Kon Kamo Gusto Gayud nga Masayud, Kamo Masayud

Ni Elder Walter F. González

Sa Kapangulohan sa Seventy

Gibati nako ang walay katapusan nga pasalamat tungod sa Basahon ni Mormon. Nakapausab kini sa akong kinabuhi sa kahangturan, ug nasayud ko nga kini makapausab sa inyong kinabuhi.

Nag-edad ko og 18 sa dihang namiyembro ko sa Simbahan. Ang Basahon ni Mormon adunay mahinungdanong bahin sa akong pagkakabig. Nianang higayuna, nangita ko og bag-ong mga ideya nga makapasabut kabahin sa kalibutan sa akong palibut. Akong nahinumduman ang akong mga propesor sa kolehiyo nga migamit sa kalibutanong mga paagi sa ilang pagtudlo. Misugod ko og salig sa dili matuohon nga mga ideya mahitungod sa presensya sa Dios.

Usa ka adlaw akong namatikdan ang usa ka sky-blue nga basahon nga gibilin sa duha ka mga misyonaryo sa among panimalay mga unom ka tuig na ang milabay. Kadto mao ang Basahon ni Mormon. Kauban sa basahon, nagbilin sila og usa ka pamphlet mahitungod ni Propeta Joseph Smith ug pipila usab ka mga instruksyon kon unsaon sa pag-ampo ngadto sa Dios.

Misugod ko sa pagbasa sa Basahon ni Mormon. Mga pipila pa lamang ko ka mga bersikulo sa basahon, sa 1 Nephi, sa dihang mibati ko og lahi. Misugod ko sa pakiglantugi tali sa akong mga pagbati ug sa akong kahibalo. Busa nakahukom ko sa pagpangutana sa Dios diha sa pag-ampo.

Mao kadto ang unang higayon sa akong kinabuhi nga nag-ampo ko nga nagluhod. Ang kasinatian nga misunod nahimong usa sa labing sagrado sa akong kinabuhi. Ang pagbati sa ingon niana nga hilabihan nga kalipay mipuno kanako nga ako nasayud sa akong kasingkasing nga ang Basahon ni Mormon labaw pa sa usa ka basahon. Usa kini ka basahon nga adunay balaanong gigikanan. Pulong gayud kini sa Dios. Wala madugay akong nasabtan nga ang pagbati mao ang Espiritu nga nagpamatuod sa kamatuoran niini.

Bisan kon ang uban adunay susama nga mga kasinatian, adunay lain-laing mga paagi nga ang usa ka tawo masayud nga ang Basahon ni Mormon tinuod.

Unsaon Ninyo Pagkasayud?

1. Ang uban masayud pinaagi sa pagpaminaw. Tingali usa kamo niadtong kinsa masayud pinaagi lamang sa pagpaminaw sa unsay gitudlo sa basahon. Ang Basahon ni Mormon naghisgut mahitungod sa liboan ka mga tawo nga naminaw sa anak nga mga lalaki ni Mosiah nga nagtudlo sa ebanghelyo ni Jesukristo ug “nakabig ngadto sa Ginoo” (tan-awa sa Alma 23:5–6). Ang mga misyonaryo karon nagtudlo nianang sama nga ebanghelyo nga makita diha sa Basahon ni Mormon. Ang uban masayud nga ang Basahon ni Mormon pulong sa Dios pinaagi lamang sa pagpaminaw sa uban nga nakigbahin sa mga pagtulun-an niini.

2. Ang uban masayud pinaagi sa pagbasa. Tingali usa kamo niadtong kinsa masayud pinaagi lamang sa pagbasa sa Basahon ni Mormon nga adunay tinud-anay nga tinguha nga masayud sa kamatuoran. Ingon niana ang nahitabo sa akong asawa. Nag-edad siya og 12 sa dihang kinasingkasing niyang gidawat ang instruksyon sa pagbasa sa basahon gikan sa sinugdanan hangtud sa katapusan. Samtang gihimo niya kini, iyang nasayran nga kini tinuod. Hilabihan ka kusog sa pagbati nga, samtang nagbasa siya, nakahukom siya nga mosunod sa Manluluwas hangtud sa kahangturan. Nagpabilin siyang matinud-anon sa iyang gibati.

