Ko e Tui ʻa e Fāmilí
ʻOku kei kau pē he ʻahó ni ʻa e ngaahi falelotu kuo laui senituli honau motuʻá, ʻi he niʻihi ʻo e ngaahi fale māʻolunga taha ʻi ʻĪtalí. ʻOku tala ʻe he ngaahi fale motuʻa kuo holo mo maumaú ʻa e moʻui ʻa e ngaahi sosaieti ʻi he kuo hilí, lolotonga ko iá ʻoku tuʻu fakaʻotu ʻi hono ngaahi hala pikopikó ʻa e ngaahi fale mei he kuonga lotolotó. ʻOku tapui ʻe he lao fekauʻaki mo e langá ʻa hono langa ʻo e ngaahi fale māʻolunga fakaonopōní, pea ʻoku maluʻi leva ʻe he laó ke ʻoua naʻa fuʻu lahi ʻa e ngaahi langa fakalakalaka ʻi he ngaahi feituʻu ʻuta ʻo Tūsoní. ʻOku tupu ʻeni mei he fie maʻu ʻe he kakai ʻo ʻĪtalí ke fakatolonga honau hisitōliá. Kapau naʻe toe foki mai ki māmani he ʻahó ni ʻa e tangata ʻiloa ko ia he Fakaakeake Foʻoú ko Maikoloʻenisilō, ʻoku fakaʻamu ʻa e kakai ʻĪtalí ʻe faingofua pe haʻane ʻiloʻi ʻa hono fonua tupuʻá.
ʻOku manako e kāingalotu ʻi ʻĪtalí ke fakatolonga ha meʻa ʻoku mahulu ange ia ʻi he ngaahi falé pē mo e ʻātakaí. ʻOku nau fakataumuʻa ke fakatolonga mo e tuí ʻi he ngaahi toʻu tangata kotoa pē. Hangē ko e kāingalotu tokolahi ʻo e Siasí ʻi he māmaní, ʻoku hoko e Kāingalotu ʻĪtalí ko ha kau paionia ʻi heʻenau faʻufaʻu ha ngaahi fāmili ʻi ha ngaahi toʻu tangata lahi ʻa ia kuo fakafehokotaki kinautolu ʻi he ngaahi fuakava ʻo e ongoongoleleí. ʻOku fehangahangai e kāingalotu ko ʻeni ʻo e Siasí mo ha ngaahi tala tukufakaholo motuʻa pea mo ha ngaahi meʻa fakamāmani hā mai ʻi honau ʻulungāanga fakafonuá, ka ʻoku nau hanga taha pē kinautolu ki he Fakamoʻuí mo feinga ke langa hake ha tui ʻa ia ʻe tupu ʻo moʻui ʻi he loto ʻo honau hakó.
Ko Hono Fakaʻapaʻapaʻi ʻo e Fāmilí
Ko e taha ʻo e ngaahi fuofua konga ʻi hono langa hake ʻo e tui ʻa e fāmilí ko e lototoʻa ke kamata ha fāmilí. Naʻe faikaumeʻa ʻa Maika mo Lafaela Felini mei he Kolo ko Filanisi Uá ʻi he Vahefonua Fololeni ʻĪtalí ki muʻa peá na toki ō ʻo ngāue fakafaifekaú. Naʻe ʻikai fuoloa mei he ʻosi ʻena ngāué kuó na maʻu ha ongo ʻi he temipalé ʻoku totonu ke vavé ni pē haʻana mali. ʻOku pehē ʻe Maika, “ʻI ʻĪtali, ʻoku faʻa lahi angē pē ke toki mali ha taha ʻi hono taʻu 30.” Ne fehuʻi ange ʻe hona ngaahi kaumeʻá mo e kāingá, “Ko e hā ʻokú mo mali kei siʻi aí?
