Ang Basahon ni Mormon

Usa ka Saksi sa Biblia

Sa pag-uyon uban sa biblikanhon nga balaod nga “ang bisan unsa nga sumbong kinahanglan paluyohan sa pagpanghimatuod sa duha o tulo ka mga saksi” (2 Mga Taga-Corinto 13:1), ang Basahon ni Mormon ug ang Biblia nagpamatuod ni Jesukristo ug nagtudlo sa mga baruganan sa Iyang ebanghelyo. Si Elder Russell M. Nelson sa Korum sa Napulog Duha ka mga Apostoles mitudlo nga ang “mga saksi sa kasulatan nagpamatud-anay sa usag usa. Kini nga konsepto gipasabut dugay na sa dihang ang usa ka propeta misulat nga ang Basahon ni Mormon ‘gisulat sa tuyo nga kamo mahimo nga motuo [sa Biblia]; ug kon kamo motuo [sa Biblia] kamo motuo usab [sa Basahon ni Mormon]’ [Mormon 7:9]. Ang matag basahon nagpasabut sa usag usa. Ang matag basahon nagbarug nga ebidensya nga ang Dios buhi ug namulong ngadto sa Iyang mga anak pinaagi sa pagpadayag ngadto sa Iyang mga propeta.”¹

Sa ubos mao ang listahan sa mahinungdanong mga doktrina nga gitudlo diha sa Biblia diin ang Basahon ni Mormon naghatag og dugang pagsaksi.

Ang Misyon ni Jesukristo

Ang Biblia ug ang Basahon ni Mormon nagpamatuod kang Jesukristo, ang Anak sa Dios, ug sa Iyang Pag-ula. Sila nagtudlo nga ang Manluluwas Mismo midala sa atong mga sala ug mibuntog sa kamatayon.

Ang Bugtong Anak sa Dios

Biblia: “Kay gihigugma gayud sa Dios ang kalibutan, nga tungod niana gihatag niya ang iyang bugtong Anak, aron ang tanan nga mosalig kaniya dili malaglag, kon dili may kinabuhing dayon.” (Juan 3:16; tan-awa usab sa Mateo 16:16; Juan 6:69).

Basahon ni Mormon: “Ako nasayud nga si Jesukristo moanhi, oo, ang Anak, ang Bugtong Anak sa Amahan, puno sa grasya, ug kalooy, ug kamatuoran” (Alma 5:48; tan-awa usab sa 1 Nephi 11:16–21; Mosiah 3:5–8).

Miula sa Atong mga Sala

Biblia: “Kay kini mao ang akong dugo sa pakigsaad, nga igaula alang sa daghan sa kapasayloan sa mga sala” (Mateo 26:28; tan-awa usab sa Mga Hebreohanon 9:28; 1 Pedro 3:18).

Basahon ni Mormon: “Tan-awa, siya mihalad sa iyang kaugalingon sa usa ka sakripisyo alang sa sala, sa pagtuman sa katuyoan sa balaod, sa tanan niadto kinsa adunay usa ka masulub-on nga kasingkasing ug mahinulsulon nga espiritu” (2 Nephi 2:7; tan-awa usab sa 1 Nephi 11:33; Alma 34:8–10; 3 Nephi 11:14).

Gipas-an ang Atong mga Kasub-anan

Biblia: “Sa pagkamatuod gipas-an niya ang atong kasakitan, ug gipas-an niya ang atong mga kasub-anan” (Isaias 53:4; tan-awa usab sa Mga Hebreohanon 2:18).

Basahon ni Mormon: “Ug siya magpadayon, mag-antus sa mga sakit ug mga kasakit ug mga pagtintal sa matag matang; … nga siya mahimo nga masayud sumala sa unod unsaon pagtabang ang iyang mga katawhan sumala sa ilang mga kahuyang” (Alma 7:11–12; tan-awa usab sa Mosiah 14:3–5).

Mibuntog sa Kamatayon

Biblia: “Apan ang tinuod mao nga si Kristo gibanhaw gikan sa mga patay, ang nahaunang gibanhaw sa mga nangamatay.” (1 Mga Taga-Corinto 15:20; tan-awa usab sa Juan 14:19; Mga Buhat 26:23).

Basahon ni Mormon: “Motuo diha kang Jesukristo, nga siya mao ang Anak sa Dios, ug nga siya gipatay pinaagi sa mga Judeo, ug pinaagi sa gahum sa Amahan siya nabuhi pag-usab, diin siya nakaangkon og kadaugan sa lubnganan” (Mormon 7:5; tan-awa usab sa Mosiah 16:7–8; Helaman 14:17).

