Unsaon Pagtuon ang Basahon ni Mormon

Ni Elder D. Todd Christofferson

Sa Korum sa Napulog Duha ka mga Apostoles

Baynte singko ka tuig ang milabay, si Presidente Ezra Taft Benson (1899–1994) midetalye sa “tulo ka dagkong hinungdan ngano nga ang mga Santos sa Ulahing mga Adlaw kinahanglang mohimo sa pagtuon sa Basahon ni Mormon nga tibuok kinabuhi nga buluhaton.”¹ Ang mga hinungdan mao kini:

• Una, ang Basahon ni Mormon mao ang sukaranang bato sa atong tinuohan—ang sukaranang bato sa atong pagsaksi ni Jesukristo, sa atong doktrina, ug sa atong pagpamatuod.

• Ikaduha, ang Basahon ni Mormon gisulat alang sa atong panahon.

• Ikatulo, ang Basahon ni Mormon nagtabang kanato nga mas maduol sa Dios.

Kini nga mga hinungdan sa pagtuon sa Basahon ni Mormon nagsugyot usab og pipila ka mga paagi nga mahimo natong gamiton sa pagtuon niining talagsaon nga kasulatan.

Ang Sukaranang Bato sa Atong Tinuohan

Tungod kay ang Basahon ni Mormon mao ang sukaranang bato sa atong pagsaksi ni Kristo ug sa kahingpitan sa Iyang ebanghelyo, importante sa atong pagtuon nga hatagan og espesyal nga pagtagad ang daghang mga pagtulun-an ug mga pagpamatuod sa Manluluwas nga anaa sa sulod niini. Ang uban naghimo niini pinaagi sa pagbaton og bag-o, dili mahal nga kopya sa Basahon ni Mormon ug pagmarka sa tanang mga bersikulo nga nagpasabut o nagtudlo mahitungod sa Manluluwas, sa Iyang Pangalagad, ug sa Iyang misyon. Kini nakahatag og mas lawom nga pagsaksi kabahin ni Jesus isip Anak sa Dios ug bag-o nga pagdayeg sa Iyang nahimo ug padayong gihimo alang kanato.

Gisulat alang sa Atong Panahon

Ang mga tigsulat sa Basahon ni Mormon misulat nga naghunahuna sa umaabut nga mga henerasyon, ilabi na sa ulahing mga adlaw. Sa pagminubo sa mga rekord sa mga Nephite, si Mormon miingon nga dili siya makalakip sa “ikagatusan nga bahin” (tan-awa sa 3 Nephi 5:8; tan-awa usab sa Mga Pulong ni Mormon 1:5). Si Moroni miingon, “Ako namulong nganha kaninyo ingon og kamo ania, ug gani kamo wala. Apan tan-awa, si Jesukristo mipakita kaninyo ngari kanako, ug ako nasayud sa inyong binuhatan” (Mormon 8:35). Kining duha ka mga tigsulat ug ang uban pa, naglihok ubos sa inspirasyon, misulat unsay labing makaayo kanato niining ulahing mga adlaw.

Busa kinahanglan kita nga magtuon nga maghunahuna niini nga mga pangutana: “Nangong giapil man kini? Sa unsang paagi nga kini magamit karon ug ngari kanako?” Si Presidente Benson nakaobserbar, sama pananglit, nga diha sa Basahon ni Mormon atong makita ang usa ka sumbanan alang sa pagpangandam sa Ikaduhang Pag-anhi sa Manluluwas. Atong nasayran giunsa sa mga disipulo ni Kristo pagpuyo sa panahon sa gubat, pag-atubang sa mga pagpanglutos ug apostasiya, paghimo sa misyonaryo nga buhat, ug pagsanong sa mga kakuyaw sa pagka-kalibutanon.² Sama sa gihimo ni Nephi, kon magtuon kita, kinahanglan nga atong “ipahisama” ang mga kasulatan ngari sa atong kaugalingon—nga mao, ang pagpaningkamot sa pagdiskubre kon unsaon paggamit sa unsay atong makaplagan diha sa Basahon ni Mormon (tan-awa sa 1 Nephi 19:23).