ʻOku fakamālō ʻa e ongomeʻá ni ki he tokoni ʻa e mātuʻa ʻa Maika, ko ʻAna mo Puluno, ʻo na mahuʻingaʻia ai ʻi he malí. ʻI he kau ʻa ʻAna ki he Siasí ʻi he 1968, ne tokosiʻi pē e kāingalotu ʻo e Siasí ʻi ʻĪtalí. Hili ʻene lotua e fili naʻá ne faí, naʻá ne mali leva mo Puluno, ʻa ia ko ha tangata naʻá ne fakaʻapaʻapaʻi e ngaahi meʻa naʻe tui ki ai ʻa ʻAná peá ne fakangofua pē ia ke ne akoʻi e ongoongoleleí ki heʻena fānaú. ʻOku pehē ʻe Puluno, “Ne ʻikai ha taimi te u hohaʻa ai ʻi heʻeku mali mo ha tokotaha Māmongá koeʻuhí he naʻá ma fefakaʻapaʻapaʻaki mo ʻAna.”
Neongo ne mamahi e loto ʻo ʻAná ʻi he ʻikai te ne lava ke foaki ki heʻene fānaú ʻa e ngaahi tāpuaki kotoa ʻo ha fāmili taʻengata, ka ʻokú ne pehē, “Ne u ʻiloʻi ko ha tangata lelei hoku husepānití pea ʻe faifai pē ʻo iku lelei ʻa e meʻa hono kotoa.” Ka ʻi he taimi ko ʻení, naʻá ne akoʻi ʻene ongo tamaiki tangatá, ʻa Maika mo ʻAlesio, ke na fokotuʻu ʻa e Fakamoʻuí ko e uho ia ʻo ʻena moʻuí peá na mahuʻingaʻia ʻi he fāmilí.
Naʻe faifai pē pea kau ʻa Puluno ki he Siasí. ʻI he ʻahó ni, ko e palesiteni ia ʻo e Kolo ko Filanisi Uá. Kae lolotonga ʻa e taʻu ko ia ʻe 29 naʻe ʻikai te ne fie kau ai ki he Siasí, naʻá na kei ngāue pē mo ʻAna ke fiefia ʻena nofo-malí. Naʻe hoko ʻa e feʻofoʻofani ʻi heʻena fetuʻutakí ko ha meʻa ke ne tākiekina lelei ʻena fānaú mo hona ʻofefine ʻi he fonó. ʻOku pehē ʻe Lafaela, “ʻI he fuofua taimi pē ne u ʻi honau ʻapí aí, naʻe mahino moʻoni kiate au ʻa e lelei ʻo ʻenau moʻui fakafāmilí. ʻOku ʻikai te na fekīhiaki. ʻOkú na nonga pē mo feangalelei ʻaki. Naʻá ku fie maʻu moʻoni ha fāmili pehē.”
Naʻe fie mali foki ʻa Lafaela ʻi he temipalé. ʻOkú ne pehē, “Ko ha taumuʻa lelei ia ke te mali ʻi he temipalé,” neongo ʻe faingataʻa ange hano fakahoko ʻi he ngaahi fonua ʻoku tokosiʻi ai e kāingalotu ʻo e Siasí. “ʻOku feinga ʻa Sētane ke fakalotoʻi kitautolu ke tau fai e ngaahi fili ʻoku halá, ka ʻi he taimi ʻoku tau fokotuʻu ai ʻi hotau ʻatamaí ha taumuʻa ʻoku lelei, ʻe tokoniʻi kitautolu ʻe he Tamai Hēvaní ke tau lavaʻi ʻa e meʻa kotoa pē koeʻuhí ka tau aʻusia ʻa e taumuʻa ko iá.” ʻOkú ne fakamālō ʻi he faingofua ange ke feʻiloaki mo e Kāingalotu ʻo e Siasí he taimí ni, kae ʻikai hangē ko e toʻu tangata ne ʻi ai ʻene mātuʻá. ʻOkú ne fiefia foki ʻi hono faitāpuekina ia ʻe he ʻEikí ʻaki ʻa e faingamālie ke ne mali ai, “ʻo ʻikai mo ha mēmipa pē ʻo e Siasí ka ko ha taha moʻui taau ʻokú ne maʻu e lakanga fakataulaʻeikí.”
