Sa Matag Pinulongan ug Katawhan
Sa dihang ang propeta sa Basahon ni Mormon nga si Alma mitugyan sa mga rekord sa iyang katawhan ngadto sa iyang anak nga lalaki nga si Helaman, iyang gisugo ang iyang anak nga lalaki sa paghinumdom nga ang Ginoo adunay “usa ka maalamon nga katuyoan” sa pagpreserbar sa mga kasulatan (Alma 37:12). Siya miingon kabahin sa mga rekord, “Sila kinahanglan nga ampingan ug ihatag gikan sa usa ka kaliwatan ngadto sa lain … hangtud motungha ngadto sa matag kanasuran, kaliwatan, pinulongan, ug mga katawhan” (Alma 37:4).
Niadtong 1827 si Joseph Smith nakadawat niadto nga mga rekord ug pagka-1829 mihuman sa paghubad niini ngadto sa Iningles pinaagi sa gasa ug gahum sa Dios. Ang basahon, nga gimantala niadtong 1830, usa ka gamhanan nga himan sa misyonaryo sa pagkombinser sa mga mambabasa sa pagkatinuod sa ebanghelyo ni Jesukristo. Sa sinugdanan adunay 5,000 ka mga kopya nga gimantala, hinoon, ang pagpadala sa Basahon ni Mormon “sa matag kanasuran, kaliwatan, pinulongan, ug mga katawhan” mora og imposible pa.
Gihapon, ang Ginoo mimatuod niini nga pagpadayag ngadto kang Joseph Smith niadtong 1833, nanagna sa adlaw nga “ang matag tawo makapaminaw sa kahingpitan sa ebanghelyo sa iyang kaugalingon nga dila, ug sa iyang kaugalingon nga pinulongan” (D&P 90:11). Ang Basahon ni Mormon, nga “naglakip … sa kahingpitan sa ebanghelyo ni Jesukristo” (D&P 20:9), adunay importante nga bahin sa katumanan niini nga panagna.
Sa tunga-tunga sa mga 1800 ang mga misyonaryo midala sa ebanghelyo ngadto sa Europe. Ang Basahon ni Mormon gimantala sa Danish niadtong 1851, gisundan sa mga edisyon sa French, German, Italian, ug Welsh niadtong 1852. Karon ang tibuok Basahon ni Mormon anaa na sa 82 ka mga pinulongan, uban sa pinili nga mga kapitulo sa laing 25 ka mga pinulongan. Ang panagna nga ang tanang katawhan makadungog sa ebanghelyo sa iyang kaugalingon nga pinulongan nahitabo matag tuig ug ang misyonayo nga buhat magpadayon.
Ang Buhat sa Paghubad
Ang proseso sa paghubad sa Basahon ni Mormon gikan sa Iningles ngadto sa usa ka bag-ong pinulongan usahay molungtad og daghang tuig aron makompleto. Ang proseso magsugod lamang kon ang Unang Kapangulohan ug ang Korum sa Napulog Duha ka mga Apostoles moaprubar sa proyekto ug adunay igong gidaghanon sa mga miyembro kinsa lumad nga mamulong sa pinulongan nga magsilbing mga tighubad. Ang mga tighubad ug tig-ribyu gihatagan og makuti nga mga sumbanan ug giawhag nga magpabiling duol sa Espiritu samtang sila maghubad. Pagkahuman og hubad, ang teksto moagi og proseso sa ecclesiastical review.
Pagkahuman og mantala, ang mga miyembro maka-order sa bag-ong edisyon pinaagi sa Distribution Services. Sa una kadaghanan niini nga mga miyembro adunay pinili lamang nga mga kapitulo sa Basahon ni Mormon sa ilang pinulongan o, ang uban, adunay mga pagpamatuod lamang sa mga misyonaryo.
Ang Basahon ni Mormon ug ang Misyonaryo nga Buhat
Kon ang lugar unang maabli alang sa misyonaryo nga buhat, ang mga pinulongan mahimong maoy dako kaayo nga hagit. Nga walay gimantala nga mga materyal sa Simbahan sa pinulongan niana nga area, ang mga misyonaryo kinahanglan nga magkat-on sa pinulongan ug mopamatuod pinaagi sa Espiritu. Sa pipila ka mga bahin sa kalibutan, daghang mga tawo ang mamulong og ikaduha nga pinulongan, ug ang mga misyonaryo makahatag kanila og Basahon ni Mormon niana nga pinulongan. Pananglitan, sa wala pa ang Basahon ni Mormon gimantala sa Mongolian, daghang mga miyembro sa Mongolia nagtuon sa Russian nga edisyon.
