Vahe 37
ʻE Hoko Mai ʻa e Ngaahi Talí
“Ko e hā hoʻo fakakaukaú?”
Ko e fehuʻi ia naʻe fakahokó ʻi he tatali ʻa Mākou Vilavisenisio ki hono uaifi ko Kalōtiá ke ne fakahoko ha talí. Naʻe toki ʻoange pē ʻe heʻene ngāueʻangá, ko ha kautaha fetuʻutaki telefoni ʻi Masala, ʻEkuatoa, ha faingamālie ke ne fakaava ha ʻōfisi foʻou ʻi Pueto Falanisisikou ti ʻOleiana, ko ha kiʻi kolo ʻi he vaotā ʻAmasoní he fakahahake ʻo ʻEkuatoá.
Naʻe fiemaʻu ʻe Mākou ʻa e lakangá, ʻa ia naʻe kau ai mo ha hiki ʻi heʻene vāhengá, ka naʻe ʻikai ke ne fie fakahoko ha fili taʻekau ai ʻa Kalōtia. ʻE fiemaʻu ʻe he ngāué ke hiki ʻa e ongo Vilavisenisió mo hona foha taʻu fā ko Saiá ki ha feituʻu ʻoku maile ʻe fāngeau tupu hono mamaʻó.
Naʻe tupu hake ʻa Kalōtia, hangē ko Mākoú, ʻi ha kolo lahi, ko ia ʻe hoko ʻa e hiki ki ha vaotaá ko ha fuʻu liliu lahi. Ka naʻá ne poupouʻi ʻa Mākou mo loto ke ne fakalakalaka ʻi heʻene ngāue maʻuʻanga moʻuí. Naʻá ne saiʻia foki ʻi he fakakaukau ke hiki ki ha feituʻu ʻutá. Naʻá ne fakakaukau ʻe toe vāofi ange ai honau fāmilí.
Ka naʻá ne kei maʻu pē mo Mākou ʻa e fehuʻi tatau fekauʻaki mo Pueto Falanisisikou ti ʻOleianá: “ʻOku ʻi ai nai ʻa e Siasí?” Naʻá na ʻosi ngāue fakafaifekau fakatouʻosi, pea naʻe mahuʻinga ʻa e Siasí kiate kinaua. Naʻá na loto ke tupu hake hona fohá ʻi ha feituʻu te ne lava ai ʻo ʻalu ki he Palaimelí, ako e ongoongoleleí, mo maʻu ha ngaahi aʻusia fakalaumālie. Naʻe ʻi ai ha Kāingalotu ʻo e Siasí ʻe meimei toko uakilu ʻi ʻEkuatoa, ka ko e tokolahi tahá naʻa nau nofo ofi ki he ngaahi kolo lalahi hangē ko Kuito, ko e kolomuʻa ʻo e fonuá, mo Kuaiakili, ʻa ia naʻe fakatapui ai ha fale ʻo e ʻEikí ʻi he 1999.
Naʻe ʻiloa fakalotofonua ʻa Pueto Falanisisikou ti ʻOleiana ko ʻEla Koka, pea naʻe siʻisiʻi ia ʻi hono fakahoa [ki he ngaahi kolo lalahí], neongo naʻe fakalakalaka vave ia ʻi hono maʻu ai ha keliʻanga lolo ʻi ha ngaahi taʻu kimuʻa. ʻI hono fakaʻaongaʻi e Meetinghouse Locator ʻi he uepisaiti ʻo e Siasí, naʻe fekumi ʻa Kalōtia ki ha uooti pe kolo ofi ki he kolo lahí. Naʻe ʻikai ha ola ʻo e fekumí, ka naʻe hili ha taimi nounou mei ai, naʻe talaange ʻe he ngaahi kaungāmeʻa ʻo Mākou mo Kalōtiá fekauʻaki mo ha kāingalotu tokosiʻi ʻo e Siasí naʻa nau hiki ʻo ngāue ai.
Naʻe fiemālie ʻa Mākou mo Kalōtia ʻi heʻena fanongo ki aí. Hili ʻena lotua ʻa e ngāué, naʻá na fakakaukau ke tali ia.
Naʻe tūʻuta ʻa e fāmili Vilavisenisió ʻi ʻEla Koka ʻi Fēpueli 2009. Naʻe tuʻu e koló ʻi he uhouhonga ʻo e vaotaá, ka naʻe ʻohovale ʻa e ongo Vilavisenisió, he naʻe ʻikai ke hangē ʻoku motuhia ia mei he toenga ʻo e māmaní. Ko e feituʻu kotoa pē naʻá na sio ki ai, naʻe feʻaluʻaki ai ha kakai pisinisi.
ʻI hono ʻilo ʻe he tokotaha ʻoku hoʻona e fale nofo totongí ko e mēmipa kinautolu ʻo e Siasí, naʻá ne talaange naʻá ne ʻiloʻi ha feituʻu ʻoku fakataha ai ha kulupu ʻo e kāingalotú ke lau folofola fakataha. Naʻá ne talaange, “Naʻá ku fakaʻatā ʻa e falé ke nau fakaʻaongaʻi.”
Naʻe fakataha e kulupú he pongipongi Sāpate kotoa ʻi he hoko ʻa e hivá, ke hivaʻi ha ngaahi himi, laukonga mei he Liahoná, mo ako ʻa e folofolá. Naʻa nau fetuʻutaki foki kia Tīmote Silouni, ko e palesiteni ʻo e Misiona ʻEkuatoa Kuitó, ʻa ia naʻá ne fekauʻi mai ha ongo faifekau ke ʻaʻahi kiate kinautolu. Ka naʻe mamaʻo e feituʻu naʻe nofo ai ʻa e ongo faifekaú, ne houa ʻe fā meia naua pea naʻe ʻikai ke na faʻa lava ʻo haʻu ki ʻEla Koka.
