Ang Basahon ni MormonSukaranang Bato sa Atong Tinuohan
Si Ezra Taft Benson nahimong ika-13 nga Presidente sa Simbahan niadtong Nobyembre 10, 1985. Siya nahinumduman tungod sa iyang lig-on nga pagpamatuod sa gahum sa Basahon ni Mormon ug sa iyang paghatag og gibug-aton sa kaimportante sa pagbasa sa kasulatan matag adlaw, misyonaryo nga buhat, ug pagtudlo sa ebanghelyo. Kini nga tuig nagtimaan sa ika-25 nga anibersaryo niining pamulong sa Oktubre 1986 sa kinatibuk-ang komperensya.
Akong hinigugmang mga kaigsoonan, karon ganahan kong mamulong kabahin sa usa sa labing mahinungdanon nga gasa nga gihatag nganhi sa kalibutan sa modernong panahon. Ang gasa nga akong gihunahuna mas importante kaysa bisan unsa nga inbensyon nga nahimo sa kapanahunan sa industriya ug teknolohiya. Kini nga gasa mas bililhon sa katawhan kaysa bisan unsa nga talagsaong mga kauswagan nga atong nakita sa modernong medisina. Kini mas bililhon ngadto sa katawhan kaysa kalambuan sa paglupad sa eroplano o ang pagbiyahe sa kawanangan. Ako naghisgut kabahin sa gasa sa Basahon ni Mormon, nga gihatag ngadto sa katawhan mga 156 ka tuig ang milabay.
Kini nga gasa giandam pinaagi sa kamot sa Ginoo sobra sa usa ka libo ka tuig, dayon Iyang gitago aron mapreserba ang kaputli niini para sa atong henerasyon. Tingali walay laing makapamatuod nga mas klaro sa kaimportante niining modernong basahon sa kasulatan kaysa unsa ang gisulti sa Ginoo Mismo kabahin niini.
Sa Iya mismong baba Siya mipamatuod (1) nga kini tinuod (D&P 17:6), (2) nga kini naglangkob sa kamatuoran ug sa Iyang mga pulong (D&P 19:26), (3) nga kini gihubad pinaagi sa gahum sa kahitas-an (D&P 20:8), (4) nga kini naglangkob sa kahingpitan sa ebanghelyo ni Jesukristo (D&P 20:9; 42:12), (5) nga kini gihatag pinaagi sa pagpadayag ug gisiguro pinaagi sa pagpangalagad sa mga anghel (D&P 20:10), (6) nga kini naghatag og ebidensya nga ang balaang mga kasulatan tinuod (D&P 20:11), ug (7) niadtong kinsa modawat nga may hugot nga pagtuo makadawat og kinabuhi nga dayon (D&P 20:14).
Ang ikaduha nga gamhanang pagpamatuod sa kaimportante sa Basahon ni Mormon mao ang paghatag og gibug-aton kon kanus-a gipatungha kini sa Ginoo sumala sa dagan sa panahon sa pagsugod sa Pagpahiuli. Ang bugtong nga butang nga nag-una niini mao ang Unang Panan-awon. Nianang talagsaon nga pagpakita, si Propeta Joseph Smith nakat-on sa tinuod nga kinaiya sa Dios ug nga ang Dios adunay buluhaton para kaniya. Ang pagtungha sa Basahon ni Mormon mao ang sunod nga butang nga nahitabo.
Hunahunaa kana kon unsa ang gipasabut niini. Ang pagtungha sa Basahon ni Mormon nag-una sa pagpahiuli sa priesthood. Kini namantala mga pipila lamang ka adlaw sa wala pa matukod ang Simbahan. Ang mga Santos gihatagan og Basahon ni Mormon aron basahon sa wala pa sila mahatagi sa mga pagpadayag nga naglatid sa talagsaong mga doktrina sama sa tulo ka gingharian sa himaya, celestial nga kaminyoon, o buhat alang sa mga patay. Kini miabut sa wala pa ang mga korum sa priesthood ug ang organisasyon sa Simbahan. Dili ba kini adunay buot nga ipaabut ngari kanato kon sa unsang paagi ang Ginoo naglantaw niining sagradong buhat?
