Ang Kasugiran sa Pagpadayag: Ang Hinay-Hinay nga Pagpadayag sa Buluhaton sa Seventy
Ngano nga ang pagpasabut sa kasaysayan sa Seventy importante karon? Tungod kay kini naghatag og usa ka sumbanan giunsa pagpadayag sa Ginoo ang Iyang kabubut-on alang sa Iyang Simbahan—ug alang sa atong tagsa-tagsa nga mga kinabuhi.
Niadtong Pebrero 8, 1835, si Joseph Smith mipahibalo ngadto kang Brigham ug Joseph Young nga iyang i-organisar ang Napulog Duha ka mga Apostoles ug ang Seventy sumala sa panan-awon nga iyang nadawat (tan-awa sa D&P 107).
Ang Propeta dayon miingon: “‘Ako manghinaut nga inyong ipahibalo sa tanan nga mga kaigsoonan nga nagpuyo sa mga branches, kutob sa maigo nga distansya gikan niini nga lugar, nga magpundok sa usa ka kinatibuk-ang komperensya sa sunod Sabado. Ako dayon ug didto mopili og napulog duha ka Linain nga mga Saksi, aron modala sa Ebanghelyo ngadto sa gawas sa mga nasud, ug ikaw,’ siya miingon (nagsulti ngadto kang Brother Brigham), ‘mahimong usa kanila.’ … Siya dayon milingi ngadto kang Elder Joseph Young uban sa kinasingkasing nga pagkahilum, sa ingon nga ang panan-awon sa iyang hunahuna nagpadayon pa, ug namulong ngadto kaniya, miingon, ‘Brother Joseph, ang Ginoo mihimo kanimo isip Presidente sa mga Seventy.’”
Bisan tuod nga ang mga Young nasayud sa pagkaanaa niining mga katungdanan sa priesthood sa Biblia, sa gihapon ang mga pulong sa Propeta “nakahimo niining managsoon sa pagkatingala.”1
Pagkasunod Sabado, Pebrero 14, ang mga miyembro sa Napulog Duha gipili ug gi-orden, ug paglabay sa duha ka mga semana ang Unang Korum sa Seventy usab gipili ug gi-orden.
Duha ka mga butang ang anaa gayud sa akong hunahuna nga piho kaayong importante kabahin sa kasaysayan sa Seventy nga makita niining unang pagtawag sa Seventy sa atong dispensasyon. (1) ang katungdanan sa Seventy gibase sa doktrina diha sa mga kasulatan ug (2) ang tahas sa Seventy dili mabulag ngadto sa misyon sa Napulog Duha. Samtang kita magtuon niining duha ka mahinungdanon nga mga punto, adunay ikatulo—kaparehas o kon dili mas importante nga punto—nahimong tataw: ang Ginoo mopadayag sa Iyang kabubut-on sa pagtulun-an human sa usa ka pagtulun-an, naghimo sa kasaysayan sa Seventy sa ulahing mga adlaw isip usa ka sumbanan sa pagpadayag alang sa Simbahan ug alang sa mga indibidwal.
1. Ang Katungdanan sa Seventy Gibase sa Doktrina diha sa mga Kasulatan
Ang unang nahisgot sa Seventy mao ang Daang Tugon nga instruksyon ngadto kang Moises ug “ang kapitoan ka mga anciano sa Israel” (Exodo 24:1).
Ang Ginoo miingon kang Moises nga gamiton ang Seventy aron siya dili mag-inusara nga magdala sa iyang mga palas-unon: “Tigumon mo alang kanako ang kapitoan katawo sa mga anciano sa Israel … magatindog sila didto uban kanimo” (Numeros 11:16).
Aron nga hustong mahatagan og gahum ang Seventy, ang Ginoo mikuha sa “espiritu” nga anaa kang Moises ug mihatag usab niini ngadto sa Seventy. “Sa diha nga mipabilin ang Espiritu diha sa ibabaw kanila, nanagpanagna sila, apan wala na sila managpadayon” (Numeros 11:25).
Ang Simbahan diha sa Bag-ong Tugon sa ingon naglangkub usab sa katungdanan sa Seventy. Ang Manluluwas mismo sa Iyang Kaugalingon mitawag ug misugo sa Seventy (tan-awa sa Lucas 10) sa paagi nga susama sa mga instruksyon nga Iyang gihatag ngadto sa Napulog Duha (tan-awa sa Mateo 10). Siya mipadala sa Seventy, nagpasabut nga “ang magpatalinghug kaninyo magapatalinghug kanako” (Lucas 10:16; tan-awa usab sa mga bersikulo 1–15).