Naʻe kamata ke ʻalu ʻa Mākou, Kalōtia, mo Saia ki he ngaahi fakatahaʻanga he Sāpaté ʻi he uike kotoa. ʻI he kamatá, naʻe fie ʻalu ʻa Saia ki he Palaimelí peá ne fifili pe naʻe ʻi fē ʻa e toenga ʻo e fānaú. Naʻe ongo foki kia Mākou mo Kalōtia ʻa e ʻikai ke na maʻu e tuʻunga moʻui kimuʻá, ka naʻe mōlia ʻena taʻelatá ʻi heʻena femoʻuekina ʻi he ngāue ʻa e ʻEikí.
ʻI he haʻu ʻa e ongo faifekaú ki he koló, naʻe kole tokoni ʻa Mākou kiate kinaua ke kumi ha kāingalotu tokolahi ange. Naʻá ne talaange, “Ongo ʻEletā, kuo pau ke mo lue takai ʻi he koló.” Naʻá ne fakakaukau kapau ʻe ʻiloʻi ʻe he kakaí ʻa e ongo faifekaú, te nau fehuʻi ange pe ko e fē feituʻu te nau lava ʻo fakataha ai mo e toenga ʻo e kāingalotu fakalotofonuá.
Ne ʻilo māmālie ʻe he kāingalotu ʻo e Siasí ʻi he koló ʻo fekauʻaki mo e fakatahá pea nau kau ki he kulupú. ʻI he kamata ke tokolahi ange ʻa e kulupú, naʻe hoko ʻa Mākou ko honau taki. Naʻe kamata ke haʻu e ongo faifekaú he uike kotoa ke akoʻi e kakaí mo kumi ha kāingalotu tokolahi ange ʻo e Siasí. Ne ʻikai fuoloa, kuo maʻu ʻe he Kāingalotu ʻi ʻEla Koká ha ngofua ke muimui he polokalama ʻa e Siasí ki he ʻiuniti toki kamakamatá.
Pea naʻe ʻomi fakataha mo e ngofua ko ʻení ʻa e mafai ke fakahoko e sākalamēnití.
ʻI he ʻilo ko ia ʻe ʻEniselā Pitasoni ʻe mātuʻaki faingataʻa kiate ia mo hono husepānití ke maʻu haʻana fānau totonú, naʻá ne tā telefoni ki heʻene faʻeé. Naʻá ne talaange, “ʻOku ʻikai ke u ʻilo e founga ke matatali e meʻá ni. ʻOku ʻikai ke u ʻilo ha taha kuó ne foua ʻeni.” Naʻá ne manavahē.
Naʻe fakafanongo ʻene faʻeé peá ne fehuʻi ange leva pe naʻá ne manatuʻi ʻa ʻAtefi Kepi, ko e palesiteni lahi mālōlō ʻo e Kau Finemuí. Naʻá ne fakamanatu ange kia ʻEniselā, “Naʻe ʻikai ke teitei tāpuekina ia mo hono husepānití ʻaki ha fānau, ka kuó ne hoko maʻu pē ko ha sīpinga ʻo hono foua e taʻefanaú taʻe te ne tuku ke hoko ia ko ha meʻa ke fakamatalaʻi ai hono tuʻungá .”
Naʻe hoko atu ʻene faʻeé ʻo pehē, “ʻOua te ke tuku ke hoko ʻeni ko ha fakafeʻātungia kiate koe. ʻOku ou ongoʻi ʻoku fiemaʻu ke mahino kiate koe ʻa e tokāteline ʻo e tuʻunga fakafaʻeé mo e fāmilí, he ka ʻikai, ʻe hoko ia ko ha meʻa te ke toutou fefaʻuhi maʻu pē mo ia ʻi he toenga hoʻo moʻuí.”
Naʻá ne talaange leva, “ʻOku ʻikai ke u ʻiloʻi e ʻuhinga ʻokú ke foua ai ʻeni mo Sioné pe ko e hā hono fuoloá, ka ʻo kapau te ke lava ʻo kātekina mo feinga ke mahino e meʻa ʻoku finangalo e ʻEikí ke ke ako mei aí, ʻe hoko mai ʻa e ngaahi talí.”
Naʻe lava ke ongoʻi ʻe ʻEniselā e ʻofa mo e poupou ʻa ʻene faʻeé, pea naʻá ne tukulotoʻi e ngaahi lea ko iá ʻi heʻene fepaki mo Sione mo ha ngaahi faingataʻa lahi ange lolotonga ʻena fakakaukauʻi ha ngaahi founga ke hoko ai ko ha mātuʻá, hangē ko e pusiaki fānaú mo e fakatupu fānau ʻi ha tesi tiupí (in vitro fertilization). ʻI heʻena vakaiʻi e pusiaki fānaú ʻo fakafou ʻi he Vaʻa Tokoni ki he Fāmilí ʻa e Siasí mo e polokalama fakapuleʻanga ʻa Nuʻu Silá, naʻá ne ʻilo ai naʻe mātuʻaki siʻisiʻi ʻaupito hona faingamālie ke pusiakí.
ʻI he fehangahangai hokohoko ʻa ʻEniselā mo e loto-mamahí, naʻá ne falala ki he lotú, ʻaukaí, mo e moihū ʻi he temipalé ke maʻu ha tokoni. Naʻá ne fakakaukau maʻu pē ki he Fakamoʻuí, ʻo loto-falala naʻá Ne tokoniʻi ia ke kātekina hono ngaahi faingataʻá. Ka naʻá ne toe fakaʻamu foki te Ne hanga ʻo toʻo atu ʻa e ngaahi faingataʻá. ʻI he ngaahi taimi ko ʻení, naʻe fakafiemālieʻi ia ʻe Sione. Naʻá ne [Sione] tui ʻe lelei ʻa e meʻa kotoa pē.
