Unsay Gitudlo sa Basahon ni Mormon mahitungod sa Gugma sa Dios

Ni Elder Russell M. Nelson

Sa Korum sa Napulog Duha ka mga Apostoles

Pipila sa makapadasig kaayong mga ehemplo sa gugma sa Ginoo narekord diha sa Basahon ni Mormon.

Kadaghanan sa mga Kristiyano pamilyar sa mga kinaiya ni Jesukristo sama sa giingon diha sa Biblia. Nahibulong sila sa gugma nga Iyang gipakita alang sa mga kabus, mga masakiton, ug sa mga gisakit. Kadtong nagkonsiderar sa ilang kaugalingon nga Iyang mga disipulo naningkamot usab sa pagsundog sa Iyang ehemplo ug pagsunod sa pag-awhag sa Iyang minahal nga Apostol: “Maghigugmaay kita ang usa sa usa: kay ang gugma iya sa Dios; ug siya nga nagahigugma gipanganak sa Dios, ug nakaila sa Dios. … Kay ang Dios gugma man” (1 Juan 4:7–8).

Kini nga konsepto giklaro sa Basahon ni Mormon. Kini naghulagway sa unsang paagi nga ang tawo gipanganak sa Dios ug sa unsang paagi nga mabatunan sa tawo ang gahum sa paghigugma sama sa Iyang gihimo. Kini nagpaila og tulo ka mahinungdanong mga baruganan nga nagdala sa gahum sa gugma sa Dios ngari sa atong kinabuhi.

Una, ang Basahon ni Mormon nagtudlo nga ang paggamit og pagtuo diha ni Kristo ug ang pagsulod ngadto sa usa ka pakigsaad uban Kaniya nga mosunod sa Iyang mga sugo mao ang yawe sa pagpakatawo pag-usab sa espirituhanong paagi. Ngadto sa mga tawo sa Basahon ni Mormon nga naghimo og ingon niana nga pakigsaad, si Haring Benjamin namahayag, “Ug karon, tungod sa pakigsaad diin kamo nakahimo kamo pagatawgon nga mga anak ni Kristo, iyang anak nga mga lalaki, ug iyang anak nga mga babaye; kay tan-awa, niining adlawa siya sa espirituhanon nga paagi nanganak kaninyo; kay kamo nag-ingon nga ang inyong mga kasingkasing nausab pinaagi sa hugot nga pagtuo diha sa iyang ngalan; busa, kamo natawo kaniya ug nahimo nga anak nga mga lalaki ug iyang anak nga mga babaye” (Mosiah 5:7).

Ikaduha, ang Manluluwas mismo nagtudlo nga ang gahum aron mas mahisama Kaniya naggikan sa pagdawat sa mga ordinansa sa ebanghelyo: “Karon mao kini ang sugo: Paghinulsol, kamong tanan nga mga lumulupyo sa yuta, ug duol ngari kanako ug magpabunyag diha sa akong ngalan, aron kamo mahimo nga pagasantoson pinaagi sa pagdawat sa Espiritu Santo, aron mobarug nga walay lama sa akong atubangan sa katapusan nga adlaw” (3 Nephi 27:20).

Ikatulo, Siya nag-awhag kanato sa pagsunod sa Iyang ehemplo: “Unsa nga matang sa mga tawo kamo mahisama?” nangutana Siya sa maayo nga pagkasulti. Ang Iyang tubag: “Sa pagkatinuod Ako moingon nganha kaninyo, gani sama nga Ako mao” (3 Nephi 27:27). Sa pagkatinuod, gusto Niya nga kita mahimong mas mahisama Kaniya.

Pipila sa labing makapadasig nga mga ehemplo sa Iyang gugma narekord diha sa Basahon ni Mormon. Kini nga mga ehemplo magamit sa kaugalingon natong kinabuhi samtang maningkamot kita nga mas mahisama sa Ginoo.

Ang Iyang gugma kang Lehi ug sa pamilya ni Lehi—ug ang ilang gugma Kaniya—mao ang nagdala kanila ngadto sa Amerika, ang ilang yuta nga saad, diin sila miuswag.¹

Ang gugma sa Dios alang kanato mao ang nag-aghat Kaniya mga siglo na ang milabay sa pagmando sa Nephite nga mga propeta sa paghupot og sagrado nga rekord sa ilang katawhan. Ang mga leksyon gikan niana nga rekord adunay kalabutan sa atong kaluwasan ug kahimayaan. Kini nga mga pagtulun-an anaa sa Basahon ni Mormon. Kining sagrado nga mga pulong nagbarug isip makita nga ebidensya sa gugma sa Dios sa tanan Niyang mga anak sa tibuok kalibutan.²

Ang gugma ni Kristo sa Iyang “laing karnero” mao ang nagdala Kaniya ngadto sa Bag-ong Kalibutan.³ Gikan sa Basahon ni Mormon atong nakat-unan nga ang grabeng mga kalamidad sa kinaiyahan ug ang tulo ka adlaw nga kangitngit nahitabo didto sa Bag-ong Kalibutan human sa kamatayon sa Ginoo didto sa Daang Kalibutan. Dayon ang nahimaya ug nabanhaw nga Ginoo mikanaog gikan sa langit ug nangalagad taliwala sa katawhan sa Bag-ong Kalibutan.

