Uepisaiti Foʻou ke Tokoni ki Hono Kamata ʻe he Toʻu Tupú ʻa e Hisitōlia Fakafāmilí

ʻOku fakataumuʻa e konga foʻou ʻo e FamilySearch Youth and Family History ʻi he youth.lds.org (lds.org/familyhistoryyouth) ke tokoni ke ʻilo ai ʻe he toʻu tupú ʻa e hisitōlia fakafāmilí pea nau tokoni ai ki heʻenau ngaahi kuí ʻi he fekumi ki honau ngaahi lekōtí.

ʻOku ʻi he saití ni ha ngaahi maʻuʻanga tokoni ʻe akoʻi ai e toʻu tupú ki he founga hono kamata fakaʻaongaʻi ʻo e FamilySearch. ʻOku akoʻi ai ki he toʻu tupú ha fanga kiʻi founga faingofua ʻe nima ke nau fekumi ai ki honau hohoko fakafāmilí, faʻu ha ngaahi lekooti fakafāmili pea mo teuteuʻi ha ngaahi hingoa ke ʻave ki he temipalé. ʻOku ʻi he saiti foki ko ʻení ha ngaahi fakakaukau ki he founga ʻe lava ke fakaʻaongaʻi ai ʻe he ngaahi kalasí mo e ngaahi kōlomú ʻa e hisitōlia fakafāmilí ke nau tokoni ai ki he niʻihi kehé.

ʻE lava ke maʻu atu he taimí ni ʻa e saiti foʻoú ni ʻi he lea faka-Pilitāniá, faka-Potukalí mo e faka-Sipeiní. ʻE lava ke maʻu atu ʻi he ngaahi lea fakafonua kehé ʻi he ngaahi māhina ka hoko maí.