TALA FAKAʻAPAʻAPA KIA PALESITENI HINCKLEY

Naʻá ne maʻu ha loto fakatamaioʻeiki mo ha poto fakatakimuʻa.

Naʻe hanga ʻe he ongoongo ʻo e pekia ʻa Palesiteni Kōtoni B. Hingikelií, ʻo langaki hano fakahoko ʻe he kakaí ha ngaahi tohi fiekaungā-mamahi mo e fakalāngilangi lahi mei ha ngaahi feituʻu kehekehe ʻo e māmaní. ʻOku ʻoatu heni ha niʻihi ʻo e ngaahi pōpoaki ʻofa ne ʻomi ʻo kau kiate iá.

Palesiteni George W. Bush, ʻIunaiteti Siteiti ʻo ʻAmeliká: ʻOkú ma ongoʻi loto-mamahi moʻoni mo Lola ʻi he pekia ko ia homa kaumeʻa ko Kōtoni B. Hingikelií… . [Naʻá ne] fakahaaʻi ha loto ʻo ha tamaioʻeiki mo ha poto fakatakimuʻa… . Ko ha lāngilangi ia moʻoku ke u foaki kiate ia ʻa e Mētali ʻo e Tauʻatāiná [Medal of Freedom], ʻa e pale fakalāngilangi māʻolunga taha ʻo hotau fonuá ʻe lava ʻo foaki ki he kakai ʻo e fonuá, ke fakaʻilongaʻi ʻaki e ngaahi taʻu lahi kuó ne līʻoa ai ʻene moʻuí koeʻuhí ko e kakaí… . ʻOku ʻoatu homa ʻofa pea ʻokú ma lotua siʻene fānau ʻe toko nimá mo e toenga ʻo e fāmili Hingikelií.

Pīsope Carolyn Tanner Irish, Taiosisi ʻo e Siasi ʻEpisikopō ʻo ʻIutaá: ʻOku faingataʻa ke u fakakaukau atu ki he māmaní mo hono ngaahi feohiʻanga fakalotú, ʻi he ʻikai ke ne ʻi aí. ʻI he ngaahi taʻu lahi ko ia kuó ne tataki ai e Siasí, kuó ne hoko ai ko e uho mo e ʻelito ʻo e Siasí ki ha laui miliona—ʻo tatau pē ki he kāingalotú mo e niʻihi teʻeki Siasí. ʻOku ou kau fakataha mo ha kakai tokolahi ʻi hono ueʻi kimautolu ʻe heʻene fakapotopotó, leʻo ʻofá mo ʻene poto he tūkuhuá.

Jeanetta Williams, Palesiteni ʻo e NAACP ʻo ʻIutā, Nevata mo ʻAitahoó: ʻOku ou fie fakahaaʻi atu ha ongoʻi fie kaungā-mamahi moʻoni ki he fāmili ʻo Palesiteni Hingikelií pea mo e kāingalotu ʻo e Siasí. Naʻá ku ʻofa ʻia Palesiteni Hingikelī. Naʻá ku maheni mo ia pea ko e moʻoni te u manatu ʻofa ki hono leʻó mo ʻene tokanga ki he tukui koló.

Larry King, Larry King Live, CNN: Naʻe ʻikai hoko pē ʻa Palesiteni Hingikelī ko e taki ʻo ha siasi ka naʻá ne hoko ko ha kaumeʻa maʻongoʻonga. ʻOku toko siʻi ha kakai kuó u feʻiloaki mo ia te nau maʻu ʻene loto vilitakí, mahinó pe fakapotopotó. ʻE manatua moʻoni ia.

Palesiteni Olafur Ragnar Grimsson, ʻAisileni: ʻOku hoko e pekia ʻa Palesiteni Kōtoni B. Hingikelií, ko ha mole lahi ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní pea mo e māmaní kotoa, he ko e mole atu ia ʻo ha takimuʻa maʻongoʻonga mo poto, ko ha tangata ʻo e vīsione mo lototoʻa. Kuo mole mei he kakai ʻo ʻAisilení hanau kaumeʻa lelei pea ʻoku ou fie fakahaaʻi atu ki he Siasi ʻo Sīsū Kalaisí ʻemau ongoʻi fie kaungā-mamahi moʻoni.