Kon kita makaamgo kon unsa ang gibati sa Ginoo kabahin niini nga basahon, dili nato angayang ikatingala nga gihatagan usab ta Niya og sagradong pasidaan kon unsaon nato sa pagdawat niini. Human sa pagpasabut nga kadtong kinsa nga modawat sa Basahon ni Mormon uban sa hugot nga pagtuo, magbuhat og pagkamatarung, makadawat og korona sa kinabuhi nga dayon (tan-awa sa D&P 20:14), gisundan kini sa Ginoo uban sa pasidaan: “Apan kadto nga nagpatig-a sa ilang mga kasingkasing sa pagkawalay pagtuo, ug nagsalikway niini, kini mosumbalik ngadto sa ilang kaugalingon nga panghimaraut” (D&P 20:15).
Niadtong 1829, ang Ginoo mipasidaan nga ang mga Santos dili magtiaw-tiaw sa sagrado nga mga butang (tan-awa sa D&P 6:12). Sigurado ang Basahon ni Mormon usa ka sagrado nga butang, apan daghan ang nagtiaw-tiaw niini, o sa laing pagkasulti, gibaliwala, gitratar kini nga ingon og dili kaayo importante.
Niadtong 1832, ang pipila sa nag-una nga mga misyonaryo miuli gikan sa ilang misyon, ang Ginoo nasuko kanila sa pagbaliwala sa Basahon ni Mormon. Isip resulta niadto nga kinaiya, siya miingon, ang ilang mga hunahuna nawad-an sa kahayag. Dili lamang ang pagbaliwala niining sagrado nga basahon ang nakapawala og kahayag sa ilang kaugalingon, kini usab nakapahimo sa tibuok Simbahan nga mabutang ubos sa panghimaraut, gani ang tanang mga anak sa Zion. Ug dayon ang Ginoo miingon, “Ug sila magpabilin ubos niini nga panghimaraut hangtud nga sila maghinulsol ug mahinumdom sa bag-o nga pakigsaad, gani ang Basahon ni Mormon” (D&P 84:54–57).
Ang kamatuoran ba nga anaa na kanato ang Basahon ni Mormon sulod sa sobra sa usa ka siglo ug tunga nakapahimo niini nga dili na kaayo importante kanato karon? Ato bang nahinumduman ang bag-o nga pakigsaad, gani ang Basahon ni Mormon? Sa Biblia kita adunay Daang Tugon ug Bag-ong Tugon. Ang pulong nga tugon mao ang paghulagway sa Iningles sa pulong nga Greek nga mahimong hubaron usab nga pakigsaad. Mao ba kini ang gipasabut sa Ginoo sa dihang Iyang gitawag ang Basahon ni Mormon nga “bag-o nga pakigsaad”? Kini sa tinuoray mao ang lain nga tugon o saksi ni Jesus. Kini mao ang usa sa mga rason nganong bag-ohay lang natong gidugang ang mga pulong “Lain nga Tugon ni Jesukristo” ngadto sa ulohan sa Basahon ni Mormon.
Kon ang nag-una nga mga Santos gibadlong sa pagbaliwala sa Basahon ni Mormon, kita ba mahatagan og gamay nga panghimaraut kon buhaton usab kini nato? Ang Ginoo Mismo nagpamatuod nga kini adunay mahangturon nga kahulugan. Ang gamayng natong gidaghanon makapahimo ba sa tibuok Simbahan nga mahimaraut tungod kay kita nagtiaw-tiaw sa sagradong mga butang? Unsa man unya ang atong isulti panahon sa Paghukom kon kita mobarug atubangan Kaniya ug makita ang iyang mausisahon nga pagtutok kon kita usa niadtong gihulagway nga nakalimot sa bag-ong pakigsaad?
Adunay tulo ka mahinungdanon nga mga rason nganong ang mga Santos sa Ulahing mga Adlaw kinahanglang magtuon sa Basahon ni Mormon sa tibuok kinabuhi.
Ang una mao nga ang Basahon ni Mormon mao ang sukaranang bato sa atong tinuohan. Kini mao ang pahayag ni Propeta Joseph Smith. Siya mipamatuod nga “ang Basahon ni Mormon mao ang labing tukma sa bisan hain nga basahon dinhi sa yuta, ug ang sukaranan sa atong tinuohan.”1 Ang sukaranan nga bato mao ang tunga-tunga nga bato sa usa ka arko. Kini ang mopugong sa uban pang mga bato sa lugar niini, ug kon tangtangon, ang arko malumpag.
