ʻEletā Tad R. Callister
ʻO e Kau Palesitenisī ʻo e Kau Fitungofulú
Naʻe fakamatala ʻa ʻEletā Teti Lisiate Kalisitā, ne toki fokotuʻu foʻou ki he Kau Palesitenisī ʻo e Kau Fitungofulú mo e Kōlomu Hono Ua ʻo e Kau Fitungofulú, ʻo ne pehē ko e taha ia ʻe ngaahi taumuʻa ʻa e Kau Takí ke aʻusia ʻa e “tupulaki moʻoní” ʻi he Siasí. Naʻá ne pehē, “ʻOku ʻuhinga ia ke ʻikai ngata pē he toe tokolahi ange ʻa e kakai ʻoku omi ki he houalotu sākalamēnití, ka ke kau ai e maʻu ʻo e sākalamēnití, maʻu ʻo e ngaahi ouau ʻo e Siasí pea mo tauhi ʻenau ngaahi fuakavá.”
ʻI he fakaʻamu ʻa ʻEletā Kalisitā ke tokoni ki he kau taki fakalotofonua ʻo e Siasí he ngāue ko iá, ʻokú ne fakafetaʻi ai kuo ʻoange ʻe he ʻEikí ha ngaahi faingamālie kiate ia ke ne ngāue ai ʻi ha ngaahi uiuiʻi kehekehe. Naʻá ne pehē, “Kuó u aʻusia tonu e meʻa ʻoku aʻusia ʻe he kakai ʻoku ou ngāue fakataha mo iá—ʻa e kau palesiteni fakasiteikí mo e kau pīsopé pea mo e kau palesiteni ʻo e kōlomu kaumātuʻá—pea ʻoku ou fakatauange ʻe tokoni ia ke u toe ongoʻingofua ange ai ʻa ʻenau ngaahi fie maʻú.”
Naʻe ngāue fakafaifekau taimi kakato ʻa ʻEletā Kalisitā ʻi he Misiona ʻo e Ngaahi Siteiti ʻAtalanitiki Hahaké, pea kuó ne hoko ko ha palesiteni ʻo e kōlomu kaumātuʻá, palesiteni ngāue fakafaifekau ʻi he siteikí, tokoni palesiteni fakasiteiki, pīsope, palesiteni fakasiteiki, fakafofonga fakavahelahi, Fitungofulu Fakaʻēlia, palesiteni ʻo e Misiona Kānata Tolonitō Hahaké (2005–08), pea naʻá ne lolotonga hoko ko e Palesiteni ʻo e ʻĒlia Pasifikí he taimi naʻe uiuiʻi ai ia ki he Kau Palesitenisī ʻo e Kau Fitungofulú.
Naʻe fāʻeleʻi ʻa ʻEletā Kalisitā kia Liiti mo Nōlini Kalisitā ʻi Tīsema 1945, ʻi Keleniteili, Kalefōnia, USA, pea naʻe maʻu hono mataʻitohi fakatauhitohi mei he ʻUnivēsiti Pilikihami ʻIongí ʻi he 1968. Naʻá ne ʻosi mei he ʻapiako laó ʻi he ʻUnivēsiti Kalefōnia Losi ʻEniselesí ʻi he 1971. ʻI he 1972 naʻe maʻu ai hono mataʻitohi MA ʻi he Laó (LLM) ʻi he tafaʻaki ki he lao ʻo e tukuhaú mei he ʻUnivēsiti Niu ʻIoké. Naʻá ne ngāue fakalao mei he 1972 ki he 2005 pea kuó ne faʻu ha ngaahi tohi fekauʻaki mo e Fakaleleí pea mo e Hē mei he Moʻoní pea mo Hono Toe Fakafoki mai ʻo e Ongoongoleleí.
Naʻá ne mali mo Kefilini Luʻisa Sapoliti ʻi Tīsema 1968 ʻi he Temipale Losi ʻEniselesi Kalefōniá. ʻOku ʻi ai ʻena fānau ʻe toko ono.
Kuo ʻiloʻi ʻe ʻEletā Kalisitā e kau mai e toʻukupu ʻo e ʻEikí ki heʻene moʻuí. “ʻOku hulu fau e ʻofa ʻa e Fakamoʻuí pea ʻoku ou tui ʻokú Ne tatali mai mo ʻetau Tamai Hēvaní ke tāpuakiʻi kitautolu ʻi he kihiʻi lelei kotoa pē ʻoku tau faí, he ko Hona natulá ia.”