Kalayo nga Nagdilaab sa Akong Kahiladman
Sa adlaw nga siya nakat-on sa pagbasa mao usab ang adlaw nga si Eduardo nakabaton og pagpamatuod sa Basahon ni Mormon ug sa gahum niini.
“Ang akong lolo kanunayng moingon, ‘Kon kita gusto nga mahimong inila nga tawo, kinahanglan kita nga makat-on sa pagbasa,’” miingon si Eduardo Contreras. “Husto ang akong lolo.”
Alang ni Eduardo, hinoon, ang dalan sa pagbasa hilabihan ka taas. Isip usa sa lima ka mga anak nga gipadako sa iyang biyuda nga inahan sa siyudad sa Córdoba, Argentina, miundang siya og eskwela sa dihang nag-edad siya og otso para motrabaho aron motabang sa pagsuporta sa iyang pamilya.
“Kabus kaayo kami,” nahinumdom siya. Sa pagtabang nga matubag ang mga panginahanglan, si Eduardo nanglimpyo og mga sapatos, naghimo og mga brick, namu-po og mga patatas, namaligya og mga newspaper, ug nagtrabaho sa temporaryo nga mga trabaho hangtud, isip usa ka batan-ong lalaki, nakakita siya og full-time nga trabaho sa gobyerno sa siyudad.
Sa pagpanglabay sa katuigan, si Eduardo naminyo ug nagsugod og iyang kaugalingong pamilya. Sa dihang ang kadaghanan sa iyang lima ka mga anak nagsugod na og biya sa panimalay, dili pa gihapon siya kahibalong mobasa ug adunay gamay kaayo nga purohan nga makat-on unsaon. Kana nausab usa ka adlaw sa dihang iyang gigukod ang pipila ka batan-ong mga lalaki sa ilang dapit nga nagbugal-bugal sa duha ka mga misyonaryo nga mga Santos sa Ulahing mga Adlaw diha sa atubangan sa iyang panimalay. Iyang gipasulod ang mga misyonaryo, ug wala madugay siya ug ang iyang asawa, si María, naminaw sa mga hilisgutan.
“Naglisud ko og sabut sa tanan nga ilang gisulti tungod kay dili kaayo sila makasulti og Kinatsila,” nahinumdom si Eduardo, “apan gipakita ko nila og pamphlet nga adunay mga hulagway sa Manluluwas ug ni Propeta Joseph Smith sa Sagrado nga Kakahoyan. Naghunahuna ko nga ang mga hulagway nga ilang gipakita kanamo ug ang mga butang nga ilang gitudlo kanamo maanindot.”
Wala madugay kadto nga mga misyonaryo napulihan og lain, nga naglakip sa usa ka lumad nga Kinatsila ang sinultihan. Sila si Eduardo ug María, nga namatyan og gamayng anak nga babaye pipila ka tuig na ang milabay, natandog sa salida sa Simbahan nga Families Are Forever. Sila, kauban ang ilang kinamanghurang anak nga lalaki, si Osvaldo, wala madugay nabunyagan.
Sa bunyag ni Eduardo niadtong 1987 miabut ang tinguha sa pagpalig-on sa iyang pagpamatuod pinaagi sa pagbasa sa Basahon ni Mormon. “Unsaon nako nga makat-on og basa?” nangutana siya sa iyang asawa. Giingnan siya ni María nga motan-aw sa mga letra, isumpay kini sa iyang hunahuna, maningkamot sa paglitok sa mga pulong, ug dayon mosulay sa pagbasa og kusog. Pinaagi sa pagpraktis, siya mipaniguro kaniya, sa kadugayan makat-on ra siya og basa.
Si Eduardo, nga nianang higayuna 45 anyos, kahibalo sa mga tono sa daghang mga letra, apan wala pa siya makasulay sa pagbasa sukad sa pag-undang og eskwela hapit upat ka dekada na ang milabay.
Gibati Nako ang Kalayo
Uban sa pag-ampo sa iyang kasingkasing, si Eduardo milingkod usa ka adlaw niana sa init nga summer sa landong nga dapit sa luyo sa iyang panimalay. “Didto,” miingon siya, “determinado ko nga mosulay.”
Si María miingon nga dili siya katuo sa sunod nga nahitabo. Samtang aduna siyay gibuhat sa kusina, naminaw siya og putol-putol samtang si Eduardo misulay sa paglitok sa mga letra ug mga pulong. “Sa kalit lang nadunggan nako siya nga paspas nga misulti,” miingon siya. “Naminaw ko ug nakaamgo nga nagbasa diay siya—maayo na kaayo. Wala kaabut og tunga sa oras ang milabay, ug nagbasa na siya!”