Adunay tulo ka mga pamaagi diin ang Basahon ni Mormon mao ang sukaranang bato sa atong tinuohan. Kini mao ang sukarang bato sa atong pagsaksi kang Kristo. Kini mao ang sukarang bato sa atong doktrina. Kini mao ang sukarang bato sa atong pagpamatuod.
Ang Basahon ni Mormon mao ang sukaranang bato sa atong pagsaksi kang Jesukristo, kinsa Siya Mismo mao ang bato sa pamag-ang sa tanan nato nga buhaton. Kini nagsaksi sa Iyang pagkatinuod uban sa gahum ug katin-aw. Dili sama sa Biblia, nga miagi sa daghang mga henerasyon nga mga tigkopya [copyists], mga tighubad, ug malimbungon nga mga relihiyonista kinsa miusab sa teksto, ang Basahon ni Mormon naggikan sa tigsulat ngadto sa tigbasa sa usa lang ka dinasig nga paagi sa paghubad. Busa, ang pagpamatuod sa Agalon klaro, lunsay, ug puno sa gahum. Apan kini makahimo og mas daghan pa. Kadaghanan sa kalibutan sa Kristiyano karon nagsalikway sa kabalaan sa Manluluwas. Ilang gikwestyon ang Iyang milagroso nga pagkatawo, Iyang hingpit nga kinabuhi, ug ang katinuod sa Iyang mahimayaong Pagkabanhaw. Ang Basahon ni Mormon nagtudlo sa yano ug dili masayop nga mga termino kabahin sa kamatuoran sa tanan niadtong butanga. Kini naghatag usab sa labing kompleto nga pagpasabut sa doktrina sa Pag-ula. Sa tinuoray, kining balaanong dinasig nga basahon mao ang sukaranang bato sa pagpamatuod ngadto sa kalibutan nga si Jesus mao ang Kristo.2
Ang Basahon ni Mormon mao usab ang sukaranang bato sa doktrina sa Pagkabanhaw. Sama sa gihisgut kaganina, ang Ginoo Mismo mipahayag nga ang Basahon ni Mormon naglangkob sa “kahingpitan sa ebanghelyo ni Jesukristo” (D&P 20:9). Kana wala magpasabut nga kini naglangkob sa tanang pagtulun-an, sa tanang doktrina nga gipadayag. Hinoon, kini nagpasabut nga diha sa Basahon ni Mormon kita makakaplag sa kahingpitan niadtong mga doktrina nga gikinahanglan sa atong kaluwasan. Ug kini gitudlo sa yano ug simple nga paagi aron bisan ang mga bata makakat-on sa mga pamaagi sa kaluwasan ug kahimayaan. Ang Basahon ni Mormon nagtanyag og daghan kaayo nga makapalapad sa atong pagsabut sa mga doktrina sa kaluwasan. Kon wala kini, kadaghanan sa gipangtudlo sa ubang mga kasulatan dili hapit mahimong yano ug bililhon.
Sa katapusan, ang Basahon ni Mormon mao ang sukaranang bato sa atong pagpamatuod. Sama nga ang arko malumpag kon tang-tangon ang sukaranang bato, mao usab ang tanan diha sa Simbahan mobarug o mapukan uban sa kamatuoran sa Basahon ni Mormon. Ang mga kaaway sa Simbahan klarong nakasabut kaayo niini. Mao kini nganong sila naningkamot pag-ayo sa pagpawala sa kamatuoran sa Basahon ni Mormon, kay kon kini mapamatud-an nga dili tinuod, malakip usab si Propetang Joseph Smith. Mao usab ang atong pag-angkon sa mga yawe sa priesthood, ug pagpadayag, ug pagpahiuli sa Simbahan. Apan sa sama nga paagi, kon ang Basahon ni Mormon tinuod—ug minilyon karon ang nagpamatuod nga sila adunay saksi sa Espiritu nga kini gayud tinuod—dayon ang tawo kinahanglan nga modawat sa mga pangangkon sa Pagpahiuli ug sa tanan nga nag-uban niini.
Oo, akong mga kaigsoonan, ang Basahon ni Mormon mao ang sukaranang bato sa atong tinuohan—ang sukaranang bato sa atong pagpamatuod, ang sukaranang bato sa atong doktrina, ug ang sukaranang bato sa pagpamatuod sa atong Ginoo ug Manluluwas.
