O Le Mana e Liua ai o le Faatuatua ma Uiga Tauleleia

Saunia e Elder Richard G. Scott

O Le Korama a Aposetolo e Toasefululua

O se olaga amiotonu faifai pea, e fua mai ai se mana i totonu ma le malosi e mafai ai ona tumau le puipuiga mai aafiaga faataumaoi o le agasala ma le solitulafono.

Pe a malamalama lelei i le faatuatua ma faaaoga tatau, e i ai ona taunuuga malolosi ma le mamana. E mafai e le faatuatua ona suia le olaga o se tagata mai gaoioiga lē gaoiā masani ma le taatele o aso uma e oo atu i se faatufugaga iloga o le olioli ma le fiafia. O le faatinoga o le faatuatua e taua tele i le fuafuaga o le fiafia a le Tama o i le Lagi. Ae o le faatuatua moni, faatuatua i le faaolataga, ua taulai atu i le Alii o Iesu Keriso, faatuatua i Ana mataupu faavae ma aoaoga, faatuatua i taitaiga faaperofeta a auauna faauuina a le Alii, faatuatua i matafaioi e iloa ai uiga ma amioga masani o loo natia e mafai ona suia ai le olaga. E moni lava, o le faatuatua i le Faaola o se mataupu faavae o le faatinoga ma le mana.

O le faatuatua o se elemene faavae o le foafoaga. Ou te mautinoa o loo faaaogaina e le Faaola o Iesu Keriso le faatuatua i Lana matafaioi e galue ai i lalo o le taitaiga a le Tama o i le Lagi. Na faaaoga e le Matai e foafoa ai vanimonimo sili ona vavamamao faapea ma le fatuina o elemene ninii, o elemene aupito i iti o mea ua tatou iloa i nei aso. Ae e i ai lou faatuatua o loo i ai lava isi elemene fatufatua’i o mea i le ofoofogia o le foafoaga.

O le faatuatua i le lumanai o loo faailoa mai e se ulugalii ua faamauina i le malumalu. Ua la malamalama e ala i le usiusitai i aoaoga a Iesu Keriso ma le fuafuaga o le fiafia a lo tatou Tama o i le Lagi, e mafai ai ona la maua faatasi se olaga fiafia. Ua la iloaina pe a oo atu luitau ia ua faamoemoeina e avea ma avanoa e tuputupu ae ai, o le a la maua ni auala, e pei ona uunaia ai e le Agaga Paia, e faatoilaloina ai luitau i ni auala e manuia ai ma fausia ai uiga tauleleia.

O le faatuatua ma uiga tauleleia e aiga lelei lava. O le faatuatua i le mana o le usiusitai i poloaiga a le Atua o le a tupu mai ai le malosi o uiga tauleleia tou te mauaina i taimi e manaomia vave ai se fesoasoani. O ia uiga e le atiina ae i taimi o luitau tetele po o faaosoosoga. O le taimi tonu lava lena ua faamoemoe e faaaoga ai. O le faaaogaina o lou faatuatua i aoaoga faavae moni e fausia ai ou uiga tauleleia; o le faamalolosia o uiga tauleleia e faateleina ai lou gafatia e faaaoga le faatuatua. O se taunuuga, o le a faateleina lou mana ma le mautinoa e faatoilalo ai tofotofoga o le olaga. O le tele o le faamalosia o ou uiga tauleleia, o le tele foi lena o lou manuia mai le faaaogaina o le mana o le faatuatua. O le a e iloa ai le auala e galulue faatasi ai le faatuatua ma uiga tauleleia e faamalosia ai le tasi ma le isi. O uiga tauleleia e lalagaina ma le onosai mai filo o aoaoga faavae, o mataupu faavae, ma le usiusitai o loo faaaogaina.

Sa saunoa mai Peresitene Hugh B. Brown: “I soo se mea i le olaga o loo faatalitali ai tulaga faatauaina maoae faaleagaga i tulaga talafeagai o se tagata, ua na o le faatuatua lava ua talafeagai ai mo ia tulaga faatauaina. E le mafai ona ola se tagata e aunoa ma le faatuatua, aua i le malaga o le olaga, o le faafitauli totonugalemu lava, o le fausiaina o uiga tauleleia—lea e le o se fua o le atamai faalemafaufau, ae o le fua o le faatuatua i faautaga sili ma le taulagaina o le tuuto atu i na [fua o le faatuatua]” (i le Lipoti o le Konafesi, Oke. 1969, 105). Tatou te faatinoina le faatuatua e ala i galuega. Na saunoa mai Iosefa Samita e faapea “o le faatuatua [o le] mataupu faavae o faatinoga ma le mana” (Lectures on Faith [1985], 72).

