Gisulayan Nako ang Saad ni Moroni

Francesco Ferraresi, Lombardy, Italy

Pipila ka tuig ang milabay didto ko sa balay sa usa ka higala sa dihang nahimamat nako ang duha ka batan-ong mga lalaki nga maayo og sininaan nga mipaila sa ilang kaugalingon isip mga misyonaryo nga mga Santos sa Ulahing mga Adlaw. Naghunahuna ko nga katingalahan kini nga naabut sila sa Italy aron sa pagkabig sa mga tawo nga mituo na sa Manluluwas.

Unya human niana gihangyo nako sila nga moadto sa akong balay. “Kon ganahan mo, makaadto kamo kanako aron makigbayloay og hunahuna,” miingon ko. “Apan ayaw paghunahuna nga mag-ilis ko og relihiyon.”

Sa dihang nagkita kami pagkasunod gabii, ang mga misyonaryo naghisgot kabahin sa Basahon ni Mormon. Naghunahuna ko nga lahi kini nga wala pa ko sukad makadungog niini. Gidapit nako sila nga mobalik, apan human sa ikaduhang pagbisita ang akong asawa, si Anna Maria, naghunahuna nga nayabag sila ug mobiya sa balay atol sa among mga panaghisgutan. Ang mga misyonaryo morag lahi usab alang kanako, apan kuryuso ko nga masayud unsay ilang isulti ug padayon nga nakigkita kanila.

Usa ka gabii sa dihang si Anna Maria mipauli sa balay, nakadungog siya kanamo nga naghisgut mahitungod sa mahangturon nga kaminyoon. Nakapainteresado kaayo kini kaniya, ug nakahukom kami nga among sugdan og balik ang hisgutanan. Daghan kaayo siya og nahibaloan sa mga kasulatan ug sa kanunay adunay taas nga listahan sa mga pangutana. Ang mga elder mitubag sa pipila niini diha-diha dayon, apan sa uban kinahanglan nga mouli una sila ug magsiksik. Matag semana walay kapakyas mibalik sila nga nagdala og mga tubag, ug matag semana si Anna Maria adunay laing listahan sa mga pangutana.

Wala madugay human natapos ang among mga panaghisgut, gisurprisa ko ni Anna Maria pinaagi sa pagpangayo nako og pagtugot nga magpabunyag. Giingnan nako siya nga wala koy supak kon tinuoray siya nga nakabig. Mitambong ko sa iyang bunyag pagka-Marso 5, 1995, nakatagamtam sa maanindot nga pagbati atol sa service.

Mipadayon ko sa pagbasa og maayo mahitungod sa Simbahan, ug ang mga misyonaryo mipadayon sa pag-awhag kanako. Sa katapusan akong gisulayan ang saad ni Moroni (tan-awa sa Moroni 10:4–5). Gusto ko nga masayud kon ang Basahon ni Mormon gikan ba sa Dios o kon usa ba lamang kini ka maanindot nga nobela.

Usa ka adlaw pagka-Hunyo 1995 samtang nag-inusara ko sa balay, miluhod ko sa tiilan sa akong higdaanan ug nangutana sa Langitnong Amahan, “Tinuod ba ang Basahon ni Mormon, ug kon mao, kanus-a man ko kinahanglang magpabunyag?” Sa kalit lang gibati nako sa akong kasingkasing ug sa akong hunahuna ang usa ka klaro nga tingog nga nag-ingon kanako, “Ang Basahon ni Mormon tinuod.” Dayon aduna koy klaro nga pagbati kon kanus-a magpabunyag. Usa ka semana ang milabay nag-ampo ko pag-usab ug nakadawat sa sama nga tubag. Ang akong kasingkasing napuno gayud sa kalipay. Nasayud na ako karon nga ang Dios namulong ngari kanako: ang Basahon ni Mormon dinasig sa Dios ug si Joseph Smith tinuod nga propeta.

Sa katapusan, pagka-Septyembre 17, 1995, nabunyagan ko, usa ka tuig ug tunga sukad sa akong pakighimamat sa mga misyonaryo. Wala madugay ang among anak nga babaye, si Aba Chiara, nainteresado sa Simbahan ug nabunyagan usab. Pagka-Enero 1997 ang among pamilya nabugkos didto sa Templo sa Bern Switzerland.

Kami nasayud nga kini ang tinuod nga Simbahan, gidumala ni Jesukristo pinaagi sa usa ka propeta ug sa priesthood. Mapasalamaton kami sa Ginoo tungod sa Iyang gugma, sa paggiya kanamo ngadto sa mga misyonaryo, ug sa among kahibalo sa ebanghelyo.