Apan ang ebanghelyo masabtan pag-ayo sa kapamilyar ug kaklaro gamit ang lumad nga pinulongan sa usa ka tawo. Si Eric Gemmell, kinsa miserbisyo sa Slovenia Ljubljana Mission niadtong 2001 hangtud 2003, mismong nakakita sa kalainan nga nahimo niini alang sa mga miyembro ug mga investigator nga anaa na ang Basahon ni Mormon sa ila gayud nga pinulongan. Siya nakaserbisyo sa unang 18 ka bulan sa iyang misyon sa wala pa maanaa sa pinulongan nga Slovenian ang Basahon ni Mormon.
Ang buhat lisud. Ang unang branch sa Simbahan natukod pagkahuman lamang sa usa ka dekada. Ang Slovenia bag-ohay lamang nga nahimong gawasnon ug anaa sa proseso sa pagpawala sa daang pinulongan sa estado nga Serbo-Croatian. Ang mga misyonaryo nagdala og mga kopya sa Basahon ni Mormon sa pinulongan nga Serbo-Croatian ug Iningles, nga kadaghanang gitun-an sa mga batan-on sa eskwelahan. Apan kasagaran, ang mga tawo mobalibad sa basahon tungod kay dili sila makasabut sa bisan asa niini nga pinulongan. Si Eric nakahinumdom kon unsa ka haw-ang nga magpamatuod ngadto sa mga tawo sa katalagsaon ug kaimportante sa Basahon ni Mormon—ug dayon mosulti kanila nga siya walay kopya niini sa ilang pinulongan.
Unom ka bulan sa wala pa mouli si Eric, ang unang pagpadala og mga kopya sa Slovenian nga Basahon ni Mormon miabut. Ang branch nag-miting diin ang matag miyembro ug misyonaryo nakadawat og kopya. “Adunay espesyal nga diwa sa palibut,” si Eric nakahinumdom. Siya mirekord sa iyang journal kon unsa ang bation nga magkupot sa ingon ka talagsaon, dugay nang gipaabut nga basahon. “Sama kini sa pagkupot sa mga palid nga bulawan mismo,” siya misulat. Human sa miting, ang mga misyonaryo midala sa nahibiling mga basahon aron gamiton sa misyonaryo nga buhat. Si Eric ug ang iyang kompanyon naghiman-hinam pag-ayo sa dihang sila miabut sa ilang apartment, ilang giablihan ang mga karton, gikatag ang mga basahon, ug gilitratohan kini sa paghinumdom sa hitabo. Dili sila makapaabut sa pagpakigbahin sa basahon ngadto sa mga tawo. Gamit ang Basahon ni Mormon sa pinulongang Slovenian, wala lamang mahimong mas malampuson ang mga misyonaryo sa pagduol sa katawhan, apan sila may paagi usab sa pagbag-o sa mga pagpamatuod sa dili kaayo aktibo nga mga miyembro sa simbahan kinsa wala na mosimba sulod sa mga katuigan.
Sa katapusang unom ka bulan sa iyang misyon, si Eric nakakita nga milambo ang mga pagpamatuod sa mga miyembro nga Slovenian. “Sa dihang ilang naangkon ang Basahon ni Mormon sa ilang lumad nga pinulongan,” siya miingon, “sila gayud nakasabut niini. Kini midulot gayud sa ilang mga kasingkasing.” Sa una, ang mga mamumulong ug ang mga magtutudlo sa mga miting sa Simbahan kinahanglang mobasa sa kasulatan sa Serbo-Croatian ug adunay usa ka tawo nga mohubad ug mopasabut sa pipila ka mga pulong. “Mora og kami hinay nga nagkat-on gamit ang hiniluman nga mga pulong gikan sa laing pinulongan,” si Eric nakahinumdom. Sa dihang ang mga miyembro misugod sa pagbasa sa Basahon ni Mormon sa ilang lumad nga pinulongan, “ang ilang pagsabut sa ebanghelyo milambo diha-diha dayon,” nakahinumdom si Eric.
Sa Ilang Kaugalingon nga Pinulongan
Si Mojca Zheleznikar mao ang usa niadtong mga miyembro kinsa namiyembro sa Simbahan sa Slovenia sa wala pa ang Basahon ni Mormon sa pinulongan nga Slovenian. Ang iyang pagpamatuod mahitungod sa ebanghelyo miabut pinaagi sa pagpaminaw sa mga misyonaryo ug sa pagtuon sa Basahon ni Mormon sa pinulongan nga Croatian ug Iningles. Pagkahuman sa hubad sa Slovenian, si Mojca nagbasa sa gihubad nga teksto ug mibati sa gahum sa mga pulong sa iyang lumad nga pinulongan. “Akong gibati ang kamatuoran nga mikuyanap kanako sa tataw nga kayano ug katulukibon nga kalunsay,” siya nahinumdom. “Ingon og ang tingog sa akong Tiglalang nakigsulti kanako sa akong kaugalingon nga pinulongan, sa pinulongan nga gipamulong sa akong inahan ngari kanako.”
