Mensahe sa Unang Kapangulohan
Ang Impluwensya sa Matarung nga mga Babaye
Ang kasulatan naghatag kanato og mga pangalan sa daghang mga babaye kinsa mipanalangin sa mga indibidwal ug mga henerasyon uban sa ilang espirituhanong mga gasa. Si Eva, ang inahan sa tanan nga adunay kinabuhi; Sara; Rebeca; Raquel; Marta; Elisabet; ug Maria, ang inahan sa atong Manluluwas, kanunay nga gipasidunggan ug gihinumduman. Ang mga kasulatan usab naghisgut og mga babaye kinsang mga pangalan wala nato mahibaloi apan mipanalangin sa atong mga kinabuhi pinaagi sa ilang mga ehemplo ug mga pagtulun-an, sama sa babayeng taga-Samaria kinsa nahimamat ni Jesus sa atabay sa Sychar (tan-awa sa Juan 4), ang sulundon nga asawa ug inahan nga gihulagway diha sa Proverbio 31, ug ang matinud-anong babaye kinsa naayo pinaagi lamang sa paghikap sa sapot sa Manluluwas (tan-awa sa Marcos 5:25–34).
Samtang kita magtan-aw sa kasaysayan niining yuta ug sa kasaysayan sa gipahiuli nga Simbahan ni Jesukristo, kini nahimong klaro nga ang mga babaye adunay espesyal nga luna sa plano sa atong Amahan alang sa walay katapusan nga kalipay ug sa kaayohan sa Iyang mga anak.
Ako nanghinaut nga ang akong pinalanggang mga kababayen-an sa tibuok kalibutan—mga lola, mga inahan, mga iyaan, ug mga higala—ayaw og ipakaubos ang gahum sa ilang pag-impluwensya alang sa kaayohan, ilabi na sa mga kinabuhi sa atong bililhon nga mga bata ug kabatan-onan!
Si Presidente Heber J. Grant (1856–1945) miingon, “Kon wala ang debosyon ug hingpit nga pagpamatuod sa buhi nga Dios diha sa mga kasingkasing sa atong mga inahan, kini nga Simbahan mahimong mamatay.”1 Ug ang manunulat sa Proverbio miingon, “Bansaya ang bata diha sa dalan nga iyang pagalaktan: ug bisan kong siya matigulang na, siya dili mobiya gikan niana” (Proverbio 22:6).
Si Presidente Gordon B. Hinckley mitambag ngadto sa kababayen-an sa Simbahan:
“Importante gayud kaayo nga ang mga babaye sa Simbahan mobarug nga malig-on ug dili matarug niana nga sakto ug tukma ubos sa plano sa Ginoo. …
“Gitawag namo ang mga babaye sa Simbahan sa pagbarug nga nagkahiusa alang sa pagkamatarung. Kinahanglan gayud nga sugdan nila sa ilang kaugalingong mga panimalay. Matudlo nila kini sa ilang mga klase. Masulti nila kini sa ilang mga komunidad.”2
Adunay usa ka sanglitanan nga ang dagko nga mga ganghaan molihok diha sa gagmay nga mga bisagra. Mga igsoon nga mga babaye, ang inyong ehemplo nga daw gamay nga mga butang makahimo og dako nga kalainan sa mga kinabuhi sa atong mga kabatan-onan. Ang paagi nga kamo magsinina ug manlimpyo sa inyong mga kaugalingon, ang paagi nga kamo mosulti, ang paagi nga kamo mag-ampo, ang paagi nga kamo magpamatuod, ang paagi nga kamo mopuyo matag adlaw makahimo og kalainan. Kini naglakip unsay inyong gitan-aw nga salida sa TV, unsa nga musika ang inyong mas gusto, ug giunsa ninyo paggamit ang Internet. Kon kamo ganahan nga moadto sa templo, ang mga kabatan-onan kinsa naghatag og bili sa inyong ehemplo ganahan usab nga moadto. Kon inyong ipahiangay ang inyong personal nga mga sinina ngadto sa temple garment ug dili ang laing bahin nga pinabali, sila makahibalo unsa ang inyong gihunahuna nga mas importante, ug sila makakat-on gikan kaninyo.
Kamo talagsaon nga igsoon nga mga babaye ug nindot kaayo nga mga ehemplo. Ang atong mga kabatan-onan napanalanginan tungod ninyo, ug ang Ginoo nahigugma kaninyo alang niana.
