Mataupu 36

Fetaomi Atu i Luma

o se alii talavou o loo ofuina se suti i le matafaga

Na maliu filemu Peresitene Gordon B. Hinckley i le afiafi o le aso 27 o Ianuari, 2008. I le taimi o le toe gasegase puupuu o le perofeta, sa nonofo ai aiga ma uo i autafa o ona tofaga i le Aai o Sate Leki. Sa asiasi atu Peresitene Thomas S. Monson, o le sa auauna faatasi ma ia i le Au Peresitene Sili mo le silia i le lua sefulu tausaga, sa asiasi atu ia te ia i ni nai itula a o lei maliu o ia ma tuuina atu ia te ia se faamanuiaga.

I le ono o aso mulimuli ane, na faapotopoto ai le sefuluono afe o tagata faavauvau i le Maota Autu mo Konafesi mo le falelauasiga o le perofeta. E le mafaitaulia isi na maimoaina taualumaga i le TV a le BYU, i luga o le uepisaite a le Ekalesia, ma faletapuai i le salafa o le lalolagi.

I le taimi o le sauniga, sa saunoa ai Peresitene Monson e uiga i le auala na la fefaasoaa’i ai ma Peresitene Hinckley le fiafia tele, taliē, ma le faanoanoa i le aluga o tausaga. “O ia o se motu toafilemu i se sami o afā,” na manatua ai e Peresitene Monson. “Sa Ia faamafanafanaina ma faatoafilemuina i matou pe a taufaafefe tulaga o le lalolagi. Sa Ia taialaina i tatou ma le lē mafaagaeetia i le ala lea o le a taitai atu ai i tatou i lo tatou Tama Faalelagi.”

Sa manatua e le Au Paia ia Peresitene Hinckley o se perofeta e malaga i le lalolagi ma fausia malumalu. Sa ia malaga i le silia ma le miliona maila e asiasi i le Au Paia i le salafa o le lalolagi—e sili atu nai lo se isi lava peresitene o le Ekalesia. Sa ia faalauteleina foi le faaaogaina o satelite ma tekinolosi faamata’inumera e aapa atu ai i le Au Paia i soo se mea sa latou nonofo ai. Ua faasalalauina nei e le Ekalesia le konafesi aoao i gagana e valusefulu. I le 2003, sa ia amatalia ai faasalalauga faaletaitai i le lalolagi atoa, ma faatagaina ai taitai o le Ekalesia e a’oa’o le toatele o le Au Paia mai se nofoaga se tasi. O lea lava tekinolosi na mafai ai ona faia ni konafesi tetele faaitulagi ma faaleatunuu, o nisi na aofia ai le silia ma le valusefulu siteki i se taimi.

I le taimi o lana peresitene, na sili atu ma le faaluaina le aofai o malumalu na faagaoioia, mai le 47 i le 124. O se tasi o malumalu sa ia faapaiaina sa i ai se toe fausiaina o le Malumalu o Navu, lea na faaleagaina i ni nai tausaga talu ona faapaiaina i le 1846.

O nei malumalu fou na aumaia ai sauniga paia ma feagaiga e latalata atili atu i le toatele o tagata nai lo se isi lava taimi muamua. Mo se faataitaiga, ia Aokuso 2005, na malaga ai le Au Paia e fasefulu lua mai le malo o Aferika Tutotonu o Cameroon i le lima selau maila e auai i se malumalu fou na faapaiaina i Aba, Nigeria. O timuga talu ai nei na suia ai auala e lei taina i le palapala, ae sa faaauau pea ona o atu le Au Paia, e tusa lava pe na latou tuleia a latou veni pasese totogi i le palapala loloto. E ui o le malaga lemu sa tele ina faigata, ae sa puupuu ma taugofie atu nai lo se malaga i malumalu i Ghana ma Aferika i Saute. Ma sa olioli le Au Paia o Cameroon ina ua latou mauaina o latou faaeega paia ma faamanuiaga o faamauga.

Sa faafetai Peresitene Hinckley i le faia o sona sao i le faasalalauina atu o faamanuiaga o le maota o le Alii i le toatele o tagata. Sa talitonu o ia o malumalu sa i ai se faamoemoega tulaga ese. “I o latou fata faitaulaga tatou te tootutuli ai i luma o le Atua lo tatou Foafoa ma tuuina mai ai folafolaga o Ana faamanuiaga e faavavau,” na ia a’oa’o mai ai. “Tatou te fesootai ma Ia ma mafaufau i Lona Alo, lo tatou Faaola ma le Togiola, le Alii o Iesu Keriso, o le na avea ma sui mo i tatou taitoatasi i se taulaga sui mo i tatou.”

