Au Paia Ia Olaola Pea le Konafesi i le Olaga i Aso Taitasi

Ua outou faafofoga i savali; ua outou lagonaina le Agaga; ua outou tautino atu e mulimuli i fautuaga. Peitai, o lea ua mae’a le konafesi aoao, e faapefea ona e faia ia avea ma vaega o lou olaga mo le isi ono masina?

Ua faasoa mai e tagata o le Ekalesia i le salafa o le lalolagi ni mea e fesoasoani ia i latou ia manatua ai ma faatino ia savali o le konafesi aoao.

Ia Faaaofia ai le Konafesi Aoao i Lou Olaga mai lea Aso i lea Aso

Faalogologo i lauga a’o fai au faamalositino, ave lau taavale, fai au feau, pe sauniuni foi mo le aso.

—James, Ontario, Kanata

Ia feauaua’i tagata o le aiga e filifili ni lauga e faalogologo i ai i le taimi o le malutaeao.

—Ashlee, Uosigitone, ISA

Matamata o se aiga i vaega o le konafesi aoao i Aso Sa.

—Grant, Kalefonia, ISA

Ia Avea Iauga o se Vaega o Afiafi Faaleaiga

Filifili ni savali e te manao e faamanatu o se aiga, ma atofa i tagata o le aiga e aoao atu i afiafi faaleaiga o le a sosoo ai.

—Vern ma Jennifer, Iuta, ISA

Faitau pe matamata foi i se lauga ma vaavaai ni sini e mafai ona outou galulue ai o se aiga.

—Tony, Arizona, ISA

Faaaoga ia Lauga mo Suesuega o Tusitusiga Paia

Fesuisuia’i ia tusitusiga paia i le taeao ae faitau se lauga o le konafesi aoao i le afiafi.

—Diane, Uosigitone, ISA

Faitau atu se lauga i lau fanau i po taitasi e fai ma tala e faamomoe ai.

—Heather, Iuta, ISA

Su’e ia mau faasino o lauga taitasi pe a uma ona e faitauina lauga taitasi.

—Becky, Iuta, ISA

Maka mea uma o loo talosaga patino mai ai le au failauga tatou te faia ma taulai atu i ai mo le mulimulita’ia o a latou fautuaga.

—Helen, Ausetalia

Suesue e Ala i Autu

Fai se lisi e fetaui ma autu na talanoaina i le konafesi aoao, ma mea e te manao e faaleleia o lou olaga. Suesue auaua’i ia autu a’o e taumafai e faaleleia oe lava a’o lei oo mai le isi konafesi aoao.

—Rebecca, Texas, ISA

Taulai atu i se autu faapitoa i le taimi o lau suesuega o tusitusiga paia mo ni nai aso, po o afiafi faaleaiga mo ni nai vaiaso.

—Francis, Nigeria

Faasoa atu Savali i Isi

Tuu ni upusii o le konafesi aoao i luga o puletini a le Ekalesia ma tufaaga.

—Todd, West Virginia. ISA

Talimalo pe auai i se kalapu tusi o le konafesi aoao, i luga o le initoneti pe fesootai i ai oe lava. I vaiaso taitasi, suesue se lauga se tasi ma e alu i le kalapu tusi ua e saunia e faasoa mea ua e iloa.

—Stephanie, Iuta, ISA