Ang ikaduha nga mahinungdanong rason nganong kinahanglan natong himoon ang Basahon ni Mormon nga sentro sa pagtuon tungod kay kini gisulat alang sa atong panahon. Ang mga Nephite wala gyud niini nga basahon; ni ang mga Lamanite sa karaang panahon. Kini gitagana alang kanato. Si Mormon misulat sa hapit na sa pagtapos sa sibilisasyon sa Nephite. Ubos sa inspirasyon sa Dios, kinsa nakakita sa tanang mga butang gikan sa sinugdanan, iyang gipamubo ang mga rekord sa daghang mga siglo, nagpili sa mga istorya, pamulong, ug panghitabo nga makatabang kaayo kanato.
Ang matag mahinungdanong mga tigsulat sa Basahon ni Mormon nagpamatuod nga siya misulat alang sa umaabut nga mga henerasyon. Si Nephi miingon: “Ang Ginoong Dios nagsaad ngari kanako nga kini nga mga butang diin ako misulat ampingan ug tipigan, ug ihatag ngadto sa akong binhi, gikan sa kaliwatan ngadto sa kaliwatan” (2 Nephi 25:21). Ang iyang igsoon nga lalaki nga si Jacob, kinsa mipuli kaniya, misulat sa susama nga mga pulong: “Kay [si Nephi] miingon nga ang kasaysayan sa iyang mga katawhan kinahanglan nga ikulit diha sa iyang uban nga mga palid, ug nga ako kinahanglan motipig niini nga mga palid ug mohatag kanila ngadto sa akong mga binhi, gikan sa kaliwatan ngadto sa kaliwatan” (Jacob 1:3). Sila si Enos ug Jarom nagpasabut nga sila usab nagsulat dili para sa ilang mga katawhan apan alang sa umaabut nga mga henerasyon (tan-awa sa Enos 1:15–16; Jarom 1:2).
Si Mormon mismo miingon, “Oo, ako mamulong nganha kaninyo, kamo nga salin sa balay ni Israel” (Mormon 7:1). Ug si Moroni, ang katapusan sa dinasig nga mga tigsulat, sa tinuoray nakakita sa atong panahon. “Tan-awa,” siya miingon, “ang Ginoo nakapakita ngari kanako niini nga mahinungdanon ug kahibulongan nga mga butang mahitungod niana nga sa dili madugay moabut, ug niana nga adlaw sa panahon nga kini nga mga butang moabut diha kaninyo.
“Tan-awa, ako namulong nganha kaninyo ingon og kamo ania, ug gani kamo wala. Apan tan-awa, si Jesukristo mipakita kaninyo ngari kanako, ug ako nasayud sa inyong binuhatan” (Mormon 8:34–35).
Kon sila nakakita sa atong panahon ug mipili niadtong mga butang nga bililhon kaayo alang kanato, dili ba angayan lang nga ingon niana ang atong pagtuon sa Basahon ni Mormon? Kinahanglan nga kanunay natong pangutan-on ang atong kaugalingon, “Ngano man ang Ginoo nagdasig ni Mormon (o Moroni o Alma) sa paglakip niana sa iyang rekord? Unsa nga leksyon ang atong makat-unan gikan niana nga makatabang kanako sa pagpakabuhi niining panahona?
Ug adunay daghang mga ehemplo kon sa unsa nga paagi kana nga pangutana matubag. Pananglit, sa Basahon ni Mormon kita makakita og sumbanan sa pagpangandam sa Ikaduha nga Pag-anhi. Usa ka dakong bahin sa basahon nagtumong sa pipila ka mga dekada sa wala pa ang pagbisita ni Kristo sa Amerika. Pinaagi sa mabinantayon nga pagtuon niana nga panahon, kita makatino nganong ang uban gipanglaglag sa grabe nga paghukom sa wala pa ang Iyang pag-abut ug unsa ang nakapahimo sa uban nga mobarug sa templo didto sa yuta sa Bountiful ug mihikap sa mga samad sa Iyang mga kamot ug tiil.
