Hoê Ite
Ua riro te Buka a Moromona ei arata‘i maitai roa‘e no te haapii eaha te huru no ta tatou raveraa e nahea ia haamaitai atu â.
Te mauruuru nei au no teie haamaitairaa ia paraparau atu ia outou i teie Sabati i roto i te hoê amuiraa rahi a te Ekalesia a Iesu Mesia i te Feia Mo‘a i te Mau Mahana Hopea Nei. Ua farii te mau melo atoa no te Ekalesia i te hoê â hopoi‘a mo‘a. Ua farii tatou i te reira e ua fafau tatou ia amo i te reira i te taime a bapetizohia‘i tatou. Te haapii nei tatou mai roto mai i te mau parau a Alama, te peropheta rahi no te Buka a Moromona, i te mea ta tatou i fafau i te Atua e e riro mai tatou: « ia oto, a oto ai te feia oto ra ; oia ïa, e ia haamahanahana ia ratou i tei au ia haamahanahanahia ra, e ia tia ei ite o te Atua i te mau mahana atoa, e i te mau mea atoa, e i roto i te mau vahi atoa ta outou e parahi ra, e ia tae noa’tu i te poheraa, ia faaorahia outou e te Atua, e ia amuihia i roto i to te tia-faahou-raa matamua, ia noaa te ora mure ore ia outou ».1
O te hoê ïa hopoi‘a mo‘a e te hoê fafauraa hanahana no ô mai i te Atua ra. Ta’u poro‘i i teie mahana o te hoê ïa poro‘i faaitoitoraa. Mai ta te Buka a Moromona i haamaramarama i te hopoi‘a ia tatou, e arata‘i ato‘a te reira ia tatou i ni‘a i te e‘a no te ora mure ore.
A tahi, ua fafau tatou ia riro ei taata aroha. Te piti, ua fafau tatou ia riro ei mau ite no te Atua. E te toru, ua fafau tatou ia faaoroma‘i. Ua riro te Buka a Moromona tei arata‘i maitai roa‘e no te haapii eaha te huru no ta tatou raveraa e nahea ia haamaitai atu â.
E haamata na tatou na roto i te riroraa ei taata aroha. E e faahaamana‘o ïa vau ia outou i te mau ohipa tei tupu iho nei. E rave rahi o outou tei haa i roto i te hoê mahana no te taviniraa. E rave rahi tauasini tei faanahonahohia na te ao taatoa nei.
Ua pure te hoê apooraa a to outou Feia Mo‘a ia ite eaha te taviniraa ia opua. Ua ani ratou i te Atua ia ite e o vai te ti‘a ia tatou ia tavini, e eaha te huru taviniraa, e o vai te anihia ia haere mai e tavini. Ua pure atoa paha ratou ia ore ia mo‘ehia te mau ope e te pape inu. Te mea hau atu ra i te faufaa, ua pure ratou e ia farii te taato‘araa o te feia tei tavini e te feia tei tavinihia i te aroha o te Atua.
Ua ite au e ua pahonohia taua mau pure ra i roto ihoa ra i te hoê paroita. Hau atu i te 120 melo tei horo‘a i to ratou taime no te tauturu. I roto i na hora e toru, ua tamâ ratou i te aua o te hoê fare pureraa i roto i to tatou oire. E ohipa rahi e te oaoa atoa. Ua mauruuru te mau orometua no taua ekalesia ra. Ua ite te feia atoa tei haa amui i taua mahana ra i te tahoêraa e te here rahi. Ua parau atoa mai te tahi e ua oaoa ratou i te hutihutiraa i te aihere e te tapupuraa i te mau raau rii.
