E Mau Tamarii Tamahine i roto i To’u Basileia: Te Hoê Ohipa Aamu na te Vahine MMHN no teie anotau
E Mau Tamarii Tamahine i roto i To’u Basileia: Te Aamu e te Ohipa a te Sotaiete Tauturu, e buka apî tei faaineinehia i raro a‘e i te faatereraa a te Peresideniraa Matamua, tei roto i reira te tuatapaparaa no te aamu o te Sotaiete Tauturu e te mau vahine o te Ekalesia, te na reira o Julie B. Beck, peresideni rahi no te Sotaiete Tauturu, i roto i te rururaa rahi a te Sotaiete Tauturu i te ava‘e setepa 2011.
Ua parau oia e, « E tahoê e e ana‘i hoi te reira i te hoê autuahineraa no te ao atoa nei i ni‘a i te mau opuaraa o te Sotaiete Tauturu e i ni‘a i te mau hoho‘a e te mau haamaitairaa o te mau pĭpĭ ». O te hoê faaiteraa te reira no te ti‘araa faufaa rahi o te mau vahine i roto i te faanahonahoraa no te oaoa a to tatou Metua, e na te reira atoa e horo‘a i te hoê faito aueue ore o te mau mea ta tatou e ti‘aturi nei, te mau mea ta tatou e rave, e te mau mea ta tatou e paruru » (api 113 no teie ve‘a).
Te parau ra te tuahine Beck e, te horo‘a mai nei teie buka i te hoê niu no te ti‘araa taata o te mau vahine ei mau tamahine na te Atua. Te parau ra oia, ia tai‘o ana‘e te taata i te reira buka, e ti‘a ïa ia ratou ia ite e, e mea nahea te Sotaiete Tauturu ia rave i te ohipa i roto i te oraraa o te tuahine tata‘itahi.
E mea nahea teie buka i te hamani-raa-hia
Ua hamata teie opuaraa na roto i te hoê faaueraa no roto mai i te Peresideniraa Matamua. Ua faataahia o Susan W. Tanner, peresideni rahi tahito no te Feia Apî Tamahine, no te papa‘i i te reira buka. Ua faataahia te tuahine Beck e to’na na tauturu, o Silvia H. Allred e o Barbara Thompson, no te arata‘i i teie ohipa, e ia haa e te tuahine Tanner, te feia nene‘i, te feia faanahonaho, e vetahi ê atu, no te haamau i to’na reni na roto i te varua o te heheuraa. Te parau ra te tuahine Beck e, « Aitâ vau i rave a‘e nei i te hoê ohipa tei arata‘i-rahi-hia e te varua mai teie te huru ».
Te hoê o te mau tuhaa o taua ohipa ra, o te faaotiraa ïa e, eaha te mau aamu i roto i te rahiraa tauatini api o te ti‘a ia tuuhia i roto i te reira buka. Ua hi‘opo‘a te tuahine Beck, to’na na tauturu, e te tuahine Tanner i te mau minuti o te mau apooraa a te Sotaiete Tauturu i Navu e i te tahi atu mau aamu no ni‘a iho i te Sotaiete Tauturu e te mau vahine o te Ekalesia.
Ua parau te tuahine Beck e, te ohipa i roaa mai, e ere ïa i te hoê aamu apapahia i roto i te roaraa o te tau, e aamu râ no te pae varua o te mau vahine o te Ekalesia e o te Sotaiete Tauturu.
Te parau ra te tuahine Beck i roto i ta’na a‘oraa i roto i te rururaa rahi a te Sotaiete Tauturu i te ava‘e setepa 2010 e, « ua tai‘o matou i to tatou aamu no te mea, e tauturu te reira ia tatou ia taui », I te hopea roa, te faufaa o te aamu e ere roa’tu ïa to’na mau tai‘o mahana, to’na mau anotau e te mau vahi. E mea faufaa roa i te mea e, te haapii mai nei te reira ia tatou i te mau parau tumu, te mau opuaraa e te mau hoho‘a o te ti‘a ia tatou ia pee, te tauturu mai nei hoi te reira ia tatou ia ite e, o vai tatou nei, e eaha tei titauhia ia tatou ia rave, e te tahoê nei te reira ia tatou no te haapuai i te mau utuafare o Ziona e no te patu i te basileia o te Atua i ni‘a i te fenua nei » (« E Mau Tamahine i roto i To’u Basileia: Te Aamu e te Ohipa a te Sotaiete Tauturu », Liahona, Novema 2010, 115).
Ua papa‘ihia teie buka ia au i te tereraa o te tau, area ta’na mau haapiiraa ra, e itehia ïa te reira i roto i te mau pene tei faanahohia ia au i te tumu parau. No te haapii i ta’na mau parau poro‘i faufaa, te faaohipa nei teie buka i te mau aamu e te mau hi‘oraa no roto mai i te mau papa‘iraa mo‘a no tera ra tau e no teie tau, no roto atoa mai i te mau parau a te mau peropheta, e no roto mai i te mau ti‘a faatere o te Sotaiete Tauturu.