Ang Plano sa Dios alang Kanato

Ang Biblia ug ang Basahon ni Mormon nagtudlo nga ang Dios mao ang atong Langitnong Amahan. Sa ingon, giandam Niya ang “plano sa kaluwasan” (Alma 24:14) diin kita mahimong maluwas pinaagi sa Pag-ula ni Jesukristo.

Mahigugmaong Amahan sa Langit

Biblia: “Kay diha kaniya kita nangabuhi, ug nagalihok, ug nagalungtad; ug matud pa usab gani sa inyong magbabalak, Kay sa pagkatinuod kita iyang kaliwat” (Mga Buhat 17:28; tan-awa usab sa Mga Salmo 82:6; Mga Hebreohanon 12:9).

Basahon ni Mormon: “Ako nasayud nga [ang Dios] nahigugma sa iyang mga anak” (1 Nephi 11:17; tan-awa usab sa 1 Nephi 17:36).

Kamatayon ug ang Kalibutan sa Espiritu

Biblia: “Ug ang abug mobalik nganhi sa yuta ingon sa kaniadto: ug ang espiritu mobalik ngadto sa Dios nga maoy naghatag niini” (Ecclesiastes 12:7; tan-awa usab sa 1 Pedro 3:19–20; 4:6).

Basahon ni Mormon: “Ang mga espiritu sa tanan nga mga tawo, bisan sila maayo o dautan, dad-on sa panimalay ngadto niana nga Dios kinsa mihatag kanila sa kinabuhi” (Alma 40:11; tan-awa usab sa mga bersikulo 12–14).

Pagkabanhaw

Biblia: “Ug sa tapus ang akong panit kining lawas ko gayud malaglag, unya sa wala ang akong unod makita ko ang Dios” (Job 19:26; tan-awa usab sa Ezequiel 37:12; 1 Mga Taga-Corinto 6:14; 15:54).

Basahon ni Mormon: “Ako nasayud nga kamo nasayud nga ang atong unod madunot ug mamatay; bisan pa niana, sa atong mga lawas kita makakita sa Dios” (2 Nephi 9:4; tan-awa usab sa 2 Nephi 9:12; Alma 11:43–45; 40:23).

Ang mga Sugo Nagsangkap og Giya

Ang Biblia nagtudlo nga ang Dios naghatag sa mga sugo ug mopanalangin kanato kon kita mosunod. Ang mga propeta sa Basahon ni Mormon mirekord ug misunod usab sa mga sugo.

Ang mga Panalangin sa Pagkamasulundon

Biblia: “Ug ang Ginoo nagsugo kanamo sa pagbuhat niining tanan nga kabalauran, ug sa pagkahadlok sa Ginoo nga among Dios, alang kanunay sa among kaayuhan, aron nga magahatag siya ug kinabuhi kanamo maingon karon. … Ug kini mamahimong pagkamatarung alang kanamo, kong pagabantayan namo ang pagtuman niining tibuok nga sugo” (Deuteronomio 6:24–25; tan-awa usab sa Mga Proverbio 4:4; Juan 14:21).

Basahon ni Mormon: “Siya misaad kaninyo nga kon kamo maghupot sa iyang mga sugo kamo gayud mouswag dinhi sa yuta; ug siya dili mausab gikan niana diin siya misulti; busa, kon kamo maghupot sa iyang mga sugo siya mopanalangin kaninyo ug mopauswag kaninyo” (Mosiah 2:22; tan-awa usab sa 2 Nephi 1:20).

Ang Napulo ka mga Sugo

Biblia: Ang Ginoo mipadayag sa Napulo ka mga Sugo ngadto kang Moises (tan-awa sa Exodo 20:1–17).

Basahon ni Mormon: Si Abinadi mitudlo sa Napulo ka mga Sugo ngadto sa mga pari ni Haring Noah (tan-awa sa Mosiah 12:33–36; 13:12–24).

Ikapulo

Biblia: “Dad-a ninyo ang tibuok nga ikapulo ngadto sa balay nga tipiganan, aron nga adunay kalan-on diha sa akong balay” (Malaquias 3:10; tan-awa usab sa Levitico 27:30).

Basahon ni Mormon: “Ug kini mao ang sama nga Melchizedek diin si Abraham mibayad sa ikapulo; oo, gani ang atong amahan si Abraham mibayad sa ikapulo sa ikanapulo nga bahin sa tanan nga iyang gipanag-iya” (Alma 13:15; tan-awa usab sa 3 Nephi 24:8–10).

Bunyag ug Espiritu Santo

Biblia: “Gawas kon ang tawo igaanak sa tubig ug sa Espiritu, dili siya makasulod sa gingharian sa Dios” (Juan 3:5; tan-awa usab sa Marcos 16:16; Mga Buhat 2:36–38).

