Ko e Hingoa Koula Ne ʻIkai Ke u Manatuʻí
Ne u lau ʻeku ʻū ʻī-meilí he pongipongi ʻe taha peá u fakatokangaʻi ai ha hingoa naʻe ʻikai ke u manatuʻi: Henelī Siaosi Tiasi. Naʻe ʻasi ʻi he laine ʻo e kaveingá ʻa e “Saludos [mālō e lelei] mei ha tokotaha mahuʻinga.”
Naʻe ʻikai ke u ʻiloʻi e ʻuhinga ʻo e pōpoaki ko ʻení, peá u fakakaukau ke lomiʻi e kī ke tāmateʻi ʻakí. Neongo ia, ne lahi ange ʻeku fieʻiló ʻo u fakaava hake ia. Naʻe ʻomi e meilí ʻi he lea faka-Sipeini.
ʻI heʻeku laú, ne u ʻilo ai naʻe nofo ʻa Henelī Tiasi ʻi hono taʻu 18 ʻi ʻAtoloki ʻi ʻĀsenitina ʻa ia ne u ngāue fakafaifekau taimi kakato ai ʻi he taʻu ʻe 30 tupu kuo hilí. Naʻá ne luelue mai ʻi he loto koló ʻi ha pongipongi ʻe taha, peá u taʻofi ia ʻo ʻoange ki ai ha tohi tufa fekauʻaki mo e ʻUluaki Mata-Meʻa-Hā-Maí. Naʻá ma faʻa fakaʻaongaʻi mo hoku hoá ʻa e taimi pongipongí ke tufa ai e ʻū tohi tufá ʻi he ngaahi hala ʻo ʻAtolokí, ʻo hangē ko e fakahinohino ne ma maʻu mei heʻema palesiteni fakamisioná. Mahalo ne ma talanoa mo ha kakai ʻe lauingeau ka ne ʻikai te ma faʻa maʻu ʻa honau hingoá. Mahalo ko e tokolahi naʻa mau talanoá naʻe sekoni pē ʻe 30.
Kuo ʻosi ʻeni ha taʻu ʻe tolungofulu tupu mei ai, pea naʻe ʻikai ke u kei manatuʻi haʻaku talanoa ki ha talavou, ka naʻá ne kei manatuʻi pē ʻe ia au. Ne u fokotuʻu hoku hingoá ʻi he Uepisaiti ʻa e Misiona ʻĀsenitiná ʻi ha ngaahi uike siʻi pē ki muʻa peá u maʻu e ʻī-meili ʻa Misa Tiasí pea ko ʻene maʻu mei ai hoku tuʻa-silá.
Naʻá ne fakamatala ʻi heʻene ʻī-meilí ki heʻene ʻave ʻa e tohi tufá ki hono ʻapí ʻo fakaʻaliʻali ki heʻene faʻeé, pea naʻe poupouʻi ia ʻe heʻene faʻeé ke ako ke lahi ange ʻene ʻilo ʻo kau kia Siosefa Sāmitá. Hili ha ngaahi māhina siʻi mei ai, naʻá ne feinga ke kumi ʻa e ongo faifekaú, ka ne u ʻosi hiki au ki ha ʻēlia foʻou.
Naʻe fai e ngaahi lēsoní kia Henelī pea naʻe papitaiso pea hilifakinima ia. Naʻá ku ngāue ʻi ʻĀsenitina ʻi ha toe māhina kehe ʻe 20 kae ʻikai pē ke u toe fanongo ʻi ha meʻa ʻo kau ki hono papitaisó.
Ne liliu ʻa ʻene moʻuí mo e moʻui ʻa ha niʻihi tokolahi ʻe he kiʻi fetalanoaʻaki taimi nounou ko ia naʻa mau fai ʻi he halá ʻi he pongipongi ko ʻení ʻi he kuo hilí. Hili ha taʻu ʻe ua mei hono papitaisó, naʻe uiuiʻi ia ke ʻalu ʻo ngāue fakafaifekau ki ʻĀsenitina tokelau. Hili iá naʻá ne mali pea hokohoko atu pē ʻene ngāue faivelenga ʻi he Siasí, ʻo ne fua ha ngaahi fatongia kehekehe, kau ai ʻene hoko ko ha pīsope, tokoni ki ha ongo palesiteni fakasiteiki pea mo ha aleaʻanga māʻolunga. Naʻá ne toe pehē naʻe ngāue fakafaifekau hono foha lahi tahá ʻi ha misiona ʻi La Paasi, ʻi Polivia.
ʻOku ʻikai lava ha lea ke fakamatalaʻi ʻa e fiefia ʻa hoku lotó ʻi heʻeku lau ʻa e ʻī-meili ko iá. Naʻe fonu hoku taimi ngāue fakafaifekaú ʻi ha ngaahi mōmeniti fakafiefia, ka kuo hanga ʻe he ongoongo ko ʻeni kuo fuoloa pea toki aʻu mai meia ʻEniliki Tiasí ʻo ngaohi ke toe fakafiefia ange ʻa e ngaahi meʻa ʻoku ou manatu ki ai ʻi heʻeku ngāue fakafaifekaú.