Naʻe fakahā ʻe Lafaela mo Maika ʻena houngaʻiá ki he ʻEikí ʻaki ʻena fai ha ngaahi feilaulau ke na lava ai ʻo mali ʻo fakatatau mo e taimi ne fakahinohino kinaua ʻe he Laumālié ki aí. Naʻá na palani ha kiʻi fakafiefia siʻisiʻi pē ʻo ʻikai ha fakamole lahi ki ai, pea naʻe fakakaukau ʻa Maika ke kiʻi fakatoloi atu hono fakaʻosi ʻene ako he ʻunivēsití. ʻOkú ne pehē ʻe ia, “ʻOku fuʻu mamafa e meʻa kotoa pē heni ʻo faingataʻa ai ke lahi ʻa e meʻa te te lava ʻo fai ʻi ha taimi pē ʻe taha—ke ako, ngāue, mo tauhi ha fāmili.” Tupu mei he faingataʻaʻia fakapaʻangá ʻoku feinga ai ʻa e kakai ʻĪtali tokolahi ke fakaʻosi ʻenau akó pea ʻi ai mo haʻanau ngāue maʻuʻanga paʻanga pea nau toki mali, ka ʻoku pehē ʻe Maika “ko e holi taupotu ʻa homa lotó ke kamata ha fāmili.” Naʻá ne ʻiloʻi ko e meʻa pē ʻe tolu naʻe mātuʻaki mahuʻinga kae lava ke fakahoko ʻení: ko ha ngāue, ha feituʻu ke nofo ai, pea mo e tui ke laka pē ki muʻa. ʻOku pehē ʻe Maika ko e kamataʻangá “naʻe ʻikai te u maʻu ha ngāue naʻe fuʻu lelei fēfē, ka naʻe feʻunga pē. Ko e taimi pē ʻoku pau ke ke fai ai ha fili faingataʻa, fai leva ia. Ngāueʻaki pē ʻa e tuí pea fai ho lelei tahá,” ʻo ke falala ʻe maʻu ʻa e ngaahi tāpuaki ko ia ʻokú ke fie maʻú. Naʻe faifai pē peá ne monūʻia ʻo maʻu ha ngāue naʻe totongi lelei ange ʻi he tafaʻaki fakataki-mamatá, mālō mo e ngaahi lea muli ko ia naʻá ne ako ʻi heʻene ngāue fakafaifekaú. Naʻe ʻi ai foki mo ʻene fakamoʻoni ki he totongi vahehongofulú he naʻe ʻikai pē ha taimi ia ʻe faingataʻaʻia ai hono kiʻi fāmilí.
ʻOku mahuʻingaʻia ʻa Maika ʻi he faleʻi ʻa e kau taki ʻo e Siasí ke akó, pea ʻokú ne palani ke maʻu hono mataʻitohí ʻi he taimi ʻe kiʻi lalahi hake ai ʻene fānaú. Ka ko e taimi ní, “ʻOku ou ongoʻi hono fakahā kiate au ʻe he Laumālié ʻoku mahuʻinga ke u fakataha mo hoku fāmilí. Pea kuo teʻeki ai ke u loto-mamahi ʻi ha meʻa kuo hoko ʻo kamata pē mei he taimi ne fāʻeleʻi mai ai ʻeku ongo kiʻi tamaiki ko Sūlia mo Lolenisoú.”
ʻOku pehē ʻe Lafaela, “ʻOku ʻikai lahi ʻema paʻangá ka ʻokú ma fiefia.” ʻOkú na fakamālō ʻi heʻena kau ʻi he palani ʻo e fiefiá mo akoʻi hono ngaahi moʻoní ki he toʻu tangata hoko haké—ʻa ia ko e toʻu tangata tolu ia ʻi he fāmilí ke ne maʻu ʻa e ngaahi tāpuaki ʻo e ongoongoleleí.