Talu mai lana misiona i Egelani i le vaitau o le 1930, sa olioli ai Peresitene Hinckley i se alofa tele mo le Au Paia i Europa. Ma sa tiga ia te ia i tausaga talu ai nei le vaaia o tagata Europa ua se ese mai le lotu. Ina ia tuuina atu le lagolago, sa ia uunaia le fatuina o “nofoaga autū mo le aapa atu” lea e mafai ai e talavou nofofua matutua ona o mai faatasi e fegalegaleai ma faasoa atu lo latou faatuatua ia Iesu Keriso. I le va o le 2003 ma le 2007, e silia ma le fitusefulu na nofoaga autū na tatalaina i Europa atoa, ma iu ai i le tele o tagata fou liliu mai, toe faatoagaina mai, ma faaipoipoga i le malumalu.

Sa suia foi e Peresitene Hinckley ia sootaga lautele a le Ekalesia. I lalo o lana vaavaaiga, na amata ai e le Ekalesia lana lava uepisaite, faatumulia i savali e totonugalemu ia Keriso ma mea e faaaoga mo a’oa’oga, ma saunia ai se potu o talafou i le initoneti lea e mafai ai e le au faasalalau ma isi ona o atu mo faamatalaga sa’o e uiga i le faatuatua.

Sa ia faaalia fo’i o ia i le tele o faasalalauga, i le taliaina o faatalanoaga i le televise ma tusitala lauiloa ma le tusiaina o tusi mo fale lomitusi tetele. I le 2001, sa ia faalauiloaina ai le Galuega Faatino o Pepa a Iosefa Samita, lea sa faamoemoe e lolomi uma pepa a le perofeta i luga o le initoneti ma i voluma faasikola e mafai ona maua i faletusi i le salafa o le lalolagi.

Mai le tele o faama’ite na faia e Peresitene Hinckley, sa lagona e Peresitene Monson o le a faamanuiaina e le Tupe Faaagaga mo Aoga le tele o olaga nai lo se isi lava. Ua toeitiiti atoa le tolusefulu afe o tamaiti aoga i atunuu e 40 ua manuia ai.

“Oka se vavega o lenei mea i le siitiaina o tagata talavou mai le mativa ma fesoasoani ia i latou e ulufale atu i galuega,” na toe manatunatu ai Peresitene Monson i lana api talaaga. “E faamanuiaina e sili atu nai lo a tatou miti sili ona fiafia i ai ma o se punāvai aoga tele mo i latou o e mananao e faalautele aoaoga i le tele o vaega o le lalolagi lea e le oo mai i ai a’oa’oga i e matitiva.”

O le aso na sosoo ma le falelauasiga, na faauuina ai ma vaetofia ai e Boyd K. Packer, le aposetolo aupito sinia na sosoo ai, Peresitene Monson e avea ma peresitene fou o le Ekalesia. Sa valaauina e Peresitene Monson ia Henry B. Eyring, lea sa avea muamua ma fesoasoani lona lua i lalo o le taitaiga a Peresitene Hinckley, e avea ma ona fesoasoani muamua, ma Dieter F. Uchtdorf, o se aposetolo mai Siamani, e avea ma ona fesoasoani lona lua.

Sa pulea e le au peresitene fou ia galuega faatino o le fausiaina o loo faaauau pea i le taimi o le maliu o Peresitene Hinckley, e aofia ai le tele o malumalu ma le tusa ma le tolu selau faletapua’i. Sa fausia foi e le Ekalesia ni fale mo faifeautalai o le malumalu i Navu, fausiaina o se Potutusi fou o Talafaasolopito o le Ekalesia ma se fale tele e fesoasoani e pulea ai foai mai tagata agaalofa, ma le fausiaina o fale ma fanua e nonofo ai ma faapisinisi i le isi itu o le auala mai le Lotoa o le Malumalu.