Ang pagkaepektibo sa Seventy tataw kaayo samtang sila mireport sa ilang mga buluhaton, “miingon, Ginoo, bisan pa gani ang ang mga yawa nagapailalum nga masinugtanon kanamo tungod sa imong ngalan” (Lucas 10:17).
2. Ang Buluhaton sa Seventy Sumpay sa Misyon sa Napulog Duha
Ang mga buluhaton sa Seventy kabahin sa Napulog Duha nahimong piho kaayong tataw human sa Pagkabanhaw sa Manluluwas. Ang Simbahan mitubo pag-ayo nga ang Napulog Duha lamang dili makahimo nga mosagubang sa tanan nga mga panginahanglan sa mga katawhan. Sa dihang ang pipila misugod sa pagbagul-bul nga ang mga balo wala na atimana sa matag adlaw nga pagpanudlo, ang calling sa mga Seventy mitubag sa mga hagit sa pagtubo. Ang Seventy midala sa pipila ka mga palas-unon aron ang Napulog Duha dili mapasagdaan ang mga buluhaton nga sila lamang ang makahimo:
“Busa, mga igsoon, pagpili kamo og pito ka mga tawo diha kaninyo nga inyong hingmatud-an nga maayo, nga puno sa Espiritu Santo ug sa kinaadman, kinsa atong ipahimutang niini nga buluhaton.
“Ug kami [ang Napulog Duha] magapadayon sa pag-atiman sa pag-ampo, ug sa pag-alagad labut sa pulong” (Mga Buhat 6:3–4).
Kini nga sumbanan napahiuli pinaagi kang Propeta Joseph Smith, ug ang katungdnan sa Seventy nga may kalabutan ngadto sa katungdanan sa Napulog Duha nahimong klaro kaayo nga gipasabut sa modernong pagpadayag:
-
“Ang Seventy gitawag usab sa pagsangyaw sa ebanghelyo, ug mahimong linain nga mga saksi ngadto sa mga Hentil ug sa tibuok kalibutan” (D&P 107:25).
-
“Ang Kapitoan mao ang mobuhat sa ngalan diha sa Ginoo, ubos sa paggiya sa Napulog Duha o sa tigpanaw nga halangdon nga konseho, sa pagtukod sa simbahan ug pagdumala sa tanan nga mga kalihokan sa mao diha sa tanan nga mga nasud” (D&P 107:34).
-
Ang Napulog Duha sa “pagtawag sa Kapitoan, sa diha nga magkinahanglan sila og panabang, sa pagbutang og pipila ka mga katungdanan alang sa pagsangyaw ug pagpangalagad sa ebanghelyo, kay sa uban” (D&P 107:38).
-
Ang Seventy “natukod alang sa tigpanaw nga mga anciano sa pagpamatuod sa akong ngalan sa tibuok kalibutan, bisan diin ang tigpanaw nga halangdon nga konseho, akong mga apostoles, modala kanila aron mag-andam og agianan sa akong atubangan.” (D&P 124:139).
Ako masaligon nga ang matag Seventy karon naghunahuna niini nga usa ka dakong pribelihiyo nga makasuporta sa Unang Kapangulohan ug sa Korum sa Napulog Duha ka mga Apostoles. Ug usab ang mga Seventy nagtabang sa paghatag og tubag sa mga hagit sa nagtubo nga Simbahan. Samtang sa kinatibuk-an adunay 3 lamang ka mga miyembro sa Unang Kapangulohan ug 12 ka miyembro sa Korum sa Napulog Duha ka mga Apostoles, adunay mausab-usab [flexibility] sa ranggo ug gidaghanon sa Seventy.
3. Ang Ginoo Mopadayag sa Iyang Kabubut-on Pagtulun-an Human sa usa ka Pagtulun-an
Sa dihang sila miabot sa Walog sa Salt Lake, ang nag-una nga mga Santos, apil na ang mga Seventy, gipadala ngadto sa daghan nga mga pinuy-anan. Ang mga Seventy naorganisar ngadto sa gibana-bana og 30 ka korum. Tungod sa gilay-on nakahimo niini nga lisud, kon dili imposible, alang sa mga miyembro ug mga lider sa Seventy aron makigkita sa ilang orihinal nga mga korum.
Isip resulta niini nga kalisud, niadtong 1883 ang Unang Kapangulohan mainampuong nangandam og usa ka sinulat nga rekomendasyon kon unsaon ug sa unsang paagi nga ang Seventy kinahanglan nga pagatukuron.