Fāitaha ʻi he Taumuʻá
ʻOku pehē ʻe Pita Sonalia ʻo e Siteiki Loma ʻĪtalí ʻe lava ke hoko ʻa e fāitaha fakalaumālié ko ha meʻa mahuʻinga ʻi hono langa hake ʻo e tui fakafāmilí. “ʻE lava ke hoko ʻa e fāitaha ʻi he taumuʻá ko ha maʻuʻanga ivi maʻá e ngaahi fāmili kotoa pē,” ka ʻoku hoko moʻoni ia ko ha tāpuaki ʻi he taimi ko ia ʻoku “ʻunu fakataha ai [ʻa e taumuʻa ko iá] kia Sīsū Kalaisi.” Ko e taumuʻa mahuʻinga taha ʻeni hono fāmilí.
Naʻe ʻikai ke faʻa fakamuʻomuʻa maʻu pē ʻe Pita e ngaahi meʻa mahuʻinga peheé. ʻI hono taʻu 15, naʻá ne mavahe ai mei he Siasí pea ʻikai ke ne toe fakakaukau ki ai, ʻo ne toki manatuʻi pē ia ʻi he taimi naʻá ne hoko ai ko ha tamaí pea meimei mālōlō ʻa ʻene tangataʻeikí ʻi haʻane pā-kalavá. Naʻe hanga ʻe he ngaahi meʻa ko ʻení ʻo fakafoki ʻene manatú ki he ngaahi akonaki ko ia ʻo e ongoongoleleí naʻá ne ako heʻene kei siʻí. ʻOkú ne pehē, “Ne u ʻiloʻi lelei pē kuo pau ke u fakatomala pea fokotuʻutuʻu lelei ʻeku moʻuí.” Naʻá ne ʻiloʻi foki ʻe uesia hono fāmilí ʻe ha “liliu mahuʻinga mo faingataʻa pehē.” Kuo vete ʻene ongomātuʻá, pea ko e konga e ʻuhinga ne hoko aí ko e ngaahi faikehekehe ʻi heʻena tui fakalotú, pea naʻá ne loto ai ke fāitaha hono fāmili ʻoʻoná.
Ne tupu hake e uaifi ʻo Pitá, ʻa Keila, ʻi ha tui fakalotu kehe pea naʻá ne ʻalu ia ki he lotú he Sāpate kotoa pē ʻi heʻene kei siʻí. ʻOku pehē ʻe Keila, “Ka ko e taimi ne u foki ai ki ʻapí kuo toe lahi ange ʻeku puputuʻú.” Kiate ia, ko e tui fakalotú ko ha meʻa tukufakaholo pē kae ʻikai ko ha meʻa ke ne tataki ʻene moʻuí. Naʻe fie maʻu ʻe Keila ia ha meʻa lahi ange ai. ʻOkú ne pehē, “Ne u ongoʻi ha holi mālohi ʻi hoku lotó ke u lotu pē ʻiate au ki he Tamai Hēvaní, ʻo ngāueʻaki ʻeku lea pē ʻaʻaku” kae ʻikai ko ha ngaahi lotu kuo ʻosi hiki. Ne teuteuʻi ia ʻe heʻene fetuʻutaki mo e ʻEikí ʻi he lotu ʻaki hono lotó, ke ne tali ʻa e ongoongolelei kuo toe fakafoki maí ʻi he taimi ne foki ai ʻa Pita ʻo fai mālohi ʻi he Siasí.
Kuo hoko ʻeni ʻa Pita mo Keila ko ha mātuʻa ʻokú na fāitaha ʻi he tuí ʻo na feinga leva ke teuteuʻi hona ongo foha ko ʻIlāliō mo Matiá ke na matuʻuaki e ʻahiʻahí—ʻo kamata pē he taimí ni lolotonga ʻena kei īkí. ʻOku pehē ʻe Keila, “ʻOku mau lau folofola he efiafi kotoa pē mo fai ʻemau efiafi fakafāmili ʻi ʻapí. ʻOku fiefia homa ongo fohá ke kau ki ai. ʻOku mau ō ki he lotú. ʻOku mau lotu fakataha. ʻOkú ma ō ki he temipalé. ʻOku ʻikai ko ha meʻa faingofua kia Pita mo Keila ke na ō maʻu pē ki he temipalé he ko e temipale ofi taha kiate kinauá ʻoku ʻi Suisalani ia mo Sipeini.