3. Ang uban masayud pinaagi sa pagbuhat. Tingali usa kamo niadtong masayud pinaagi lamang sa pagbuhat sa mga butang nga gitudlo sa basahon. Ang ubang mga tawo nakaangkon sa ilang mga pagpamatuod pinaagi sa pagbuhat (tan-awa sa Juan 7:17). Si Nephi, usa ka propeta sa Basahon ni Mormon, nakasabut kaayo niini nga baruganan. Misulat siya nga aron “labaw nga makadani kanila sa hingpit sa pagtuo diha sa Ginoo nga ilang Manunubos … ako mipahisama sa tanan nga mga kasulatan ngari kanato, nga kini unta mahimo alang sa atong kaayohan ug sa atong pagkat-on” (1 Nephi 19:23; empasis gidugang). Pinaagi sa pagpahisama, o paggamit, sa mga pagtulun-an sa Basahon ni Mormon sa inyong kaugalingong kinabuhi, kamo usab mahimong madani sa balaanong gigikanan niini.

4. Ang uban masayud pinaagi sa pagpangutana sa Dios. Tingali usa kamo niadtong masayud pinaagi sa pagbasa sa Basahon ni Mormon ug dayon sa pagpangutana sa Langitnong Amahan diha sa pag-ampo kon ang basahon tinuod ba. Mao kini ang akong nasinati. Mao kini ang makapadasig nga saad nga gihatag sa laing propeta sa Basahon ni Mormon, si Moroni, ngadto sa tanang tinud-anay nga nangita sa kamatuoran: “Tan-awa, ako moawhag kaninyo nga kon kamo mobasa niini nga mga butang … nga kamo mangutana sa Dios, ang Amahan sa Kahangturan, sa ngalan ni Kristo, kon kini nga mga butang dili ba tinuod; ug kon kamo mangutana sa kinasingkasing, uban sa tinuod nga katuyoan, nga may hugot nga pagtuo kang Kristo, siya mopakita sa kamatuoran niini nganha kaninyo, pinaagi sa gahum sa Espiritu Santo” (Moroni 10:3–4). Ako mopamatuod nga kon kamo mobasa ug mag-ampo mahitungod sa Basahon ni Mormon, nga nagsunod sa mga gimando ni Moroni, kamo masayud nga kini tinuod.

Ang Dios Misaad nga Kamo Masayud

Kon kamo gusto gayud nga masayud, kamo masayud nga ang Basahon ni Mormon tinuod. Ang Dios misaad nga ihatag kini nga kahibalo ngadto sa matinud-anon nga mga nangita sa kamatuoran, ug Siya mao “ang Dios sa kamatuoran, ug dili magbakak” (Ether 3:12).

Ang laing propeta sa basahon ni Mormon, si Alma, mitudlo sa iyang anak nga lalaki nga ang Dios misaad nga Siya “moamping [niini nga basahon] alang sa usa ka maalamon nga katuyoan diha kaniya, nga siya unta makapakita sa iyang gahum ngadto sa umaabut nga mga kaliwatan. Ug karon tan-awa, usa ka katuyoan ang iyang natuman, gani ngadto sa pagpahiuli sa daghan nga mga kaliboan … ngadto sa kasayuran sa kamatuoran; ug siya mipakita sa iyang gahum diha kanila, ug siya usab mopakita gihapon sa iyang gahum dinha kanila ngadto sa umaabut nga mga kaliwatan; busa [kini nga basahon] mopadayon” (Alma 37:18–19).