Naʻe kei tohoakiʻi pē tokanga ʻa ʻEniselaá ʻe he fanongonongo ki he fāmilí naʻe tautau ʻi he holisí. Naʻá ne saiʻia maʻu pē ʻi hono ngaahi akonakí. Ka ʻi he hili hono ʻilo ʻene taʻefanaú, naʻá ne faʻa ongoʻi loto-mamahi ʻi heʻene lau ʻa e fakapapauʻi mai ai e “fekau ko ia ʻa e ʻOtuá ki Heʻene fānaú ke nau fanafanau mo fakatokolahi ʻa māmaní.” Naʻe mahino kiate ia naʻe ʻikai ke na maumauʻi mo Sione ha faʻahinga fekau, koeʻuhí naʻe ʻikai ke na lava ʻo fanau fakanatula. Ka ʻi he kamata e ngaahi faitoʻo ki heʻena taʻefanaú, naʻe fifili ʻa ʻEniselā pe naʻe feʻunga nai ʻena meʻa naʻe fakahokó.
ʻI he taimi ko ʻení, naʻá na hiki ki Taulanga, ko ha kolo lahi ʻi he Matāfanga Mahu ʻo Nuʻu Silá, pea naʻe uiuiʻi ʻa ʻEniselā ko e palesiteni ʻo e Kau Finemuí he siteikí. Naʻá ne ilifia ʻi he uiuiʻi foʻoú. Naʻá ne kei taʻu tolungofulu siʻi peá ne ongoʻi fuʻu kei siʻi ke tala ki he kau taki kehé ʻa e meʻa ke faí. ʻI he taimi tatau, naʻá ne hohaʻa foki ʻokú ne fuʻu motuʻa ke femahinoʻaki mo e kau finemuí. Naʻá ne lotu ke ʻiloʻi e founga ke tataki ʻaki kinautolú.
Naʻe ʻikai fuoloa kuó ne ʻiloʻi naʻá ne lava ʻo femahinoʻaki mo e tamaiki fefiné ʻi ha ngaahi founga naʻe ʻikai ke ne ʻamanaki ki ai. Naʻá ne kei siʻi ange ʻi heʻenau mātuʻá, pea naʻe fakaʻapaʻapaʻi ia ʻe he kau finemui tokolahi mo tali fakamātoato ʻene akonakí. Naʻá ne lava ʻo poupouʻi mo fakakaungāmeʻa mo kinautolu ʻi ha founga naʻe ʻikai lava ʻe heʻenau ngaahi faʻeé. ʻI he ʻikai haʻane fānaú, naʻá ne ʻilo ai te ne lava ʻo feohi mo kinautolu ʻi ha taimi lahi ange mo ʻoange e faleʻi naʻa nau fiemaʻu mei ha taha lahi falalaʻangá.
Naʻe fiefia foki ʻa e ongo Falenitiné ʻi hono poupouʻi e ngaahi fāmili kehe ʻi honau uōtí mo e siteikí. Naʻá na faʻa fakahoko ha tunutunu, sio faiva ʻi tuʻa, mo e ngaahi efiafi fakafāmili. Lolotonga e ngaahi konifelenisi lahí, te nau fakaafeʻi e kau finemuí ke nau kai laʻikeke kimuʻa pea nau ō ki he siteiki senitaá ke fakahoko e fakamafola fakalūkufua ki he Kau Finemuí. Koeʻuhí naʻe faingataʻa ke fuʻu mamaʻo ʻaupito mei he fāmilí ʻi he taimi Kilisimasí, naʻá na fakahoko ha paati ʻi he Efiafi Kimuʻa ʻi he Kilisimasí maʻá e niʻihi ʻo e kau hikifonua mai naʻá ne ʻiloʻi mei Saute ʻAfilika mo e motu ko Niueé. Naʻe fonu maʻu pē hona ʻapí he fānaú ʻi he ngaahi ʻekitivitī ko ʻení, pea naʻe fiefia ʻa ʻEniselā mo Sione he feohi mo kinautolu mo ʻenau mātuʻá.
ʻI he ʻaho ʻe taha, ʻi he fakalaka hake ʻa ʻEniselā ʻi he tā ʻo e fanongonongo ki he fāmilí ne tautau ʻi hono holisí, naʻá ne maʻu tepu ʻa e ngaahi lea kamatá: “Ko kimautolu, ko e Kau Palesitenisī ʻUluaki pea mo e Fakataha Alēlea ʻo e Kau ʻAposetolo ʻe Toko Hongofulu Mā Ua ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻoku mau fakahā heni ʻi he loto māluʻia …”
Naʻá ne fehuʻiloto, “ʻOku ou tui moʻoni nai ki heni? ʻOku ou tui nai ko e kau palōfita ʻeni mo e kau ʻaposetolo ʻoku nau fakahoko e ngaahi lea ko ʻení?” Naʻe liliu ʻe heʻene ngaahi aʻusiá ʻa e founga ʻene lau mo e mahino kiate ia ʻa e fanongonongo ki he fāmilí. Ka naʻá ne ʻiloʻi ʻoku fakamoʻoni makehe ʻa e kau palōfitá mo e kau ʻaposetoló kia Sīsū Kalaisi, pea naʻá ne tui ki heʻenau ngaahi leá.
Naʻe kamata ke ne vakai naʻe lahi ha ngaahi founga ke hoko ai ko ha faʻē, pea naʻá ne tui te ne maʻu mo Sione ʻa e faingamālie ke hoko ko ha ongomātuʻa ʻi he nofo taʻengatá. Naʻe tokoni e ʻilo ko ʻení ke mahino kiate ia ʻa e mahuʻinga ʻo e malí mo e fāmilí ʻi he palani ʻo e fakamoʻuí.
Naʻá ne manatuʻi e founga naʻe hanga ai ʻe he fanongonongo ki he fāmilí ʻo tākiekina mo fakalotoa e makēniki mo e ʻofisiale Hahake Lotoloto naʻá na fetaulaki ʻi Uāsingatoni DC. Naʻe mālohi fau ʻa e ngaahi moʻoni ne akoʻi aí pea ʻaonga ki heʻene moʻuí, pea naʻá ne falala ki ai.
