Eaha ta te Buka a Moromona e haapii nei no ni‘a i te Here o te Atua

Na Elder Russell M. Nelson

No te Pŭpŭ no te Tino Ahuru ma Piti Aposetolo

Ua papa‘ihia te tahi o te mau hoho‘a hau roa’tu te hanahana no te here o te Fatu i roto i te Buka a Moromona.

Elder Russell M. Nelson

Ua matau te rahiraa o te mau Keresetiano i te mau maitai o Iesu Mesia mai tei faaitehia i roto i te Bibilia. Ua maere ratou i te here Ta’na i faaite no te feia vêvê, te feia ma‘i e te feia tei faatîtîhia. Ua tutava atoa te mau taata tei faariro ia ratou iho ei mau pĭpĭ Na’na ia pee i To’na hoho‘a e ia pee i te a‘oraa a Ta’na Aposetolo herehia : « E aroha tatou ia tatou iho : no ŏ mai hoi te aroha i te Atua ra ; e o tei aroha ra, ua faafanauhia ïa e te Atua, e ua ite hoi oia i te Atua. … e aroha hoi te Atua » (1 Ioane 4:7–8).

Ua haamaramaramahia teie mana‘o e te Buka a Moromona. Te faataa nei te reira e nahea te hoê taata e faafanauhia ai e te Atua e nahea e noaa ai i te hoê taata te mana no te aroha mai Ia’na i aroha. E faataa mai te reira e toru na parau tumu faufaa rahi o te afa‘i mai i te mana o te aroha o te Atua i roto i to tatou oraraa.

A tahi, te haapii nei te Buka a Moromona e te faaohiparaa i te faaroo i te Mesia e te tomoraa i roto i te hoê fafauraa e Ona no te haapa‘o i Ta’na mau faaueraa o te taviri ïa ia faafanau-varua-hia. I te nunaa no te Buka a Moromona tei rave i taua fafauraa ra, ua parau te Arii Beniamina, « e teie nei, no te fafauraa ta outou i fafau maira, e parauhia‘i outou i te tamarii a te Mesia, oia hoi ta’na mau tamarii tamaroa, e ta’na mau tamarii tamahine ; Inaha hoi, i naua nei i fanau-varua-hia‘i outou e ana ; no te mea te na ô maira outou, ua faahuru-ê-hia to outou aau na roto i te faaroo i to’na ra i‘oa ; no reira i faafanauhia‘i outou e ana, e i riro ai hoi outou ei tamarii tamaroa e tamahine na’na ra » (Mosiah 5:7).

Te piti, ua haapii te Faaora Iho e te mana no te riro mai Ia’na ra e tae mai ïa na roto i te fariiraa i te mau oro‘a no te evanelia : « E teie nei tera te faue, e tatarahapa, e to te mau otia no te fenua, e haere mai ia’u, e bapetizohia i to’u i‘oa, ia mo‘a outou i te noaara mai te Varua Maitai, ia tia outou ma te porao ore i mua ia’u i te mahana hopea ra » (3 Nephi 27:20).

Te toru, ua a‘o Oia ia tatou ia pee i To’na hoho‘a : « Eaha to outou huru e au ai ? » Ua ui nehenehe oia. Ta’na pahonoraa : « Amene e parau atu vau ia outou, mai to’u nei ïa » (3 Nephi 27:27). Oia mau, ua hinaaro Oia ia tatou ia riro mai Ia’na ra te huru.

Ua papa‘ihia te tahi o te mau hoho‘a hau roa’tu i te hanahana no te aroha o te Fatu i roto i te Buka a Moromona. E nehenehe teie mau hoho‘a e faaohipahia i roto i to tatou iho oraraa a tutava ai tatou ia riro mai te Fatu ra te huru.

