Usa ka Pagpamatuod, usa ka Pakigsaad, ug usa ka Pagsaksi
Ako mosaksi nga ang Basahon ni Mormon usa ka bag-o nga pakigsaad, usa ka pagpamatuod gikan sa Bag-ong Kalibutan ngadto sa tibuok kalibutan.
Ang akong balaanong panghimatuod kabahin sa Manluluwas ug sa Iyang gipahiuli nga Simbahan una nakong naangkon isip usa ka batan-ong lalaki sa dihang akong gibasa ang Basahon ni Mormon. Nahitabo kini samtang nagbasa ko niining sagrado nga rekord diin akong gibati—og balik balik—ang dili malimud nga mga paghung-hong sa Espiritu Santo nga nagpahayag ngari sa akong kalag sa pagkatinuod niini.
Ang pagbasa sa basahon mao ang sinugdanan sa akong kahayag. Kini mao ang tinubdan sa una nakong espirituhanong kasiguroan nga ang Dios buhi, nga Siya ang akong Langitnong Amahan, ug usa ka plano sa kalipay ang gilatid sa kahangturan alang kanako. Kini nakapahimo kanako sa paghigugma sa Balaan nga Biblia ug sa ubang balaang kasulatan sa Simbahan. Kini nagtudlo kanako sa paghigugma sa Ginoo nga si Jesukristo, sa daklit nga paglantaw sa Iyang kamanggiloy-on, ug sa paghunahuna sa iyang grasya ug katalagsaon as Iyang maulaong sakripisyo.
Tungod kay ako mismo nasayud nga ang Basahon ni Mormon usa ka tinuod nga saksi—lain nga tugon ug usa ka bag-ong pakigsaad—nga si Jesus mao ang Kristo, nasayud usab ko nga si Joseph Smith sa una ug karon usa ka propeta a Dios. Sama sa gisulti sa apohan sa akong mga apohan niadtong unang mga adlaw sa Pagpahiuli, “Walay dautan nga tawo ang makahimo sa pagsulat og ingon ini nga basahon; ug walay matarung nga tawo ang makasulat niini, gawas nga kini tinuod ug siya gisugo sa Dios sa pagbuhat sa ingon.”1
Sa akong unang konbiksyon nadugang ang ubang makapadasig nga mga higayon ug makapabalaan nga mga pagpakita nga karon naghatag og dako kaayo nga kahulugan sa akong mga panahon, katuyoan sa akong kinabuhi, ug lig-on nga pundasyon sa akong pagpamatuod.
Karon, wala ko naglayag uban sa igsoon nga lalaki ni Jared. Wala ko makadungog ni Haring Benjamin nga nagwali og sama sa anghel. Wala ko didto sa pundok sa mga Nephite kinsa mihikap sa mga samad sa nabanhaw nga Ginoo, ni naghilak uban ni Mormon ug Moroni sa kalaglagan sa sibilisasyon. Apan ang akong pagpamatuod niini nga rekord ug sa kalinaw nga nahatag niini ngadto sa kasingkasing sa tawo—nga gihatag ngari kanako pinaagi sa paghunghong sa Espiritu Santo sama nga kini gihatag diha kaninyo—ingon nga may bili ug klaro kaayo sama sa ilaha. Ako mopamatuod niini nga basahon sa ingon ka sigurado sama nga ako, kauban sa Tulo ka mga Saksi, nakakita kang anghel Moroni o, uban sa Walo ka mga Saksi, nga nakakupot sa mga palid nga bulawan.
Mopamatuod ako og dugang nga walay usa kanato ang tinud-anay nga makabig niining buhat sa ulahing adlaw ug diin makakaplag sa hingpit nga kalinaw ug kahupay sa atong panahon hangtud nga siya modawat sa Basahon ni Mormon ug sa Ginoo nga si Jesukristo, kang kinsa kini nagpamatuod. Sama sa gisulti ni Mormon ngadto kang Moroni sa usa sa ilang malisud kaayo nga panahon, mao usab nga mosulti ko dinhi sa atong lisud kaayo nga panahon: “Pagpamatinud-anon diha kang Kristo. … Ug unta ang grasya sa Dios nga Amahan, kansang trono anaa sa kahitas-an sa mga langit, ug sa atong Ginoong Jesukristo, kinsa naglingkod sa tuo nga kamot sa iyang gahum …, ug magpabilin uban kanimo hangtud sa kahangturan” (Moroni 9:25–26).
Ang Basahon ni Mormon usa ka sagrado nga pagpahayag sa talagsaon nga katapusang pakigsaad ni Kristo uban sa katawhan. Kini usa ka bag-o nga pakigsaad, usa ka bag-ong tugon gikan sa Bag-ong Kalibutan ngadto sa tibuok kalibutan. Ang kahayag nga akong gilaktan mao ang Iyang kahayag. Ang Iyang kalooy ug kahalangdon migiya kanako—ug kanimo—sa atong pagsaksi Kaniya ngadto sa kalibutan.
Ang Biblia ug ang Basahon ni Mormon Nagpamatuod kang Kristo, ni Greg K. Olsen