ʻI ʻEla Koka ʻEkuatoá, naʻe vave hono fakaava ʻe Mākou Vilavisenisio ha ʻōfisi fetuʻutaki telefoni ʻi he koló, ka ko ha pole fakaʻaho hono fakalele iá. Naʻe foʻou ʻene kau ngāué ki he ngāueʻangá pea fiemaʻu ke akoʻi kimuʻa pea nau lava ʻo feau lelei e ngaahi fiemaʻu ʻa e kakaí. Ko e meʻa leva ʻe tahá ko hono kumi ha kakaí. Koeʻuhí naʻe matuʻaki foʻou ʻa e ʻōfisí, ko e konga lahi e taimi ʻo Mākou mo ʻene timí naʻe fakaʻaongaʻi ia he fakataha mo e kakaí mo tuʻuaki ʻenau pisinisí. Ka neongo ia, naʻa nau ngāue mālohi, pea naʻe fakalakalaka ʻa e ʻōfisí.
Neongo e femoʻuekina ʻa Mākoú, ka naʻe ʻi ai hono taimi ki hono fāmilí mo e Siasí. ʻI he māhina takitaha, naʻe omi ha kakai tokolahi ange ki he houalotu sākalamēnití ʻi he pongipongi Sāpaté. Naʻe teuteuʻi ʻe he Laumālie ʻo e ʻEikí ha kakai tokolahi ki he ongoongolelei ʻo Kalaisi kuo fakafoki maí. Naʻa nau vēkeveke ke ʻilo ki he ʻOtuá mo ʻEne ʻofá.
Ko e taimi ko ʻení naʻe tuʻo lahi e omi ʻa e kau faifekaú ki he koló he uike ke akoʻi e kakaí mo fakaafeʻi kinautolu ki he lotú. Naʻe fifili ʻa Mākou mo Kalōtia pe ko e hā hono fuoloa pea hoko ʻenau kulupú ko ha koló.
Hili ha māhina ʻe fitu mei he tūʻuta ʻa e fāmili Vilavisenisió ki ʻEla Koká, naʻe ʻaʻahi mai ʻa Tīmote Silouni ko e palesiteni fakamisioná, ki he koló. Koeʻuhí naʻe tataki ʻe Mākou ʻa e kulupu fakalotofonua ʻo e Siasí, naʻe kole ange ʻe Palesiteni Silouni ke ne fakafeʻiloaki ia ki he Kāingalotú lolotonga ʻena ʻaʻahi holo ʻi ʻEla Koká.
ʻI hono kotoa ʻo e pongipongí pea aʻu ki he hoʻataá, naʻe ʻave takai ʻe Mākou ʻa e palesiteni fakamisioná ʻi he koló. Naʻe tautautefito e mahuʻingaʻia ʻa Palesiteni Silouní ʻi heʻene feʻiloaki mo e kau maʻu lakanga Taulaʻeiki Faka-Melekisētekí, pea naʻá ne ʻinitaviu honau niʻihi. Lolotonga ʻena fononga ʻi he feituʻu takitaha, naʻá ne fehuʻi ange foki kia Mākou fekauʻaki mo hono fāmilí, ngāue maʻuʻanga moʻuí, mo e aʻusia ʻi he Siasí.
ʻI he fakaʻosinga e ʻahó, naʻe talaange ʻe Palesiteni Silouni kia Mākou ʻokú ne fie talanoa ki ai. Naʻá na ʻalu ki he fale naʻe fakahoko ai e ngaahi fakataha ʻa e Kāingalotú pea maʻu ha loki naʻe ʻatā. Naʻe talaange leva ʻe Palesiteni Silouni kuó ne lotua ke maʻu ha palesiteni fakakolo ʻi he koló. Naʻá ne talaangē “Kuó u maʻu ʻa e ongo ko koe ʻa e tokotaha ko iá. ʻOkú ke tali nai e uiuiʻi ko ʻeni ʻa e ʻEikí?”
Naʻe talaange ʻe Mākou, “ʻIo.”
ʻI he ʻaho hono hokó, ʻaho 6 Sepitema 2009, naʻe fokotuʻu ʻe Palesiteni Silouni ʻa e Kolo ʻOleianá pea vaheʻi ʻa Mākou ke palesiteni ai. Hili ha uike ʻe taha mei ai, naʻe ʻomi ʻe he ʻōfisi fakaʻēlia ʻo e Siasí ʻi Kuitó ha ʻū sea, palakipoe, tesi, mo ha ʻū meʻa kehe pē ki he feituʻu fakatahaʻanga ʻo e koló.
Naʻe tokolahi ha kau taki foʻou ʻo e koló, kau ai ʻa Kalōtia, ʻa ia naʻe hoko ko e palesiteni ʻo e Kau Finemuí. Ko e tokolahi taha ʻo e kau takí naʻe siʻisiʻi ʻenau aʻusia ʻi he Siasí, ko ia naʻe fika ʻuluaki ʻa e akó kia Mākou. Naʻá ne loto ke hoko e kau taki fakakoló ko ha sīpinga ʻo e ʻofa mo e tokoni faka-Kalaisí. Naʻá ne fakaʻaongaʻi e maʻuʻanga tokoni kotoa pē naʻá ne maʻú—ʻa e tohi lēsoni mo e vitiō kotoa pē ʻa e Siasí—ke tokoni ki he kau taki foʻoú ke ako honau ngaahi fatongiá. Koeʻuhí naʻe fakaʻau ke angamaheni ange ʻa e telefoni toʻotoʻó ʻi he koló, te ne tā pe text ki he kau mēmipa ʻo e koló ʻi he lolotonga e uiké ke fakahoko e pisinisi ʻo e koló, palani ha ngaahi ʻekitivitī, mo feau e ngaahi fiemaʻu ʻa hono Kāingalotú.