Na To’na aroha ia Lehi e te utuafare o Lehi e to ratou here Ia’na i afa‘i ia ratou i te fenua Amerika, to ratou fenua fafauhia, i reira ratou i te ruperuperaa.¹

Na te aroha o te Atua ia tatou i faauru Ia’na e mau tenetere i ma‘iri a‘e nei ia faaue i te mau peropheta no te Ati Nephi ia tape‘a i te hoê buka mo‘a no to ratou nunaa. E tuati te mau haapiiraa no taua buka ra i to tatou faaoraraa e faateiteiraa. I teie nei tei roto teie mau haapiiraa i te Buka a Moromona. Te ti‘a nei teie buka mo‘a ei tapa‘o papû no te here o te Atua i Ta’na mau tamarii atoa na te ao nei.²

Na te aroha o te Mesia i Ta’na « mau mamoe ê atu » i faahaere mai Ia’na i te Fenua Apî. Te haapii nei tatou mai roto mai i te Buka a Moromona e ua tupu te mau ati rahi no te fenua e e toru mahana pouri i te Fenua Apî i muri a‘e i te poheraa o te Fatu i te Fenua Tahito. I muri iho ua pou mai te Fatu hanahana e tei ti‘afaahou mai te ra‘i mai e ua utuutu i te mau taata no te Fenua Apî.

Ua parau Oia ia ratou, « O vau te maramarama e te ora o teie nei ao, ua oti ta’u inuraa i ta te ‘a‘ua avaava i horo‘ahia mai e te Metua na’u ra, ua faahanahanahia hoi te Metua na roto i ta’u raveraa i te hara o to te ao nei i nia iho i‘au » (3 Nephi 11:11).

I muri iho ua horo‘a Oia i te hoê o te mau ohipa taa ê e nehenehe ta te hoê taata e ite i piha‘iho Ia’na. Ua ani oia ia ratou ia fafa i te puta i To’na aoao e te mau puta auri i roto i To’na mau rima e avae, ia ite papû ratou e o Oia « te Atua no Iseraela, e te Atua no to te ao atoa nei, e tei pohe no te mau hara a to teie nei ao » (3 Nephi 11:14).

I reira ua horo‘a Iesu i Ta’na mau pĭpĭ te mana ia bapetizo, ia horo‘a i te horo‘a o te Varua Maitai, e ia faatere i te oro‘a mo‘a. Ua horo‘a Oia ia ratou te mana ia haamau i Ta’na Ekalesia i rotopu ia ratou, arata‘ihia e na ahuru ma piti pĭpĭ

Ua horo‘a Oia ia ratou te tahi o te mau haapiiraa tumu Ta’na i horo‘a i Ta’na mau pĭpĭ i te Fenua Tahito ra. Ua faaora Oia i to ratou feia ma‘i. Ua tuturi e ua pure Oia i te Metua e no te puai rahi e te mo‘a o Ta’na mau parau aita ïa i ti‘a i te papa‘ihia. No te puai rahi o Ta’na pure ua î roa ïa te feia tei faaroo Ia’na i te oaoa. No te rahi o To’na here no ratou e no to ratou faaroo Ia’na, ua heva o Iesu. Ua tohu Oia i te ohipa a te Atua i roto i te mau tenetere e tae atu i te taime tei fafauhia no te piti o To’na taeraa mai.⁴

I muri iho ua ani Oia ia ratou ia hopoi mai i ta ratou mau tamarii Ia’na ra.

« E ua rave atu ra oia i ta ratou mau tamarii rii, haamatai tatai hoê ihora ia ratou, e ua pure atu ra i te Metua no ratou.

« E oti a‘e ra oia i te na reiraraa, oto faahou ihora oia ;

« E ua parau atu ra oia i te feia ra, na ô atu ra, A hi‘o na i ta outou mau tamarii rii.

« E te hi‘o a‘e ra ratou ra, nânâ a‘e ra ratou i to ratou mata i ni‘a i te ra‘i, e ua veteahia a‘e ra te ra‘i ia ratou, e hi‘o a‘e ra ratou i te mau melahi mai te mea ra e, te pou maira ratou no te ra‘i mai i na roto i te auahi ; e pou maira ratou i raro, e haaati a‘e ra i te mau tamarii ra… e ua tauturu maira te mau melahi ia ratou » (3 Nephi 17:21–24).