Ae ina ua amata e Peresitene Monson lana taitaiga, sa tulai mai ni faafitauli ogaoga. E toatele tagata e anaina fale i le Iunaite Setete ua amata ona le toe totogia a latou mokesi, ma o faletupe o loo umia mokesi e le’i totogia na faamau i lalo o le tele o aitalafu. E le’i umi ae oo atu le Iunaite Setete i se faafitauli sili ona leaga i le tamaoaiga talu mai le Paū Tele o le Tamaoaiga, ma na faaosofia ai le popolevale i mea tautupe ma le faateteleina o le leai o ni galuega i le lalolagi atoa.

“Ua lamatia le maketi o mea tautupe,” na toe manatunatu ai Peresitene Monson i lana api talaaga. “O o tatou tagata, faatasi ai ma isi i lo tatou atunuu ma le lalolagi, ua faateleina i a latou aitalafu.”

A o faateteleina le faaletonu, sa fetutuuna’i ai le Au Peresitene Sili pe le talefeagai ai le taofia o galuega faatino eseese a le Ekalesia mo le fausiaina o fale. I le ola ai i le Paū Tele o le Tamaoaiga, sa malamalama ai Peresitene Monson i le matautia o le sopo atu o se tasi nai ona tapulaa. Ae na ia iloaina foi afai e taofia le fausiaina o fale, o lona uiga o le a leai ni galuega mo le faitau selau o tagata faigaluega e pei o kamuta ma faieletise. Sa matuā faigatā le fausiaina o fale, ma sa faigata ona maua ni galuega.

O le Au Epikopo Pulefaamalumalu, o e sa i ai le taitaiga i le fausiaina o fale ma taumafaiga agaalofa a le Ekalesia, sa fono ma le Au Peresitene Sili i Aso Faraile uma e iloilo le tulaga o galuega faatino. I se tasi Aso Faraile i le amataga o le 2008, na fesili ai le au epikopo ia Peresitene Monson po o le a le mea e tatau ona fai.

“O loo matou faia nei galuega faatino uma o le fausiaina, i se tasi setete po o se isi,” o le tala lea a le au epikopo. “O le a sou finagalo?”

Sa mausalī Peresitene Monson. “Fetaomi i luma,” o lana tala lea.

I le taimi lea, na toe foi mai ai Blake McKeown i le Bondi Beach i Sini mo se isi taumafanafana o aoaoga a le au leoleo faaola i luma o le mea pueata o le TV. O lona alia’e mai i le vaitau lona lua o le Bondi Rescue na avea ai o ia ma se tagata lauiloa i le lotoifale i Ausetalia. I nisi taimi, a o fai ana faatauga i lona nuu po o le tietie i se nofoaafi e agai atu e faigaluega, na te matauina tagata o tilotilo agai atu ia te ia ma tusitusi atu ma le faaeteete o latou lima. Sa fai si faasoesa o le gauai atu, ae sa le mafai ona ia faitio. E fiafia o ia e totogi e evaeva ai i le matafaga i lea aso ma lea aso ma ana uo. “E mafai faapefea ona sili atu le lelei o le olaga?” sa ia mafaufau ai.

Ae peita’i, sa popole ona mātua. Pe na suia ea mea na ia faamuamua ona o le lauiloa i le televise? Sa maua e Blake le galuega o le leoleo faaola i le tausaga na muamua atu ina ia maua ai se tupe a o faatalitali e auauna atu i se misiona faamisiona. O lenei ua leva ona oo mai ma alu ese lona aso fanau lona sefuluiva.

“O le a sa’u mea e fai?” sa fesili ai lona tina i lo latou epikopo i se tasi aso. “O le a faapefea le taunuuga o lenei mea?”

“Ou te le iloa,” o le tali lea a le epikopo, ma le popole. “Sa lelei tele o ia.”

Sa taumafai Blake e faamautinoa atu i ona matua. Sa ia ta’u atu ia i la’ua o loo ia tatalo ia iloa le taimi sa’o e auauna atu ai. Sa le’i lagonaina e ia faapea ua oo mai le taimi. “E taua lo’u alu, ae le o le taimi ou te alu ai,” na ia fai atu ai ia i la’ua, ma toe ta’ua se mea sa ta’u atu e lona tamā ia te ia i taimi uma.