Naʻe kau ʻi he ʻū meʻa ne maʻu ʻe he koló mei he Siasí ha komipiuta mo ha ʻinitaneti. Naʻe faʻu ʻe he Siasí ha polokalama fakakomipiuta ne ui ko e Member and Leader Services ke tokoni ki he kau taki mo e kau kalake fakalotofonuá ke nau lekooti mo lipooti totonu mo malu e vahehongofulú, maʻulotú, mo e fakamatala kehé. Naʻe feangai ʻa Mākou mo e ʻū komipiutá mei heʻene aʻusia ʻi he kautaha fakatekinolosiá, pea naʻe vave ʻene ako e founga ki hono fakaʻaongaʻi ʻo e polokalamá. Naʻe hāhāmolofia ke ʻi ai ha komipiuta ʻi ʻEla Koka, ko ia naʻe fiemaʻu foki ke ne fakaʻaliʻali ki ha niʻihi ʻo e kau taki foʻoú ʻa e founga hono fakaʻaongaʻí. Ko e meʻa mālié, naʻe tataki kinautolu ʻe he Laumālié, pea ko e kau ako vēkeveke kinautolu naʻa nau fakaangaanga loto-fiemālie ki he tekinolosiá.
ʻI he ngaahi fakataha alēlea fakakoló, naʻe vahevahe tauʻatāina ʻe Mākou mo e toenga ʻo e kau takí ʻenau fakakaukau ki he founga ke tokoniʻi ai e kakai ʻoku nau tokangaʻí. Naʻe mahino ki he fakataha alēleá ʻa e fiemaʻu ke fakatupulaki ʻe he taha kotoa pē ʻi he koló ha fakamoʻoni kia Sīsū Kalaisí. ʻI he ngaahi fakataha mo e ngaahi ʻekitivitī ʻa e koló, naʻe lea maʻu pē ʻa Mākou mo e kau taki kehé ʻo kau kia Kalaisi, ʻi hono tanumaki ha ʻātakai ʻe ongoʻi ai ʻe he kau ʻaʻahí mo e kau mēmipa foʻoú ʻa ʻEne ʻofá pea haʻu kiate Ia.
Hili e māhina ʻe taha hono fokotuʻu e koló, naʻe fakamafola ʻe he Siasí ʻa e konifelenisi lahi fakavaeuataʻú ʻi he letioó, televīsoné, satelaité, mo e ʻinitanetí. Neongo naʻe aʻu e ngaahi sēnolo ko ʻení ki he ngaahi feituʻu lahi ʻi he māmaní, ka naʻe teʻeki maʻu ʻe he kolo ʻi ʻEla Koká ʻa e televīsone satelaité pe ko ha ʻinitaneti mālohi feʻunga ke nau mamata ai ʻi he konifelenisí. Ka naʻe hili ha taimi nounou, naʻe ʻave ʻe he ʻōfisi ʻo e Siasí ʻi Kuitó ki he koló ha DVD ʻo e konifelenisí naʻe hiki he lea faka-Sipeini.
ʻI he fakaʻamu ʻa Mākou mo e kau taki fakakolo kehé ke hangē pē ʻoku nau mamata hangatonu ʻi he konifelenisí, naʻa nau fakakaukau ai ke huluʻi e vitioó ʻi ha fakaʻosinga ʻo e uiké, ʻo vahevahe ia ʻo fakatatau mo e fakatahaʻangá. Naʻa nau fokotuʻu ha ʻū sea, televīsone, mo e ʻū meʻa fakaleʻolahi ʻi he falelotú pea ʻave ha ngaahi fakaafe makehe ki he mēmipa takitaha. Naʻe tokangaʻi ʻe Kalōtia hono talitali lelei e kakaí ʻi heʻenau aʻu maí.
Ko e ʻaho ʻo e ʻuluaki fakatahá, naʻe omi e Kāingalotú kuo nau teunga lotu ki he Sāpaté. Naʻe maheni e niʻihi mo e konifelenisi lahí, pea ko e niʻihi naʻe ʻikai ke nau ʻilo e meʻa ke ʻamanaki ki aí. Naʻe fakafonu e lokí ʻe he Laumālié ʻi he fakafanongo tokanga e tokotaha kotoa ki he ʻū meʻa fakaleʻolahí mo fiefia ʻi he hiva ʻa e Kuaea Tāpanekalé.
Ko e tokolahi ʻo e kau mēmipa foʻou angé naʻa nau mahalo naʻe siʻisiʻi pē ʻa e Siasí mo fakalotofonua pē. Ka ʻi heʻenau mamata ki he konifelenisí, naʻa nau vakai naʻa nau kau ki ha kautaha fakamāmani lahi. Naʻe ngāue fakataha ha lauimiliona ʻo e Kāingalotu kehe hangē ko kinautolú, ke paotoloaki e ngāue ʻa e ʻEikí.
ʻI he kamataʻanga ʻo e 2010, naʻe nofo ha kāingalotu ʻe toko 170,000 tupu ʻo e Siasí ʻi he ʻotu motu Kalipiané. ʻI he Lepupelika Tominikení, ne nofo ai ha vahe ua ʻe tolu ʻo e Kāingalotu ko ʻení, naʻe ʻi ai ha ngaahi siteiki ʻe hongofulu mā valu mo e misiona ʻe tolu. ʻI he 1998, naʻe fokotuʻu ʻe he Siasí ha Senitā Akoʻanga Fakafaifekau ʻi Sanitō Tomingikou, ko e kolomuʻa ʻo e Lepupelika Tominikení, ke teuteuʻi e kau faifekau ke ngāue ʻi he Kalipiané. Hili ha taʻu ʻe ua mei ai, ʻi Sepitema 2000, naʻe haʻu ʻa Palesiteni Hingikelī ki he koló ke fakatapui ʻa e Temipale Sanitō Tomingikoú, ko e fuofua fale ia ʻo e ʻEikí ʻi he feituʻú.