Gikan sa Basahon ni Mormon kita makakat-on kon sa unsang paagi nagpakabuhi ang mga disipulo ni Kristo sa mga panahon sa gubat. Gikan sa Basahon ni Mormon atong makita ang mga kadautan sa tinago nga mga kalihokan nga gihulagway nga tataw ug makahahadlok nga reyalidad. Sa Basahon ni Mormon kita makakaplag og mga leksyon nga naghisgut kabahin sa pagpanglutos ug sa apostasiya. Kita makakat-on og daghan kon unsaon sa paghimo ang misyonaryo nga buhat. Ug labaw sa tanan, atong makita diha sa Basahon ni Mormon ang kapeligro sa pagkakalibutanon ug pagtinguha sa atong mga kasingkasing sa mga butang sa kalibutan. Aduna bay magduhaduha nga kini nga basahon gitagana alang kanato ug sulod niini kita makakaplag og dakong gahum, dakong kahupayan, ug dakong proteksyon?
Ang ikatulo nga rason nganong ang Basahon ni Mormon bililhon ngadto sa mga Santos sa Ulahing mga Adlaw makita diha sa sama nga pahayag ni Propeta Joseph Smith nga nakutlo kaganina. Siya miingon, “Ako misulti sa mga kaigsoonan nga ang Basahon ni Mormon mao ang labing tukma sa bisan hain nga basahon dinhi sa yuta, ug ang sukaranan sa atong tinuohan, ug ang tawo labi nga maduol sa Dios pinaagi sa pagsunod sa iyang mga lagda, kay sa bisan hain nga basahon.” Kana mao ang ikatulo nga rason sa pagtuon sa basahon. Kini makatabang kanato nga mas mapaduol sa Dios. Aduna bay usa ka butang sulod sa atong kasingkasing nga naghandom nga mas mapaduol ngadto sa Dios, mas mahisama Kaniya sa atong matag adlaw nga pagpakabuhi, mobati sa Iyang presensya kanunay? Kon mao, ang Basahon ni Mormon makatabang gayud kanato sa pagbuhat niini kaysa uban pang basahon.
Ang Basahon ni Mormon wala lamang magtudlo kanato sa kamatuoran, bisan tuod naghimo kini niana. Ang Basahon ni Mormon wala lamang magpamatuod kang Kristo, bisan tuod naghimo kini niana, usab. Apan adunay mga butang nga mas labaw pa. Adunay gahum sa basahon nga magsugod sa pagdagayday sa inyong mga kinabuhi sa higayon nga sugdan ninyo ang tinuoray nga pagtuon sa basahon. Makaplagan ninyo ang mas dako nga gahum sa pagpakigbatok sa pagsulay. Makaplagan ninyo ang gahum sa paglikay sa panglingla. Makaplagan ninyo ang gahum nga magpabilin sa higpit ug pig-ot nga dalan. Ang mga kasulatan mao ang gitawag og “mga pulong sa kinabuhi” (tan-awa sa D&P 84:85), ug walay laing mas tinuod pa kay sa Basahon ni Mormon. Kon kamo magsugod sa pagkagutom ug pag-uhaw niadto nga mga pulong, kamo makakaplag sa kinabuhi nga mas mabungahon.
Ang atong pinalanggang igsoon, si Presidente Marion G. Romney … mipamatuod sa mga panalangin nga moabut sa kinabuhi niadtong mobasa ug magtuon sa Basahon ni Mormon. Siya miingon:
“Akong gibati ang kasigurado nga kon, sa atong mga panimalay, ang mga ginikanan mainampoon ug kanunay nga mobasa gikan sa Basahon ni Mormon, kanilang duha ug kauban sa ilang mga anak, ang diwa nianang talagsaon nga basahon moabut aron mopuno sa atong mga panimalay ug sa tanan nga nagpuyo didto. Ang diwa sa balaan nga pagtahud molambo; pagtahud ug ang konsiderasyon sa usag usa molambo. Ang diwa sa panagbingkil mopalayo. Ang mga ginikanan motambag sa ilang mga anak uban sa mas dako nga gugma ug kaalam. Ang mga anak mas mosanong ug manunuton sa tambag sa ilang mga ginikanan. Ang pagkamatarung molambo. Hugot nga pagtuo, paglaum, ug gugma nga putli—ang tiunay nga gugma ni Kristo—maanaa sa atong mga panimalay ug kinabuhi, makahimo sa ilang pagmata nga adunay kalinaw ug hingpit nga kalipay.”3
Kini nga mga saad—dugang nga gugma ug panagsinabtanay sa panimalay, dakong pagtahud tali sa ginikanan ug anak, paglambo sa espiritwalidad ug pagkamatarung—dili kawang nga mga saad, apan sama sa gipasabut ni Propeta Joseph Smith sa dihang siya miingon nga ang Basahon ni Mormon makatabang kanato nga mas mapaduol ngadto sa Dios.