ʻOku toe pehē ʻe Pita, “ʻOkú ma feinga ke lau ʻa e mōmeniti kotoa pē ko ha faingamālie ia ke akonaki ai. ʻI he tuʻunga ko ʻeni ʻo e moʻuí ʻoku ʻi ai homa ongo kiʻi fohá, ʻokú na lolotonga ako ke talangofua ki heʻena mātuʻá.” ʻOku ʻamanaki ʻa Pita ʻe tokoni ʻeni ke na ako ai ke talangofua ki he Tamai Hēvaní, ʻo fakateungaʻaki kinaua ʻa e mālohi mo e fakamoʻoni ʻe fie maʻu ke na moʻui faivelenga ai ʻi he ngaahi taʻu ʻo ʻena kei talavoú pea hokohoko atu. ʻOkú ne ʻiloʻi—pea fie maʻu ke ʻiloʻi ʻe heʻene fānaú—ʻoku toki maʻu pē ʻa e fiefia ʻoku tolongá ʻi he talangofua ki he ʻOtuá.
Naʻe ʻilo ʻa ʻAtelea Lonitineli mei he Siteiki Loma ʻĪtalí ki he ongoongoleleí hili e mālōlō ʻene tamaí ʻo ne liliu ʻene moʻuí, ʻo hangē pē ko Pitá. ʻOkú ne pehē, “Naʻe mahino kiate au naʻe ʻikai ko e ngataʻangá ia.” Naʻá ne ongoʻi kuo pau pē ʻoku ʻi ai ha moʻui hili ʻa faʻitoka pea ʻi ai mo e taumuʻa ki he moʻuí mo e maté. Naʻe ʻi ai ʻene ʻilo ki he Siasí ʻi he taimi ne papitaiso ai hono tuofāfiné ʻi he taʻu ʻe 15 kuo hilí. ʻI he mālōlō pē ʻene tamaí naʻá ne fekumi leva ki he kau faifekaú pea ʻosi pē ha ʻaho ʻe 15 mei ai naʻe papitaiso.
Naʻá ne maʻu hono tāpuaki fakapēteliaké hili pē ha taimi nounou mei ai. Naʻe talaʻofa ange ʻa e ʻEikí kiate ia ʻe maʻu hano hoa ki he taʻengatá. ʻOkú ne pehē, “Ne u lotu lahi lolotonga ʻeku fekumi kiate iá.” Naʻá ne fie maʻu ha uaifi te na maʻu ha taumuʻa fakalaumālie tataú ʻo ne fakangata ai ʻa hono kaumeʻa mo ha taʻahine naʻá na ʻosi fakamaʻu ke mali ko e ʻikai ke loto e taʻahiné ke silaʻi kinaua ʻi he temipalé. Naʻá ne pehē, “Ne u fai e meʻa kotoa pē ne u lavá ke u mateuteu ki he mōmeniti te u fetaulaki ai mo hoku uaifí.” ʻI ha tali ki ha taha ʻo ʻene ngaahi lotú, naʻe ongoʻi ʻe ʻAtelea ʻe ʻi ai e ʻaho ʻe ʻi ai hano foha. Ne tokoniʻi ai ia ke ne kātaki pē ʻo aʻu ki heʻena toki fetaulaki mo Malielá.