Ona toe foi mai lea o lona uso o Wade mai lana misiona i Iapani. Sa vaaia e Wade le popolega o ona matua ma sa ia talanoa atu ia Blake. Sa talia e Blake upu a Wade ma amata ona mafaufau mamafa atili e uiga i le alu i se misiona. “Afai e moni le Ekalesia,” sa ia fai ifo ai ia te ia lava, “ona tatau lea ona ou alu i se misiona.”

Sa mafaufau o ia i lana molimau ma le Ekalesia. A o tuputupu ae, sa auai o ia i le TFY, le konafesi a le autalavou i aso e tele i Ausetalia, lea na salalau atu i atunuu i Amerika i Saute ma Europa i le 2006 i lalo o le igoa Faapitoa mo le Autalavou. Sa auai foi ma le faamaoni o ia i le seminare i le taeao po ma isi gaoioiga a le Ekalesia. Atonu e le o taimi uma na fiafia ai o ia e alu, ae sa taumafai o ia e tausi poloaiga ma fai le mea sa’o. Ma sa ia te ia le faatuatua ia Iesu Keriso ma le moni o le talalelei toefuataiina. Na lava lena mafuaaga e auauna atu ai.

E lei umi ae auina atu e Blake lana talosaga faafaifeautalai. O se taimi o avanoa e le’i mafaitaulia mo le galuega faafaifeautalai. I tausaga talu ai nei, sa “siitia ai e taitai o le Ekalesia le faatulagaga” mo le galuega faafaifeautalai, ma faamamafa atu ai le manaomia o toeaina ma tuafafine tuuto e i ai tulaga faatonuina maualuluga o amioga mama o e na iloa le auala e faalogo ma tali atu ai i le Agaga Paia. Sa faalauiloaina foi e le Ekalesia ni misiona o auaunaga mo tagata talavou e i ai tulaga patino o le soifua maloloina po o e sa le fetaui lelei misiona masani mo le talaiga.

Ina ua oo mai le valaauga o Blake, sa ia mauaina se tofiga e auauna atu i se misiona talai faamisiona i le Misiona a Filipaina Baguio, o se tasi o misiona e sefululima i le atunuu. Pau lava le mea na totoe na te faia o le ta’u atu lea i ona uso a leoleo faaola.

E lei leva mulimuli ane, a o pueina le ata o le Bondi Rescue, sa talanoa atu ai Blake i mea pueata e uiga i lona faatuatuaga. “A o ou tuputupu ae, sa avea lava au ma se tagata o Le Ekalesia a Iesu Keriso o le Au Paia o Aso e Gata Ai,” o lana tala lea. “Ou te alu i le lotu i Aso Sa uma. Ou te matea e i ai sina tulaga faatonuina e sili atu ona maua’i ou te ola ai, ae e ese mai lena, ua na o au o se tagata masani.”

Ina ua maea le sifi a Blake, sa faatonuina o ia e le au gaosi o le ata tifaga e fai se suti ma se fusiua. Ona ia savali atu lea i le ‘olo autū o le leoleo faaola ma tuitui atu i le faitotoa. “Ou te matea o le a masani o’u lima i lena mea,” o lana tala lea, ma tilotilo atu i le mea pueata.

Sa faafeiloaia o ia e leoleo faaola i ni taliēga lelei. “Tou te fiafia i ai?” na ia fesili ai, ma faaali atu ia i latou lona suti. “O a’u lea mo le isi lua tausaga.”

“O fea e te alu i ai?” o le fesili lea a se tasi o leoleo faaola.

“I Filipaina,” o le tala lea a Blake. “Ou te alu e auauna atu i la’u misiona mo la’u ekalesia.”

“O oe o se Mamona?” o le tala lea a se isi leoleo faaola.

“Ioe,” o le tala lea a Blake. “Ou te manatu ua ou maua le mea sili i lo’u olaga, aisea la e le tatau ai ona ou faasoa atu i isi tagata?”

Sa faamatala e Blake o le a le pine ae alu atu o ia mo le Iunaite Setete e maua a’oa’oga faafaifeautalai ma a’oa’o le gagana Tagalog. Ona alu lea o ia i lana galuega ua tofia i ai. “O le a matou tuitui malosi i faitotoa,” na ia saunoa ai, “ma taumafai e a’oa’o tagata e uiga ia Iesu Keriso.”