Niadtong Abril 14, 1883, ang Ginoo midawat sa rekomendasyon ug mipadayag: “Unsa ang inyong gisulat mao ang akong kabubut-on, ug kini madawat ngari kanako: ug dugang pa … ayaw itugot nga ang inyong mga kasingkasing nga masamok, ni kamo mabalaka kabahin sa pagdumala ug pag-organisar sa akong Simbahan ug Priesthood ug ang katumanan sa akong buluhaton. Kahadluki ako ug sunda ang akong mga balaod ug Ako kining ipadayag nganha kaninyo, sa matag higayon, pinaagi sa mga pamaagi nga Akong gipili, ang tanan gikinahanglan alang sa kalamboan sa umaabot ug sa kahingpitan sa akong Simbahan, alang sa pagpahiangay ug sa kalamboan sa akong gingharian, ug sa pagtukod ug sa pag-establisar sa akong Zion.”2
Kini nga “matag higayon” nga sumbanan sa pagpadayag mahimong klaro pinaagi sa usa ka pagtuon sa kasaysayan sa Seventy—usa ka pagtuon nga mopakita giunsa ang calling, mga buluhaton, ug mga responsibilidad sa Seventy milambo sa pagtulun-an human sa usa ka pagtulun-an sumala sa pundasyon sa doktrina diha sa mga kasulatan. Si Presidente Boyd K. Packer, Presidente sa Korum sa Napulog Duha ka mga Apostoles, miingon nga ang hinay-hinay nga pagpadayag sa mga panghitabo sa organisasyon sa Seventy “mopamatuod sa usa ka talagsaon nga panalangin sa Dios ug usa ka sumbanan sa pagpadayag mismo.”3
Atong iribyu ang pipila lamang ka mga importanting kalamboan niining kasaysayan aron sa paghulagway niining sumbanan sa pagtulun-an human sa usa ka pagtulun-an.
Pag-organisar sa Seventy. Niadtong Pebrero 1835, sa dihang si Propeta Joseph mitawag sa unang mga Seventy niining dispensasyon, ang tanan kanila nahimong mga miyembro sa Zion’s Camp, ang grupo nga mimartsa gikan sa Ohio ngadto sa Missouri niadtong 1834 aron sa pagtabang sa mga Santos.
Elder B. H. Roberts (1842–1933) sa Seventy misulat nga kining pangalagad nagpasabut “nga ang kinaiya sa mga lalaki kinsa nakakab-ot niining mataas nga posisyon sa Priesthood sa Dios kinahanglan nga mga lalaki kinsa nakahimo og mga sakripisyo alang sa buluhaton sa Dios, o kinsa hingpit nga andam nga mohimo sa ingon niini nga mga sakripisyo, bisan sa pagtugyan sa ilang mga kinabuhi alang niini nga katuyoan.”4
Kalamboan sa Nauvoo. Samtang ang mga Santos nagpuyo sa Nauvoo, “ang gidaghanon sa Seventy hilabihan nga misaka. … Sa sinugdanan sa Enero, 1845, ang gidaghanon sa mga korum misaka ngadto sa katorse.” Paglabay sa usa ka tuig ang korum misaka ngadto sa 30.5
Pagpakatap sa Utah. Ang pagpakatap sa mga Seventy human ang mga Santos miabot sa Utah midala ngadto sa rekomendasyon sa Unang Kapangulohan niadtong 1883, nga nagmando nga ang mga miyembro sa Seventy mag-uban sa ilang kaugalingon sa usa ka korum nga anaa sa dapit asa sila nagpuyo.
Sama sa gisulti, ang Ginoo midawat sa rekomendasyon sa Unang Kapangulohan ug misaad nga samatag higayon, Siya mopadayon sa pagpadayag sa gikinahanglan nga mga kausaban. Ingon og ang kasugiran sa pagpadayag mao lamang ang sinugdanan!
