, 10.

  27. Benson, Journal, Aug. 2–3, 1986; Gerry Avant, “Prophet Retraces Paths of Church History,” Church News, Aug. 10, 1986, 7–8; Argetsinger, “Hill Cumorah Pageant,” 58–69; “Hill Cumorah Pageant,” Springville (NY) Journal, Aug. 14, 1986, 14.

  28. Ezra Taft Benson, “The Book of Mormon Is the Word of God,” Aug. 3, 1986, 1, 3, Ezra Taft Benson Addresses, CHL; Gerry Avant, “Prophet Retraces Paths of Church History,” Church News, Aug. 10, 1986, 7–8; Mason, “Ezra Taft Benson,” 66–67; Reynolds, “Coming Forth of the Book of Mormon,” 9–30.

  29. Benson, Journal, Sept. 30, 1921; Nov. 18 and 20, 1921; Oct. 25, 1922; Dew, Ezra Taft Benson, 49, 55; Reynolds, “Coming Forth of the Book of Mormon,” 30–31.

  30. Hunter, Journal, Mar. 6, 1986; Dew, Ezra Taft Benson, 492; Shepherd and Shepherd, Kingdom Transformed, 76, 78, 101; Bowman, Mormon People, 231–32; Carmack, “Images of Christ in Latter-day Saint Visual Culture,” 66.

  31. Missionary Executive Council, Minutes, Sept. 1 and Oct. 6, 1982; John L. Hart, “Subtitle Testifies of Jesus Christ,” Church News, Oct. 16, 1982, 3; Shipps, Sojourner, 102–4, 353–54; Haws, Mormon Image in the American Mind, 99–102, 108–25; Turner, Mormon Jesus, 44–46.

  32. Dew, Ezra Taft Benson, 492–96; Reynolds, “Coming Forth of the Book of Mormon,” 31. Na fofogaina e Peresitene Benson se saunoaga na faaautuina “O Le Tusi a Mamona o le Afioga a le Atua” i le le itiiti ifo i le sefulu ni nofoaga faitele i lona tausaga muamua o se peresitene o le Ekalesia. (Benson, Addresses, Jan. 5 and 26, 1986; Feb. 16, 1986; Mar. 2, 1986; Apr. 4, 1986; May 11 and 25, 1986; Aug. 3, 1986; Oct. 12, 1986; Nov. 2, 1986.)

  33. Ezra Taft Benson, “Cleansing the Inner Vessel,” Ensign, May 1986, 5–6.

  34. Ezra Taft Benson, “The Book of Mormon—Keystone of Our Religion,” Ensign, Nov. 1986, 4–7; see also Woodruff, Journal, Nov. 28, 1841. Autu: Ezra Taft Benson

  35. Kapp, Journal, Oct. 17, 1986; Gerry Avant, “Balloons Bear Messages of Love, Hope and Peace,” Church News, Oct. 19, 1986, 8.

  36. Moreno, Interview, [2]–[4], [7], [9]; Ardeth Kapp to Consuelo Moreno, Oct. 14, 1986, Maria del Consuelo Wong Moreno Papers, CHL.

  37. Ardeth Kapp to Consuelo Moreno, Oct. 14, 1986, Maria del Consuelo Wong Moreno Papers, CHL; Moreno, Interview, [4], [6].

  38. Moreno, Interview, [2]–[5], [7], [9]; Moreno, Oral History Interview, [15]–[16], [19]–[20]; Young Women Values, 6; Los valores de las mujeres jovenes, 6.

  39. Moreno, Interview, [4]–[5]; “Young Women: New Beginnings,” 1. Autu: O Faalapotopotoga a Tamaitai Talavou