Te farerei faahou nei tatou

Na te peresideni Thomas S. Monson

I teie nei, e te mau taea‘e e te mau tuahine, te pure nei au ia faaîhia tatou i te Varua o te Fatu a faaroo ai tatou i te mau parau poro‘i i teie mahana e ananahi, e ia apo mai i taua mau mea ra ta te Fatu e hinaaro nei ia ite tatou.

E te mau taea‘e e te mau tuahine, e mea oaoa mau ia farii ia outou i roto i te 181raa o te amuiraa rahi afa matahiti a te Ekalesia a Iesu Mesia i te Feia Mo‘a i te mau Mahana Hopea nei.

I teie amuiraa te ti‘a-raa-hia e 48 matahiti—a feruri na, 48 matahiti—mai to’u pii-raa-hia i roto i te Pŭpŭ no te Tino Ahuru Ma Piti Aposetolo na te peresideni David O. McKay. Ua tupu te reira i te ava‘e atopa 1963. E mea fifi ia feruri i tera rahiraa matahiti tei tere mai e tei ma‘iri mai taua taime mai ra.

Ia rahi roa ana‘e ta tatou ohipa, mai te huru ra e, e mea tere vitiviti roa te tau, e no’u nei, aita ïa na ava‘e e ono i ma‘iri a‘e nei i huru ê atu i te reira. Te hoê o te mau mea rarahi tei tupu i roto i taua area taime ra, o te taime ïa a haamaitai faahou ai au i te Hiero no Atlanta Georgia i te 1 no me. Ua apeehia mai au na Elder e te Tuahine M. Russell Ballard, Elder e te Tuahine Walter F. González, e o Elder e te Tuahine William R. Walker.

I roto i te aru‘i faaoaoaraa tei parauhia « Te mau mori no apato‘a », tei tupu i te pô na mua’tu i te haamaitairaa, ua ha‘uti mai e 2.700 feia apî tamaroa e tamahine no taua mataeinaa hiero ra. Ua riro ïa ei hoê o te mau faanahoraa nehenehe roa o ta’u i ite, e ua ti‘a te taata i ni‘a e rave rahi taime no te popo.

I te mahana i muri iho ua haamaitai-faahou-hia te hiero i roto e piti tuhaa pureraa, i reira hoi matou i ite ai i te niniiraa rahi o te Varua i ni‘a ia matou.

I te pae hopea o te ava‘e atete, ua haamaitai te peresideni Henry B. Eyring i te Hiero no San Salvador i te fenua Salvador. Ua apeehia’tu oia na te tuahine Eyring e na Elder e te tuahine D. Todd Christofferson, Elder e te tuahine William R. Walker, e te tuahine Silvia H. Allred no te peresideniraa rahi o te Sotaiete Tauturu e ta’na tane, o Jeffry. Ua faaite mai te peresideni Eyring e, e ohipa hanahana mau te reira.

I te pae hopea o teie matahiti, e ratere atu te peresideni Dieter F. Uchtdorf e te tuahine Uchtdorf e te tahi atu mau huimana faatere rahi, i Quetzaltenango, i Guatemala, no te haamaitai i ta tatou hiero i reira.

E te mau taea‘e e te mau tuahine, te tamau noa nei te paturaa i te mau hiero ma te mutu ore. I teie mahana, te oaoa nei au ia faaite atu ia outou e rave rahi hiero apî.

Na mua roa, te hinaaro nei au e parau atu e, aita e paturaa fare hau atu i te faufaa i te paturaa o te hoê hiero. Ua riro te mau hiero ei mau vahi i reira te mau autaatiraa e taati-hoê-hia ai, ia vai te reira e a muri noa’tu. Te oaoa nei tatou no te mau hiero atoa e rave rahi na te ao atoa nei, e te riroraa ratou ei haamaitairaa i roto i te oraraa o to tatou mau melo.

I te hope‘a o te matahiti i ma‘iri a‘e nei, ua paapaa ino roa te fare menemene no Provo i Utaha i te auahi. Ua toe noa mai te mau papa‘i rapae o teie fare nehenehe, tei here-roa-hia e te mau u‘i e rave rahi o te feia mo‘a i te mau mahana hopea nei. I muri a‘e i te hoê tuatapaparaa papû, ua faaoti matou e patu faahou ia’na ma te tapea e ma te faaapî faahou i te rapaeraa, e ia riro mai ei pitiraa o te hiero a te Ekalesia i roto i te oire no Provo. Te hiero no Provo i teie taime, o te hoê ïa o te mau hiero ohipa roa a‘e i roto i te Ekalesia, e e riro te piti o te hiero i reira ei tautururaa i te maraaraa o te rahiraa o te mau melo haapa‘o haere hiero o te Ekalesia no Provo iho e no te mau tuhaa fenua fatata mai.

Te oaoa atoa nei au ia faaite atu i te mau hiero apî i roto i teie mau fenua i muri nei: Barranquilla, i Colombie; Durban, i Afirita Apatoa; Kinshasa i roto i te Democratic Republic no Congo; e i Star Valley, Wyoming. Taa ê atu i te reira, te haere nei tatou i mua i roto i te mau faanahoraa no paturaa i te hoê hiero i Paris, Farani.

E horo‘ahia’tu te mau haapapûraa no teie mau hiero a muri a‘e, ia roaa ana‘e mai te mau parau faatia no te vahi ti‘araa e no te tahi atu mau mea e titauhia.

I roto i te mau amuiraa i ma‘iri a‘e nei, ua faahiti atu vau i te haereraa i mua te parau no te haafatataraa i te mau hiero i piha‘i iho i to tatou mau melo. Noa‘tu e, e mea ohie i teie nei no te rahiraa o te mau melo ia haere i te hiero, te vai noa ra â te tahi mau fenua i te ao nei e mea atea roa te hiero i to tatou mau melo, aita e maraa ia ratou te mau haamau‘araa e titauhia no te tere atu i reira. No reira, aita ïa e ti‘a ia ratou ia farii i te mau haamaitairaa mo‘a e te mure ore ta te hiero e horo‘a mai. E no te tautururaa i te reira, ua faataa matou i te mea tei parauhia, te Moni Tauturu i te Taata Haere Hiero. Na teie moni e aufau hoê a‘e tere i te hiero no te feia aita roa’tu ta ratou e rave‘a no te haere i te hiero e i te tia‘i-maoro-raa i taua taime ra. Te taata e hinaaro e tauturu i teie afata, e nehenehe ïa ratou e faaite i te reira i ni‘a i te api parau aufauraa i matarohia, o te horo‘ahia’tu i te episekopo ra i te mau ava‘e atoa.