Mga Korum sa Seventy sa mga Stake ug mga Misyon. Niadtong Abril 1953, sa dihang ang gidaghanon sa mga korum mga 500 na, ang Unang Kapangulohan, nabalaka kabahin sa pipila ka mga Seventy nga wala maapil sa usa ka korum, mipahibalo nga ang korum sa Seventy, pagadumalaon pinaagi sa pito ka mga presidente, kinahanglan nga i-organisar sa matag stake o misyon diin adunay 36 o labaw pa nga mga Seventy.6
Sa matag stake o misyon nga adunay ubos pa sa 36 ka mga Seventy, usa ka unit, kaysa usa ka korum, pagadumalaon pinaagi sa usa ka presidente ug duha ka mga magtatambag. Ang mga unit ug mga korum dayon giorganisar sa sunod-sunod nga mga numero aron malikayan ang pagkalibug. Niadtong 1974 ang mga unit sa mga Seventy gihunong, ug ang matag stake kinahanglan nga adunay usa ka korum. Ang mga presidency sa korum sa stake mialagad isip stake mission presidency.7
Sa una, niadtong Marso 1936, ang misyonaryo nga buhat naorganisar uban sa usa ka misyon sa usa ka stake. Kini nga mga misyon sa stake gidumala sa Unang Konseho sa Seventy, nga nagtrabaho pinaagi sa mga stake president.8
Pag-establisar og Balik sa Unang Korum sa Seventy. Oktubre 1975 nga kinatibuk-ang komperensya midala og usa ka dako nga labing importante nga panghitabo sa kasugiran sa pagpadayag. Si Presidente Spencer W. Kimball (1895–1985) mipahibalo sa pag-establisar og balik sa Unang Korum sa Seventy. Kini nga korum sa mga General Authority hinay-hinay nga giorganisar uban sa 70 ka mga miyembro ug Pito ka mga Presidente.9
Paglabay sa usa ka tuig, niadtong Oktubre 1976 nga kinatibuk-ang komperensya, ang Unang Korum sa Seventy mipalapad pinaagi sa pagdugang sa Unang Konseho sa Seventy ug ang mga Assistant ngadto sa Napulog Duha. Ang tanang mga miyembro sa Unang Korum giordinahan ngadto sa katungdanan sa high priest ingon man usab sa katungdanan sa Seventy.
Si Presidente Kimball mipasabut: “Tungod niini nga buhat, ang tulo ka nagdumala nga mga korum sa Simbahan gihulagway pinaagi sa mga pagpadayag—ang Unang Kapangulohan, ang Korum sa Napulog Duha ka mga Apostoles, ug ang Unang Korum sa Seventy —nahimutang na sa ilang sakto nga mga lugar sama sa gipadayag sa Ginoo. Kini mohimong posible nga makasarang nga modala sa bug-at nga buluhaton sa karon ug aron mangandam alang sa pagpalapad ug pagpas-pas sa buluhaton, nangandam sa adlaw kon ang Ginoo mobalik aron direktang modumala sa Iyang simbahan ug gingharian.”10
Paghunong sa mga Korum sa Stake. Niadtong Oktubre 4, 1986, ang tanang mga korum sa stake sa Seventy gihunong, ug ang mga Seventy sa lebel sa stake nahimong mga miyembro sa mga elders quorum o giorden ngadto sa katungdanan sa high priest. Ang katungdanan sa Seventy dayon gireserba lamang alang sa mga General Authority sa Simbahan.11
Pag-establisar sa Ikaduha nga Korum. Niadtong Abril 1, 1989, ang Ikaduha nga Korum sa Seventy gihimo.12 Kini gisugdan aron sa pagbutang sa saktong lugar sa duha ka mga Korum sa Seventy: ang Una mao ang mga General Authority kinsa gipang-release sa ilang calling apan gitugutan nga magpabilin ang titulo nga Seventy [emeritus] sa edad nga 70 ug ang Ikaduha mao ang lima ka tuig nga mga General Authority.
Calling sa mga Area Authority. Niadtong Abril 1995 nga kinatibuk-ang komperensya, ang tanang mga regional representative sa Napulog Duha gipang-release sugod Agosto niadtong tuiga, ug ang katungdanan sa Area Authority gipahibalo. (Ang Regional representative usa ka calling sa Simabahan nga gi-establisar niadtong 1967 aron sa pagbansay sa mga lider sa stake ug ward.)
Si Presidente Gordon B. Hinckley (1910–2008) miingon kabahin sa mga Area Authority: “Kini mao ang mga high priest nga gipili gikan sa nangagi ug karon nga sinati nga mga lider sa Simbahan. Sila mopadayon sa ilang pagpanarbaho karon, mopuyo sa ilang kaugalingong mga panimalay, ug moalagad sumala sa panginahanglan sa Simbahan nga gi-assign diha kaniya. Ang termino sa ilang call mahimong mausab-usab [flexible], sa kasagaran, sulod sa mga unom ka tuig. Sila mabinantayong magtrabaho uban sa mga area presidency.”13
Calling sa mga Area Seventy. Paglabay sa duha ka tuig, niadtong Abril 1997, si Presidente Hinckley mipahibalo nga ang mga Area Authority mahimong i-orden sa mga Seventy ug ilhon isip mga Area Authority Seventy (karon gitawag og mga Area Seventy). Kini mao ang sinugdanan sa usa ka mahinungdanon nga pagsaka sa gidaghanon sa mga Seventy ug sa ilang mga responsibilidad.