“Ia, alii, ia manuia mea uma,” o le tala lea a se leoleo faaola, ma faatalofa atu ia Blake ma tosoina o ia i se opo mafanafana. Sa faanoanoa Blake i le tuua o le matafaga, ma sa ia iloaina o le a misia ana uo. Ae sa naunau o ia e amata lana misiona ma faia mea lelei i le lalolagi.

I le toe foi atu i le fale, sa ta’u atu ai e Blake ia Wade e uiga i le aafiaga. “O la’u luitau i le avea ai ma se faifeautalai o le talanoa atu lea i tagata e toasefulu i le aso i Iapani,“ o le tala lea a Wade. “Faatoa uma ona e faia lena mea i le sefulu miliona tagata i le taimi e tasi.”

Ia Iuni 2008, na o ai Uili ma Lili Binene i se pasi ma le la fanau e toatolu i le malaevaalele i Mbuji-Mayi, pe tusa ma le selau maila i matu o lo la fale i Luputa, Ripapelika Temokarasi o Congo. Mai iinā, na latou felelei atu ai i Kinshasa, momoe i le pō i le aai, ona latou ō lea i se vaalele i Aferika i Saute. Sa umi le malaga, ae sa fiafia tamaiti, ma fiafia i a latou malaga. Sa agai atu le aiga i le Malumalu o Johannesburg ina ia faamauina faatasi mo le faavavau.

Ua mavae le lua tausaga talu ona toe faatasia i laua o se aiga ona o le valaauga o Uili e avea ma peresitene o le Itu o Luputa. Ina ua toe siitia atu i Luputa, sa tatalaina e Lili se aoga amata. Sa vave ona faamanuiaina, ma e lei umi ae ia faalauteleina i se aoga tulagalua. Na faataatia ese e Uili lana miti o le avea ma se enisinia eletise ae amata ona a’oa’oina o se tausimai i le falemai i le lotoifale. Sa ia faapaleniina lenei galuega ma manaoga o lona valaauga, ma sa faalagolago o ia i le lagolago a ona fesoasoani i le au peresitene o le itu a o latou a’oa’oina o latou tiutetauave fou, a’oa’o taitai i le lotoifale, ma asiasi atu i le Au Paia.

Talu ai nei lava, na tauaveina ai e le au peresitene ni tiute faaopoopo e fesoasoani ai i se galuega faatino e tolu tausaga, na faatupeina e le Ekalesia e faaaoga ai vai mamā i Luputa. Ua leva ona faalagolago tagata o le aai i vaitaele eseese, punavai, ma alavai mo vai. E faalua i le aso, e savavali ai fafine ma tamaiti i se maila pe sili atu i se tasi o nei nofoaga, ao mai vai i soo se koneteina o loo i ai, ona ave lea i le fale. O nei punavai o vai sa tumu i parasite matautia, ma toetoe lava o tagata uma sa iloaina se tasi—e masani lava o se tamaitiiti laitiiti—o lē na maliu ona o le vai ua faaleagaina. Ma o nisi taimi sa osofaia ai tamaitai a o latou savavali atu i le punavai o le vai ma toe foi mai ai.

Mo le tele o tausaga, sa mana’o ai le ADIR, o se faalapotopotoga o fesoasoaniga alofa i le DRC, e aumai vai mamā i tagata e 260,000 i totonu ma autafa o Luputa. Ae o le punavai sili mo le vai o se vaega o punavai auvaemauga e luasefulu-tasi maila le mamao, ma e leai se $2.6 miliona o le ADIR e fau ai le paipa. Ona faalogo lea o le pule faatonusili o le faalapotopotoga e uiga i Galuega Alofa a le Au Paia o Aso e Gata Ai ma faafesootai faifeautalai o fesoasoaniga alofa i le lotoifale e uiga i le galulue faatasi i le galuega faatino.

Na fatuina i le 1996 i lalo o le taitaiga a le Au Peresitene Sili, o le Auaunaga Alofa a le Au Paia o Aso e Gata Ai na lagolagoina le faitau selau o galuega faatino o fesoasoaniga alofa a le Ekalesia i le salafa o le lalolagi i tausaga taitasi. E ui lava sa eseese ana auaunaga e tusa ai ma manaoga, ae o ana taumafaiga autū talu ai nei o tui puipui, nofoa faataavalevale, tausiga o mata, tausiga o pepe, ma vai mamā. Ina ua oo mai le tala e uiga i le manaomia o se alavai paipa i Luputa, sa foai atu e le Auaunaga Alofa a le Au Paia o Aso e Gata Ai ia tupe e tatau ai, ma sa malilie volenitia mai Luputa ma isi nuu lata ane e fesoasoani e faatino le galuega.

