Manava i te amuiraa
Te mana‘o mai nei to tatou Metua i te Ao ra ia tatou tata‘itahi e i to tatou mau hinaaro. Ia faaîhia tatou i To’na Varua a pee ai tatou i te mau faanahoraa o teie… amuiraa.
E au mau taea‘e e au mau tuahine here, e au e, ua tere vitiviti roa te tau mai to tatou â farereiraa hopea a ono ava‘e i teie nei. Ua tahe rahi to vetahi hou a nuu ai te ohipa a te Fatu i mua ma te tape‘a-ore-hia.
Ua fana‘o vau, ma te apeehia mai e to‘u na tauturu e te tahi o te mau Hui Mana Faatere Rahi, i te haamo‘araa o na hiero e toru: i Curitiba, i Paratira; i te Oire no Panama, i Panama; e i Twin Falls, i Idaho—o te 128 raa ïa rahiraa hiero e faaohipahia nei i te ao atoa nei.
I te ahiahi hou te haamo‘araa o te mau hiero tata‘itahi, e faatupuhia te hoê aru‘i no te mau ohipa ihotumu nehenehe roa. I Curitiba i Paratira, ua faaineine mai e 4 330 melo no te mataeinaa hiero, paturuhia e te hoê pŭpŭ himene 1 700 reo, i te hoê faaiteiteraa faauruhia na roto i te tahi mau himene, mau oriraa e te hoho‘a video. Ua î roa te tahua rahi tu‘eraa popo no taua faanahonahoraa i te taata. E mea puai te mata‘i e ua faaineine te ua i te topa. Ua pûpû vau i te hoê pure mamu ma te ani i te Metua i te Ao ra ia hi‘o mai ma te aroha i teie feia o tei faaineine ma te itoito no ta matou nei faaanaanataeraa e e riro hoi to ratou mau ahu no teie nei mau oriraa i te rari mai te mea e topa mai teie ua e aore râ, mai te mea e tupu mai teie vero. Ua faatura Oia i teie nei pure, e ia hope roa teie nei faaanaanatae i topa puai mai ai teie ua i taua aru‘i ra.
Ua faati‘ahia te hoê aamu no te Ekalesia i Paratira na roto i te himene e i te ori. E ua ha‘utihia te hoho‘a o Elders James E. Faust e o William Grant Bangerter o tei tavini na ei misionare i Curitiba i te matahiti 1940. A patahia mai ai to raua mau hoho‘a i ni‘a i te hoê paruai aano, ua huro te mau taata. Ei haapotoraa, e ohiparaa una‘una mau.
I te Oire no Panama, i Panama, i te ru‘i hou te haamo‘araa o te hiero i reira, ua mata‘ita‘i matou e 900 feia apî, tei putu mai na te mau vahi atoa o Panama. Ua ahu mai ratou i to ratou mau ahu û rave rau e mau ahu no te mau peu tumu a ori ai e a faaiteite ai i te mau parau poro‘i no te utuafare, no te aupururaa e no te faaroo. Ua faaroo matou e, hoê matahiti to ratou haapiipiiraa. Ua haere mai ratou mai te hoê atearaa o te mau motu no San Blas e mai te mataeinaa no Changuinola i te pae apatoerau hiti‘a o te râ o Panama. Te atearaa no te tere i te oire pû mai te mau motu o San Blas e toru ïa mahana na te miti e na te fenua marô. E mea nehenehe roa teie nei ohiparaa e e mea faauru mau.
I roto i te faineineraa no te haamo‘araa o ta tatou hiero apî roa, i Twin Falls, i Idaho, ua hamani te mau melo o te fenua iho i te hoê pa‘epa‘e rahi roa i ni‘a i te hoê tahua pihee [foire] i Filer, i Idaho, e ua tanu i te matie i ni‘a i te tahua repo e te tahi atu mau faa‘una‘una, e te hoê papa‘i taheraa pape no te faahoho‘araa i Shoshone Falls, te hoê toparaa pape e 3,200 kilometera i te atea mai te hiero apî atu. I roto i teie aru‘i faaanaanataeraa, e toru tauasini e piti hanere feia apî tamaroa e tamahine tei tomo mai i ni‘a i te tahua ma te tahiri i te mau ripene moana e te uo‘uo, ei faahoho‘araa i te toparaa e i te taheraa pape. « Te pape ora » no roto mai teie tumu parau ia Ioane 4:10,14, ua amui teie ohiparaa i te feia apî o na tĭtĭ 14 i roto i teie mataeinaa hiero apî. Ua faahoho‘a ratou, na roto i te himene e i te ori, i to ratou auraroraa i to ratou oraraa i te pae varua i ni‘a i te pape ora a te Faaora e i to ratou auraroraa i to ratou oraraa i te pae tino i ni‘a i te mau pape iti e i te mau pape rahi o te mou‘a o to ratou fenua. Te feia o tei fana‘o e o tei ite mata i teie nei ohiparaa ua faateiteihia e ua haapiihia ïa.
