Paaki Mavahe ʻa e Ngaahi Maʻuʻanga Fakahinohinó mei he Ngaahi Lea ʻo e Konifelenisí

Ko e maʻuʻanga fakahinohino maʻá e kau faiako ʻi he Lakanga Taulaʻeiki Faka-ʻĒloné mo e Kau Finemuí ʻa ia naʻe faʻa maʻu atu ʻi he pulusinga ko ia ʻo e Liahona mo e Ensign ʻo e konifelenisi lahí, ʻe paaki kehe atu pea ʻoatu fakahangatonu pē ki he ngaahi uōtí mo e koló.

Naʻe pehē ʻe Maikolo G. Metiseni ʻo e Potungāue ki he Nāunau Fakalēsoni ʻa e Siasí, “ ʻOku fakalahi atu pea fakamālohia e tohi lēsoni ʻa e Lakanga Taulaʻeiki Faka-ʻĒloné mo e kau Finemuí ʻi hono ʻoange ki he kau faiakó ʻa e lea fakamuimuitaha ʻa e kau taki ʻo e Siasí fekauʻaki mo e tefito ʻo e ngaahi lēsoní.”

ʻOku ʻoatu ʻe he fakahinohinó ha nāunau ke tokoni ki he lēsoni taki taha ʻi he tohi lēsoni angamahení ʻaki hono fakafekauʻaki e ngaahi talanoa mo e lea mei he kau taki lolotonga ʻo e Siasí pea mo e ngaahi fakamatala kehe ʻi he ngaahi makasini ʻa e Siasí. Kuo tānaki atu foki ha ngaahi fehuʻi, lea mo ha tokoni fakafaiako maʻá e faiakó ki he fakahinohino foʻoú, ke lahi ange ai ʻa e ngaahi nāunau ʻe maʻu tokoni mei ai ʻa e faiakó. ʻOku fakataumuʻa ʻa e ngaahi fakahinohino foʻoú ke fakalahi pea ʻoatu ʻa e fakamatala fakamuimuitaha ki he ngaahi tohi lēsoni ʻoku lolotonga ngāue ʻakí, kae ʻikai ko hano fakafetongi ʻo e ngaahi tohi lēsoní.

ʻE paaki tuʻo taha ʻi he taʻu ʻa e maʻuʻanga fakahinohinó. ʻOku konga ʻe fā ʻa e maʻuʻanga fakahinohino foʻoú: ngaahi fehuʻi, ngaahi maʻuʻanga tokoni kehe, ngaahi meʻa ne hoko mo ha ngaahi tokoni fakafaiako.

ʻOku paaki ʻa e maʻuʻanga fakahinohino foʻoú ʻi ha lea fakafonua ʻe 27 pea ʻoatu mo ha ngaahi nāunau ki he lēsoni ʻo e ʻaho Sāpaté pea pehē ki ha ngaahi ʻekitivitī lolotonga e uiké maʻá e toʻu tupú. ʻOku faʻufaʻu ʻa e ngaahi ʻekitivitī he lolotonga e uiké ke fakafekauʻaki ia mo e ngaahi lēsoni ʻo e ʻaho Sāpaté, pea ʻoange ai ha faingamālie ki he toʻu tupú ke nau aʻusia mo ngāueʻaki ʻa e ngaahi meʻa kuo akoʻi kiate kinautolú. ʻOku tokoni e ngaahi ʻekitivitií ki hono fakakakato ʻo e ngaahi fie maʻu Fatongia ki he ʻOtuá mo e Fakalakalaka Fakatāutahá.

Naʻe pehē ʻe Misa Metiseni, “ ʻOku mau hanga ʻo fakafekauʻaki ʻa e meʻa ʻoku nau ako ʻi he ʻaho Sāpaté mo ha ʻekitivitī lolotonga e uiké ke tokoniʻi ke tohi tongi ʻi honau lotó ʻa e ongoongoleleí.”

ʻOku poupouʻi atu ʻa e kau taki ʻo e Kau Talavoú mo e Kau Finemuí ke nau ngāue ʻaki ʻa e fakahinohino foʻou ko ʻení fakataha mo ʻenau nāunau fakafaiakó. ʻOku kau ʻi he fakahinohinó ha ngaahi tokoni fakafaiako ʻe 11 ke tokoni ki he faiakó ʻi hono palani mo fakahoko lelei ange e ngaahi lēsoní.

Naʻe pehē ʻe Misa Metiseni, “Kapau ʻe muimui ʻa e kau faiakó ki he ngaahi tokoni fakafaiako ko ʻení, ʻe lava ke toe fakaleleiʻi ange ʻenau founga faiakó.”

Ne fuofua tuku atu ʻa e ngaahi fakahinohino foʻou ki he 2009 ki he Ngaahi Fale Tufakiʻanga Nāunaú ʻi he ʻaho 2 ʻo Sepitema, 2008.