ʻEletā Jay E. Jensen

ʻO e Kau Palesitenisī ʻo e Kau Fitungofulú

Hili ha ngaahi ʻaho ʻo ʻene feinga ke veteki ha palopalema lolotonga ʻene hoko ko e palesiteni ʻo e Misiona Kali Kolomupiá, ne pehē ʻe ʻEletā Sei ʻEtuini Seniseni ne toki ui ki he kau Palesitenisī ʻo e Kau Fitungofulú, ʻokú ne manatu ki heʻene fakaava hake ʻene folofolá ʻi he vakapuná ʻi heʻene foki ki he ʻapi fakamisioná.

Ne tohoakiʻi ʻa ʻene tokangá ʻe ha laine ʻi he Tokāteline mo e Ngaahi Fuakava 3: 5 ʻa ia ʻoku pehē: “Manatu foki ki he ngaahi talaʻofa naʻe fai kiate koé.”

Ne pehē ʻe ʻEletā Seniseni, “ ʻOku tau fehangahangai mo ha ngaahi faingataʻa ʻi he moʻuí, ka naʻe hangē ʻoku fakamanatu mai ʻe he ʻEikí ʻoku mahulu ange maʻu pē ʻa e ngaahi talaʻofá.”

Ne fuofua ako ʻe ʻEletā Seniseni ki he ngaahi talaʻofa ʻa e ʻEikí mei heʻene ongo mātuʻá, ʻa Liueli Uitingi mo ʻĒteli ʻOti Seniseni. Naʻe fāʻeleʻi ia ʻi Meipolotoni, ʻi ʻIutā, ʻIunaiteti Siteití, ʻi he ʻaho 5 ʻo Fēpueli, 1942 ko e fika 6 ia ʻi ha fānau ʻe toko 10 ʻi ha ʻapi ʻokú ne pehē ne, “moʻui ʻaki mo akoʻi ai ʻa e ongoongoleleí.”

Hili ʻa ʻene ngāue ʻi he Misiona Sipeini ʻAmeliká mei he taʻu 1961 ki he 1963, naʻá ne mali leva mo Lona Lī Saila ʻi he ʻaho 1 ʻo Nōvema, 1963 ʻi he Temipale Manatai ʻIutaá. ʻOkú na hoko ko ha mātuʻa ki ha fānau ʻe toko ono. Naʻe maʻu ʻa hono mataʻitohi B.A., M.A., mo e toketaá mei he ʻUnivēsiti Pilikihami ʻIongí.

Hili ʻene faiako ʻi he seminelí, naʻá ne ngāue ko ha talēkita ʻo e nāunau fakalēsoni ʻa e semineli mo e ʻinisititiutí, talēkita ʻo e Potungāue Fakafaifekaú, pea talēkita ʻi hono fakafekauʻaki ʻo e ngaahi folofolá ʻi he Potungāue Fakalēsoni ʻa e Siasí.

Kuo ʻosi hoko foki ʻa ʻEletā Seniseni ko ha pīsope, tokoni ʻi he kau palesitenisī ʻo e Senitā Akoʻanga Fakafaifekau (MTC) ʻi Polovó, alēleaʻanga māʻolunga, kulupu lita ʻi he taulaʻeiki lahí, palesiteni ʻo e Kau Talavoú, faiako Lautohi Faka-Sāpate mo ha palesiteni fakamisiona. Naʻe uiuiʻi ki he Kōlomu Hono Ua ʻo e Kau Fitungofulú ʻi he ʻaho 6 ʻo Sune, 1992 pea ki he Kōlomu ʻUluaki ʻo e Kau Fitungofulú ʻi he ʻaho 1 ʻo ʻEpeleli, 1995.

ʻOku mahino mai ʻa e meʻa kuó ne ako ʻi he kotoa ʻo ʻene moʻuí ʻi he meʻa ko ʻeni ne hoko kiate ia mo e folofolá ʻi heʻene hoko ko e palesiteni fakamisioná. Naʻá ne pehē, “ ʻOku ʻi ai e mālohi ʻi he folofola ʻa e ʻOtuá,” (vakai, ʻAlamā 31:5). ʻOkú ne ʻamanaki ʻo hangē ko Kitione ʻi he Tohi ʻa Molomoná, ʻe “ ʻaonga ia” ki he Tuʻí mo e kakai ʻo Hono puleʻangá (Mōsaia 22:4).