ʻI he tūʻuta ʻa e kau faifekau ʻo e Siasí ki he Lepupelika Tominikení ʻi he 1978, ne ofi he kāingalotu ʻe toko hongofulu mā ua ʻo e Siasí—ko e Kāingalotu pē ia ʻi he fonuá—naʻa nau feʻiloaki ʻi he malaʻe vakapuná. Ne kau ai ʻa Lutolofi mo Noemi Pouteni. Naʻe kau e ongo Poutení mo ha niʻihi ʻena fānaú ki he Siasí ʻi ha māhina ʻe tolu kimuʻa ʻo fakafou ʻi honau ngaahi kaungāmeʻa ko Sione mo Nanisē Lapoloí mo ʻEti mo Meseitesi ʻAmipelo. ʻI he ngaahi taʻu hoko mai aí, naʻe ngāue faivelenga ʻa Lutolofi mo Noemi ʻi he Siasí.
Naʻe mafola atu e ongoongolelei kuo fakafoki maí ki he ngaahi fonua Kalipiane kehe ʻi he founga tatau. ʻI Samaika, ko ha motu he fakahihifo ʻo e Lepupelika Tominikení, naʻe malangaʻi ʻe he kau faifekau ʻo e Siasí ʻa e ongoongoleleí talu mei he 1850 tupú. Ka naʻe ʻikai ke fokotuʻu ʻa e Siasí ai ka ne taʻeʻoua e mahuʻingaʻia ai ʻa e ongo papi ului he 1970 tupú ko Vikitā mo Vena Niuseni ne fāʻeleʻi ʻi Samaika. ʻI he ʻaho ʻe taha, naʻe maʻu ʻe Vikitā mo Vena ha Tohi ʻa Molomona meia Paula Simeli, ko ha kaungā ngāue ʻAmelika. Naʻá ne fakafeʻiloaki foki kinaua ki he filimi ʻa e Siasí ko e Man’s Search for Happiness, pea naʻe hanga ʻe hono pōpoakí, fakataha mo e sīpinga faka-Kalaisi ʻa Paulá, ʻo tākiekina ʻa Vikitā.
ʻI he ʻaho 20 ʻo Sānuali 1974, naʻe papitaiso ai ʻa e fāmili Niusení. Hili ha taʻu ʻe fā mei ai, ʻi hono fakaava ʻe he fakahā ʻa Palesiteni Sipenisā W. Kimipoló ʻa e matapā ki he fāmili Niusení mo ha kakai hako ʻAfilika ʻUliʻuli kehe ke nau maʻu e ngaahi tāpuaki kakato ʻo e lakanga fakataulaʻeikí, naʻe silaʻi ʻa e fāmilí ʻi he Temipale Sōlekí.
ʻI he taʻu tatau pē ko iá, ʻi he 1978, naʻe papitaiso ʻe ha tokotaha ʻAmelika Siasi ko Kuleki ʻIongi, ʻa hono ngaahi kaungāmeʻa ko Sione mo Sune Naimí ʻi Pāpatosi. Hili ha taʻu ʻe taha mei ai, naʻe fokotuʻu e fuofua kolo ʻi Pāpatosí pea hoko ʻa Sione ko e palesiteni fakakoló pea palesiteni Fineʻofa ʻa Sune. Kimui ange aí, naʻe hoko ʻa Pāpatosi ko e hetikuota ʻo e Misiona West Indies, pea naʻe mafola ʻa e ongoongoleleí mei ai ki Kulenata, Kuatalupe, Seni Lūsia, Mātiniki, Seni Viniseni, Kuiana Falanisē, Sini Māteni, mo e ngaahi founga kaungāʻapi kehe.
Lolotonga iá ʻi Haiti, naʻe fanongo ʻa ʻAlekisanitulei Mola ko ha tangata Haiti ne fāʻeleʻi ʻi Silei, ʻo kau ki he Siasí ʻi hano kāinga naʻá ne maʻu ha tatau ʻo e Tohi ʻa Molomoná mo ha tohi kehe ʻo e Siasí mei he kau faifekaú ʻi Folōlita. Hili hono lau ʻe ʻAlekisanitulei e fakamoʻoni ʻa e palōfita ko Siosefa Sāmitá, naʻá ne kole haʻane Tohi ʻa Molomona pea maʻu ha fakamoʻoni ki hono moʻoní. Koeʻuhí naʻe teʻeki aʻu e Siasí ki Haiti, naʻá ne puna ki Folōlita, ʻo talanoa mo e palesiteni fakamisioná ai, peá ne papitaiso ʻi Siulai 1977. Naʻá ne foki leva ki hono ʻapí ʻi Poteau Pilinisi pea akoʻi e ongoongoleleí ki he niʻihi kehé. Hili ha taʻu ʻe taha mei ai, naʻe ʻaʻahi e palesiteni fakamisioná ki Haiti peá ne fakahoko e papitaiso ʻo e toko uofulu mā ua ko e ngaahi kaungāmeʻa ʻo ʻAlekisanituleí.
Naʻe hokohoko atu e tupulaki ʻa e Siasí ʻi Haiti ʻi he ngaahi taʻu hoko mai aí, neongo e moveuveu fakasōsiale mo fakapolitikale naʻe faʻa hoko ʻi he fonuá. ʻI he fakaʻosinga ʻo e 2009, naʻe ʻi ai ha Kāingalotu ʻe tahamano onoafe ʻi he siteiki ʻe ua mo ha vahefonua ʻe ua. Naʻe ʻahiʻahiʻi ʻenau loto-vilitakí ʻi he ʻaho 12 Sānuali 2010, ʻi he luluʻi ʻe ha mofuike fakalilifu ʻa Haiti, ʻo fakaʻauha ai ha ngaahi ʻapi mo tāmateʻi ha kakai ʻe toko uakilu, kau ai ha Kāingalotu ʻo e Siasí ʻe toko fāngofulu mā ua.