Tatou te avea ma tagata tatou te mananao ia avea ai e ala i lo tatou avea ai pea lava pea ma tagata tatou te mananao ia avea ai i aso taitasi. O uiga tauleleia amiotonu o se faailoaga taua lea o le ituaiga tagata ua avea ai oe. O le uiga tauleleia amiotonu e sili atu ona taua nai lo au meatotino, soo se malamalama ua e maua e ala i le suesue, po o soo se sini ua e ausia tusa lava po o le a le tele o lona patipatia e tagata. I le olaga a sau, o le a iloiloina ai ou uiga tauleleia amiotonu e fuafua ai po o le a le lelei na e faaaogaina ai le avanoa o le olaga faitino.

E le mafai e le mana o Satani po o se isi lava mana ona faatamaiaina pe faavaivaia ou uiga tauleleia ua faatuputeleina. E na o oe lava e mafai ona faia lena mea e ala i lou lē usitai. O se uiga ua matua tauleleia, e liua i le lefulefu lē aoga pe a tafiesea e le taufaasese po o le solitulafono.

O uiga tauleleia malosi e afua mai i filifiliga sa’o faifai pea i faigata ma tofotofoga o le olaga. O ia filifiliga e faia i le faalagolago i mea e talitonuina ma pe a faatinoina, e faamautuina.

O a nisi o aoaoga faavae mamana o faavae ai le faatuatua?

• Faalagolago i le Atua ma i Lona naunautai e tuuina mai le fesoasoani pe a manaomia, e tusa lava po o le a le faigata o le tulaga e i ai.

• Usiusitai i Ana poloaiga ma se olaga e faailoa mai ai e mafai ona Ia faatuatuaina oe.

• Ia iloa gofie uunaiga mālū a le Agaga Paia.

• Faatinoina ma le lototoa o lena uunaiga.

• Onosai ma le malamalama pe a tuu atu e le Atua e te tauivi ina ia e tuputupu a’e ai, ma pe a auaua’i mai ia tali mo se taimi umi.

“O le faatuatua o le mea lea ua faamoemoe i ai, a e le o vaaia; o lea aua le fefinauai ai ona ua le vaaia e outou, aua e le maua e outou se mau, seia uma le tofotofoina o lo outou faatuatua” (Eteru 12:6). O le mea lea, o taimi uma lava e te “tofotofoina ai lou faatuatua”—o lona uiga, galue i le agavaa i se uunaiga—o le a e mauaina le faamaoniga mautu a le Agaga. A o e faatinoina se mea e tusa ai ma lou malamalama aupito sili i mea, ae e te le o mautinoa lava po o le a le mea e fai, o le faatinoga o le faatuatua, o le a taitai atu lava oe ia e maua ni tali semanu e te le mauaina. Tusa lava pe matuai malosi lou faatuatua, o le a le tauia vave oe e le Atua i taimi uma e tusa ai ma ou manaoga. Ae, o le a tali atu lava le Atua i le mea o i Lana fuafuaga e faavavau e aupito sili mo oe, pe afai e mapuna mai ai se aoga aupito sili. Ia tumu lou loto i le faafetai ona o nisi taimi e faataga ai e le Atua ona e tauivi mo se taimi umi a o lei oo mai lena tali. O iina e afua ai ona faateleina lou faatuatua ma faatupulaia ai ou uiga tauleleia.

O le faavae o uiga tauleleia o le amiosa’o. O uiga tauleleia agavaa o le a faamalosia ai lou gafatia e iloa ai le taitaiga a le Agaga ma usitai i ai. O lou faaaogaina pea lava pea o le faatuatua e fausia ai uiga tauleleia malolosi. O se faavae mautu mo ou uiga tauleleia faatupulaia ua faataatiaina e ala i le avea o Iesu Keriso ma Ana aoaoga ma totonugalemu o lou olaga.