“Ako ang kahayag ug ang kinabuhi sa kalibutan,” miingon Siya kanila, “ug Ako nakainom gikan sa pait nga kopa nga gihatag sa Amahan ngari kanako, ug gihimaya ang Amahan sa akong pagpas-an sa mga sala sa kalibutan” (3 Nephi 11:11).

Dayon mihatag Siya og usa sa labing halandumon nga mga kasinatian nga mabatunan ni bisan kinsa uban Kaniya. Siya midapit kanila sa paghikap sa samad sa Iyang kilid ug sa mga agi sa mga lansang diha sa Iyang mga kamot ug mga tiil, nga sila masayud gayud nga Siya mao “ang Dios sa Israel, ug ang Dios sa tibuok yuta, nga gipatay tungod sa mga sala sa kalibutan” (3 Nephi 11:14).

Dayon si Jesus mihatag sa Iyang mga disipulo og awtoridad sa pagbunyag, sa paghatag sa gasa sa Espiritu Santo, ug sa pagpahigayon sa sakrament. Gihatag Niya kanila ang gahum sa pag-establisar sa Iyang Simbahan taliwala kanila, nga gidumala sa napulog duha ka mga disipulo.

Gihatag Niya ngadto kanila ang pipila sa mahinungdanon nga mga pagtulun-an nga Iyang gihatag sa Iyang mga disipulo sa Daang Kalibutan. Giayo Niya ang ilang mga masakiton. Miluhod Siya ug nag-ampo sa Amahan sa mga pulong nga hilabihan ka gamhanan ug ka sagrado nga kini dili mahimong irekord. Hilabihan ka gamhanan ang Iyang pag-ampo nga kadtong mga nakadungog Kaniya napuno sa kalipay. Napuno sa Iyang gugma alang kanila ug sa ilang hugot nga pagtuo Kaniya, si Jesus mismo mihilak. Nanagna Siya kalabut sa buhat sa Dios sulod sa mga siglo paingon sa gisaad nga sinugdanan sa Iyang Ikaduhang Pag-anhi.⁴

Dayon misugo Siya kanila sa pagdala sa ilang mga bata ngadto Kaniya.

“Ug siya mikuha sa ilang gagmay nga mga bata, sa tinagsa, ug mipanalangin kanila, ug nag-ampo ngadto sa Amahan alang kanila.

“Ug sa diha nga siya nakahimo na niini siya mihilak pag-usab;

“Ug siya namulong ngadto sa pundok sa mga katawhan, ug miingon ngadto kanila: Tan-awa ang inyong gagmay nga mga bata.

“Ug samtang sila mipunting sa ilang mga mata paingon sa langit, ug sila nakakita sa langit nga naabli, ug sila nakakita sa mga anghel nanaog gikan sa langit nga ingon og diha sa taliwala sa kalayo; ug sila nanaog ug gialirongan kadtong gagmay nga mga bata, … ug ang mga anghel nangalagad ngadto kanila” (3 Nephi 17:21–24).

Ingon niana ang kaputli ug gahum sa gugma sa Dios, sama sa gipadayag diha sa Basahon ni Mormon.

Niining ulahing mga adlaw kita kinsa adunay kahigayunan nga makabaton og Basahon ni Mormon, mahimong mga miyembro sa Simbahan sa Ginoo, makabaton sa Iyang ebanghelyo, ug makatuman sa Iyang mga sugo masayud kabahin sa dili masukod nga gugma sa Dios. Nasayud kita kon unsaon pag-angkon sa Iyang gugma. Sa atong pagkahimong tinuod Niya nga mga disipulo, kita makaangkon og gahum sa paghigugma sama sa Iyang gihimo. Sa atong pagsunod sa Iyang mga sugo, kita mas mahisama Kaniya. Atong mapalambo ang atong personal nga sirkulo sa paghigugma sa pagtabang sa mga tawo sa matag nasud, kaliwat, ug pinulongan.