ʻI he lulu ʻa e mofuiké, naʻe fakataha ʻa Solini Senitilasi mo ʻene pīsopé ʻi honau falelotu ʻi Poteau Pilinisí. Naʻe ngāue hono husepāniti ko ʻOlokení ʻi ha hōtele fakalotofonua. Naʻá na fakavave ki hona fale nofo totongí, ʻa ia naʻe tokangaʻi ai ʻe ha taha ʻena fānau iiki ʻe toko tolú. Naʻe holafa ʻa e falé.
Naʻe lotu ʻa ʻOlokeni ʻo pehē, “ʻE Tamai Hēvani, kapau ko Ho finangaló ia ke moʻui pē ā ha taha ʻo siʻema fānaú, kātaki ʻo tokoni mai.”
ʻI he houa ʻe hongofulu, naʻe kumi takai e kau fakahaofi moʻuí ʻi he fale holó. ʻI ha taimi ʻe taha, naʻa nau fanongo kia Kenisī ko e tamasiʻi lahi tahá naʻe taʻu nima, ʻokú ne hivaʻi e “Fānau au ʻa e ʻOtuá,” ko ʻene hiva manakó. Naʻe tataki ʻe hono leʻó e kau ngāué ke fakahaofi ia, ko hono ngaahi tokouá mo e tuofāfiné, mo ʻenau taʻahine toʻotamá.
ʻI he ngaahi uike siʻi hono hokó, naʻe tokoni ʻa e Siasí ki he kau taki fakalotofonuá mo e ngaahi kautaha tokoni ʻofa fakaetangatá ʻi hono ʻomi ha kau toketā, ʻū tēniti, meʻakai, ngaahi saliote teketeke, naunau fakafaitoʻo, mo ha ʻū meʻa mahuʻinga kehe. Naʻe fakaava foki e ngaahi falelotú ke ʻi ai ha nofoʻanga mo e hūfangaʻanga maʻá e kakai tokolahi ne mole honau ngaahi ʻapí ʻi he fakatamakí. Naʻe tokoni e Siasí kimui ange ki he kakaí ke kumi ha ngāue mo kamata ha ʻū pisinisi foʻou.
Hili hono fakahaofi ʻa Kenisī Senitilasí, naʻe ʻave ia ki Folōlita ke faitoʻo ha ngaahi lavea lalahi. Naʻe omi ai e kāingalotu fakalotofonua ʻo e Siasí ʻo tokoni ki he fāmili Senitilasí, ʻo ʻomi kiate kinautolu ha meʻavaʻinga, meʻakai, taipa, mo ha ʻū naunau kehe. Naʻe hoko ʻenau angaʻofá ke tangi ai ʻa ʻOlokeni.
Naʻá ne pehē, “ʻOku ou houngaʻia ʻaupito ki hoku siasí.”
ʻI Sepitema 2010, naʻe ofi ke ʻosi hono fakatoka ʻe he kakai ʻo Luputá ʻi he Lepupelika Fakatemokālati ʻo Kongokoú, ʻa e pamu ki heʻenau laine vai maʻa naʻe fakapaʻanga ʻe he Siasí. ʻI ha talanoa ʻa Uili Pinene ko e palesiteni fakavahefonuá mo ha faiongoongó, naʻá ne fakamamafaʻi ai e mahuʻinga ʻo e laine vaí.
Naʻá ne pehē, “ʻE lava ha tangata ʻo moʻui taʻe maʻu ha ʻuhila. Ka ko e siʻisiʻi ʻo e vai maʻá ko ha kavenga mafasia ia ʻoku meimei fuʻu faingataʻa ke fuesia.”
Tatau ai pē pe naʻe fakatokangaʻi ia ʻe he faiongoongó pe ʻikai, ka naʻe lea ʻa Uili mei ha aʻusia ʻi he kotoa ʻene moʻuí. ʻI heʻene hoko ko ha tokotaha ako ʻenisinia fakaʻuhilá, naʻe ʻikai ke ne teitei fie nofo ʻi Luputa, ko ha kolo naʻe ʻikai ha ʻuhila ai. Naʻe liliu ʻene ngaahi palaní pea naʻá ne sai pē—aʻu ʻo fakalakalaka—taʻe ʻi ai ha ʻuhila. Ka naʻá ne kātekina mo hono fāmilí, mo e fāmili kotoa pē ʻi he feituʻú, ʻa e ngaahi nunuʻa fakamamahi ʻo e ngaahi mahaki ʻoku tupu mei he vaí. Ke maluʻi kinautolu ʻi he lotú, naʻe aʻu ʻo nau feilaulau ke fakatau mai ha hina vai maʻa ki he sākalamēnití.
Ko ʻeni, naʻe toe siʻi pē ʻa e ngāue ke fakahokó, pea ʻamanaki ke liliu e moʻui ʻi Luputá. Talu e kamata ʻa e ngāué, naʻe vahe ki he kaungāʻapi kotoa pē takatakai ʻi he koló ha ngaahi ʻaho ke ngāue ai ʻi he laine vaí. ʻI he ngaahi ʻaho ko iá, naʻe haʻu pongipongia e ʻū loli mei he ADIR, ko e kautaha naʻa nau tokangaʻi e ngāué, ke uta ʻa e kau ngāue tokoní ʻo ʻave kinautolu ki he feituʻu ne fai ai e ngāué.
ʻI he hoko ʻa Uili ko e palesiteni fakavahefonuá, naʻá ne loto ke hoko ko ha taki faʻifaʻitakiʻanga. ʻI he ngaahi ʻaho naʻe vahe ai ki honau feituʻu kaungāʻapí ke ngāué, naʻá ne tuku ʻene ngāue nēsí pea kamata e kelí. Naʻe lau maile ʻa e ngaahi tafungofunga mo e teleʻa ʻi he vahaʻa ʻo Luputa mo e maʻuʻanga vai maʻá. Koeʻuhí naʻe tafe ʻa e vaí fakatatau ki he kalāvité, naʻe pau ke keli ʻe he kau ngāué ʻa e fakatafengá pea tanu feʻunga pē ʻa e pamú ke fakapapauʻi naʻe tafe lelei ʻa e vaí.