Ang mga miyembro sa tibuok kalibutan nakasinati og susama nga mga pagbati sa dihang ilang nadawat ang Basahon ni Mormon sa ilang pinulongan. Niadtong 2003, human nga ang Basahon ni Mormon mahubad ngadto sa Kekchi, pinulongan nga gipamulong sa mga katawhan nga Maya sa Guatemala ug Belize, ang mga tighubad miribyu sa hubad uban sa grupo sa lokal nga mga miyembro. Usa sa mga tighubad nahinumdom, “Among gipundok ang usa ka grupo sa mga miyembro nga pioneer sa Senahú chapel aron sa pagbasa, ug sa among pagtapos sa matag bersikulo, usa ka hilum nga may balaan nga pagtahud ang nabati sa kwarto. Ang pagsabut nahingpit, ug ang pagkaanaa sa Espiritu gamhanan kaayo. Kadto usa ka balaan nga kasinatian.”
Usa sa mga miyembro diha sa miting, si Elvira Tzí, mapasalamaton sa paghubad sa Basahon ni Mormon sa Kekchi tungod sa mga panalangin nga mahatag niini ngadto sa nagtubo nga henerasyon. Siya miingon nga ang hubad makahimo sa mas batan-on nga mga miyembro nga “makaangkon og mas hingpit nga pagsabut sa mga pulong sa Ginoo ug may pagtahud sa unsa ang gikinahanglan sa Ginoo.”
Alang sa mga miyembro sa Simbahan, ang pagtuon sa Basahon ni Mormon sa ilang kaugalingon nga pinulongan usa ka tinubdan sa dili maihap nga panalangin. Samtang ang mga miyembro “mainampoon nga magkat-on ug magtudlo gikan sa mga kasulatan,” ang Unang Kapangulohan miingon, “ang ilang mga pagpamatuod molambo, ang ilang kahibalo madugangan, ang ilang gugma sa pamilya ug sa uban modaku, ang ilang abilidad sa pagserbisyo sa uban modaku, ug sila makadawat og mas dakong kalig-on sa pagbuntog sa tintasyon ug pagdepensa sa kamatuoran ug pagkamatarung.”1
Hilabihan Ka Daghan nga mga Panalangin
Ang daghang panalangin nga mahatag sa Basahon ni Mormon ngadto sa kinabuhi sa mga nagtuon niini moresulta ngadto sa kusog nga pagdasig sa pagpakigbahin sa basahon ngadto sa uban, sa padayon nga katumanan sa panagna. Matag tuig mga upat ka milyon ka mga kopya sa Basahon ni Mormon ang maapud-apod sa tibuok kalibutan sa sobra ka 100 ka pinulongan samtang ang tagsa-tagsa, mga miyembro ug mga misyonaryo mopakigbahin sa ilang mga pagpamatuod ni Jesukristo. Ang “maalamong katuyoan,” nga gipamulong ni Alma sa karaang panahon natuman diha sa pagkaanaa sa Basahon ni Mormon ug ang matag usa niini nakapausab sa kinabuhi.
Ang unang edisyon sa Basahon ni Mormon adunay 5,000 ka giimprinta nga mga kopya.
Samtang ang buhat sa paghubad nagpadayon, ang mga miyembro sa tibuok kalibutan, sama nila ni Lea ug Florea Lotric sa Slovenia, nakasinati og hingpit nga kalipay sa pag-angkon sa unang higayon og kopya sa Basahon ni Mormon sa ilang pinulongan.
Gilitratohan ni Eric Gemmell
Pagkahuman sa paghubad, ang mga miyembro sa Simbahan kinsa makasulti sa pinulongan hangyoon sa pagribyu sa teksto. Gikan sa wala: Sila si Walter Barillas Soto, Mike Peck, Sulenny Ruby Cucul Sierra, John Bringhurst, ug Josefina Cucul Tiul nagribyu sa Basahon ni Mormon sa pinulongang Kekchi sa Cobán, Guatemala.
Sa wala sa ibabaw: gilitratohan sa Busath Photography; sa ubos: gilitratohan ni Tod Harris