Si Presidente Hinckley mipasabut, “Isip mga Seventy sila gitawag aron sa pagsangyaw sa ebanghelyo ug mahimong usa ka linain nga mga saksi sa Ginoong Jesukristo sama sa gihan-ay sa mga pagpadayag.”14
Si Presidente Hinckley mipasabut nga kining mga Kaigsoonan adunay relasyon sa korum. Siya miorganisar sa Ikatulo, Ikaupat, ug Ikalima nga mga Korum sa Seventy sumala sa hiyograpiya.
Pagkasunod, ang mga Area Seventy misugod sa pagdumala sa mga member-missionary coordinating council (naglangkub sa mission president ug tanang mga stake president sa misyon). Sa kaulahian kini nga miting gipanganlan og lain isip coordinating council meeting, ug ang mga katuyoan gipalapdan aron sa pag-apil sa kadaghanan sa mga programa sa Simbahan ug sa nagkalain-laing mga problema sa daghang mga stake.
Gipalapdan nga mga Buluhaton sa Presidency sa Seventy Niadtong Abril 2004 ang mga miyembro sa Presidency sa Seventy gipang-release isip mga Executive Director sa punoang mga departamento sa punoang buhatan, ug ang ubang mga Seventy gi-assign niini nga mga posisyon. Human sa pipila ka mga bulan, niadtong Agosto 2004, ang Presidency sa Seventy misugod sa pagdumala sa tanang 11 ka mga area sa Simbahan sa North America ug sa pagtabang sa Napulog Duha sa pagdumala sa tanang internasyonal nga mga lugar.
Ang Presidency sa Seventy magsugod og miting uban sa tanang Napulog Duha matag Martes. Ang Napulog Duha makasalig sa Presidency sa Seventy samtang ang presidency mao ang “mopili sa lain nga mga kapitoan [ug] modumala ibabaw kanila” (D&P 107:95).
Ang Seventy Karon
Ang kasugiran sa pagpadayag sa pag-organisar ug mga buluhaton sa Seventy nagpadayon karon. Ang Unang Kapangulohan bag-ohay lang nga gihiusa ang internasyonal nga mga area sa Simbahan ug naghatag og mas daghan nga administratibo nga mga responsibilidad ngadto sa mga Seventy nga nangalagad sa mga Area Presidency.15
Giunsa kaha pagsabut ni Joseph Smith sa dihang siya mi-orden sa unang mga Seventy nga kining katungdanan molambo lakip sa, sa pagkakaron, 315 ka mga Seventy sa walo ka mga korum sa tibuok kalibutan? Ako mopamatuod nga si Joseph dili kinahanglan nga masayud tungod kay ang Ginoo nasayud ug unsa ang natukod ni Joseph mao ang pundasyon sa ulahing adlaw nga gibasi dinha sa mga doktrina sa mga kasulatan ug sa “panan-awon nga nagpakita sa kapunongan sa Kapitoan” (D&P 107:93).
Ang kamot sa Ginoo migiya sa hinay-hinay nga pagpadayag sa kasaysayan sa Seventy gikan sa sinugdanan ug sa matag sunod-sunod nga kalamboan nga naghimo sa katungdanan sa Seventy nga makasunod sa iyang titulo pinasubay sa kasulatan. Nganong magtuon niining hinay-hinay nga pagpadayag sa kasaysayan? Sama sa gipasabut ni Presidente Packer, kini “usa ka sumbanan sa pagpadayag mismo.” Pagtulun-an human sa usa ka pagtulun-an, ang Ginoo mipadayag sa Iyang kabubut-on alang sa Seventy, ug ako nasayud nga Siya mopadayon sa pagbuhat sa ingon alang sa Seventy—ug alang kaninyo ug kanako isip indibidwal nga mga miyembro sa Simbahan.
Sa wala sa ibabaw: Joseph Smith Nag-orden kang Parley P. Pratt isip usa ka Apostol, ni Walter Rane
Ang mga Seventy Gipadala, ni Del Parson
Gilitratohan ni Craig Dimond
Ibabaw, gikan sa wala: Ang unang mga miyembro sa Korum sa Napulog Duha ka mga Apostoles ug ang unang mga Seventy giorden niadtong Pebrero 1835. Ang pito ka mga presidente sa ika-30 nga Korum sa Seventy uban sa ilang secretary, mga 1890. Ang mga miyembro sa ika-88 nga Korum sa Seventy uban sa ilang mga pamilya, Marso 1897.
Ang Una ug Ikaduha nga mga Korum sa Seventy, 2006.