Naʻe keli nima ʻe Uili mo e kau ngāue tokoní ʻa e meʻa kotoa. Naʻe pau ke ʻinisi ʻe hongofulu mā valu e fālahi ʻo e fakatafengá pea fute ʻe tolu hono lolotó. ʻI he ngaahi feituʻu ʻe niʻihi, naʻe touʻone ʻa e kelekelé, pea naʻe vave ʻa e ngāué. ʻI he ngaahi feituʻu kehe, naʻe akaaka mo makamaka ʻa e kelekelé, ʻo mātuʻaki faingataʻa ʻaupito ʻa e ngāué. Naʻe lotu pē ʻa e kau ngāue tokoní ke ʻoua naʻa fakatuaiʻi ʻenau ngāué ʻe he vela ʻo e vaó mo e fanga ʻinisēkite naʻe uʻú. ʻI ha ʻaho leleí, te nau lava ʻo keli ha meimei fute ʻe nimangeau ʻo e fakatafengá.
Naʻe ngāue ʻa e Kāingalotu ʻi he Vahefonua Luputá ʻi ha ngaahi taimi ngāue makehe ʻo tānaki atu ki he ngāue angamaheni honau feituʻú. ʻI he ngaahi ʻaho ko iá, naʻe kau atu e kakai tangata ʻo e Siasí ki he kau ngāue tokoni tuʻupaú ʻi hono keli e fakatafengá, kae teuteuʻi ʻe he kau fefine mei he Fineʻofá ʻa e meʻatokoni maʻá e kau ngāué.
Naʻe tokoni e līʻoa ʻa e Kāingalotú ki he ngāué ke ako lahi ange ai ʻa e niʻihi kehé fekauʻaki mo ʻenau tuí. Naʻe vakai e kakai ʻi he feituʻú ki he Siasí ko ha kautaha naʻe ʻikai ngata pē ene tokanga ki hono kau mēmipá ka ki he komiunitií fakalūkufua foki.
ʻI he ʻosi ʻa e taki ʻo e laine vaí ʻi Nōvema 2010, naʻe omi ha kakai tokolahi ki Luputa ke mamata tonu ki hono tukuange mai ʻo e vaí. Naʻe fokotuʻu ha ngaahi fuʻu tangikē vai lalahi ʻi he koló ke tānaki ki ai ʻa e vai mei he ʻū pamu vaí. Ka naʻe fifili ha kakai ʻe niʻihi pe ʻe lava moʻoni e laine vaí ʻo ʻomi ha vai feʻunga ke fakafonu ʻaki e ʻū tangikeé. Naʻe veiveiua foki mo Uili.
Pea naʻe fakaava leva ʻa e taʻofiʻanga vaí, pea naʻe lava e tokotaha kotoa ʻo fanongo ki he tafe mai ʻa e vaí ki he ʻū tangikeé. Naʻe fiefia lahi ʻa e haʻofangá. Naʻe lava he taimí ni ha ngaahi sima vai iiki, kuo ʻosi ʻi ai mo hono meʻa kiiʻi, ʻo tufaki ha vai maʻa ki Luputa kotoa.
Ke fakaʻilongaʻi e ngāue kuo lavá, naʻe fakahoko ʻe he koló ha fakafiefia. Naʻe tataki mai ʻe he ngaahi fakafiefiá ha kakai ʻe tahamano nimaafe mei Luputa pea mo e ngaahi kolo kaungāʻapí. Naʻe kau ʻi he kau fakaafe fakalāngilangí ha kau fakafofonga fakapuleʻanga mo fakahaʻa, kau ʻōfisa ʻo e ADIR, pea mo ha mēmipa ʻo e kau palesitenisī ʻo e ʻĒlia ʻAfilika Tongahahake ʻo e Siasí. Naʻe tautau ʻi he taha ʻo e ngaahi tangikē vaí ha fuʻu fuka lahi kuo tohi lanu pulū mālohi ki ai ʻa e ngaahi lea:
FAKAMĀLŌ LAHI KI HE SIASÍ
FAKAMĀLŌ LAHI KI HE ADIR
KO E VAI MAʻÁ
ʻI he aʻu mai ʻa e kau fakaafé ʻo tangutu ʻi he fanga kiʻi palepale ne fokotuʻú, naʻe hivaʻi ʻe ha kuaea ʻo e Kāingalotu ʻo e Siasí ha ngaahi himi.
ʻI he maau pē ʻa e tokotaha kotoa, pea fakalongolongo hifo ʻa e haʻofangá, naʻe toʻo hake ʻe Uili ʻa e maiká peá ne lea ki he haʻofangá ko ha fakafofonga fakalotofonua ia ʻo e Siasí. Naʻá ne pehē, “Hangē pē ko hono fakahoko ʻe Sīsū ha ngaahi mana lahí, ko e ʻahó ni ko ha mana ia ʻa hono taki mai ʻa e vaí ki Luputá.” Naʻá ne talaange ki he haʻofangá naʻe fakapaʻanga ʻe he Siasí ʻa e laine vaí maʻá e koló fakalūkufua, peá ne tapou ki he tokotaha kotoa ke nau fakaʻaongaʻi lelei ia.
Pea ki ha taha pē naʻe fifili pe ko e hā e ʻuhinga naʻe mahuʻingaʻia pehē ai ʻa e Siasí ʻi ha feituʻu hangē ko Luputá, naʻá ne ʻoange ha tali faingofua.
Naʻá ne pehē “Ko e fānau kotoa kitautolu ʻa ʻetau Tamai Hēvaní. Kuo pau ke tau failelei ki he tokotaha kotoa pē.”