Tāpuni e Konifelenisi Lahi Fakavaeuataʻu Hono 178

ʻI he fuofua konifelenisi lahi fakavaeuataʻu ʻa Palesiteni Tōmasi S. Monisoni talu hono hikinimaʻi ia ʻi he fakatahaʻanga mamalu ʻo ʻEpeleli kuo ʻosí, naʻá ne fanongonongo ai ha ngaahi temipale foʻou ʻe nima ke langa ʻi he funga māmaní.

Talu mei ʻEpeleli ʻo e taʻu 2000 mo e teʻeki ai ke toe fanongonongo ha ngaahi temipale lahi pehē ʻi ha taimi pē ʻe taha. (Ke maʻu ha fakamatala lahi ange, vakai ki he peesi 126).

Ne tukuange ʻa ʻEletā ʻEli C. Tingei mo ʻEletā Selitoni F. Saila mei he Kōlomu ʻUluaki ʻo e Kau Fitungofulú pea ke na hoko ko ha Takimuʻa mālōlō, pea naʻe tukuange foki mo ʻEletā Sēlati N. Lani mo ʻEletā Lōpeti R. Sitiua mei he Kōlomu hono Ua ʻo e Kau Fitungofulú.

Ne fakanofo ʻa ʻEletā Sei E. Seniseni ʻo e Kau Fitungofulú ke ne hoko ko ha taha ʻo e Kau Palesitenisī ʻo e Kau Fitungofulú hili e ʻatā e lakanga ko iá, ʻi hono tukuange ʻo ʻEletā ʻEli C. Tingeí. (Vakai ki he fakamatala fakapiokālafi ʻoku ʻoatu heni ʻi he peesi 128.)

Ne fakamanatu foki e ʻaho fāʻeleʻi ʻo Palesiteni Monisoní ʻi he ʻaho 21 ʻo ʻAokosí, pea ko ia naʻá ne puleʻi ʻa e konifelenisí mo ne tataki ha ngaahi fakatahaʻanga ʻe tolu. Naʻá ne fakafiefiaʻi foki mo hono uaifi ko Falanisesí ʻa e hokosia e taʻu 60 ʻo ʻena nofo-malí, ʻi he ʻaho 7 ʻo ʻOkatopá.

Makehe mei hono paaki ʻo e ngaahi lea ʻo e konifelenisí ʻi he ngaahi makasini ʻa e Siasí, ʻe lava foki ke maʻu ʻa e ngaahi fakatahá ʻi he ʻInitanetí ʻi he LDS.org. ʻOku lava foki ke maʻu ha vitiō ʻo e ngaahi fakataha kotoa ʻo e konifelenisí ʻi he Talanoa Fakaʻilonga Nima Faka-ʻAmeliká, Faka-Pilitānia, Potukali, mo Faka-Sipeiní. ʻOku lava foki ke toe maʻu atu ʻi he ʻInitanetí e ngaahi faile ongó ʻi ha ngaahi lea fakafonua ʻe 90 nai pea ʻi hono paaki ʻi ha ngaahi lea fakafonua ʻe 30.