I le avea ai ma se au peresitene o le itu, sa galulue ai Uili ma ona fesoasoani ma ADIR ma Daniel Kazadi, o se tagata o le Au Paia o Aso e Gata Ai i le lotoifale na faafaigaluegaina e vaaia le nofoaga. Sa latou ofo atu foi o ni tagata e faia le galuega.

O lenei, a o tulaueleele le au Binene i Johannesburg, sa mafai ona latou faataatia ese o latou olaga pisi ae taulai atu i le maota o le Alii. I le malaevaalele, sa faafeiloaia i latou e se aiga ma aveina atu i le fale o le malumalu i le nofoaga o le malumalu. Mulimuli ane, na ulufale atu ai Uili ma Lili i le malumalu, sa tuu le la fanau i le fale e vaaia e le Ekalesia, ae sui i ofu papae.

A o lei tuua Luputa, sa suesueina e le au Binenes le tusi lesona o sauniuniga o le malumalu a le Ekalesia, o le Faaeeina mai Lugā, ma faitau le tusiga a le aposetolo o James E. Talmage O Le Maota o le Alii. Ae, ina ua la taunuu i le malumalu, sa fai si o la’ua le mautonu aua sa fou mea uma ma e leai se tasi e tautala i le gagana Farani. Ae o le faaaogāina o taga, na la iloa ai le mea e o i ai ma le mea e fai.

Mulimuli ane, i le potu o faamauga, sa matuai fiafia lava i laua ina ua toe faatasia ma le la fanau e toatolu. Ilaei papae, sa foliga mai o ni agelu a o latou o mai i totonu o le potu. Sa lagona eUili le tutū o mone o ona lima. Sa foliga mai ua le o toe i ai o ia ma lona aiga i le lalolagi. Sa pei lava ua latou i ai i le afioaga o le Atua.

“Oka!” o lana tala lea.

Sa lagona foi e Lili e pei ua latou i ai i le lagi. O le iloa ai ua fusia faatasi i latou mo le faavavau na foliga mai na faateleina ai le alofa o le aiga mo le tasi ma le isi. Ua le mavavaeeseina nei. E oo lava i le oti e le mafai ona vavaeeseina ai i latou.

I le amataga o le 2009, sa nonofo ai Angela Peterson i Iuta ma lona toalua o John Fallentine. Sa la feiloai ma John i se uarota a tagata matutua nofofua i le Aai o Sate Leki ina ua faatoa tuua e Angela lana galuega faigata i Uosigitone, DC. O John e sau mai le Itu i sisifo o le Iunaite Setete, ma sa nofo ma faigaluega foi o ia mo se taimi i Uosigitone. Sa matua o ia nai lo Angela ma e matamuli teisi, ae sa vave lava ona avea i laua ma uo sili ona lelei. Ia Novema 2007, na faamauina ai i la’ua i le Malumalu o Bountiful Iuta.

O lea ua saunia le au Fallentines mo se malaga fou. Ina ua uma ona maua e John le faatagaga mai lona pule e faigaluega mamao ai, sa teuina e le ulugalii a laua meatotino ma siitia atu i le Motu i Matu o Niu Sila. Sa la i ai uma iina muamua, ma sa la manatu o le nofoaga aupito sili lea ona matagofie i le lalolagi.

E lei leva ona faamanatuina e le Au Paia o Niu Sila le 150 tausaga o le taunuu mai o le Ekalesia i lo latou atunuu, ma ua mavae le limasefulu tausaga talu le faapaiaga o le Malumalu o Niu Sila. I lena taimi, sa i ai i le Ekalesia pe tusa ma le sefulufitu afe tagata o le Ekalesia i le atunuu ma e leai ni uarota po o ni siteki. O le taimi nei, ua toeitiiti atoa le selau afe o le Au Paia ua salalau solo i siteki e 25, uarota e 150, ma paranesi e 54.

