Te 181raa o te amuiraa rahi afa matahiti

Ua hau i te 100.000 taata tei tae mai i na tuhaa amuiraa e pae o te 181raa o te amuiraa rahi afa matahiti a te Ekalesia a Iesu Mesia i te Feia Mo‘a i te mau Mahana Hopea nei i roto i te Pû Amuiraa i Roto Miti, Utaha, USA, i te 1 e te 2 no atopa. E rave rahi mirioni tei mata‘ita‘i e aore ra, tei faaroo i te haapurororaa i roto i te afata teata, te ratio, na ni‘a i te pee‘utari e te itenati.

I roto i te tuhaa amuiraa matamua i te mahana maa 1 no atopa, ua faaara te peresideni Thomas S. Monson i te mau fenua i reira e patuhia ai e ono hiero apî : Barranquilla, Colombie; Durban, Afirita Apatoa; Kinshasa, Democratic Republic no Congo; Paris, Farani; Provo, Utaha, USA; e i Star Valley, Wyoming, USA.

I muri mai i teie faaararaa, ua ani manihini te peresideni Monson i te mau melo ia tauturu i te afata rahi tauturu no te feia haere hiero. Ua parau oia e, « Na teie moni e aufau hoê a‘e tere i te hiero no te feia aita roa’tu ta ratou e rave‘a no te haere i te hiero e i te tia‘i-maoro-raa i taua taime ra ».

I te mahana maa avatea, ua faaara o Elder David A. Bednar, no te Pŭpŭ no te Tino Ahuru Ma Piti Aposetolo,i te hoê tuhaa apî o te youth.lds.org—oia ho‘i, te Ma‘imiraa Utuafare na te Feia Apî (lds.org/familyhistoryyouth). Ua faataahia teie tuhaa apî no te tauturu i te feia apî ia ite i te aamu utuafare e ia tavini i to ratou mau tupuna na roto i te imiraa i to ratou tuatapaparaa. (A hi‘o i te parau pia i ni‘a i te apî 128).

I roto atoa i te reira tuhaa amuiraa, ua haamauruuruhia o Elder Claudio R. M. Costa i to’na ti‘araa i roto i te peresideniraa o te Hitu Ahuru. Ua paturuhia o Elder Tad R. Callister i roto i te peresideniraa o te Hitu Ahuru (a hi‘o i te parau haamaramaramaraa no ni‘a ia’na i te apî 128). Ua haamauruuruhia e aore ra, ua faatuhaahia hoê ahuru e ma piti Hitu Ahuru e Hitu Ahuru Area (a hi‘o i te patururaa e te iritiraa i ni‘a i te apî 23).

I roto i ta’na a‘oraa i te Sabati po‘ipo‘i, ua faahaamana‘o mai te peresideni Henry B. Eyring, Tauturu Matamua i roto i te Peresideniraa Matamua,i te tiaororaa—i horo‘ahia mai i roto i te amuiraa rahi no eperera i te omuaraa o teie matahiti—ia amui te mau melo atoa i roto i te hoê ohipa taviniraa i roto i te matahiti 2011 (a hi‘o Henry B. Eyring, « Te mau taime no te rave i te maitai », Liahona, Me 2011, 22).

Ua faaroo te mau melo na te ao atoa nei i te amuiraa na roto e 93 reo. No te iteraa e, eaha te taime e nehenehe ai farii i te mau parau, te faarooraa, e te mau hoho‘a video o te amuiraa i roto i tera e tera reo, a haere i ni‘a i te itenati i te lds.org/general-conference/when-conference-materials-will-be-available.

Te vai ra te hoê hoho‘a peni o te faaite ra i te fare menemene no Provo, tei paapaa i te auahi, e tei hamani-faahou-hia ei pitiraa no te hiero i Provo, Utaha, USA.