Ua faaite te peresideni Monson i te parau apî no te mau Hiero Api

E rahi atu â te mau melo no te Ekalesia o te farii i te mau haamaitairaa no te hiero ia hope ana’e te paturaa o na hiero api e pae tei faaitehia i roto i te amuiraa rahi. Ua faaite te peresideni Thomas S. Monson i te parau api no te mau hiero api i roto i ta’na a‘oraa iritiraa i te Tuhaa no te po‘ipo‘i mahana maa i te 4 no Atopa 2008.

E patuhia te mau hiero api i Calgary, Alberta, Canada; Cordoba, Raparata; te Area no Kansas City, Misouri, te Fenua Marite; Philadelphia, Pennsylvania, Fenua Marite; e i Roma, Italia. Ua noaa a’ena te mau fenua no te mau hiero api.

« Auê ïa e mahana hanahana no tatou i te iteraa i te parau apî no na hiero apî e pae tei faaitehia mai e to tatou nei peropheta herehia », ua na ô maira te Peresideni Dieter F. Uchtdorf, Tauturu Piti i roto i te Peresideniraa Matamua i roto i ta’na a‘oraa i te amuiraa i muri a’e i te faaiteraa. « Auê ïa e mahana nehenehe no tatou paatoa ».

E patuhia te hiero i Calgary, Alberta, Canada, i ni‘a i te fenua tei fatuhia e te Ekalesia i pihai iho i te hoê fare pureraa e vai nei i te tuhaa apatoerau tooa o te râ no te oire. O te va’uraa ïa o te hiero i Canada e te toruraa ïa o te hiero i te tuhaa fenua no Alberta. Te vai nei te tahi atu mau hiero i Canada i Halifax, Nova Scotia; Edmonton, Alberta; Cardston, Alberta; Regina Saskatchewan; Toronto, Ontario; Montreal, Quebec; e Vancouver, British Columbia (te patuhia ra te hiero i British Columbia).

E ti‘a mai ïa te hiero i Cordoba, Raparata i te fenua e ti‘ahia ra te fare pureraa no Belgrano, i pihai iho i te fare no te peresideni no te misioni. O te 34raa ïa o te hiero i Amerika Latino e te pitiraa o te hiero i Raparata. Ua haamo‘ahia te hiero matamua i Raparata i te matahiti 1986 i te oire pû no Buenos Aires.

E itehia te tupuraa tamau o te Ekalesia i te fenua Marite na roto i te parau api no te opuaraa no te hoê hiero i Kansas City, Misouri, e i Philadelphia, Pennsylvania. E amui atu teie nei mau hiero i te mau tatini atu mau hiero no te fenua Marite. E patuhia te hiero i te Oire no Kansas i Clay County, Misouri, i roto i te otia o te Oire no Kansas i ni‘a i te hoê fenua nohoraa i te tuhaa fenua Shoal Creek. Te hiero i Philadelphia e patuhia ïa i te oire iho, mai te tahi atu mau hiero tei patuhia i roto i te mau otia o te oire mai Manhattan e Hong Kong.

E fana‘o rahi roa te Feia Mo‘a i te mau tuhaa fenua no Mediterranea na roto i te mau opuaraa tei faaitehia no te hoê hiero i Roma, Italia. E faaohipa te hiero i te tahi tuhaa no te tuhaa fenua e 6 tâ tei fatuhia e te Ekalesia i pihai iho i te poromu e haati nei i te tuhaa apaoterau hitiaa o te râ no Roma. E riro ïa teie hiero tei faaitehia te 12raa o te hiero i Europa e te hiero matamua i te tuhaa fenua no Mediterranea. E fana‘o ïa te mau melo no te Ekalesia i roto i te mau fenua e haati mai na roto i te itiraa o te taime tereraa e te itiraa o te mau haamau‘araa no te tereraa.

E vai nei e 128 hiero tei haamo‘ahia e ohipa ra e te tahi 17 hiero tei faaitehia aore râ te patuhia ra, e te taatoaraa o te mau hiero tei faaitehia aore râ te faaohipahia ra na te ao taatoa nei e 145 ïa hiero.