Ne ʻilo ʻe Maliela ki he ongoongoleleí ʻi Kolomupia ʻi hono taʻu 11. Naʻá ne ʻaʻahi ki ʻĪtali hili haʻane ngāue fakafaifekau ʻi hono fonuá pē. Naʻá ne ʻohovale—mo kiʻi ongoʻi faingataʻaʻia foki—ʻi heʻene ongoʻi naʻe ueʻi ia ʻe he Laumālié ke ne nofo ʻaupito aí. ʻOkú ne pehē, “Naʻe lele lelei e meʻa kotoa pē ʻi Kolomupia. Naʻe ʻi ai ʻeku ngāue maʻuʻanga moʻui. Ne u ngāue ʻi he Siasí. Ne u maʻu ha faingamālie ke u ako. Ka ne u ongoʻi ʻi hoku lotó naʻe ʻi ai e taumuʻa ne u ʻi heni aí, pea ko e fonua ʻeni naʻe ʻi ai hoku fatongiá.”
ʻOku fakamālō ʻa ʻAtelea koeʻuhí ko e ueʻi ko iá. Naʻá na fetaulaki mo Maliela hili ha taʻu ʻe ua mei hono papiaisó, pea ko e ʻaho ní ʻokú na fiefia ʻi he faʻahinga nofo-mali ne na tatali ki aí—ke silaʻi kinaua he temipalé, peá na maʻu ʻa e tui tatau. ʻOku kei hokohoko atu pē ʻena langa hake ʻa e uouangatahá ʻaki “ʻa e toe lahi ange ʻa e taimi ʻokú na fakataha aí, hangē ko haʻana lue lalo pē ʻo ʻeva.”
ʻOku mahuʻinga ʻaupito foki mo e efiafi fakafāmili ʻi ʻapí. ʻOku pehē ʻe ʻAtelea, “Naʻe kau kotoa homau fāmilí ki he papitaiso ʻo homa fohá.” Ne lau māhina ʻenau fakaʻaongaʻi ʻa e efiafi fakafāmili ʻi ʻapí ki hono ako e founga ke nau teuteu ai ki he papitaisó mo e hilifakinimá pea mo “ako e ngaahi tefitoʻi moʻoni ʻe tali ʻe Tanielá. Ne mau kau kātoa, pea naʻa mau ongoʻi kuo mau ʻosi mateuteu lelei ki hono papitaisó.” ʻOku kau maʻu pē ʻa e fānaú ʻi he taimi ʻoku fai ai ʻa e efiafi fakafāmili ʻi ʻapí. ʻOku malimali ʻa ʻAtelea mo ne pehē, “ʻOku tataki e hivá ʻe heʻema taʻahine ko Valenitiná. ʻOku poto ʻaupito he tā hivá.” ʻOku fili ʻe Taniela ʻa e ʻū himí pea tokoni ki hono teuteu e lēsoní he taimi ʻe niʻihi. “ʻOku hoko ʻa e efiafi Mōnite kotoa pē ko ha taimi fakaʻofoʻofa moʻoni kiate kinautolu kotoa ʻi homau fāmilí.” ʻOku hanga ʻe he ngaahi meʻa pehení ʻo fakamālohia ʻa e fakavaʻe fakalaumālie ke langa ai ʻa ʻena fānaú mo e makapuná.
Ko e Moʻui Fiefiá
ʻOku pehē ʻe Lolenisō Maliani ʻo e Kolo ko Pisá ʻi he Vahefonua Fololeni ʻĪtalí, ko e meʻa hono tolu ke langa hake ʻaki e tui ʻa e fāmilí ko e moʻui fiefiá. ʻOku tokoni ʻa Lolenisō ʻi he kau palesitenisī fakavahefonuá, pea ʻoku nofo pē ʻa hono uaifí ko ʻIlalia ʻi ʻapi peá ne ngāue foki ʻi he Kau Finemuí. ʻOku lahi ʻena ngāue ke faí, pea okú na feinga pē ke fakahoko ia ʻi he fofonga malimali. ʻOkú na tui ka fotu ki tuʻa ʻena fiefiá, ʻe lava ke tokoni ia ki hono faʻu ʻo e ʻulungāanga ʻo e fānaú fekauʻaki mo e ongoongoleleí. ʻOku pehē ʻe Lolenisō, “ʻI he taimi ʻokú ma fakahoko ai ha meʻa maʻá e Siasí, ʻokú ma fakaʻaliʻali ha faʻifaʻitakiʻanga ʻoku leleí ʻaki ʻa e ʻikai ke ma fakaʻasi ʻokú ma helaʻia pea lelei foki mo ʻema tōʻongá. ʻE lava pē ke tala ʻe he fānaú kapau ʻokú ke fai ha meʻa ʻi he loto fiefia pe ko haʻo fakahoko pē ia koeʻuhí ko ha fatongia.”