Ua tauturu te mau parau no roto mai i te Buka a Moromona ia ratou ia ite i te tumu no te reira. Ua parau te Arii Beniamina i to’na nunaa, « Ia ite hoi outou e, a tavini ai outou i te taata nei, te tavini ïa outou i to outou Atua ra ».2 Ua haapii o Moromona na roto i ta’na iho mau parau i roto i te Buka a Moromona e « O te aroha… o te hinaaro mau ïa i te Mesia, e ore roa ïa e mou ; e o te itea te aroha i roto ia’na i te mahana hopea ra, e maitai ïa to’na ».3
E tape‘a te Fatu i Ta’na fafauraa ia outou ia tape‘a ana‘e outou i ta outou fafauraa. A tavini ai outou ia vetahi ê No’na, e faati‘a ïa Oia ia outou ia ite i To’na aroha. E i muri mai, e riro mai ïa te mau mana‘o aroha ei tufaa no to outou iho natura. E e farii ïa outou i te haapapûraa a Moromona i roto i to outou aau a tamau noa‘i outou i te taviniraa ia vetahi ê i roto i te oraraa, e maitai ïa outou.
Mai ta outou i fafau i te Atua ia riro ei taata aroha, ua fafau atoa outou ia riro ei ite No’na i te mau vahi atoa i reira outou na roto i to outou oraraa. Faahou â, ua riro te Buka a Moromona ei arata‘i maitai roa‘e ta’u i ite no te tauturu ia tatou ia tape‘a i taua fafauraa ra.
Ua anihia vau i te hoê taime ia paraparau i te hoê oro‘a opereraa parau tu‘ite i te hoê fare haapiiraa teitei. Ua hinaaro te peresideni o te haapiiraa teitei e titau manihini i te Peresideni Gordon B. Hinckley, aita râ oia i vata. No reira, ua farii au i te titauraa manihini. E melo apî roa vau no te Pŭpŭ no te Tino Ahuru Ma Piti Aposetolo.
Ua pe‘ape‘a rii te taata tei ani mai ia’u ia paraparau a ite ai oia no ni‘a i ta’u mau hopoi‘a ei Aposetolo.Ua niuniu mai oia ia’u no te parau mai e ua taa ia’na i teie nei ta’u hopoi‘a ei ite no Iesu Mesia.
Ma te reo etaeta ua parau mai oia ia’u e eita e nehenehe ia’u ia faaohipa i taua ti‘araa ra i roto i ta’u a‘oraa. Ua faaite mai oia e te faatura nei te fare haapiiraa teitei i te mau taata no te mau huru faaroo atoa, e tae noa’tu te feia o te huna i te oraraa o te hoê Atua. Ua tapiti oia i te parau mai e « Eita e nehenehe ia oe ia faaohipa i ta oe hopoi‘a i ŏnei ».
Ua vaiiho vau i te niuniu ma te mau uiraa hohonu i roto i to’u feruriraa. E ti‘a anei ia’u ia parau atu i te fare haapiiraa teitei e eita ïa vau e tape‘a i ta’u fafauraa no te paraparau ? E piti noa iho hepetoma hou te oro‘a. Ua faaarahia ho‘i e e tae atu vau. Eaha te tupu mai i ni‘a i te i‘oa maitai o te Ekalesia ia ore au e tape‘a i ta’u fafauraa ?
Ua pure au no te ite eaha ta te Atua e hinaaro ia’u ia rave. Ua tae mai te pahonoraa ma te maere no’u iho. Ua ite au e ua riro vau mai ia Nephi, Abinadi, Alama, Amuleka e te mau tamaroa a Mosia. Ua riro ratou e mau ite mata‘u ore no Iesu Mesia i mua i te ati pohe.
No reira aita’tu ïa e rave‘a ê atu maori râ ia faaineine. Ua ma‘imi au i te mau mea atoa e nehenehe ia’u ia ite no ni‘a i te fare haapiiraa teitei. A fatata mai ai te mahana no te a‘oraa, ua rahi to’u mana‘o pe‘ape‘a e ua puai atu â ta’u mau pure.