O lou fiafia i le lalolagi, faapea foi lou faaolataga e faavavau, e manaomia ai le tele o faaiuga sa’o, e leai lava se tasi e faigata ona faia. Faatasi ai ma na filifiliga e fafau ai se uiga tauleleia e tetee atu i faatosinaga faataumaoi o le agasala ma le solitulafono. O uiga tauleleia faatamalii e pei lava o se omea taua ua fausia mai mea faalenatura filifilia, ua fausia i le faatuatua, ua mamanu ma le faaeteete i faatinoga amiotonu fai fai pea, ma faamuina i le ogaumu o aafiaga siitia. O se meafaitino e matagofie tele ma le taugata. Ae e mafai lava ona faaleagaina i sina taimi puupuu e ala i le solitulafono, e manaomia ai taumafaiga tetele ma le tiga e toe faaleleia ai. Ae pe a malupuipuia e le lotopulea, o le a tumau ai pea uiga tauleleia amiotonu mo le faavavau.

E le mafai e oa o le lalolagi ona fua mai ai le fiafia ma le lotomalie ma le olioli o le ausiaina i le lalolagi. E le taitaiina atu ai foi i tatou i le faaeaga. O le tamalii o uiga, o le malosi lea i totonu ma le talitonuga maumaututu e ala i le faia o le anoanoai o faaiuga amiotonu, e maua ai e le olaga lona taitaiga. O se olaga amiotonu faifai pea, e fua mai ai se mana i totonu ma le malosi e mafai ai ona tumau le puipuiga mai aafiaga faataumaoi o le agasala ma le solitulafono. O lou faatuatua ia Iesu Keriso ma le usiusitai i Ana poloaiga o le a faamalosia ai lou uiga tauleleia. O lou uiga tauleleia o se fuataga lea o le tagata o le a avea ai oe. O le faamaoniga o le lelei o lou faaaogaina o lou taimi i le lalolagi i lenei vaitau faata’ita’i i le olaga nei.

O se faaupuga ua tatou malamalama uma lava i ai e faapea, o le mea e te totogia o le mea foi lena e te maua. E tonu foi lena mea i mataupu faaleagaga. E te maua le mea sa e totogia i le usiusitai, i le faatuatua ia Iesu Keriso, i le faaaogaina ma le maelega o upumoni ua e aoaoina. O le mea e te mauaina o le mamanuina o ou uiga tauleleia, o le faatupulaia o lou mana, ma le faamaeaina ma le manuia o lou faamoemoega ina ia tofotofoina, ma ia maua le olioli.

E le mafai ona e faalolololo i le olaga, po o le taimi foi o le a faavaivaia ai e le tagata o le lalolagi au taumafaiga e ola agavaa. O mea e te faia ma mea e te mafaufau i ai e avea ai oe. O le leai o ni uiga tauleleia e taitai atu ai se tasi o vevesi le mafaufau e faamalieina le manao po o le saili o ana lava mea. E le mafai ona e apoapoina ma le faamanuiaina se uiga vaivai i se pulupulu o mea faafoliga.

I taimi e faia ai e se tasi ia filifiliga e tusa i tulaga ua i ai, e mautinoa a’ia’i lava le faia o soligatulafono matuia. Ua leai se ai uamea o le upumoni e taofia ai lena tagata i le ala sa’o. O le a ia faaauau pea ona feagai ma le tele o faaosoosoga faatauvaa ia e faia ai ni ’alofaga mai poloaiga. O na filifiliga ua faamaoniaina e ala i le finauina e faapea e le leaga tele, e taliaina e le lautele ma o loo maua ai se faapotopotoga lautele o uo. O se tagata atamai e aunoa ma aoaoga faavae mautu e mafai i nisi taimi ona maua, ae le tumau, ma le faagaeetia ni mea na ausia. Ae o lena mea na ausia e pei lava o se fale e fau i le oneone. Pe a oo mai tofotofoga o uiga tauleleia, e olopalaina, e masani lava ona ave faatasi atu ai ma isi. E tusa lava po o le a le faaeteete i fea o se tagata agasala e taufiufi le solia o poloaiga, ae e i ai lava taimi e masani lava ona toetoe a faaalia faalauaitele. O loo iloa e Satani lava ia lena mea. O ia ma ana vaega ua naunau e faatupua le tiga uiga ese i fanau taitasi a le Tama i le Lagi. E tasi lava se faatinoga matuia o le le usitai po o le solia o le faatuatuaina e le taumatea lava le fesiligia pe faamata o i ai ma nisi. O le faatuatua ma le mautinoa o isi i uiga tauleleia o lena tagata ua faavaivaia.