Usa ka Ehemplo sa Hugot nga Pagtuo
Tuguti ko sa pagpakigbahin og pipila ka mga panghunahuna kabahin ni Sister Carmen Reich, akong ugangan nga babaye, kinsa usa ka tinud-anay gayud nga pinili nga babaye. Siya kinasingkasing nga midawat sa ebanghelyo sa labing lisud ug sa labing magul-anon nga panahon sa iyang kinabuhi, ug siya nakahimo sa paglingkawas gikan sa tumang kaguol ug kasubo.
Isip usa ka batan-ong babaye—usa ka balo ug inahan sa duha ka batan-on nga mga babaye—siya nakalingkawas gikan sa kalibutan sa karaan nga mga tradisyon ug mibalhin ngadto sa usa ka kalibutan nga puno sa pagkaespirituhanon. Siya paspas nga matinud-anong midawat sa mga pagtulun-an sa ebanghelyo, uban sa intelektwal ug espiritwal nga gahum niini. Sa dihang ang mga misyoanryo mihatag kaniya sa Basahon ni Mormon ug midapit kaniya sa pagbasa sa mga bersikulo nga ilang gimarkahan, siya nakabasa sa tibuok basahon sulod lamang sa pipila ka mga adlaw. Siya nakakat-on sa mga butang labaw pa kaysa sa pagsabut sa iyang mga kaedad tungod siya nakakat-on niini pinaagi sa Espiritu sa Dios. Siya ang labing mapailubon sa tanang mapailubon; ang labing maalamon sa tanang maalamon, tungod siya andam ug adunay igong kaputli sa pagtuo sa dihang ang Dios misulti.
Siya nabunyagan niadtong Nobyembre 7, 1954. Sulod lamang sa pipila ka mga semana human sa iyang bunyag, siya gihangyo sa misyonaryo kinsa nagbunyag kaniya sa pagsulat sa iyang pagpamatuod. Ang misyonaryo gusto nga mogamit sa iyang pagpamatuod sa iyang pagtudlo aron sa pagtabang sa uban nga makabati sa tinuod nga espiritu sa pagkakabig. Swerte kaayo, ang misyonaryo mitipig sa orihinal nga sinulat sulod sa labaw sa 40 ka mga tuig, ug dayon iya kining giuli ngadto kaniya isip usa ka hilabihan ka espesyal ug gimahal nga regalo.
Usa ka Pagpamatuod Gikan sa Espiritu
Tuguti ko nga mopakigbahin uban kaninyo sa mga bahin sa iyang gisulat nga pagpamatuod. Palihug kanunay ninyong hunahunaon nga siya misulat niining mga pulong sa pipila lamang ka mga semana human siya nakadungog kabahin sa ebanghelyo. Sa wala pa moabut ang mga misyonaryo, siya wala gayud nakadungog sa bisan unsa kabahin sa Basahon ni Mormon, ni Joseph Smith, o sa mga Mormon sa kinatibuk-an. Niadtong 1954 wala pay mga templo gawas sa kontinente sa Estados Unidos, gawas lamang sa Canada ug Hawaii.
Kini mao ang hubad sa Iningles nga sinulat nga pagpamatuod ni Sister Reich:
“Espesyal nga mga kinaiya ang anaa sa Ang Simbahan ni Jesukristo sa mga Santos sa Ulahing mga Adlaw nga wala sa ubang mga komunidad sa tinuohan, labaw sa tanan, ang modernong pagpadayag nga gihatag pinaagi kang Propeta Joseph Smith.
“Ang Basahon ni Mormon sa iyang klaro ug putli nga pinulongan mao ang sunod, uban sa tanang mga instruksyon ug mga saad alang sa Simbahan ni Jesukristo; kini sa tinud-anay mao ang ikaduhang saksi, uban sa Biblia, nga si Jesukristo buhi.
“Nagkahiusa pinaagi sa hugot nga pagtuo diha sa usa ka personal nga Dios, nga mao ang, Dios Amahan, Dios Anak, ug ang Espiritu Santo, kinsa mitabang sa pag-ampo ug usab nag-impluwensiya sa personal nga paagi.
“Usab, hugot nga pagtuo sa kinabuhi sa wala pa dinhi sa yuta, ang kinabuhi sa wala pa dinhi sa yuta, ang katuyoan sa atong kinabuhi dinhi sa yuta, ug ang atong kinabuhi human sa kamatayon dako kaayo og bili para kanamo ug kini makapaikag kaayo ug makahatag og impormasyon. Kini klaro nga gipasabut, ug ang among kinabuhi nakadawat og bag-ong kahulugan ug direksyon.
Ang Simbahan naghatag kanato sa Pulong sa Kaalam isip usa ka giya sa paghimo sa atong lawas ug espiritu sa iyang labing hingpit nga porma aron matuman ang atong mga tinguha ug tumong. Aron atong mapadayon ang atong mga lawas nga himsug ug mopalambo niini. Kining tanan gikan sa kahibalo nga kita makaangkon pag-usab niini nga lawas human sa kamatayon sa sama nga porma.