Si Eduardo hilabihan nga nalingaw sa iyang pagpaningkamot nga wala na niya namatikdi nga nagbasa na siya. Apan samtang nagbasa siya, nahinumdom siya, “Gibati nako ang kalayo nga nagdilaab sa akong kahiladman.” Nahadlok ug nahingangha, gitawag ni Eduardo ang iyang asawa, “Mami, unsay nahitabo nako?”
“Mao kana ang Espiritu sa Ginoo,” mitubag si María. “Maayo na kaayo ka nga mobasa!”
Samtang nahinumdom siya sa kasinatian, miingon si María, “Usa kadto ka butang nga dili gayud namo ikalimud.”
Midugang si Eduardo, “Sa adlaw nga ako nakat-on sa pagbasa mao usab ang adlaw nga ako nakabaton og pagpamatuod sa Basahon ni Mormon ug sa gahum niini.”
Sukad niana, si Eduardo momata na og alas 4:00 sa buntag aron magbasa sa Basahon ni Mormon sa dili pa motrabaho. Dayon gibasa niya ang Doktrina ug mga Pakigsaad, sunod ang Biblia. Usa ka librarya ang makita karon sa panimalay sa mga Contreras, diin adunay pipila lamang ka mga basahon nga makit-an sa wala pa ang 1987.
Samtang ang kahibalo nila ni Eduardo ug María sa ebanghelyo mitubo, mao usab ang ilang mga pagpamatuod. Sa dihang ang ilang anak nga lalaki nga si Osvaldo namatay human sa usa ka aksidente sa kadalanan pagka-2001, ang ilang mga pagpamatuod—inubanan sa gamhanan nga espirituhanong mga kasinatian atol sa pag-ampo ug didto sa Templo sa Buenos Aires Argentina, diin sila ug si Osvaldo nabugkos—nakatabang kanila sa pag-atubang sa ilang problema.
“Tingali ang uban nga mga ginikanan mabuang,” miingon si Eduardo, “apan gibati namo ang kalinaw nga nag-ingon, ‘Maayo ra ang inyong anak.’ Siyempre mihilak kami. Buotan siya nga anak, ug gimingaw mi niya. Apan nabugkos kami sa templo, ug nasayud kami kon asa siya.”
Ang Kahayag sa Kahibalo [Literacy]
Salamat sa pagtudlo sa usa ka miyembro sa iyang ward, si Eduardo nakat-on usab sa pagsulat. “Kaniadto,” miingon siya, “Dili gani ko makapirma sa akong pangalan.”
Uban sa kahayag sa kahibalo [literacy], nasabtan ni Eduardo ang kamatuoran sa mga pulong sa iyang lolo.
“Ania kita dinhi sa yuta aron kita mouswag og ginagmay matag adlaw,” miingon siya. Pinaagi sa pagkat-on sa pagbasa ug pagsulat, dugang niya, nagpakita siya sa iyang mga anak ug mga apo nga dili pa gayud ulahi nga makat-on, molambo, ug mahimong unsay gusto sa Dios nga kita mahimo. “Tungod kay makabasa na ko, nakat-on ko og bag-o nga butang matag adlaw,” miingon siya.
Karon si Brother Contreras makabasa na og bisan unsa nga gusto niyang basahon, lakip na ang newspaper nga kaniadto iyang gibaligya isip usa ka bata nga dili kahibalong mobasa ug mosulat. Ang mga kasulatan nagpabilin nga iyang paboritong mga basahon, ilabi na ang Basahon ni Mormon. Nabasa na niya kini gikan sa sinugdanan hangtud sa katapusan sulod sa walo ka higayon.
“Alang kanako ang Basahon ni Mormon mao ang pultahan,” miingon siya, mapasalamaton gihapon kon sa unsang paagi nga ang kahibalo [literacy] ug ang ebanghelyo nakapausab sa iyang kinabuhi. “Ang Basahon ni Mormon mao ang tanan alang kanako. Kini ang tanan alang kanako. Bation nako ang Espiritu sa matag higayon nga ablihan ko kini aron magbasa.”
Alang kang Eduardo Contreras, gilitratohan sa ibabaw uban sa iyang asawa, si María, ang Basahon ni Mormon mao ang pultahan ngadto sa kahibalo [literacy]. “Bation nako ang Espiritu sa matag higayon nga ablihan ko kini aron magbasa,” miingon siya.
Gilitratohan ni Michael R. Morris