Kanang sama nga makadani nga gahum makit-an karon dinhi niining usa ka volume sa kasulatan, ug ang Ginoo mopakita niini ngadto ni bisan kinsa nga tinuoray nga nagtinguha nga masayud. Makasulti ko niini uban sa kasiguroan samtang motan-aw ko og balik niadtong mga panahon sa dihang nagkat-on pa ko mahitungod sa Simbahan. Karon, tungod sa makapadani nga gahum sa Basahon ni Mormon, ako mopamatuod nga ang Basahon ni Mormon pulong sa Dios, nga kini nagtudlo nga si Jesus mao ang Kristo, ang Balaan nga Mesiyas. Ang basahon makita nga ebidensya nga ang Pagpahiuli sa Iyang ebanghelyo nahitabo ug nga si Joseph Smith usa ka propeta sa Dios.

Kon usa kamo niadtong tinuoray nga nangita sa kamatuoran, ang Ginoo misaad nga kamo masayud. Mahimo kamong masayud pinaagi sa pagpaminaw sa mga pagtulun-an sa basahon, pinaagi sa pagbasa sa basahon, pinaagi sa pagbuhat unsay gitudlo sa basahon, pinaagi sa pag-ampo aron masayud sa kamatuoran niini, o pinaagi sa kombinasyon niini nga mga elemento. Apan masayud kamo.

Saad ni Moroni

Sa katapusan sa Basahon ni Mormon, usa ka propeta nga ginganlan og Moroni nagsaad nga kon kita mobasa sa Basahon ni Mormon, mamalandong sa mensahe niini diha sa atong mga kasingkasing, ug mangutana sa Dios diha sa pag-ampo kon kini tinuod ba, ang Dios motubag kanato pinaagi sa gahum sa Espiritu Santo (tan-awa sa Moroni 10:3–5).

Ang personal nga pagpadayag para sa kaugalingon lamang. Moabut kini sa lain-laing mga paagi ug sa lain-laing mga panahon ngadto sa matag usa kanato sumala sa kabubut-on sa Ginoo. Ang pagsabut sa mosunod nga mga baruganan makatabang kaninyo nga masayud sa inyong kaugalingon.

1. Hunahunaa Kini

Sa wala pa modapit kanato sa pag-ampo, si Moroni nagdapit kanato sa pagpamalandong. Ang pagpamalandong nagpasabut nga hunahunaon kini og maayo. Pangutan-a ang inyong kaugalingon: Unsay akong gibati kon magbasa ko sa Basahon Mormon? Nganong gibati ko man kana? Unsay akong nakat-unan? Maayo ba kini?

Ang Ginoo mitudlo niini nga baruganan ngadto ni Oliver Cowdery: “Ikaw wala maghunahuna gawas sa pagpangutana kanako. Apan, tan-awa, Ako moingon nganha kanimo, nga ikaw kinahanglan gayud nga magtuon niini diha sa imong hunahuna; unya ikaw kinahanglan nga mangutana kanako kon kini husto” (D&P 9:7–8; empasis gidugang).

2. Pag-ampo sa Makugihong Paagi

Ang pag-focus sa atong mga hunahuna ug ang paghunahuna og maayo sa hilum nga mga tubag sa Espiritu Santo nagkinahanglan og paningkamot sa hunahuna. Tingali mao kini ang hinungdan nganong si Enos diha sa Basahon ni Mormon naghisgut mahitungod sa iyang pag-ampo isip usa ka “pagpakigbisog … atubangan sa Dios” (Enos 1:2).

Kon kamo magbasa, mamalandong, o mag-ampo, pangita og oras ug dapit nga wala kaayoy makabalda kon mahimo. Pangita og kaadtoan nga makatabang kaninyo nga makahunahuna og maayo. Ang pag-ampo og kusog makatabang nga ma-focus ang inyong mga hunahuna.

3. Pangutana og Husto nga mga Pangutana

Ang Ginoo miingon kang Oliver Cowdery nga dili lang mangutana kondili mangutana kon ang butang nga iyang gihunahuna husto ba. Kasagaran, ilabi na kon kita wala pa makasulay sa pagdawat og mga tubag gikan sa atong Langitnong Amahan, mas daling masabtan ang tubag sa usa ka yano nga oo o dili nga pangutana.