“Bag-o gayud ngari kanako, siympre, mao ang buluhaton sa templo uban sa iyang daghang sagrado nga mga ordinansa, paghimo sa pamilya nga mag-uban hangtud sa kahangturan. Kining tanan gihatag pinaagi sa pinadayag ngadto kang Propeta Joseph Smith.”
Si Carmen Reich, ang akong pinalanggang ugangan nga babaye, namatay niadtong 2000 sa edad nga 83.
Ang Walay Sama nga Ilhanan sa Babaye
Ang mga kinabuhi sa mga babaye sa Simbahan gamhanan kaayo nga saksi nga ang espirituhanong mga gasa, mga saad, ug mga panalangin sa Ginoo ihatag niadtong tanan kinsa angayan, “nga ang tanan unta makaangkon og kaayohan” (D&P 46:9; tan-awa sa mga bersikulo 9–26). Ang mga doktrina sa gipahiuli nga ebanghelyo naghimo og usa ka talagsaon ug “walay sama nga timailhan sa pagkababaye nga nag-awhag sa mga babaye sa pagpalambo sa ilang mga abilidad” isip usa ka tinuod ug literal nga anak nga mga babaye sa Dios.3 Pinaagi sa pag-alagad diha sa mga organisasyon sa Relief Society, Young Women, ug Primary—wala pa mahisguti ang ilang pribadong mga buhat sa gugma ug pagserbisyo—ang mga kababayen-an kanunay adunay bahin ug sa kanunay makahimo og importanting bahin sa pagtabang sa “pagpadala ug pagtukod sa kahimoan sa Zion” (D&P 6:6). Sila nag-atiman sa mga kabus ug sa masakiton; nag-alagad sa pagproselyte, sa kaayohan, sa tawhanon, ug uban pang mga misyon; nagtudlo sa mga bata, batan-on, ug mga hamtong; ug nagdugang ngadto sa temporal ug espiritwal nga kaayohan sa mga Santos sa uban pang daghang mga paagi.
Tungod ang ilang potensyal alang sa maayo hilabihan ka mahinungdanon ug ang ilang mga gasa nagkalain-lain, ang mga babaye mahimong maana sa mga tahas nga mousab sa ilang mga kahimtang sa kinabuhi. Ang pipila sa mga kababayen-an, sa pagkatinuod, kinahanglang gayud nga mopuno og daghang mga tahas nga nagsunod-sunod. Tungod niini nga rason, ang mga babaye nga Santos sa Ulahing mga Adlaw giawhag sa pagkuha og edukasyon ug pagbansay aron sila makasarang alang sa homemaking ug sa pag-amuma og usa ka matarung nga pamilya ug sa pagpangita og panginabuhi gawas sa balay kon gikinahanglan sa kahigayunan.
Kita nagpuyo sa usa ka talagsaon nga panahon alang sa tanang mga babaye sa Simbahan. Mga igsoong babaye, kamo adunay importante kaayo nga bahin sa plano sa atong Langitnong Amahan alang sa walay katapusan nga kalipay; kamo gitugahan og usa ka balaan nga katungod sa pagkatawo. Kamo ang tinud-anay nga magtutukod og mga nasud bisan asa man kamo nagpuyo, tungod kay ang lig-on nga panimalay sa gugma ug kalinaw modala og kasiguradohan sa bisan unsa nga nasud. Ako nanghinaut nga unta kamo nakasabut niana, ug ako nanghinaut nga unta ang mga kalalakin-an sa Simbahan nakasabut usab niana.
Unsa ang inyong gipangbuhat karon mga kaigsoonan kong mga babaye motino unsa ang mga baruganan sa gipahiuli nga ebanghelyo makaimpluwensiya sa mga nasud sa kalibutan sa umaabot. Kini motino sa unsa nga paagi nga kining langitnong mga kahayag sa ebanghelyo modan-ag sa matag yuta sa umaabot.4
Bisan tuod kita sa kanunay naghisgut kabahin sa impluwensiya sa mga babaye sa umaabot nga mga henerasyon, palihug ayaw og ipakaubos ang impluwensiya nga inyong mahimo karon. Si Presidente David O. McKay (1873–1970) miingon nga ang nag-unang rason nga gitukod ang Simbahan mao “ang paghimo sa kinabuhi karon nga matam-is, sa paghatag og katagbawan sa kasingkasing karon, sa paghatag og kaluwasan karon. …
“Ang pipila kanato naglantaw sa unahan og usa ka panahon sa umaabot—kaluwasan ug kahimayaan sa umaabot nga kalibutan—apan ang karon mao ang kabahin sa kahangturan.”5
Mga Panalangin labaw pa kaysa Mahunahuna
Samtang kamo nagpuyo niini nga misyon, sa bisan unsang kahimtang sa kinabuhi inyong makita ang inyong kaugalingon—isip usa ka asawa, isip usa ka inahan, isip usa ka nag-inusara nga inahan, isip usa ka diborsyada nga babaye, isip usa ka balo o usa ka tigulang dalaga—ang Ginoo nga atong Dios maoy moabli sa mga responsibilidad ug mga panalangin nga labaw pa kaysa inyong abilidad sa paghunahuna.