Basahon ni Mormon: “Paghinulsol, kamong tanan nga mga lumulupyo sa yuta, ug duol ngari kanako ug magpabunyag diha sa akong ngalan, aron kamo mahimo nga pagasantoson pinaagi sa pagdawat sa Espiritu Santo, aron mobarug nga walay lama sa akong atubangan sa katapusan nga adlaw” (3 Nephi 27:20; tan-awa usab sa 2 Nephi 9:23; 31:5–9).

Ang Simbahan ni Jesukristo sa Karaang mga Panahon

Ang Ginoo mitukod sa Iyang Simbahan sa Jerusalem ug sa Amerika. Ang Biblia ug ang Basahon ni Mormon mga saksi nga Siya nag-organisar ug naggiya sa Iyang mga tawo pinaagi sa mga propeta ug apostoles.

Mga Propeta

Biblia: “Sa pagkamatuod ang Ginoong Dios dili magbuhat sa bisan unsa, gawas kong ang iyang tinago ipadayag niya sa iyang mga alagad ang mga manalagna” (Amos 3:7; tan-awa usab sa Jeremias 1:7; 7:25).

Basahon ni Mormon: “Pinaagi sa Espiritu ang tanan nga mga butang mahimo nga masayran ngadto sa mga propeta” (1 Nephi 22:2; tan-awa usab sa Jacob 4:4–6).

Ang Napulog Duha

Biblia: “Gitawag niya ang iyang mga tinun-an: ug gikan kanila iyang gipili ang napulog duha, nga iyang ginganlan nga mga apostoles” (Lucas 6:13; tan-awa usab sa Mga Taga-Efeso 2:19–20; 4:11–14).

Basahon ni Mormon: “Bulahan kamo kon kamo mopatalinghug sa mga pulong niining napulog duha kinsa Ako mipili gikan diha taliwala kaninyo sa pagpangalagad nganha kaninyo” (3 Nephi 12:1; tan-awa usab sa 1 Nephi 11:29).

Katungod sa Priesthood

Biblia: “Kamo wala magpili kanako, hinonoa ako mao ang nagpili kaninyo, ug nagtudlo kaninyo, aron managpanglakaw kamo ug managpamunga, ug magalungtad ang inyong bunga” (Juan 15:16; tan-awa usab sa Mateo 16:19; Lucas 9:1–2; Mga Hebreohanon 5:4).

Basahon ni Mormon: “Si [Alma] mi-orden og mga pari ug mga anciano, pinaagi sa pagpandong sa iyang mga kamot sumala sa kapunongan sa Dios, aron pagdumala ug pagbantay ibabaw sa simbahan” (Alma 6:1; tan-awa usab sa 2 Nephi 6:2; Moroni 3).

Dugang nga Tun-anan

Kini nga tsart dili kompleto nga lista. Isip kabahin sa inyong personal o pamilya nga pagtuon sa kasulatan, mahimo kamong modugang og mga pakisayran niining tsart ug magsiksik og dugang nga mga baruganan nga gitudlo sa Basahon ni Mormon ug sa Biblia gamit ang Topical Guide o Giya ngadto sa mga Kasulatan ug ang study tools sa internet sa scriptures.lds.org.

Usa ka Propeta Nagpamatuod

“Sa panahon karon nga ang Biblia gipakaubos sa kadaghanan kinsa migamit niini sinagolan og mga pilosopiya sa kalibutan uban sa mga kasulatan sa Biblia aron sa pagpawala sa tinuod nga kahulugan niini, pagkabulahan nga ang atong Langitnong Amahan, kinsa sa kanunay naghunahuna sa espirituhanong kaayuhan sa Iyang mga anak, naghatag kanato og kauban niini nga basahon sa mga kasulatan, nailhan nga ang Basahon ni Mormon, isip depensa sa mga kamatuoran sa nasulat sa Biblia ug gipamulong sa mga propeta sumala sa sugo sa Ginoo. …

“… Pinaagi niining ikaduha nga saksi kita makasiguro sa kahulugan sa mga pagtulun-an sa daang mga propeta ug, sa tinud-anay, sa Agalon ug sa Iyang mga disipulo samtang sila nagpuyo ug nagtudlo sa katawhan. Kini makadasig gayud sa tanan nga matinud-anong nagsiksik sa kamatuoran sa paggamit niining duha ka sagradong mga kasulatan ug sa pagtuon niini isip usa ka basahon, pagsabut, sama sa atong gibuhat, sa ilang tinuod nga relasyon.”

Presidente Harold B. Lee (1899–1973), Ye Are the Light of the World (1974), 89, 91.

Litrato ni Harold B. Lee ni Doyle Shaw, sa maayong kabubut-on sa Church History Museum