Konifelenisi Lahi Fakavaeuataʻu Hono 181

Ne laka hake he kakai ʻe toko 100,000 ne nau omi ki he ngaahi fakatahaʻanga ʻe nima ʻo e Konifelenisi Lahi Fakavaeuataʻu Hono 181 ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní naʻe fai ʻi he Senitā Konifelenisí ʻi Sōleki Siti ʻi ʻIutaá ʻi he ʻaho 1 mo e 2 ʻo ʻOkatopá. Ne laui miliona mo ha kakai ne nau mamata pe fanongo ki ai he ngaahi fakamafola ne fai he TV, letioó, satelaité mo e ʻInitanetí.

Lolotonga e ʻuluaki fakataha ʻo e ʻaho Tokonaki ko e 1 ʻo ʻOkatopá, naʻe fanongonongo ai ʻe Palesiteni Tōmasi S. Monisoni ha ngaahi feituʻu ke langa ai ha ngaahi temipale foʻou ʻe ono: Palanikuila ‘i Kolomupia; Tāpani, Saute ʻAfilika; Kinisasa ʻi he Lepupelika Fakatemokālati ʻo Kongokoú; Pālesi ʻi Falanisē; Polovo, ʻIutā; Teleʻa Sitá ʻi Uaiōmingi, ʻAmelika.

Hili e fanongonongo naʻe fai ʻe Palesiteni Monisoní, naʻá ne fakaafeʻi ai e kāingalotú ke nau tokoni ki he Paʻanga Tokoni Fakalūkufua ki he Pataloni ʻo e Temipalé. Naʻá ne pehē, “ʻE lava ʻe he paʻanga ko ʻení ʻo fakapaʻanga ha foʻi ʻaʻahi pē ʻe taha ki he temipalé maʻanautolu he ʻikai ke nau lava [ki he temipalé].”

ʻI he hoʻatā Tokonakí, naʻe hanga ai ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo fanongonongo ha konga foʻou ʻo e youth.lds.org—FamilySearch Youth and Family History (lds.org/familyhistoryyouth). ʻOku fakataumuʻa e konga ko ʻení ke tokoni ki hono ʻiloʻi ʻe he toʻu tupú ʻa e hisitōlia fakafāmilí mo nau tokoni ki heʻenau ngaahi kuí ʻaki ʻenau fekumi ki honau ngaahi lekōtí. (Vakai ki he fakamatala he peesi 128.)

Naʻe tukuange foki ʻi he fakatahaʻanga ko ʻení ʻa ʻEletā Kalauta R. M. Kositā mei he Kau Palesitenisī ʻo e Kau Fitungofulú. Naʻe fokotuʻu leva ki he Kau Palesitenisī ʻo e Kau Fitungofulú ʻa ʻEletā Teti R. Kalisitā (vakai ki hono piokālafí he peesi 128). Naʻe tukuange ha Kau Fitungofulu mo ha Kau Fitungofulu Fakaʻēlia ʻe toko hongofulu mā ua pea foaki ki ha niʻihi ʻa e tuʻunga mālōlō fakalāngilangí (vakai ki he peesi 23 ki he ngaahi fokotuʻú mo e tukuangé).

Lolotonga e lea ʻa Palesiteni Henelī B. ʻAealingi ko e Tokoni ʻUluaki ʻi he Kau Palesitenisī ʻUluakí ʻi he fakataha ʻo e pongipongi Sāpaté, naʻá ne fakamanatu ai ki he kakaí ʻa e ui—naʻe fai ʻi he konifelenisi lahi ʻo ʻEpelelí he konga ki muʻa ʻo e taʻu ní—ke kau mai e kāingalotu kotoa pē ki ha ʻaho ngāueʻofa lolotonga e 2011 (vakai, Henry B. Eyring, “Ngaahi Faingamālie ke Fai Leleí,” Liahona, Mē 2011, 22).

Naʻe fakafanongo e kāingalotu he funga ʻo e māmaní ki he konifelenisí ʻi ha lea fakafonua ʻe 93. Ki ha fakamatala fekauʻaki mo e taimi ʻe lava ke maʻu ai e tatau ʻo e tohí, lea mo e vitiō ʻo e konifelenisí ʻi ha ngaahi lea fakafonua kehekehé, vakai ki he lds.org/general-conference/when-conference-materials-will-be-available.

Ko hano tā ʻe ha tangata tā valivali ʻa e Tāpanekale Polovó, ʻa ia naʻe ʻauha ʻi ha vela, pea ʻoku toe fakafoʻou ke hoko ko ha temipale hono ua ʻi Polovo, ʻIutā, USA.