Lava ke Ma‘u ‘i he Tu‘asila ‘Initaneti ‘o e Ngaahi Hiva ‘a e Siasí ha Ma‘u‘anga Tokoni Fakavaha‘a-Pule‘anga

Hili hano toe fakaleleiʻi ʻa e Uepisaiti ʻo e Ngaahi Hiva ʻa e Siasí, kuo lava ʻeni ke tuku atu ʻi he polokalama PDF ʻa e ngaahi hivá ʻi he lea faka-Sipeiní, Falaniseé mo e faka-Potukalí. ʻE lava foki ke maʻu ai mo e ngaahi hiva kuo hiki mei he Tohi Hiva ʻa e Fānaú pehē ki he ngaahi himí ʻi he lea faka-Sipeiní. ʻOku kau ʻi he ngaahi maʻuʻanga tokoni ne tānaki maí ha ngaahi lēsoni ki hono tatakí pe tā ʻōkani pe piano pea maʻu ʻi he polokalama PDF ʻi he lea faka-Sipeiní, Falaniseé mo Faka-Potukalí ʻa e Hymns Made Easy, ʻa ia ko ha tohi ʻoku ʻi ai e founga faingofua ki hono tā ʻo e ngaahi himí.

Naʻe pehē ʻe Taieni Pasitiano ko e kouʻotineita ʻo e uepisaití, “Kuo fai ʻe he Siasí ha fuʻu ngāue lahi talu mei he 2005 ke lava ʻo maʻu ʻa e ngaahi nāunau ko ʻení ʻi ha ngaahi lea fakafonua lahi ʻi he ʻInitanetí. ʻI he taimi ne mau fuofua fokotuʻu ai ʻa e uepisaiti hivá, ne lahi ha ngaahi fakamatala ne ʻomi ʻo kole mai ke ʻoatu e ngaahi meʻá ni. ʻOku ʻi ai ha kakai mei ha ngaahi fonua lahi ʻoku nau vakai ki he uepisaiti ko ʻení pea ʻoku mau fie ʻoange ʻa e meʻa ʻoku nau fie maʻú.”

Neongo ko e ngaahi lea fakafonua pē ʻe 4 ʻoku maʻu ʻi he ʻInitanetí, ka ʻoku lava ke maʻu ʻi he Tufakiʻanga Nāunau ʻa e Siasí ʻa e Tohi Hiva ʻa e Fānaú ʻi ha ngaahi lea fakafonua ʻe 10 (faka-Hōlani, Pilitānia, Falanisē, Siamane, ʻĪtali, Siapani, Kōlea, Manitalini, Potukali mo faka-Sipeini). ʻOku lava foki ke maʻu ʻi he lea faka-Pilitāniá mo e faka-Sipeiní ʻa hono hivaʻi ʻo e ngaahi himí.

Ne tuku mai ʻa e Uepisaiti hiva ʻa e Siasí ʻi he taʻu 2004 ʻi ha feinga ke lava ke maʻungofua ʻe he kāingalotú ʻa e ngaahi tāpuaki ʻo e ngaahi hiva ʻa e Siasí. ʻOku ʻi ai foki ha polokalama ʻe lava ke ngāueʻaki (Interactive Church Music Player) ʻe he tokotaha ʻokú ne fakaʻaongaʻi ʻa e polokalamá ke ne mamata, fanongo pea paaki ʻa e ngaahi himi ʻa e Siasí mo e ngaahi hiva ʻa e fānaú. ʻE lava ke tuku mai ki he komipiutá ʻa e ngaahi hivá ʻi he polokalama PDF pe MP3. Ke ʻilo lahi ange ki he meʻa ʻoku lava ke ʻoatu ʻi he uepisaití, vakai ki he www.lds.org/ churchmusic.