Tera ïa te porao ore e te mana o te here o te Atua, mai tei heheuhia mai i roto i te Buka a Moromona.

I teie mau mahana hopea nei o tatou tei haamaitaihia i te fariiraa i te Buka a Moromona, i te riroraa ei melo no te Ekalesia a te Fatu, i te fariiraa i Ta’na evanelia, e i te haapa‘oraa i Ta’na mau faaueraa, ua ite ïa tatou te tahi tufaa o te here hope ore o te Atua. Ua ite tatou nahea ia faariro i To’na here no tatou iho. Ia riro ana‘e tatou ei mau pĭpĭ mau Na’na, e noaa ïa ia tatou te mana no te here mai Ia’na. Ia haapa‘o ana‘e tatou i Ta’na mau faaueraa, e riro hau atu ïa tatou mai Ia’na ra te huru. E faaaano tatou i to tatou iho haamenemeneraa no te here na roto i te farereiraa’tu i te mau taata no te mau fenua, te mau opu e te mau reo atoa.

Ma te mauruuru hohonu no To’na oraraa maitai, e nehenehe ta tatou e faariro i teie papa‘iraa mo‘a ei arata‘i no tatou : « E pure atu i te Metua ma te puai hope o te aau ia î outou i teie nei aroha, o ta’na i ho mai i te taata atoa e pee mau i ta’na tamaiti ia Iesu Mesia, ia riro outou ei tamarii tamaroa [e tamarii tamahine] na te Atua, e ia fâ mai oia ra ua riro tatou mai ia’na te huru, e ite hoi tatou ia’na i to’na ra huru mau » (Moroni 7:48).⁵

Te mau nota

1. A hi‘o 1 Nephi 17:35–44 ; Mosia 7:20 ; Alama 9:9–11 ; 3 Nephi 5:20–22.

2. A hi‘o Api Upoo Parau no te Buka a Moromona ; 1 Nephi 13:35–41 ; 2 Nephi 33:4 ; Mosia 1:2–7 ; Moromona 8:13–41.

3. A hi‘o Ioane 10:16 ; 3 Nephi 15:11–24.

4. A hi‘o 3 Nephi 11–14 ; 18–20.

5. A faaau 1 Ioane 3:1–3.

Te faaite papû nei te hoê peropheta

President Gordon B. Hinckley

« Ua tae mai te Buka a Moromona na roto i te horo‘a e te mana o te Atua. Te parau mai nei oia mai te hoê reo mai raro mai i te repo ei faaite-papû-raa no ni‘a i te Tamaiti a te Atua. Te faahiti nei te reira no ni‘a i To’na fanauraa, Ta’na ohipa pororaa evanelia, To’na faasatauro-raa-hia e te ti‘a-faahou-raa, e To’na fâraa’tu i te feia parau-ti‘a i te fenua no Bounetifula i ni‘a i te fenua Amerika.

« E mea mau e nehenehe e tape‘ahia, e nehenehe e tai‘ohia, e e nehenehe e tamatahia. Tei roto i to’na mau api te hoê fafauraa no to’na tupuraa hanahana. E rave rahi mau milioni taata tei tamata i te reira e tei ite e e buka mau e te mo‘a te reira.

Peresideni Gordon B. Hinckley (1910–2008), « The Great Things Which God Has Revealed », Liahona, Me 2005, 81–82.

Ia Ite o te Ite ïa i te Aroha

E melo apî vau no te Ekalesia a Iesu Mesia i te Feia Mo‘a i te Mau Mahana Hopea Nei, e no’u nei e ere te Buka a Moromona i te hoê noa buka. E haapapûraa paari te reira e te here nei te Metua i te Ao ra ia tatou. E haapapûraa e ua here te feia mo‘a matamua ia tatou e ua hinaaro ratou ia tatou ia ho‘i mai i te fare nei. E haapapûraa e te vai nei te opuaraa a te Atua no te oaoa e e mea maitai roa te reira.