Pagpaduol ngadto sa Dios

Gikutlo si Presidente Benson sa makausa pa: “Dili lamang nga ang Basahon ni Mormon nagtudlo kanato sa kamatuoran, bisan tuod og kini naghimo niana. Dili lamang nga ang Basahon ni Mormon nagpamatuod ni Kristo, bisan tuod og kini naghimo usab niana. Apan adunay butang nga mas labaw pa. Adunay gahum niana nga basahon nga mosugod sa pagdagayday sa inyong mga kinabuhi sa higayon nga sugdan ninyo ang tinuoray nga pagtuon sa basahon.”³

Sa pagkatinuod, ang pagtuon sa Basahon ni Mormon nagdapit sa Espiritu, ug ang Espiritu mao ang instrumento sa pagpadayag. Nagsugyot kini nga kita magtuon sa mahunahunaon, mahinuklugon nga paagi—mamalandong, mag-ampo, ug gani maglista samtang kita magbasa. Nagbutang kini kanato sa kahimtang aron makadawat og dugang nga kahayag ug pagsabut, mahitungod sa unsay atong gitun-an ug mahitungod sa ubang mga butang. Usahay makatabang ang pagbasa sa tibuok nga Basahon ni Mormon sa mubo ra nga panahon aron makuha ang dagan sa istorya ug mensahe. Apan kasagaran labing maayo nga mo-focus sa paghatag og igong panahon kada adlaw sa pagtuon sa basahon agig sukwahi sa pagbasa og pipila ka gitakda nga gidaghanon sa mga bersikulo o mga pahina kada adlaw.

Mga Tabang sa Pagtuon

Bulahan kita karon nga adunay daghang mga gamit nga makatabang kanato sa atong pagtuon sa Basahon Mormon. Ang uban nalakip na sa atong mga kasulatan—ang Topical Guide, Bible Dictionary, ug indeks sa Iningles nga mga kasulatan ug ang Giya ngadto sa mga Kasulatan sa lain nga mga pinulongan. Ug kita adunay daghang mga footnote ug mga cross-reference diha sa matag pahina sa mga edisyon sa mga kasulatan sa Santos sa Ulahing mga Adlaw.

Ang uban nga mga tabang sa pagtuon nga giimprinta naglakip sa Giya sa Pagtuon sa Sakop sa Klase sa Sunday School, ang Giya sa Estudyante sa Pagtuon sa Seminary, ug ang Manwal sa Estudyante sa Institute. Ang bag-o sa atong panahon mao ang pagdaghan sa elektronik nga mga himan, nga gihulagway diha sa kilid nga bahin sa pahina 31.

Instrumento sa Pagkabig

Ang Basahon ni Mormon usa ka dili hitupngan nga bahandi ug ang instrumento sa pagkabig nga gituyo ug gihatag sa Ginoo alang sa atong dispensasyon. Akong giila kini isip pundasyon sa akong kaugalingong pagpamatuod kang Jesukristo, sa propetikanhon nga tawag ni Joseph Smith, ug sa Ang Simbahan ni Jesukristo sa mga Santos sa Ulahing mga Adlaw nga mao “ang gingharian sa Ginoo nga sa makausa pa gitukod na usab dinhi sa yuta.”⁴ Ako malipayong molakip sa akong pagpamatuod uban sa pagpamatuod ni Jesukristo nga “samtang ang imong Ginoo ug ang imong Dios buhi kini tinuod” (D&P 17:6). Unta ang inyong tibuok kinabuhi nga pagtuon sa Basahon ni Mormon mopalawom sa inyong pagkakabig ug modala kaninyo sa usa ka diretso nga dalan ngadto sa kinabuhing dayon.