ʻOku pehē ʻe ʻIlalia, “ʻI he ʻaho kotoa pē ʻoku ou fakakaukau lahi ai ki ha founga ke tō ai ʻa e tuí ʻi he loto ʻo ʻeku fānaú.” ʻOkú ne ʻamanaki pē ʻe fakaʻaliʻali ʻe heʻene ʻofá mo e tokangá ki heʻene ongo tamaiki ko Sioeli mo Tēvitá, ʻa e fiefia ʻoku maʻu ʻi he ngaahi fāmilí, pea mo e mahuʻinga ʻo e ngaahi fetuʻutaki fakafāmilí ʻo mahulu ange ia ʻi he paʻangá. ʻOkú ne pehē, “ʻOku kau ʻi he ngaahi mālohi ʻoku tuʻu fakamanamana ki he fāmilí ʻi ʻĪtalí ʻa e ʻikai ke fie mali e kakaí pe ʻikai te nau fie maʻu ke tokolahi ange ʻenau fānaú he toko tahá koeʻuhí kae lava ʻo totongi ha ngaahi faingamālie lahi ange maʻa ʻenau fānaú. ʻOkú ne talamai pē ʻoku lahi ange e koloa ia ʻoku maʻu ʻe he fānau kehé ʻi heʻene fānaú, “ka ʻoku ʻikai ke mahuʻinga e ngaahi meʻa ia ko ʻení” ʻi he taimi ʻokú ne fakaʻaongaʻi ke akoʻi ai e ngaahi moʻoni taʻengatá ki heʻene fānaú.
ʻOku faʻa ongoʻi taʻelata ʻa ʻIlalia he taimi ʻe niʻihi ʻi he tokolahi e kakai fefine ʻoku feohi ʻi he ngāueʻangá, ka ʻokú ne lotu ke tokoniʻi ia peá ne ongoʻi hono fakafonu ia ʻe he Laumālié ʻaki ʻa e fiefia mo e mālohi. ʻOkú ne pehē, “ʻOku ou monūʻia foki ke ʻi ai haʻaku ngaahi tokoua tokolahi ʻi he Siasí ʻoku ʻofa ʻiate au.” ʻI heʻene lotu ʻo kole tokoní he taimi ʻe niʻihi, ʻe telefoni mai ha fefine ʻi he koló ko e fie poupou mai kiate au.
Fekauʻaki mo e poupou ʻa e kāinga ofí, oku hanganaki fiefia atu ʻa ʻIlalia mo Lolenisō ki he ʻaho ko ia ʻe tokolahi ai ʻa hona hakó ʻi ha ngaahi toʻu tangata faivelenga ke ako mei ai ʻa e ngaahi toʻu tangata ki muí mo hoko ko ha faʻifaʻitakiʻanga. ʻOku pehē ʻe Lolenisō, ʻa ia ko e toʻu tangata hono ua ia ʻi honau fāmilí kuo kau ki he Siasí, “ʻOkú ma lotua homa hakó. ʻOku ou ongoʻi ko ha faongia lahi ia kiate au ke u ngāue mālohi mo faivelenga.”