Ua riro ïa vau ei taata paturu i teie nei mau ohiparaa. Na te reira i tauturu i ta tatou feia apî ia amui i roto i te tahi mau ohiparaa o ta ratou i ite o te ore roa e mo‘e. Te auhoaraa e te mau haamana‘oraa o tei nati ia ratou e vai ïa e amuri noa’tu.
I teie ava‘e i muri nei i te Oire no Mehiko e haamo‘a-faahou-hia te hiero no Mehiko i muri mai i te hoê tata‘iraa rahi. I teie mau ava‘e i muri nei, e oti mai te tahi atu mau paturaa o te tahi atu mau hiero, e e faatupuhia ïa te mau uputa iriti e te mau haamo‘araa.
Te hinaaro nei au i teie po‘ipo‘i e faaara atu e pae hiero apî no te mau vahi tei roaa mai i roto i te mau ava‘e e mau matahiti i mua nei, e patuhia i te mau fenua i muri nei : Calgary, Alberta, Canada ; Córdoba, Ra-Parata ; i te tuhaa rahi no Kansas City ; Philadelphia, Pennsylvanie ; e Roma, Italia.
E au mau taea‘e e au mau tuahine, ta tatou nuu misionare, e tavini nei i te ao atoa nei, te tamau noa nei ă i te imi i te feia o te maimi nei i te parau mau e itehia i roto i te evanelia a Iesu Mesia. Te tupu vitiviti nei te Ekalesia mai to’na ă faanahonaho-raa-hia 178 matahiti i teie nei.
Ua fana‘o vau i na ono ava‘e i ma‘iri i te farereiraa i te mau feia faatere o te mau fenua e i te mau ti‘a o te mau hau. Te feia atoa o ta‘u i farerei, ua mauruuru ratou i te Ekalesia e i to tatou mau melo, e ua ati e ua faaau mai. Te vaira râ vetahi mau fenua o te ao nei e mea iti roa tei farii i ta tatou mau faaururaa e i te opani-roa-raa ia porohia te evanelia. Mai ta te Peresideni Spencer W. Kimball i rave a 32 matahiti i ma‘iri, i to’na ani ‘u‘anaraa ia outou ia pure no te iritiraa o teie mau fenua, ia nehenehe tatou ia opere i te oaoa o te evanelia. I to tatou pureraa ei pahonoraa i te taparu a te Peresideni Kimball, ua ite tatou i te mau semeio i te hohora-raa-hia a iriti ai te mau fenua i muri i te tahi fenua to ratou mau uputa o ta ratou i opani na i te Ekalesia. Na te reira i faatahe faahou i te hou a pure ai tatou na roto i te faaroo.
I teie nei, e au mau taea‘e e au mau tuahine, ua haere mai tatou i ô nei ia haapiihia e ia faauruhia. Vetahi o outou e mea apî mai i roto i te Ekalesia. Te manava’tu nei matou ia outou. Vetahi o outou te ‘aro nei i te mau fifi, i te mau tamataraa, i te mau tarapaperaa o te aau i te mau pau. Te here nei matou ia outou e te pure nei matou no outou. Rave rahi mau parau poro‘i e faataehia’tu i roto i teie na mahana e piti. Te haapapu atu nei au ia outou e, ua pure teie mau tane e teie mau vahine o te paraparau atu ia outou, i te mau mea o ta ratou e ti‘a ia parau. Ua faauruhia e ua faahoruhoruhia ratou a imi ai ratou i te tauturu e i te arata‘iraa a to te ra‘i.
Te mana‘o mai nei to tatou Metua i te Ao ra ia tatou tata‘itahi e i to tatou mau hinaaro. Ia faaîhia tatou i To’na Varua a pee ai tatou i te mau faanahoraa o te 178raa o te amuiraa rahi afa matahiti a te Ekalesia. O teie ta‘u pure haehaa, e o ta‘u e horo‘a’tu na roto i te i‘oa o Iesu Mesia, Amene.