O lenei olaga o se nofoaga e tofotofo ai. Po o le a le lelei o le a outou faafetaia’ia ai ona luitau e iloa ai po o le a le malosi o le a i ai ou uiga tauleleia. O lou faatuatua ia Iesu Keriso ma Ana aoaoga o le a faamalosia ai ou uiga taueleleia.

Ua ou faamanino patino atu ia mataupu e pei o le faatuatua, tatalo, alofa, ma le lotomaualalo e leai se taua tele ma e le tutupu ai ni vavega sei vagana ua avea ia mea ma se vaega ola o i tatou e ala i o tatou lava aafiaga, ua fesoasoani mai ai uunaiga malu a le Agaga Paia. A o ou talavou sa ou iloa e mafai ona ou aoaoina ia aoaoga o le talalelei ma le atamai ma, e ala i le mana o le mafaufau ma auiliiliga, e iloa ai o na mea e i ai so latou taua tele. Ae o lo latou mana tele ma le tomai e tosoina ai au i tala atu o tapulaa o ou mafaufauga ma le gafatia e lei avea ma se mea moni seia oo ina faatinoina e le aunoa ma le onosai lea na faatagaina ai le Agaga Paia e tatala mai ma faalauteleina lo latou uiga i lou loto. Sa iloa ai a o ou auauna atu ma le faamaoni i isi, na suia e le Atua ou uiga tauleleia patino. Sa Ia faatupuina se gafatia tuputupu ae e iloa ai le taitaiga a le Agaga. O le atamai o le fuafuaga o le talalelei e faapea, e ala i le faia o na mea ua apoapoai mai ai le Alii ia i tatou e fai, ua tuuina mai ai ia i tatou le malamalama uma ma gafatia uma e manaomia e maua ai le filemu ma le taunuuga sili i lenei olaga. E faapena foi, tatou te maua le sauniuniga e tatau ai mo le fiafia e faavavau i le afioaga o le Alii.

E faamalosia se molimau e ala i uunaiga faaleagaga lea e faamautu ai le aoga o se aoaoga, po o se faatinoga amiotonu. E tele taimi e faafeao mai ai lena taitaiga e lagona mamana lea e aumaia ai loimata i mata ma faigata ai ona tautala. Peitai, o se molimau e le o se lagona. O le fatu tonu lava lea o le uiga tauleleia, e lalagaina mai filo e maua mai i faaiuga sa’o e le mafaitaulia. E faia nei filifiliga faatasi ma le faatuatua moni i mea e talitonu i ai, ae e le o vaaia. O se molimau malosi e aumaia ai le filemu, mafanafana, ma se faamautinoaga. Na te fatua’ia le talitonuga maumaututu e faapea, a usita’ia pea lava pea ia aoaoga a le Faaola, o le a matagofie le olaga, mautu le lumanai, ma o le a tatou maua le gafatia e faatoilalo ai luitau e faasalaveia lo tatou ala. E tupu se molimau mai le malamalama i le upumoni, e faasolosolo mai e ala i le tatalo ma le mafaufau loloto i aoaoga faavae faatusi paia. E faafaileleina e ala i le ola ai i na upumoni faatasi ai ma le faatuatua e taulaina i le mautinoa maumaututu, o le a maua lava taunuuga folafolaina.

O le a faamalosia lau molimau e ala i le usiusitai naunautai i le tulafono o le sefuluai ma le tuuina atu o taulaga anapogi, ma o le a faamanuiaina tele ai oe e le Alii mo le faia o na mea. A o faamalosia lau molimau, o le a faapena ona taumafai malosi foi Satani e faaosoosoina oe. Ia e teenaina ana taumafaiga. O le a e malosi atili ma o ana faatosinaga ia te oe o le a faavaivaia.