Te faaûruraa a teie buka
Te parau ra te tuahine Beck e, na roto i teie buka, e haapii mai te mau tuahine e nahea ia faatupu i te mau opuaraa a te Sotaiete Tauturu i roto i to ratou iho oraraa, e i roto i te autaatiraa tuahie no te mau pĭpĭ haapa‘o i te mau faaueraa.
« E haapii mai ratou e, eaha te auraa o te parau ra, e faarahi i te faaroo e i te parauti‘a o te taata iho, e haapuai i te mau utuafare e i te mau nohoraa, e ia imi e ia tauturu ia vetahi ê i roto i to ratou nava‘i ore », te na reira ra te tuahine Beck i roto i te hoê uiuiraa na te mau ve‘a a te Ekalesia. « Ia ite ana‘e te mau tuahine ia ratou i roto i te ohipa a te Sotaiete Tauturu, e ite ïa ratou i te mana puai o te mau vahine i roto i te tupuraa o te Ekalesia, i tahito ra e i teie mahana, e ite atoa hoi ratou i ta ratou opuaraa e i to ratou ti‘araa taata ».
Te ti‘aturi nei te tuahine Beck e, te feia e tai‘o i teie buka, e ite ïa ratou na roto i te hi‘oraa e i te a‘o, e nahea ia faaroo i te Varua Maitai e ia farii i te heheuraa na te taata iho. E haapuai-atoa-hia ratou e faaitoitohia hoi i roto i to ratou oraraa i te mau mahana atoa e i roto hoi i to ratou mau tamataraa e te mau ati.
« E puai rahi te vai ra i roto i teie buka—e puai rahi o ta tatou e nehenehe e pee », te na reira ra te tuahine Beck. « No reira, ia tae mai te mau mahana fifi, te ti‘aturi nei au e, e vaiiho te taata i ta ratou buka i piha‘i iho noa ia ratou, e e rave mai ratou i te reira, e e tai‘o hoê aamu e aore ra, hoê hi‘oraa o te haapuai ia ratou ».
Te parau atoa ra te tuahine Beck e, e tae teie buka i roto i te mau utuafare o te Ekalesia na roto i te rima o te mau tuahine, tera râ, te ti‘aturi nei oia e, e riro teie buka ei rave‘a faufaa roa no te mau tane e no te mau vahine. E tauturu teie buka i te feia apî tamahine ia haroaroa e nahea ratou ia riro mai ei tuhaa no te hoê autaatiraa tuahine rahi no te ao atoa nei, e e nehenehe oia e tahoê i te tane e te vahine i roto i ta raua ohipa mo‘a o te arata‘iraa i to raua utuafare e o te taviniraa i roto i te Ekalesia.
I muri a‘e i to’na tai‘oraa i teie buka, ua parau o Dale Cook, peresideni no te tĭtĭ no Syracuse Utah Bluff e, e riro teie buka ei rave‘a faufaa roa no te tauturu eiaha i te mau vahine noa o te Ekalesia ia haroaroa i ta ratou mau ohipa ei pĭpĭ no te Mesia, i te mau tane atoa râ. « E tai‘o e e ite outou e, e mea nahea [te Sotaiete Tauturu] i te taamuraa e i te tuatiraa i ni‘a i te autahu‘araa », te na reira ra te peresideni Cook. « Ua tauturu te reira ia‘u ia ite i te mana i roto i to’u hoa faaipoipo, e [nahea] ia here, ia taturu e ia paturu maitai atu ia’na ».
No ni‘a i te buka
E rave‘a teie buka no te haapii i te taata iho, e no te haapii i roto i te utuafare, i roto i te Sotaiete Tauturu, e i roto i te tahi atu mau faanahonahoraa a te Ekalesia. E haponohia te reira i te mau episekopo ra e i te mau peresideni amaa ra, e na ratou e paraparau e te mau peresideni no te Sotaiete Tauturu no te faaoti e, nahea ia faariro i te opereraa o teie mau buka ei haamaitairaa no te mau tuahine i roto i te paroita e te amaa.
Ua opuahia e hamani i teie buka i roto e piti tatini reo hou te hopea o te ava‘e tenuare 2012. E rave rahi o te reira mau buka o te nehenehe e roaa i ni‘a i te itenati, i reira hoi te mau melo e nehenehe ai e mata‘ita‘i i te mau video, e faaite i te mau faahitiraa parau, e e tai‘o i te mau mana‘o tauturu no ni‘a iho i te faaohiparaa e i te horo‘araa i te mau parau poro‘i i roto i teie buka. A haere i ni‘a i te itenati i te lds.org/relief-society/daughters-in-my-kingdom. A pata i ni‘a i te « Additional Languages (PDF) » i te afaraa o te api i raro a‘e i te « Related Resources ». E pura mai i te pae atau o te api, te hoê tapura no te mau reo e vai ra. E riro te tahua natirara i te iritihia i roto i te mau reo e rave rahi.
Ua opuahia e hamani i te tahi mau buka tapoi paari na roto i te reo Peretane, Potiti, e te Paniora, hou te hopea o teie matahiti, e e roaa te reira i roto i te mau Fare Hooraa buka e i ni‘a atoa i te itenati store.lds.org.
HOHO‘A PATAHIA E RICK WALLACE