Mai te semeio o te vahi-raa-hia te Miti Uteute, ua ite au i te hoê parau apî i roto i te ve‘a. Ua faahanahanahia te fare haapiiraa teitei no te raveraa i te hoê â ohipa ta te Ekalesia i haapii i te rave i roto i ta tatou mau tautururaa i te taata na te ao nei. E no reira ua faaite au i roto i ta’u a‘oraa i te mau mea ta tatou e ta ratou i rave no te haamaitai i te mau taata i roto i to ratou hinaaro rahi. Ua parau vau e ua ite au e o Iesu Mesia te tumu no te mau haamaitairaa tei tae mai i roto i te oraraa o te mau taata ta tatou e ta ratou i tavini.
I muri a‘e i te oro‘a ua ti‘a mai te mau taata no te haapopou, te hoê mea i ore i matauhia e au. Ua maere au e ua pe‘ape‘a rii au. Ua haamana‘o vau i te mea i tupu ia Abinadi. O Alama ana‘e tei farii i to’na iteraa. I taua pô râ, i te hoê tamaaraa rahi, ua faaroo vau i te peresideni no te fare haapiiraa teitei i te parauraa e ua faaroo oia i roto i taua a‘oraa ra i te mau parau a te Atua.
Area, e mea varavara roa taua huru faati‘amâraa ra i roto i to’u iteraa rau ei ite no te Mesia. E mea papû râ te mana o te Buka a Moromona i ni‘a i to outou huru taata, to outou mana e to outou itoito ia riro ei ite no te Atua. E faateitei, e arata‘i e e faaitoito te haapiiraa tumu e te mau hi‘oraa itoito i roto i taua buka ra ia outou.
E haamaitaihia ïa te mau misionare atoa o te poro i te i‘oa e te evanelia a Iesu Mesia na roto i te tai‘oraa i te Buka a Moromona i te mau mahana atoa. E tauturuhia ïa te mau metua e fifi nei i te faaô i te hoê iteraa papû no ni‘a i te Faaora i roto i te aau o te hoê tamarii ia imi ana‘e ratou i te hoê rave‘a no te afa‘i mai i te mau parau e te mana o te Buka a Moromona i roto i te utuafare e te mau oraraa atoa i roto i to ratou utuafare. Ua itehia e parau mau te reira no tatou.
E nehenehe ta’u e ite e, te tupu nei te semeio i roto i te mau pureraa oro‘a e te mau piha haapiiraa atoa a te Ekalesia ta’u i haere atu. Te faaite nei te feia a‘o e te mau orometua haapii i te here e te ite paari no te mau papa‘iraa mo‘a, te Buka a Moromona ihoa ra. E tupu papû mai to ratou iho mau iteraa papû mai roto roa mai i to ratou mau aau. Te haapii nei ratou ma te haapapûraa rahi e te faaite papû nei ratou ma te puai.
Te ite nei au i te mau tapa‘o e te rave maitai nei tatou i te tufaa toru no te fafauraa ta tatou i rave i te bapetizoraa. Ua fafau tatou i te faaoroma‘i, i te haapa‘o i te mau faaueraa a te Atua a ora noa‘i tatou.
Ua haere atu vau i te fare ma‘i no te farerei i te hoê hoa vahine tahito tei roohia i te ma‘i mariri-ai-taata. Ua afa‘i au na muri ia’u ta’u na tamahine apî e piti. Aita vau i mana‘o e e taa mai oia ia raua. Te ti‘a haati noa ra to’na iho utuafare i to’na ro‘i a tomo atu ai matou.
Ua hi‘o mai oia e ua ataata mai. E haamana‘o noa â vau i to’na hoho‘a mata a ite ai oia e ua afa‘i mai maua i ta maua na tamahine na muri ia maua. Ua ani oia ia raua ia tapiri atu i to’na ra ro‘i. Ua parahi oia, ua tauahi mai ia raua e ua faaite atu ia raua i to’na ra utuafare. Ua paraparau oia no ni‘a i te maitai o taua na tamahine ra e piti. E au ra e te faaite ra oia i te mau tamahine hui arii i te mau taata hui arii.
Ua mana‘o vau e e hope oioi ta matou farereiraa. Oia mau, ua mana‘o vau, ua rohirohi oia. I to’u râ hi‘oraa e au râ e e ua mo‘e ê atu to’na paari. E mea oraora maitai oia e ua î mau oia i te here no matou paatoa.
