Ngaahi Akonaki Maʻa Hotau Kuongá

ʻOku hanga ʻe he ngaahi fakahinohino ko ʻeni fekauʻaki mo e lēsoni Sāpate fā ʻa e Lakanga Taulaʻeiki Faka-Melekisētekí mo e Fineʻofá, ʻi he “Ngaahi Akonaki Maʻa Hotau Kuongá” ʻo fetongi ʻa e fakahinohino ko ia ʻi he Fakamatala maʻá e Kau taki ʻo e Lakanga Fakataulaʻeikí mo e Ngaahi Houalotú ʻi he Nāunau Fakalēsoni ʻo e 2005 ki he 2008.

ʻE fakatefito e fakatahaʻanga ʻo e Lakanga Taulaʻeiki Faka-Melekisētekí mo e Fineʻofá he Sāpate fā ʻo e māhina takitaha ʻi he “Ngaahi Akonaki Maʻa Hotau Kuongá. ʻE akoʻi e ngaahi lēsoni kotoa pē ʻo e “Ngaahi Akonaki Maʻa Hotau Kuongá” mei he Liahona ʻoku hā ai e ngaahi lea ʻo e konifelenisi lahi fakamuimuitahá. ʻOku pulusi e makasini ko iá ʻi Mē mo Nōvema ʻo e taʻu takitaha. ʻE lava foki ke maʻu fakahangatonu e ngaahi leá mei he ʻinitanetí (ʻi ha ngaahi lea fakafonua lahi) mei he tuʻasila ko e www.lds.org.

ʻE lava ke teuteuʻi ʻa e lēsoni takitaha mei ha lea ʻe taha pe lahi ange. ʻE lava ke fili ʻe he kau palesiteni fakasiteikí mo e fakavahefonuá ʻa e ngaahi lea ke fakaʻaongaʻí, pe te na tuku atu ʻa e fatongia ko ʻení ki he kau pīsopé mo e palesiteni fakakoló. ʻOku totonu ke fakamamafaʻi ʻe he kau taki lakanga fakataulaʻeiki ko ʻení ʻa e mahuʻinga ke ako ʻe he houʻeiki tangata ʻo e Lakanga Taulaʻeiki Faka-Melekisētekí mo e houʻeiki fafine ʻo e Fineʻofá, ʻa e lea tatau pē ʻi he Sāpate tatau. ʻOku totonu ke kumi faleʻi e kau faiakó mei honau kau takí ʻi ha faʻahinga fakamamafa makehe.

Ko kinautolu ʻoku nau omi ki he lēsoni Sāpate faá, ʻoku poupouʻi atu kinautolu ke nau ako pea omi ki he kalasí mo e makasini ʻo e konifelenisi lahi fakamuimuitahá. ʻOku totonu ke fakapapauʻi ʻe he kau taki ʻo e uōtí mo e koló ʻe lava ʻo maʻu ʻe he mēmipa kotoa pē e makasini ʻa e Siasí.

Ngaahi Fokotuʻu ki Hono Teuteu ʻo ha Lēsoni mei he Ngaahi Leá

Lotu ke nofoʻia koe ʻe he Laumālie Māʻoniʻoní ʻi hoʻo ako mo akoʻi ʻa e (ngaahi) leá. ʻE ʻi ai ha ngaahi taimi ʻe ʻahiʻahiʻi ai koe ke ke tuku ki he tafaʻakí e ngaahi lea konifelenisí, ka ke teuteuʻi ʻa e lēsoní ʻaki haʻo fakaʻaongaʻi ha ngaahi nāunau kehe. Ka ko e ngaahi lea konifelenisí pē ʻa e nāunau fakalēsoni kuo fakangofua atú. Ko ho fatongiá ke tokoni ki he niʻihi kehé ke nau ako mo moʻuiʻaki ʻa e ongoongoleleí ʻo hangē ko ia ne akoʻi mai ʻi he konifelenisi lahi fakamuimuitaha ʻo e Siasí.
Toe vakaiʻi ʻa e (ngaahi) leá, ke ʻiloʻi ʻa e ngaahi tefitoʻi moʻoni mo e ngaahi tokāteline ʻokú ne feau e ngaahi fie maʻu ʻa e kau mēmipa ʻo e kalasí. Kumi hake foki mo ha ngaahi talanoa, fakamoʻoni fakafolofola mo ha ngaahi fakamatala mei he (ngaahi) leá te ne tokoniʻi koe ʻi hono akoʻi ʻo e ngaahi tefitoʻi moʻoní mo e tokāteliné.
Fokotuʻutuʻu e founga ʻokú ke loto ke akoʻi ʻaki ʻa e ngaahi tefitoʻi moʻoní mo e tokāteliné. ʻOku totonu ke kau ʻi hoʻo fokotuʻutuʻú ha ngaahi fehuʻi ʻe tokoni ki he kau mēmipa ʻo e kalasí ke nau:
- ʻIloʻi e ngaahi tefitoʻi moʻoní mo e ngaahi tokāteline ʻokú ke akoʻi mei he (ngaahi) leá.
- Fakakaukau ki he ʻuhinga ʻo e ngaahi tefitoʻi moʻoní mo e tokāteliné.
- Vahevahe ʻenau mahinó, fakakaukaú, taukeí, mo e ngaahi fakamoʻoni fekauʻaki mo e ngaahi tefitoʻi moʻoní mo e tokāteliné.
- Fakaʻaongaʻi e ngaahi tefitoʻi moʻoni mo e tokāteline ko ʻení ʻi heʻenau moʻuí.
Toe vakaiʻi e ongo vahe 31–32 ʻo e ʻOku ʻIkai ha Ui ʻe Mahuʻinga ange ʻi he Faiakó.

“Ko e meʻa ʻoku mahuʻinga tahá ko hono ongoʻi ko ia ʻe he kāingalotú e mālohi ʻo e Laumālié, fakatupulaki ʻenau mahino ki he ongoongoleleí, ako ke fakaʻaongaʻi e ngaahi tefitoʻi moʻoni ʻo e ongoongoleleí ʻi heʻenau moʻuí pea mo fakamālohia ʻenau tukupā ke moʻuiʻaki ʻa e ongoongoleleí” (Tohi Fakahinohino maʻá e Faiakó [2001], 12).

Kātaki kae ʻomi ha ngaahi fakamatala fekauʻaki mo e “Ngaahi Akonaki Maʻa Hotau Kuongá” ki he Curriculum Development, 50 East North Temple Street, Room 2420, Salt Lake City, UT 84150-0024, USA; e-mail: cur-development @ldschurch.org.

Māhiná	Nāunau ki he Lēsoni ʻo e Sāpate Faá
Nōvema 2008– ʻEpeleli 2009	Ngaahi lea ʻoku pulusi atu ʻi he Liahona* ʻo Nōvema 2008
Mē 2009–ʻOkatopa 2009	Ngaahi lea ʻoku pulusi atu ʻi he Liahona* ʻo Mē 2009