Mga Istorya ug mga Pagpamatuod sa Campfire
“Busa, ipadayag ang mga butang nga inyong nadungog, ug sa pagkatinuod motuo, ug nasayud nga tinuod”D&P 80:4
Ting! Mao kadto ang katapusang bagting sa adlaw sa tingklase pagka Biyernes sa hapon. Milukso ko gikan sa akong lingkuranan ug nagdaling mipaingon sa pultahan. Ang akong higala nga si Kent midapit kanako ug sa laing duha ka mga lalaki nga magkamping nianang gabhiona duol sa iyang balay. Gihulat ko gayud kini sulod sa duha ka semana.
Pag-abut nako sa balay gikan sa eskwelahan, akong gikuha ang akong katulganan, unlan, flashlight, mga komiks, ug usa ka bag nga mga snack. Pag-abut nako sa balay ni Kent, siya ug ang iyang amahan mao pa gayuy pagtaud sa tolda. Nagpuli-puli kami og dukdok sa mga ugsok nga mopalig-on sa tolda diha sa yuta.
Dayon ang papa ni Kent nag-barbecue og mga hamburger, ug kaming tanan nagduwa og tago-tago sa kakahoyan. Pagsawop gayud sa adlaw, among gipasiga ang among mga flashlight ug padayon nga nagsuroy-suroy.
Pagkataud-taud, kaming tanan gitawag sa mama ni Kent nga mopahawa na sa kakahoyan ug miingon kanamo nga oras na nga mopahulay alang nianang gabhiona. Nanagan kami paingon sa tolda, gibukhad ang among mga katulganan, ug namahulay. Wala madugay nagsalo mi og mga snack ug naminaw ni Kent sa iyang pipila ka talagsaon nga mga istorya sa pagpanimpalad. Si Kent kanunay nga mohimo namo nga mga bayani diha sa iyang mga istorya. Makahimo kami kanunay sa paglupad, ug kanunay kaming nagmalampuson.
Samtang nagkalawom ang gabii, ang tanan gikapoy ug nagsugod na og pangatulog. Akong madungog ang mga gangis nga nagsaba-saba sa hangin sa kagabhion ug ang usa ka tren nga miagi didto sa unahan. Nagsugod ko sa paghunahuna mahitungod sa mga istorya ni Kent. Ako nakaamgo nga bisan og gisultihan ko ni Kent og daghang maanindot nga mga istorya, adunay usa ka mahinungdanong istorya nga wala niya mahibaloi. Kadto mao ang tinuod nga istorya ni Joseph Smith ug sa Pagpahiuli sa ebanghelyo. Kon unsa ka dako ang akong paghunahuna mahitungod niini, ingon usab ka dako ang akong pagbati nga kinahanglan nakong ipakigbahin sa akong higala kining espesyal nga istorya.
“Kent, nagmata pa ba ka?”
“Oo. Unsa man?”
Nag-anam kakusog ang kulba sa akong kasingkasing ug gibati ko nga nakuyawan, apan nagsige ko og sulti.
“Naghunahuna lang ko. Nagtuo ka ba sa Dios?”
“Oo, siyempre,” siya miingon.
“Nagtuo ka ba sa mga propeta sa Biblia?”
“Oo,” miingon si Kent samtang milingkod siya sa iyang katulganan.
“Ah, unsa kaha kon sultihan ko ikaw nga kita adunay usa ka buhing propeta nga ania sa yuta karon, sama gayud sa Biblia?”
“Unsay buot nimong ipasabut—usa ka propeta sama ni Moises?”
“Oo, mao gyud kana ang akong buot ipasabut.”
“Ah, bag-o na da,” siya mingon. “Sultihi ko mahitungod niini.”
Ang akong gibati nga kakuyaw nag-anam og kawala, ug ang kahinam maoy mipuli niini. Akong gisultihan si Kent mahitungod ni Propeta Joseph Smith ug sa unsang paagi nga ang ebanghelyo napahiuli sa yuta. Gisultihan ko siya mahitungod sa buhi nga propeta ug sa mga apostoles nga ania sa yuta karon.
Pagkahuman nako, akong gipangutana si Kent kon unsay iyang hunahuna mahitungod niini.
Nahilum siya sulod sa pipila ka gutlo. “Sa akong hunahuna usa kana ka talagsaon nga istorya nga kinahanglan gayud nakong hunahunaon. Nagtuo ka ba gayud niini?”
“Oo, nagtuo gyud ko.” Gibati nako ang kainit sulod sa akong dughan, ug nasayud ko nga akong nasulti ang unsay gusto sa Langitnong Amahan nga akong isulti. Hilum ko nga nag-ampo nga si Kent masayud unta sa iyang kaugalingon nga unsay akong gisulti tinuod.
Sa kaulahian akong nasayran nga si Kent nag-ampo nga makaplagan ang iyang tubag. Gipakigbahin usab niya sa iyang mga ginikanan unsay iyang nakat-unan. Wala madugay ang pamilya ni Kent nagtuon sa ebanghelyo ug nakighimamat sa mga misyonaryo. Dili kaayo kadto dugay hangtud nga ang tibuok pamilya ni Kent nabunyagan ug nakumpirmahan nga mga miyembro sa Ang Simbahan ni Jesukristo sa mga Santos sa Ulahing mga adlaw.
Bisan og daghan nang mga katuigan ang milabay sukad niana, si Kent ug ako suod pa gihapon nga managhigala. Kaming duha nakaserbisyo og misyon, ug nagdungan mi og eskwela sa Brigham Young University. Malipayon kaayo ko nga nakahigayon ko sa pagpakigbahin sa ebanghelyo ngadto sa akong higala.
Paghulagway pinaagi ni Richard Hull