Sa dakong pasalamat alang sa Iyang sulundon nga kinabuhi, kita makahimo niini nga kasulatan nga atong sumbanan: “Pag-ampo ngadto sa Amahan uban sa tibuok kusog sa kasingkasing, nga kamo unta mapuno niini nga gugma, diin siya mitugyan diha sa tanan kinsa tinuod nga mga sumusunod sa iyang Anak, nga si Jesukristo; aron mahimo kamo nga mga anak sa Dios; nga kon siya moabut kita mahisama kaniya, kay kita makakita kaniya nga mao gihapon” (Moroni 7:48).⁵

Ang Pagkasayud Mao ang Pagkasayud sa Gugma

Bag-o ko nga miyembro sa Ang Simbahan ni Jesukristo sa mga Santos sa Ulahing mga Adlaw, ug alang kanako ang Basahon ni Mormon dili lamang usa ka basahon. Lig-on kini nga ebidensya nga ang Langitnong Amahan nahigugma kanato. Ebidensya kini nga ang nag-una nga mga Santos nahigugma kanato ug gusto nga kita makapauli. Ebidensya kini nga ang plano sa kalipay sa Dios anaa ug hingpit.

Ang pagkasayud nga kini nga basahon tinuod mao ang pagkasayud nga ang Langitnong Amahan ug ang Iyang Anak buhi. Kini ang pagkasayud nga ang kinabuhi matahum ug mahangturon. Kini ang pagkasayud nga hangtud nga kamo padayon nga naningkamot sa paghimo sa inyong labing maayo ug maghinulsol kon kamo masayop, nan kamo kanunay nga pasayloon. Kini ang pagkasayud sa tinuod nga kahulugan sa pamilya. Kini ang pagkasayud nga dili gayud mawala kaninyo ang inyong minahal, kay siya maghulat kaninyo. Kini ang pagkasayud sa mga panalangin sa Langitnong Amahan. Kini ang pagkasayud sa kahupayan nga bisan unsa pa nga mga problema ang moabut kaninyo, kamo makasugakod niini, kay kini alang sa inyong kaayohan. Kini ang pagkasayud nga ang Espiritu Santo mao ang inyong kanunay nga kauban. Sa lintunganay, kini ang pagkasayud sa gugma diha sa tanan niini nga mga pagpahayag.

Emma Adesanya, Ireland

Pag-ila sa Gahum sa Iyang Gugma

Sa dihang mipasakop ko sa Simbahan atol sa akong unang tuig sa kolehiyo, nindot ang akong gibati mahitungod sa mga kausaban nga akong gihimo sa akong inadlaw nga pagpakabuhi ug nakita unsa ka dako ang nahimo sa ebanghelyo sa akong kinabuhi. Bisan pa niana, gibati nako sa wala madugay nga ang akong nangagi mibabag sa bisan unsa nga kalamboan nga akong himoon. Unsaon sa Langitnong Amahan paggamit kanako sa pagtabang og tukod sa Iyang gingharian nga nakahimo man ko og ingon ka bati nga mga pagpili?

Dayon usa ka adlaw akong giablihan ang akong Basahon ni Mormon sa kinatapusan nga pahina. Akong gibasa ang mga pulong sa pagpanamilit ni Moroni: “Oo, duol ngadto kang Kristo, ug paghingpit diha kaniya, … ug kon kamo molimud sa inyong mga kaugalingon sa tanan nga dili diosnon, ug mohigugma sa Dios uban sa tibuok ninyo nga gahum, hunahuna ug kusog, niana ang iyang grasya igo alang kaninyo, nga pinaagi sa iyang grasya kamo mahimo nga hingpit diha kang Kristo; ug kon pinaagi sa grasya sa Dios kamo mahingpit diha ni Kristo, kamo dili makahimo sa paglimud sa gahum sa Dios” (Moroni 10:32). Akong gitutokan kadto nga mga pulong. Gibati nako ang Espiritu nga nagsulti kanako nga kini tinuod. Akong naamguhan nga akong gilimitahan ang gahum sa Dios pinaagi sa paghunahuna nga Siya dili makagamit kanako sa bisan unsa nga paagi nga Iyang nakita nga angay.

Nakahukom ko nga gikan niana dili na ko “molimud sa gahum sa Dios” apan dawaton ang akong nangagi ug molantaw sa akong umaabut. Sa dihang mas mi-focus ko sa akong umaabut imbis sa akong nangagi ug misalig sa makapabalaan nga grasya ni Jesukristo, mas gibati nako ang gugma sa akong Manluluwas alang kanako ug mas malipayon ko sa akong kaugalingon.

Christy Pettey, Washington, USA

Si Alma Namunyag diha sa Katubigan sa Mormon, ni Arnold Friberg

Si Jesukristo Mibisita sa Amerika, ni John Scott