E faataa-ê-hia i teie nei te mau Buka Arata‘iraa i te mau Ve‘a no te Amuiraa Rahi

E nene’i-taaê-hia e e hapono-ti‘a’tu-hia i teie nei i te mau paroita e te mau amaa te mau buka arata‘i na te mau orometua haapii no te Autahu’araa a Aarona e te Feia Api Tamahine, tei piahia na na mua’e i roto i te mau ve‘a a te Liahona e te Ensign no te amuiraa rahi.

Ua parau o Michael G. Madsen no te Tuhaa Buka Haapiiraa a te Ekalesia e, « ua riro te mau buka arata‘i ei rave‘a hau atu â e e haapuairaa i te mau buka a te Autahu’araa a Aarona e a te Feia Api Tamahine na roto i te horo‘araa’tu i te mau orometua haapii te mau parau apî roa a te feia faatere o te Ekalesia no ni‘a i te parau tumu o te haapiiraa ».

E horo‘a mai te mau arata‘iraa i te tahi atu â tautururaa no te mau haapiiraa tata‘itahi i roto i te mau buka ma te faahiti i te mau aamu e te mau a‘oraa api a te feia faatere o te Ekalesia e te tahi atu mau papa‘iraa i roto i te mau ve‘a a te Ekalesia. Ua amuihia’tu te mau uiraa, te mau faahitiraa parau, e te mau rave‘a ohie no te haapii na te mau orometua haapii i te mau arata‘iraa api, ma te horo‘a i te tahi atu â mau rave‘a na te mau orometua haapii. Ua opuahia te mau arata‘iraa api no te tauturu e no te faaapi i te mau materia i roto i te mau buka haapiiraa, e ere râ no te mono atu i te mau buka haapiiraa iho.

I teie nei e faataahia te neneiraa i te mau arata‘iraa hoê taime i te matahiti. Te vai nei e maha tuhaa i roto i te mau arata‘iraa api : te mau uiraa, te tahi atu â mau rave‘a, te mau ohipa tei tupu, e te mau rave‘a ohie no te haapii.

E neneihia te mau arata‘iraa api i roto i na 27 reo e e horo‘a mai ratou i te materia no te mau haapiiraa i te mahana Sabati e te mau mana‘o tauturu no te mau faaoaoaraa a te feia api i ropu i te hebedoma. Ua opuahia teie mau faaoaoaraa i ropu i te hebedoma no te tuati i te mau haapiiraa i te Sabati, ma te horo‘a i te feia api te rave‘a no te ite e no te faaohipa i te mea tei haapiihia ia ratou. E tauturu te mau faaoaoaraa e rave rahi i te ohipa i te Atua e te mau titauraa no te haereraa i mua no te tamahine tata‘itahi.

Ua parau te Taea‘e Madsen e : « te tuati nei matou i te mea ta ratou i haapii i te sabati i te hoê faaoaoaraa i hoê pô i roto i te hebedoma no te tauturu i te faahaere te evanelia i roto i to ratou mau aau ».

E faaitoitohia te mau faatere no te Feia Api Tane e te Feia Api Tamahine ia faaohipa i te mau arata‘iraa api e ta ratou mau rave‘a haapiiraa. Te vai nei i roto i te mau arata‘iraa e 11 rave‘a ohie taa ê no te haapii no te tauturu i te mau orometua haapii ia faanaho e ia horo‘a i te mau haapiiraa maitai atu â.

Ua parau te taea‘e Madsen e, « mai te mea e pee te mau orometua haapii i teie mau rave‘a ohie, e nehenehe ïa ta ratou e haamaitai rahi i ta ratou huru haapiiraa ».

E noaa te mau arata‘iraa api no te matahiti 2009 na roto i te mau Pû opereraa buka i te 2 no Tetepa 2008.