Mubo nga mga sulat

1. Ezra Taft Benson, “The Book of Mormon—Keystone of Our Religion,” Ensign, Nob. 1986, 5–7. Kining walay paglubad nga pakigpulong giimprinta og usab dinhi niini nga isyu sa mga pahina 52–58.

2. Tan-awa sa Ezra Taft Benson, Ensign, Nob. 1986, 6–7.

3. Ezra Taft Benson, Ensign, Nob. 1986, 7.

4. Pasiuna sa Basahon ni Mormon.

Usa ka Propeta Nagpamatuod

“Nagsugod ko og basa sa Basahon ni Mormon sa wala pa ko masakto sa pangidaron nga mahimong deacon, ug nagbasa na ko niini sukad niana, ug nasayud ko nga kini tinuod. …

“… Alang kanako bisan kinsa nga miyembro niini nga Simbahan dili gayud matagbaw hangtud nga iyang mabasa ang Basahon ni Mormon matag karon ug unya, ug pamalandongan kini og maayo aron siya makahatag og pagsaksi nga kini usa gayud ka rekord nga adunay inspirasyon sa Labawng Makagagahum nganha niini, ug nga ang kasaysayan niini tinuod.”

Presidente Joseph Fielding Smith (1876–1972), sa Conference Report, Okt. 1961, 18.

Ang mga Kasulatan nga anaa sa Internet ug Mobile nga mga Device

Agig dugang sa sayon nga pagpangita sa mahinungdanon nga pulong ug pag-cross-reference, ang mga kasulatan nga anaa sa internet (scriptures.lds.org) ug ang mobile nga mga device (mobile.lds.org) naghatag og bag-o nga mga function nga makatabang kaninyo sa inyong personal nga pagtuon:

My Study Notebook (notebook.lds.org)

Kining anaa sa internet nga study notebook nagtanyag og daghang susama nga mga himan nga mahimo ninyong gamiton sa tradisyonal nga pagtuon—sama pananglit, sa pagmarka, pagsulat, ug pag-cross-reference —apan nagtugot kini kaninyo sa paggamit ug pagkopya niini sa elektronik nga paagi. Dugang pa, mahimo kamong “mo-tag” o mo-kategoriya sa inyong mga sinulat ug sa uban pang mga sulod kon kini maanaa. Tungod sa inyong pag-log in sa My Study Notebook gamit ang inyong LDS account, ang inyong mga kausaban sa notebook magpabilin nga updated bisan pila pa ka buok nagkalain-laing mga device ang inyong gamiton sa pagsulod niini. Kini nga mga himan nagtugot kaninyo sa pagmugna og inyong kaugalingong talagsaon nga topical archive alang sa pagtuon ug pagtudlo sa ebanghelyo.

Han-ay ug mga Pinulongan sa mga Kasulatan (scriptures.lds.org)

Ang elektronik nga text ug mga audio recording sa mga kasulatan anaa na karon sa LDS.org ug alang sa mga mobile device sa daghang mga pinulongan ug anaa sa proseso ang uban pa nga mga pinulongan.

Agig dugang sa pagbasa ug pagpaminaw diha sa internet, maka-download usab kamo ug makagamit sa audio, ePub, ug PDF nga mga file nga offline. Ang kinabag-ohan nga site sa mga kasulatan sa Simbahan nga naa sa internet nagtanyag usab og sayon nga pagpakigbahin sa mga tudling ug personal nga mga sinulat ngadto sa uban gamit ang e-mail ug social media nga mga himan.

Ang mga kasulatan diha sa LDS.org kasamtangan nga magamit sa 21 ka mga pinulongan; ang mobile device nga paggamit anaa sa gibana-bana nga 10 ka mga pinulongan, depende sa platform.