E au ra e te oaoa ra oia i te taime mai te mea ra e ua faaea te tau. No te Fatu ua horo‘a oia i te rahiraa o to’na oraraa i te atuaturaa i te mau tamarii. Ua ite oia na roto i te aamu o te Buka a Moromona e ua rave tata‘itahi te Faaora tei ti‘afaahou mai i te mau tamarii rii, haamaitai ihora ia ratou, e oto ihora no te oaoa.4 E ua ite oia iho i taua oaoa ra i nehenehe ai ia’na ia faaoroma‘i i roto i Ta’na taviniraa aroha e tae noa’tu i te hope‘a.
Ua ite mata vau i taua iho â semeio ra i roto i te piha o te hoê taata tei tavini itoito, i mana‘o ai au e ua nava‘i ta’na taviniraa no te faafaaea.
Ua ite au e ua farii oia i te rapaauraa roa e te mauiui no te hoê ma‘i ta te mau taote i parau e e ma‘i pohe. Aita ratou i horo‘a i te tahi atu â rapaaruraa aore râ rave‘a ê atu.
Ua arata‘i atu ta’na vahine faaipoipo ia’u i to’na piha i roto i to raua fare. I reira oia i te taravaraa i ni‘a i to’na tua, i ni‘a i te ro‘i tei faaineine-maitai-hia. Ua oomo oia i te hoê ahu uouo tei auri-apî-hia, te hoê taamu arapo‘a e te mau tiaa apî.
Ua ite oia i te hi‘oraa maere rahi i roto i to’u mata, ua ataata hau noa e ua parau mai, « I muri a‘e i to oe haamaitairaa ia’u, ua hinaaro vau ia ineine i te pahono i te piiraa ia ti‘a e ia rave i to’u ro‘i e ia haere e rave i te ohipa. Ua nehenehe ia’u ia ite e ua ineine oia no ta’na uiuiraa e te Fatu, o Ona hoi ta’na i tavini ma te itoito.
Ua riro oia ei hoho‘a no te Feia Mo‘a i te mau Mahana Hopea nei tei faafariu-mau-hia, ta’u i farerei pinepine i muri a‘e i to ratou horo‘araa i te hoê oraraa tei î i te taviniraa tuutuu ore. Ua rohi mau ratou.
Teie ta te Peresideni Marion G. Romney i parau : « I roto i te taata tei faafariu-mau-hia, e pohe mau ïa te hinaaro i te mau mea e ore e tano i te evanelia a Iesu Mesia e e mono ïa te aroha o te Atua i te reira mana‘o ma te faaotiraa papû ia haapa‘o i ta’na mau faaueraa ».5
O taua faaotiraa ra o ta’u i ite rahi e te pinepine i roto i te mau pĭpĭ itoito a Iesu Mesia. Mai te tuahine tei farii mai i ta’u na tamahine e te taata i roto i to’na mau tiaa apî tei ineine i te ti‘a e i te haere, ua pee ratou i te faauearaa a te Faaora e tae noa’tu i te hope‘a. Ua ite paato‘a outou i te reira.