O le faatosinaga faateleina a Satani i le lalolagi, ua faatagaina ina ia saunia ai se siosiomaga e tofotofoina ai i tatou lava. E ui lava ina ia faamatua’ia le faatafunaga i le taimi nei, ae ua uma ona faamautu lona taunuuga e Iesu Keriso e ala i Lana Togiola ma le Toetu. O le a le manumalo lava le tiapolo. E oo lava i le taimi lenei, e tatau ona gaoioi o ia i totonu o tuaoi ua faataatia e le Alii. E le mafai ona ia aveeseina faamanuiaga ua uma ona galulue ai mo le mauaina. E le mafai ona ia fesuia’ia uiga tauleleia ua uma ona lalagaina mai faaiuga amiotonu. E leai sona mana e faatamaia ai noataga o le faavavau na faatinoina i se malumalu paia i le va o se tane, ava, ma le fanau. E le mafai ona ia faaumatia le faatuatua moni. E le mafai ona ia aveesea lau molimau. Ioe, e mafai ona leiloloa nei mea e ala i le gauai atu i ana faaosoosoga. Peitai, e leai sona mana na te faaumatiaina ai.

O se aotelega:

• E faaaoga e le Atua lou faatuatua e mamanu ai ou uiga tauleleia.

• O uiga tauleleia o le faailoaga lea o le ituaiga tagata ua avea ai oe.

• O uiga tauleleia malolosi e afua mai i le faia e le aunoa o filifiliga sa’o.

• O le faavae o uiga tauleleia o le amiosa’o.

• O le tele lava o le faamalosiaina o ou uiga tauleleia, o le tele foi lena o lou mafai ona faaaoga o le mana o le faatuatua.

O le lotomaualalo o le uiga ‘au’au mama lea e faatagaina ai i tatou ina ia aoaoina mai luga e ala i le Agaga po o le aoaoina mai punaoa ia e muai mauaina mai musumusuga a le Alii, e pei o tusitusiga paia ma saunoaga a le au perofeta. O le lotomaualalo o le eleele lelei taua lea o uiga tauleleia amiotonu. I totonu o le eleele lelei lea e tutupu ae mai ai fatu o le tuputupu ae patino. Pe a tausia e ala i le faaaogaina o le faatuatua, ma teuteuina i le salamo, ma faamalosia e ala i le usitai ma galuega lelei, o ia fatu o le a fua mai ai fua faapelepeleina o le taitaiga faaleagaga. Ona maua ai lea o musumusuga faalelagi ma le mana—o musumusuga e iloa ai le finagalo o le Alii, o le mana e maua ai le tomai e faataunuu ai lena finagalo musuia.

Pe mafai ona ou faasoa atu ia mataupu faavae e fa ua ou maua ai lagona aupito loloto o le filemu ma le fiafia i lo’u olaga? Na faatuina e le Alii nei maatulimanu i Lana fuafuaga o le faavavau, ma e taua uma lava. E galulue faatasi uma ma fefaamalosia’i e le tasi le isi. Pe a faaaogaina pea lava pea i le maelega, latou te aumaia le malosi o uiga tauleleia, faateleina ai le tomai e faaliliu ai luitau o le olaga e avea ma faapogai o le fiafia i le taimi nei ma le faavavau. O ia maatulimanu o:

• Faatuatua i le Alii o Iesu Keriso ma Lana polokalama e maua ai le mana e ausia ai.

• Salamo e faaleleia ai taunuuga o mea sese ona o le lē faia po o le faia.

• Usiusitai i poloaiga a le Alii ia maua ai le malosi ma le taitaiga i o tatou olaga.

• O auaunaga lē manatu faapito e faatamaoaigaina ai olaga o isi.

Afai ua e fuafua e te ola amiotonu, aua nei e lotovaivai. Atonu e foliga mai e faigata le olaga i le taimi nei, ae ia e pipiimau i le ai u’amea o le upumoni. O loo lelei lou alualu i luma nai lo le mea lena e te iloa. O loo faaleleia e au tauiviga ou uiga tauleleia, amio pulea, ma le talitonuga i folafolaga a lou Tama i le Lagi ma le Faaola, pe a e usiusitai e le aunoa i a La’ua poloaiga. Ia uunaia oe e le Agaga Paia ina ia e faia pea e le aunoa faaiuga ia e faamalosia ai ou uiga tauleleia, ma fua mai ai le olioli ma le fiafia tele, i le suafa o Iesu Keriso, amene.