LDS Scripture Citation Index (scriptures.byu.edu)

Kini nga kapanguhaan, nga gihimo sa Iningles sa duha ka mga magtutudlo sa Brigham Young University, nagkonektar sa mga bersikulo sa kasulatan ngadto sa mga pamahayag gikan sa bag-ong mga propeta ug mga apostoles. Sama pananglit, kon gusto ka nga masayud kon kinsa ang nagkutlo sa 1 Nephi 3:7 sa kinatibuk-ang komperensya. I-klik ang link sa Basahon ni Mormon sa wala nga bahin sa screen ug i-scroll paubos ngadto sa 1 Nephi 3; didto inyong makit-an ang tubag.

General Conference Topics Index (conference.lds.org)

Laing kapanguhaan nga motabang kaninyo sa pagkonektar sa pagtuon sa kasulatan ngadto sa mga pulong sa buhing mga propeta, conference.lds.org nagpakita og mga lista nga gibase sa hilisgutan alang sa matag kinatibuk-ang komperensya. Pananglitan, kon kamo nagtuon sa Pag-ula diha sa mga kasulatan, makakita kamo og lima ka mga pakigpulong nga naghisgut niana nga hilisgutan sa Abril 2011 nga komperensya.

Padayon sa Pagtuon aron Padayon nga Makat-on

Ang unang higayon nga akong nabasa ang Basahon ni Mormon dili pa ko miyembro. Nag-edad ko og 16, ug gibasa ko kini sa usa ka semana. Sa hapit na mahuman ang akong pagbasa, miabut ko sa usa ka bersikulo nga nagmatuod nga kon ang usa ka simbahan iya ni Kristo, magdala kini sa Iyang pangalan (tan-awa sa 3 Nephi 27:8). Nianang higayuna ang luha mitulo sa akong mga aping. Nasayud ko nga ang Basahon ni Mormon tinuod, ug midesisyon ko nga magpabunyag.

Human sa akong bunyag gibasa nako pag-usab ang basahon, apan niining higayuna mipalit ko og pangmarka ug gimarkahan ang mga bersikulo o mga tudling nga nakapadasig kanako. Sa kaulahian nga mga pagbasa mao gihapon ang akong gihimo, gawas lang sa akong gidugang nga mga sulat diha sa akong gimarkahan nga mga bersikulo diha sa mga kilid. Pagkasunod midugang ko og mga pakisayran sa may koneksyon nga mga bersikulo, gikan man sa Basahon ni Mormon o sa uban nga mga kasulatan.

Dayon, pagsugod sa usa ka tuig, mipalit ko og bag-o nga kopya sa mga kasulatan, kay ang usa nga anaa nako napuno na sa mga marka, ilabi na kay gigamit ko na kini sa akong misyon ug miandam og daghang mga leksyon gamit niini. Niining higayuna ang akong pagtuon ug pagmarka gibase sa hilisgutan. Mibutang ko og usa ka kolor sa piho nga mga hilisgutan—pananglitan, orange para sa hugot nga pagtuo, green para sa paghinulsol, ug uban pa.

Pinaagi sa padayon nga pagtuon sa Basahon ni Mormon gamit kining nagkalain-laing mga pamaagi, akong nakat-unan nga ang usa ka pagbasa sa Basahon ni Mormon dili paigo. Makat-on kita og pagtulun-an human sa usa ka pagtulun-an samtang kita magpadayon sa pagtuon. Nakat-unan usab nako nga bisan pila pa ka higayon nga kita nakabasa, sa kanunay adunay usa ka butang nga makaingon kita, “Nganong wala man nako kana makit-i sa una? Anaa ra man kini dinhi.”

Ang mga kasulatan—ilabi na ang Basahon ni Mormon—nagtudlo kanato mahitungod ni Jesukristo ug mahitungod sa atong Amahan sa Langit. Ang pagtuon sa mga kasulatan mas nakapaduol kanako ngadto Kanila.

Cristina Vergara Ramírez, Chile

Paghulagway sa litrato pinaagi ni Craig Dimond