Mga kaigsoonan, dasigon ko kamo uban sa akong tibuok kasingkasing nga inyong ikonsiderar uban sa dakong kabalaan ang kaimportante sa Basahon ni Mormon diha kaninyo sa personal nga paagi o sa tibuok Simbahan.
Sobra sa 10 ka tuig ang milabay mihimo ko sa mosunod nga mga pahayag kabahin sa Basahon ni Mormon:
“Ang mahangturon ba nga mga sangputanan nag-agad sa atong pagsanong niini nga basahon? Oo, alang man sa atong panalangin o sa atong kalautan.
“Ang matag Santos sa Ulahing mga Adlaw kinahanglang magtuon niini nga basahon isip usa ka buluhaton sa tibuok kinabuhi. Kay kondili iyang gibutang ang iyang kalag sa kakuyaw ug nagsalikway niadtong makahatag og espiritwal ug intelektwal nga panaghiusa sa iyang tibuok kinabuhi. Adunay kalainan tali sa usa ka kinabig kinsa natukod sa bato ni Kristo pinaagi sa Basahon ni Mormon ug nanggunit pag-ayo sa gunitanan nga puthaw, ug sa tawo nga wala.”4
Akong imatuod kini nga mga pulong kaninyo karong adlawa. Dili kita magpabilin ubos sa paghimaraut, uban sa hampak ug paghukom, pinaagi sa pagbaliwala niining talagsaon ug kahibulongan nga gasa nga gihatag sa Ginoo ngari kanato. Hinoon, atong daugon ang mga saad nga nalakip sa pagbahandi niini sa atong mga kasingkasing.
Sa Doktrina ug mga Pakigsaad, seksyon 84, bersikulo 54 hangtud 58, atong mabasa:
“Ug ang inyong mga hunahuna sa mga panahon nga nangagi nangitngit tungod sa walay pagtuo, ug tungod kay kamo mibaliwala sa mga butang nga kamo nakadawat—
“Kansang garbo ug walay pagtuo midala sa tibuok simbahan ubos sa paghukom.
“Ug kini nga panghimaraut anaa diha sa mga anak sa Zion, gani sa tanan.
“Ug sila magpabilin ubos niini nga panghimaraut hangtud nga sila maghinulsol ug mahinumdom sa bag-o nga pakigsaad, gani ang Basahon ni Mormon ug ang kaniadto nga mga sugo diin Ako mihatag ngadto kanila, dili lamang sa pag-ingon, apan sa pagbuhat sumala ngadto niana nga Ako misulat—
“Nga sila unta makadala og bunga nga angay alang sa gingharian sa ilang Amahan; kon dili adunay magpabilin nga hampak ug paghukom nga ibu-bu diha sa mga anak sa Zion.”
Sukad sa pinakabag-o kinatibuk-ang komperensya nga akong natambungan, ako nakadawat og daghang sulat gikan sa mga Santos, batan-on o tigulang, gikan sa tibuok kalibutan kinsa midawat sa hagit sa pagbasa ug pagtuon sa Basahon ni Mormon.
Ako nalipay pag-ayo sa ilang mga istorya kon sa unsang paagi nga ang ilang mga kinabuhi nausab ug sa unsang paagi nga sila mas naduol sa Ginoo isip resulta sa ilang pasalig. Kining mahimayaong mga pagpamatuod nagmatuod sa akong kalag sa mga pulong ni Propeta Joseph Smith nga ang Basahon ni Mormon tinuod gayud “nga sukaranang bato sa atong tinuohan” ug ang usa ka lalaki ug babaye “labi nga maduol sa Dios pinaagi sa pagsunod sa iyang mga lagda, kay sa bisan hain nga basahon.”
Kini mao ang akong pag-ampo, nga ang Basahon ni Mormon mahimong sukaranang bato sa atong mga kinabuhi.
Paghulagway sa litrato pinaagi ni David Stoker; sa tuo: gilitratohan ni Welden C. Andersen; litrato ni Presidente Benson pinaagi sa Busath Photography