Mahimo ba nga kamo akong dapiton sa pagkab-ot sa dakong potensyal nga anaa kaninyo. Apan ayaw kab-uta kadtong sobra pa sa inyong kapasidad. Ayaw paghimo og mga tumong nga sobra pa sa imong kapasidad sa pagkab-ot. Ayaw’g batia nga sad-an o magpabilin nga maghunahuna sa kapakyasan. Ayaw itandi ang imong kaugalingon sa uban. Buhata ang inyong labing maayo, ug ang Ginoo maoy mobuhat sa uban. Pagbaton og hugot nga pagtuo ug pagsalig diha Kaniya, ug inyong makita ang mga milagro nga mahitabo sa inyong kinabuhi ug sa mga kinabuhi sa inyong mga hinigugma. Ang hiyas sa inyong kaugalingon nga kinabuhi mahimong kahayag niadtong naglingkod sa kangitngit, tungod kay ikaw ang buhing saksi sa kahingpitan sa ebanghelyo (tan-awa sa D&P 45:28). Bisan asa man kamo nagpuyo niining maanindot apan sa kanunay nagkagubot nato nga kalibutan, ikaw mahimong mao ang “motabang sa maluyahon, ipataas ang mga kamot sa nawad-an og paglaum, ug lig-una ang mga tuhod nga mahuyang” (D&P 81:5).
Akong pinalanggang igsoong mga babaye, samtang kamo nagpuyo sa matag adlaw nga kinabuhi uban sa tanan nga mga panalangin ug mga hagit, akong ipaniguro kaninyo nga ang Ginoo nahigugma kaninyo. Siya nakaila kaninyo. Siya naminaw sa inyong mga pag-ampo, ug Siya motubag niadtong mga pag-ampo, bisan asa man kamong dapita niining kalibutan. Gusto Niya nga kamo magmalampuson niini nga kinabuhi ug sa kahangturan.
Mga igsoong lalaki, ako nag-ampo nga kita isip mga naghupot sa priesthood—isip mga bana, mga amahan, mga anak nga lalaki, mga igsoon lalaki, ug mga higala niining pinili nga mga kababayen-an—nga unta kita makakita kanila sama sa pagtan-aw sa Dios kanila, isip anak nga mga babaye sa Dios nga adunay walay kinutuban nga potensyal sa pag-impluwensya sa kalibutan alang sa kaayohan.
Sa sayo nga mga adlaw sa Pagpahiuli, ang Ginoo nakigsulti ngadto kang Emma Smith pinaagi sa iyang bana, nga si Propeta Joseph Smith, naghatag kaniya og mga instruksyon ug mga panalangin: “[Mag] matinud-anon ug maglakaw sa mga agianan nga maligdong diha sa akong atubangan. … Ikaw kinahanglan nga dili mahadlok. … Ikaw mosalikway sa mga butang niini nga kalibutan, ug pangitaa ang mga butang nga maayo. … Ipataas ang imong kasingkasing ug paglipay. … Ug ang korona sa pagkamatarung ikaw makadawat” (D&P 25:2, 9, 10, 13, 15).
Niini nga pinadayag, ang Ginoo mideklarar, “Kini ang akong tingog ngadto sa tanan” (bersikulo 16).
Sa kaulahian, si Propeta Joseph Smith misulti sa igsoon nga mga babaye, “Kon kamo magpuyo sumala sa inyong mga pribelihiyo, ang mga anghel dili mapugngan nga mahimo ninyong mga kauban.”6
Niining mga kamatuoran ako mopamatuod, ug akong ihatag kaninyo ang akong gugma ug akong panalangin isip Apostol sa atong Manluluwas, ang Ginoong Jesukristo.
Alang Niining Bata Ako Nag-ampo, ni Elspeth Young; sa luyo © Getty Images
Paghulagway sa litrato pinaagi ni Matthew Reier; gisukip Tinapay sa Kinabuhi, ni Julie Rogers
Gisukip: Liso sa Hugot nga Pagtuo, ni Jay Bryant Ward