E nehenehe ta outou e ite faahou i te reira mai te mea e ho‘i outou i roto i te Buka a Moromona. E faahiahia noa â vau i roto i to’u mafatu, ia tai‘o vau i teie mau parau a te hoê tavini paari taiâ ore a te Atua : « I teie nei â hoi, ua rurutaina noa to’u nei tino taatoa a tamata‘i au i te a‘o atu ia outou na ; ua tauturu mai râ te Fatu te Atua ia’u nei., e ua faatia mai hoi ia’u ia parau atu vau ia outou na ».6
E noa’a ïa ia outou te itoito, mai ia’u nei, mai roto mai i te hoho‘a no te faaoroma‘iraa ta Moromoni i horo‘a mai ia tatou. O ona ana‘e iho i roto i ta’na taviniraa. Ua ite oia e ua fatata mai te hopea o to’na oraraa. A faaroo na i ta’na i papa‘i no te maitai o te feia tei ore â i fanauhia mai e te mau huaai a to’na mau enemi tahuti nei : « Oia mau, e haere mai i te Mesia ia maitai roa outou ia’na, e tapea ia outou iho eiaha e rave noa’tu i te mea paieti ore ra, e ia faarue outou i te mau mea paieti ore ra, e ia aroha atu i te Atua ma to outou aau atoa, e te mana‘o atoa, e te puai atoa, ei reira e navai ai to’na aroha ia riro outou ei taata maitai roa i te Mesia ra ».7
Ua horo‘a Moroni i taua iteraa ra ei poro‘i hope‘a no to’na ora e ta’na taviniraa. Ua poro oia i te aroha mau mai ta te mau peropheta i na reira i roto i te Buka a Moromona. Ua apiti atu oia i to’na iteraa no ni‘a i te Faaora a fatata mai ai te pohe i mua ia’na. E tamarii oia na te Atua tei faafariu-mau-hia o ta tatou atoa e nehenehe e riro mai : tei î i te aroha, tei riro ei ite tamau e te mata‘u ore no te Faaora e Ta’na evanelia, e tei faaoti ia faaoroma‘i e tae noa’tu i te hope‘a.
Ua haapii mai Moroni i te mea e titauhia ia tatou. Ua parau oia e e te taahiraa matamua no te faafariuraa hope roa o te faaroo ïa. E faatupu ïa te tai‘oraa i te Buka a Moromona na roto i te pure i te faaroo i te Atua te Metua, i Ta’na ra Tamaiti Here, e i Ta’na ra evanelia. E faatupu ïa te reira i to outou faaroo i te mau peropheta a te Atua, no mutaa ihora e no teie anotau.
E nehenehe te reira e haafatata’tu ia outou i te Atua hau atu i te tahi atu buka. E nehenehe te reira e haamaitai atu â i te hoê oraraa. Te ti‘aoro atu nei au ia outou ia rave i te mea ta to’u hoa misionare i rave. I to’na taure‘are‘araa a faaru‘e atu ai oia i to’na utuafare no te imi i te tahi atu â oaoa, ua tuu te tahi taata i te hoê Buka a Moromona i roto i te hoê afata ta’na i ta‘ita‘i atu na muri ia’na.
Ua ma‘iri te mau matahiti. Ua tere atu oia mai tera vahi i tera vahi na te ao nei. I te hoê mahana o oia ana‘e ra e ma te oaoa ore ua ite oia i te afata. Ua î te afata i te mau mea ta’na i ta‘ita‘i atu na muri ia’na. I raro i te afata, ua ite oia i te Buka a Moromona. Ua tai‘o oia i te fafauraa e vai ra i roto e ua tamata i te reira. Ua ite oia e e parau mau te reira. Ua taui taua iteraa ra i to’na oraraa. Ua ite oia i te oaoa hau atu i ta’na i ite i roto i ta’na mau moemoea.
Aita paha ta outou Buka a Moromona e tai‘ohia no te rahi o ta outou mau ohipa e te hopoi‘a i te mau mahana atoa. Te taparu nei au ia outou ia tai‘o e ia tuatapapa pinepine i te reira. Tei roto hoi i te reira te îraa o te evanelia a Iesu Mesia, o te reira ana‘e hoi te e‘a no te ho‘i atu i te Atua ra.
Te vaiiho nei au ia outou i to’u iteraa papû e te ora nei te Atua e e pahono mai Oia i ta outou mau pure. O Iesu Mesia te Faaora o te ao. Ua riro te Buka a Moromona ei ite mau e te papû i te mea e te ora nei Oia e o Oia to tatou Faaora ora tei ti‘afaahou.
Te Buka Moromona o te ite mau ïa e te faufaa no Iesu Mesia. I teie nei te vaiho nei au ia outou to’u iteraa na roto i te i‘oa o Iesu Mesia, amene.