Dr. Hussein Hassouna, ʻAmipasitoa ʻo e Ngaahi Fonua Fengāueʻaki ʻo ʻAlepeá ki he ʻIunaiteti Siteití: Ko ha ongoongo fakamamahi ia ʻeku ongona e pekia ʻa Palesiteni Kōtoni B. Hingikelī, ko e Palesiteni ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻOku ou kei manatuʻi pē ʻeku ʻaʻahi ki Sōleki Siti he ngaahi taʻu siʻi kuo ʻosí. Ne u ofo ʻi heʻene mohu ʻiló, potó mo ʻene tokanga ki he ngaahi meʻa ʻoku hoko ʻi he māmaní.

Zamira Sydykova, ʻAmipasitoa ʻo e Lepapulika Kiekisí ki he ʻIunaiteti Siteití mo Kānatá: Naʻe hoko ʻa [Kōtoni B.] Hingikelī ko ha tokotaha … maʻongoʻonga naʻá ne ʻai ke toe ʻilolahi ange ʻa e māmaní ki he tokāteline faka-Māmongá peá ne taukaveʻi ʻa e anga fakaʻapaʻapá mo e feveitokaiʻaki ʻa e kakai he feituʻu kotoa pē.

Yuval Rotem, ʻAmipasitoa ʻa ʻIsileli ʻi ʻAositelēliá: ʻOku ou kau fakataha mo ha laui miliona ʻi he māmaní ʻi he fakaʻapaʻapa mo ongoʻi fie kaungā-mamahi ʻi he pekia ʻa e tangata lotoʻofa mo angaʻofa ko ʻení… . Naʻá ku lau ko Palesiteni Hingikelií ko ha takimuʻa lototoʻa naʻá ne malava ʻo ʻiloʻi pea mahino kiate ia e uho ʻo ha faʻahinga palopalema. ʻOku hounga moʻoni kiate au ʻene feinga lahi ke toe vāofi ange ʻa e kakai Kalisitiané mo e kau Siú.

Ke mamata pe fanongo ki he ngaahi lea mei he meʻafakaʻeiki ʻo Palesiteni Kōtoni B. Hingikelií, vakai ki he www.lds.org/ presidenthinckleymemorial.

FAKALĀNGILANGIʻI ʻE HE TOʻU TUPÚ ʻA PALESITENI HINGIKELĪ

Ne hanga ʻe he ngaahi telefoni toʻotoʻó ʻo fakamafola atu ki he funga ʻo e māmaní ʻa e ongoongo kuo pekia hotau palōfita ʻofeina ko Kōtoni B. Hingikelií, ʻi he efiafi Sāpate, ko hono 27 ʻo Sānualí. Ne hili pē ha ngaahi houa siʻi kuo ʻoatu mo ha ngaahi pōpoaki tohi ʻa e toʻu tupú ʻi he telefoni toʻotoʻó, ʻi heʻenau fepoupouʻaki ke nau tui ki he akó honau vala lelei ki he Sāpaté kae ʻikai ko honau vala angamahení ʻi he ʻaho hono hokó, ko e fakahaaʻi ʻo ha fakalāngilangi kia Palesiteni Hingikelī.

Ne ʻohovale ha faʻē ʻe taha ʻi Mesa ʻi ʻAlesoná ʻi he ʻā pongipongia ʻene tama fefiné ʻo haiane hano piva ke tui ki he akó he Mōnité. Naʻá ne pehē, hili hono maʻu ʻe heʻene tama ko Makenisií ha ngaahi tohi ʻi he telefoni toʻotoʻó, naʻá ne fakakaukau leva mo hono kaungāmeʻá ke nau tui honau vala lelei tahá ki he akó, ko e fakaʻapaʻapa ki he palōfitá. Naʻe fai pehē mo ha toko laui afe kehe.

Naʻe fakamatalaʻi ʻe Sēmisi Peesi ko ha mokopuna tangata ʻo Palesiteni Hingikelī, ʻa ʻene ʻilo ki he ʻuhinga ne tui ai ʻe ha toʻu tupu tokolahi honau vala leleí ki he akó, ʻo ne pehē: “Naʻá ne ʻofa lahi ʻi he toʻu tupú pea naʻa nau ongoʻi ʻene ʻofá. Naʻa nau fakahaaʻi ia ʻaki ʻenau tōʻongá.”

Naʻe hā ʻa e laumālie tatau pē ʻi he hala puleʻangá, mei hono malangaʻí ki he faʻitoká, ʻi he taʻataʻalo ʻa e toʻu tupú mo e kakai lalahí ʻaki ha ngaahi holoholo hinehina mo ha ngaahi tokotoko, ko e ngalutuku ʻenau fakamāvae mo e palōfitá.