Ua hope te 178raa o te Amuiraa Rahi Afa Matahiti

I roto i ta’na amuiraa rahi afa matahiti matamua mai te taime a paturuhia’i oia i roto i te amuiraa hanahana i te ava’e Eperera ra, ua faaite te Peresideni Thomas S. Monson i te parau apî e e patuhia e pae hiero api i te ao nei.

Mai te ava’e Eperera 2000 mai â atahi ra i faaitehia’i te paturaa e rave rahi mau hiero i te taime hoê. (A hi’o i te api 126 no te tahi atu â haamaramaramaraa.)

Ua haamauruuruhia o Elder Earl C. Tingey e Elder Sheldon F. Child no roto i te Pŭpŭ Matamua no te Hitu Ahuru e ua riro raua ei Hui Mana Faatere Faatuhaahia, e ua haamauruuruhia o Elder Gerald N. Lund e Elder Robert R. Steuer no roto i te Piti o te Pŭpŭ no te Hitu Ahuru.

Ua paturuhia o Elder Jay E. Jensen no te Hitu Ahuru no te mono ia Elder Earl C. Tingey i roto i te Peresideniraa no te Hitu Ahuru. (A hi’o i te parau haamaramaramaraa no to’na oraraa i te api 128.)

Ua peresideni te peresideni Monson, tei faahanahana i to’na 81raa o to’na matahiti i te 21 no Atete ra, i te amuiraa e ua arata‘i e toru tuhaa o te amuiraa. Ua faahanahana oia e ta’na vahine faaipoipo, o Frances, i te 60raa o to raua oro’a faaipoiporaa i te 7 no Atopa ra.

Taa ê noa’tu i to ratou piaraahia i roto i te ve‘a amuiraa a te mau ve‘a a te Ekalesia, te vai nei te mau tuhaa o te amuiraa i ni‘a i te itenati LDS.org. Te vai nei te mau hoho‘a o te mau tuhaa atoa o te amuiraa i roto i te reo vava Marite, te reo Marite, te reo Potiti e te reo Paniora. Te vai nei te mau ripene i roto i na reo e 90 e te mau a‘oraa i roto i na reo e 30 i ni‘a i te itenati.