Na nonofo le ‘au Fallentines i Thames, o se taulaga i le talafatai i le Penisula o Coromandel, ma e le’i umi ae amata ona auauna i la latou paranesi laitiiti. O le toatele o tagata o le latou paranesi ma le siteki o Māori, ma sa fiafia Angela e faamasani ia i latou. Sa galue o ia i Tamaitai Talavou a o John o se faiaoga i le Aoga Sa, sa ofofua atu e fesoasoani i le peresitene o le paranesi i alii talavou. Sa auauna atu foi Angela ma John o ni faifeautalai o le paranesi ma ni tagata faigaluega i sauniga i le malumalu i Hamilton, e toeitiiti lava lua itula le mamao e tietie ai i ai.

Ae peita’i, i le fale, sa faatupula’ia le popole o le ulugalii. I lona olaga atoa, sa manao ai Angela e avea ma se tina. Ae e oo mai i le taimi nei, e le’i mafai ona la fanauina ma John se fanau. Sa latou feutagai ma se foma’i i Aukilani ma faia ni su’esu’ega eseese e iloa ai po o le ā, pe afai e iai se mea, e mafai ona fai. Ina ua toe foi mai taunuuga, na iloa uma e Angela ma John e i ai ni faafitauli tetele o o la’ua totoga fanau. E ui lava i le fesoasoani a foma’i ma tagata tomai faapitoa, ae sa itiiti lava avanoa e mafai ai ona maitaga Angela.

Sa matua faamomoiloto lea tala. O aso uma lava, e pasia ai e Angela se kopi faavaa o le folafolaga i le aiga i lo latou fale. O lana fe’au na tulai mai ai se fesili faigatā i lona mafaufau. Afai na faauuina le aiga e le Atua, aisea na le mafai ai ona la maua ma John ni fanau?

Sa ia lagonaina le fememea’i ma le lē mautonu—ae sa faamoemoe lava o le a tali mai le Atua ia la tatalo ma John.

I le aso 9 o Aokuso, 2009, sa feiloai ai Peresitene Thomas S. Monson ma uo Katoliko Roma i le Falesa o le Madeleine i le Aai o Sate Leki. O le fale tapuai matagofie sa selau tausaga le matua, ma sa o mai Peresitene Monson ma isi taitai faalelotu ma faalemalo e faamanatu.

Sa faaaoga e Peresitene Monson le avanoa e saunoa ai e uiga i le auala na faataatia ese ai e tagata Katoliko ma le Au Paia o Aso e Gata Ai o latou eseesega faalelotu ina ia tausia tagata o loo manaomia le fesoasoani. O le polokalama o le “Samaria Agalelei” o le falesa na tuuina atu ai se taumafataga o le aoauli i aso taitasi mo e fia aai, faatasi ai ma falaoa ma isi meaai na saunia e le Tautua o le Uelefea a le Ekalesia. E faapena foi, sa faagaoioia e tagata Katoliko se fale e faaaoga ai fualaau faasāina i le lotoifale, lea sa teuina e le Ekalesia i meaai. Sa galulue faatasi foi ekalesia e lua e fesoasoani i tagata sulufai na taunuu i le Aai o Sate Leki ia lava sapalai o le tumamā ma le faatotogaina o fale.

O lenei faigapaaga na oo i talaatu o le Aai o Sate Leki. I tausaga talu ai nei, na fesoasoani ai ofisa o galuega alofa a le Katoliko i le Ekalesia e tufatufa atu le silia ma le $11 miliona i fesoasoaniga alofa i le lalolagi atoa, ma faamautinoa ai na tuuina atu fesoasoaniga ia i latou o e na sili ona manaomia.

“A i ai ni o tatou mata e vaai ma taliga e faalogo ma loto e iloa ma lagona, o le a tatou iloa manaoga a o tatou uso a tagata o loo fetagisi mai mo se fesoasoani.”

I le tausaga ma le afa ua mavae, sa gauai atu ai Peresitene Monson i le tele o galuega faatino o fale ma fesoasoaniga alofa a le Ekalesia. E ui lava ina sa tumau pea le lē mautonu o le tamaoaiga o le Iunaite Setete ma le maualuga o le leai o ni galuega, ae sa ia vaaia ni faamanuiaga e le’i faamoemoeina i le fetaomi atu i luma i nei taumafaiga. Sa leai se manaoga mo galuega faufale, ae sa mafai e le Ekalesia ona saunia ni galuega mo le toatele o tagata faigaluega tomai i ana galuega faatino.