ʻOku ongoʻi ʻe Lolenisō mo ʻIlalia ʻa e houngaʻia lahi ʻi heʻena maʻu ʻa e faingamālie ke na hoko ko ha ongo paioniá—ko ha niʻihi ʻo kinautolu ʻi honau fāmilí ke fuofua ʻohake ʻa ʻenau fānaú ʻi he maama ʻo e ongoongoleleí. Ko e faʻē ʻa Lolenisoó ʻa e fuofua tokotaha ʻi hono fāmilí ke kau ki he Siasí, pea naʻe fanongo ʻa ʻIlalia mei hono mehikitangá ʻo fekauʻaki mo e Siasí. ʻOku pehē ʻe Lolenisō, “ʻOku tokoni lahi ʻa e ongoongoleleí ki hono fakamālohia ʻema nofo-malí. ʻOkú ne ʻomi kiate kimaua ʻa e ʻilo taʻengata fekauʻaki mo homa fāmilí. ʻOkú ma feinga ke fai ʻa e fili ʻoku totonú ʻo fakatatau mo ʻema ʻilo taʻengatá kae ʻikai ko ʻema ʻilo fakaemāmaní.” ʻOku tupu mei he ngaahi fili ko ʻení ʻa e ngaahi fehokotakiʻanga mālohi ko ia ʻokú ne fakafehokotaki ʻa e toʻu tangata faivelenga ʻe taha mo e toʻu tangata faivelenga hoko maí.
ʻOku talamai ʻe ʻIlalia, “Taimi ʻe niʻihi ʻi heʻeku fanongo ki he ngaahi talanoa ʻi he konifelenisi lahí ʻo pehē ai ʻe he tokotaha leá ko e kau paionia ʻene ngaahi kui uá, pea naʻa nau kolosi he ngaahi feituʻu tokaleleí, ʻoku ʻalu hake ʻeku kiʻi loto-kovi.” ʻOku faingataʻa ke ne fakakaukau atu ki ha fuʻu kakai tokolahi ʻi ha fāmili naʻa nau feilaulau koeʻuhi ko e ongoongoleleí. ʻOku fakalotolahi kiate kinaua ʻa ʻena sio ki he tupulaki ʻa e Siasí ʻi honau feituʻú. ʻOkú na houngaʻia ʻi he kau fuofua faifekau ne nau tō ʻa e ngaahi tenga aí, pea ʻokú na ʻilo ko e ututaʻu lahi ʻe hoko maí.
ʻOku malimali ʻa ʻIlalia ʻi heʻene fakakaukauloto atu ki he ʻaho ko iá. “ʻOku ou ʻiloʻi ʻe ʻi ai ʻa e ʻaho ʻe lau ai ʻe ha taha e tohinoa ʻa e Kui Ua Fefine ko ʻIlaliá.” ʻOku kamata ʻiate ia ʻa e ngaahi talanoa fakafāmili kau ki he tuí ʻi he ʻahó ni.
Ko Hono Teuteuʻi Honau Hakó
Lolotonga ʻoku fakatolonga ʻe he kakai ʻo ʻĪtalí ʻa e ngaahi fale fakamanatu mo e ngaahi meʻa fakaʻofoʻofa mei he Kuonga ʻo e Fakaakeaké, ʻoku kau atu foki mo e Kāingalotu ʻo e Siasí ʻi ʻĪtalí ʻi hono faʻufaʻu ʻo e hisitōliá. ʻOku nau faʻu ha hisitōlia fakafāmili ʻe taʻengata hono mahuʻingá ʻaki ʻenau tauhi e ngaahi fekaú mo akoʻi ʻenau fānaú ke fai ʻa e meʻa tatau. ʻOku nau hanga atu ki ha toe hāʻele mai ʻa e Fakamoʻuí pea mo ʻamanaki ʻe kau honau hakó ʻi Heʻene kau ākongá.
ʻOku nau feinga mo kinautolu ke nau hoko ko ha kau ākonga foʻou kae lava ke hoko ʻeni. ʻOku nau fakamoʻoniʻi ʻe lava ke tau kātaki, faivelenga, fiefia mo fokotuʻu ha ngaahi fāmili faivelenga ʻi he ngaahi fuakava ʻo e temipalé. ʻOku nau akoʻi ʻa e toʻu tangata ʻoku ʻalu haké ʻi he lea mo e ngāue, ki hono mahuʻinga ke tanumaki ʻa e tui kia Sīsū Kalaisí.