Ia ite e parau mau teie buka o te ite ïa e te ora nei te Metua i te Ao ra e Ta’na Tamaiti. O te iteraa ïa e mea nehenehe e e mea mure ore te oraraa. O te iteraa ïa e a tamau noa‘i outou i te tamata ia riro ei taata maitai e ia tatarahapa ia hi‘a ana‘e outou, e e faaore-noa-hia ïa ta outou mau hara i muri mai. O te iteraa ïa i te auraa mau no te utuafare. O te iteraa ïa e ore roa outou e ere i te hoê taata tei herehia, no te mea te tia‘i nei oia ia outou. O te iteraa ïa i te mau haamaitairaa a te Metua i te Ao ra. O te iteraa ïa i te tamahanahanaraa ia tae mai te mau vero na ni‘a i to outou haerea, e nehenehe ïa ia outou ia faaruru atu, no te mea e maitai te reira no outou. O te iteraa ïa e te Varua Mo‘a o to outou ïa hoa tamau. Oia hoi, o te iteraa ïa i te aroha i roto i to’na mau faaiteraa atoa.

Emma Adesanya, Irerane

Te Iteraa i te Mana no To’na Aroha

I to’ u riroraa ei melo no te Ekalesia i ta’u matahiti matamua i te fare haapiiraa teitei, ua mauruuru vau no te mau tauiraa ta’u i rave i roto i to’u huru oraraa e ua ite i te maitai ta te evanelia i faatupu i roto i to’u oraraa. Area râ, aita i maoro roa ua haafifi to’u oraraa tahito i te mau haereraa i mua atoa ta’u e nehenehe e rave. Nahea ïa e nehenehe ai i te Metua i te Ao ra ia faaohipa ia’u no te patu i To’na ra basileia ia rave ana‘e vau i taua mau ma‘itiraa ino ra ?

I reira i te hoê mahana ua iriti vau i ta’u Buka a Moromona i te api hopea roa. Ua tai‘o vau i te mau parau hopea a Moromoni : « Oia mau, e haere mai i te Mesia ia maitai roa outou ia’na… e ia faarue outou i te mau mea paieti ore ra, e ia aroha atu i te Atua ma to outou aau atoa, e te mana‘o atoa, e te puai atoa, ei reira e navai ai to’na aroha ia riro outou ei taata maitai roa i te Mesia ra, ia maitai roa outou i te Mesia na roto i to te Atua ra aroha, eita’tu outou e tia ia huna i te mana o te Atua ra » (Moroni 10:32). Ua hi‘o tutonu noa vau i taua mau parau ra. Ua ite au i te Varua i te parauraa mai ia’u e e parau mau taua mau parau ra. Ua ite au e ua taoti‘a vau i te mana o te Atua ma te mana‘o e eita e nehenehe Ta’na e faaohipa ia’u mai Ta’na i mana‘o.

Ua faaoti au e mai taua taime ra e ore vau e « huna i te mana o te Atua » e farii râ vau i to’u oraraa tahito e e hi‘o vau i mua no to’u oraraa no ananahi. Ia rahi ana‘e to’u hi‘oraa i to’u oraraa no ananahi eiaha râ i to’u oraraa i tahito ra e te ti‘aturi i te aroha haamo‘araa o Iesu Mesia, e rahi ïa to’u iteraa i te aroha o to’u Faaora no’u e to’u oaoa ia’u iho.

Christy Pettey, Washington, Fenua Marite

Te haapii nei te Faaora iho e e tae mai te mana no te riro mai Ia’na ra te huru na roto i te fariiraa i te mau oro‘a no te evanelia.

I muri iho ua ani Oia ia ratou ia hopoi mai ta ratou ra mau tamarii Ia’na ra. « E ua rave atu ra oia i ta ratou mau tamarii rii, hamaitai tata‘i hoê ihora ia ratou, e ua pure atu ra i te Metua no ratou ».

To te Mesia fâraa i te Fenua Marite, na Arnold Friberg© 1995 IRI

To Alama bapetizoraa i roto i te mau Pape no Moromona, na Arnold Friberg

Te tere o Iesu Mesia i Amerika, na John Scott