“Ang yawe sa maayo nga pag-ampo mao ang pagkat-on sa paghimo og husto nga mga pangutana,” miingon si Elder Richard G. Scott sa Korum sa Napulog Duha ka mga Apostoles.¹

4. Unsa ang Inyong Katuyoan?

Usa sa mga yawe ngadto sa saad ni Moroni mao nga kita mangutana uban sa “tinuod nga katuyoan.” Sa dihang ang 14 anyos nga si Joseph Smith miadto sa kakahoyan aron mag-ampo, “siya nag-ampo uban sa tuyo nga dili lamang sa pagpaminaw apan sa pagtuman,” miingon si Presidente Henry B. Eyring, Unang Magtatambag sa Unang Kapangulohan. “… Ug tungod sa iyang kamatinud-anon, sa mga adlaw ug mga bulan ug mga tuig nga miabut ang iyang mga pag-ampo gitubag uban sa hilabihang kahayag ug kamatuoran.”²

5. Ayaw Kini Palabya

Dili tanan nga pagpadayag katingalahan. Ang uban nga mga tawo adunay mga damgo, mga panan-awon, o mga pagbisita. Apan kadaghanan kanato makasinati og morag hilum ug tulugkaron, sama sa init, malinawon nga pagbati.

Si Presidente Spencer W. Kimball (1895–1985), ika-12 nga Presidente sa Simbahan, mitudlo, “Nagpaabut sa katingalahan, ang usa ka tawo mahimong dili hingpit nga makabantay sa makanunayong pagdagayday sa gipadayag nga komunikasyon.”³

Unsaon Nako sa Pagkasayud

Bisan og nabunyagan ko sa edad nga nuybe, ang akong pamilya dili aktibo sa Simbahan. Apan sa dihang nag-edad ko og 13, ang mga misyonaryo midapit kanako sa pagsimba, ug gibuhat nako kini. Mitambong usab ako sa seminary. Ang kurso nga tun-anan mao ang Doktrina ug mga Pakigsaad, nga morag nakapalibog kanako. Naglisud gayud ko kabahin ni Joseph Smith ug sa Basahon ni Mormon. Gusto kong makakaplag sa Dios, apan dili ko sigurado kon unsaon ug asa.

Sa dugay nga panahon nagsige ko og hunahuna mahitungod sa panagsultihanay uban sa mga misyonaryo. Naghunahuna ko mahitungod sa seminary. Naghunahuna ko mahitungod sa panagsultihanay nako uban sa mga miyembro ug sa uban nga Kristohanong mga tinuohan. Usahay nag-ampo ko nga masayud unsay husto, apan naglabi ang lumalabay nga hunahuna kay sa sinsero nga pangutana. Dayon usa ka gabii nakahukom ko nga mag-ampo uban sa “tinuod nga katuyoan.”

Misulti ko sa Langitnong Amahan nga gusto ko nga makaila Kaniya ug mahimong kabahin sa Iyang tinuod nga Simbahan. Misaad ko: “Kon Ikaw motugot kanako nga masayud kon si Joseph Smith tinuod ba nga propeta ug kon ang Basahon ni Mormon tinuod, akong buhaton bisan unsa nga gusto Nimong ipabuhat kanako. Kon Ang Simbahan ni Jesukristo sa mga Santos sa Ulahing mga Adlaw mao ang tinuod nga Simbahan, mosunod ko niini ug dili gayud moundang niini.”

Walay katingalahan nga pagpakita ngari kanako, apan gibati nako ang kalinaw ug dayon natulog. Pipila ka oras ang milabay nahigmata ko nga may lahi nga hunahuna: “Si Joseph Smith tinuod nga propeta, ug ang Basahon ni Mormon tinuod.” Ang hunahuna giubanan og dili mahulagway nga kalinaw. Nakatulog ko og balik, nga nahigmata na usab nga may sama nga hunahuna ug pagbati.

Sukad nianang higayuna, wala na gayud ako magduha-duha nga si Joseph Smith tinuod nga propeta. Nasayud ko nga kini buhat sa Manluluwas ug nga ang Langitnong Amahan motubag sa atong sinsero nga mga pangamuyo.

Rodolfo Armando Pérez Bonilla, El Salvador