Sa uunaia foi e Peresitene Monson ia taitai o le lotoifale e faaitiitia tau i nofoaga e mafai ai. Sa ia talosagaina taitai misiona e a’oa’o faifeautalai ia faasoasoa tatau. Sa ia faamaonia se fuafuaga na fautuaina talu ai nei e le Au Epikopo Pulefaamalumalu e faaitiitia ai le tetelē o nofoaga autu fou o siteki i le lona fa. Nai lo le fausiaina o fale tetele, ma taugata atu e ofi ai tagata uma o le siteki, e mafai e siteki ona potopoto i le tele o fale o uarota ma fesootai atu i konafesi a siteki e ala i faasalalauga faatekinolosi. O lenei mea na mafai ai foi e le Au Paia ona faaitiitia tupe faaalu mo femalagaaiga.

I le taimi o le pau o le tamaoaiga, sa mafaufau Peresitene Monson i tagata sa manaomia le fesoasoani—aemaise lava fafine ua oti a latou tane. Ua faateleina talosaga mo taulaga anapogi, ma sa le manao o ia e galo se tasi. A o talavou o ia, sa avea Peresitene Monson ma epikopo o se uarota a le Aai o Sate Leki ma e silia ma le afe tagata. O le valusefulu-lima o i latou o fafine ua oti a latou tane. Ina ua mavae le lima tausaga o lona avea ai ma epikopo, sa faaauau pea ona asiasi atu Peresitene Monson i nei fafine ua oti a latou tane, ma tuuina atu meaalofa ma aumaia le fiafia. I le avea ai ma peresitene o le Ekalesia, sa asiasi atu o ia e le aunoa i e ua tuuatoatasi ma ua faagaloina.

“O lena galuega lea ua valaauina i tatou uma i ai, o le galuega a le Alii o Iesu Keriso,” na ia a’oa’o atu ai le Au Paia. “A o Ia faitaulia i tatou i Lana galuega, ua Ia valaaulia i tatou ia faalatalata atu ia te Ia. E fetalai mai o Ia ia te oe ma au.”

I le 2003, na faalauiloa ai e le Ekalesia se uepisaite fou, o le www.providentliving.org, lea na a’oa’o atu ai mataupu faavae autu o le uelefea. A o lei oo i le pau o le tamaoaiga, sa maua e le saite le silia ma le miliona le au maimoa i lona itulau i masina taitasi. Ia, ina ia fesoasoani e toe faamamafa atu nei upumoni ua leva ona faamamaluina, sa saunia ai e le Au Epikopo Pulefaamalumalu se tamaitusi fou ma se DVD, Mataupu Faavae Autu o le Uelefea ma le Ola Tutoatasi. Sa uunaia le Au Paia e totogi a latou sefuluai ma taulaga, ola i totonu o se paketi, aloese mai aitalafu, faaitiitia le aai soo i fale’aiga, ma teu ni meaai faaleoleo.

“Ou te tautino atu o le polokalama uelefea a Le Ekalesia a Iesu Keriso o le Au Paia o Aso e Gata Ai, e musuia e le Atua Silisiliese,” na molimau mai ai Peresitene Monson. “Ioe, o le Alii o Iesu Keriso o lona Tusiata Mamanu ia.”

Mo le tele o tausaga, sa faauigaina mai ai e taitai o le Ekalesia le misiona a le Ekalesia e aofia ai elemene e tolu: faaatoatoaina o le Au Paia, folafola atu o le talalelei, ma le togiolaina o e ua maliliu. O lenei ua lagonaina e Peresitene Monson o le uelefea e tatau ona avea ma “vae lona fa o le nofoa.” Ia Setema 2009, sa ia faamaonia ai le faasa’oina o le Tusitaulima o Faatonuga a le Ekalesia e aofia ai le “tausia o e matitiva ma e le tagolima” o se vaega o le misiona a le Ekalesia.

“Ua siomia i tatou e i latou e manaomia lo tatou gauai atu i ai, la tatou faamalosiau atu, la tatou lagolago, la tatou faamafanafana, lo tatou agalelei,” na saunoa mai ai Peresitene Thomas S. Monson i ni nai vaiaso na sosoo ai ma le konafesi aoao. “O i tatou o lima o le Alii i luga o le fogaeleele, ua i ai le tiutetauave e auauna atu ai ma siitia Ana fanau. O loo faalagolago mai o Ia ia i tatou taitoatasi.”